2 Kronika

29 Hizkiya+ zu fia esime wòxɔ ƒe blaeve vɔ atɔ̃, eye wòɖu fia ƒe blaeve vɔ asieke le Yerusalem. Dadaa ŋkɔe nye Abiya, Zakariya vinyɔnu.+ 2 Ewɔ nu si nyo le Yehowa ŋkume,+ abe ale si tɔgbuia David wɔ ene. + 3 Le eƒe fiaɖuɖu ƒe ƒe gbãtɔ ƒe ɣleti gbãtɔ me la, eʋu Yehowa ƒe aƒe la ƒe ʋɔtruawo, eye wòɖɔ wo ɖo.+ 4 Ena nunɔlawo kple Lewi viwo va, eye wokpe ta ɖe gbadzaƒe le ɣedzeƒe gome. 5 Eye wògblɔ na wo be: “Mi Lewi viwo, miɖo tom. Mikɔ mia ɖokuiwo ŋu,+ eye mikɔ Yehowa, mia tɔgbuiwo ƒe Mawu, ƒe aƒe la ŋu, eye miɖe nu makɔmakɔwo do goe le kɔkɔeƒe la.+ 6 Elabena mía fofowo mewɔ nuteƒe o, eye wowɔ nu si nye vɔ̃ le Yehowa mía Mawu la ŋkume.+ Wogblẽe ɖi, woɖe ŋku ɖa le Yehowa ƒe avɔgbadɔ la ŋu, eye wotrɔ ʋume dee.+ 7 Wodo akpata la ƒe ʋɔtruawo hã,+ eye wotsi akaɖigbɛawo.+ Womegadoa dzudzɔ ʋeʋĩ o,+ eye womegasaa numevɔwo+ na Israel ƒe Mawu la le kɔkɔeƒe la o. 8 Eya ta Yehowa ƒe dɔmedzoe va Yuda kple Yerusalem dzi,+ ale be wòwɔ wo wozu ŋɔdzinu kple nu wɔmoyaa kpakple nu si ŋu woalia aku ɖo,* abe ale si tututu miele ekpɔm kple miawo ŋutɔwo miaƒe ŋkuwo ene.+ 9 Eye kpɔ ɖa, mía tɔgbuiwo tsi yi nu,+ eye mía viŋutsuwo kple mía vinyɔnuwo kpakple mía srɔ̃wo yi aboyo me le esia ta.+ 10 Medi vevie tso dzi me be mabla nu kple Yehowa, Israel ƒe Mawu la,+ ne eƒe dziku helĩhelĩ si wòdo ɖe mía ŋu la nu nafa. 11 Azɔ la, vinyewo, miganɔ anyi ɖi ko o,* elabena miawoe Yehowa tia be miatɔ ɖe eŋkume, asubɔe+ ahado dzudzɔ ʋeʋĩ nɛ.”+

12 Eye Lewi viwo tso ɖe dɔa ŋu. Mahat, Amasai vi, kple Yoel, Azariya vi tso Kohat viwo+ dome; Kis, Abdi vi kple Azariya, Yehalel vi tso Merari viwo+ dome; Yoak, Zima vi kple Eden, Yoak vi tso Gerson viwo+ dome; 13 Simri kple Yeuel tso Elizafan viwo dome; Zakariya kple Mataniya tso Asaf+ viwo dome; 14 Yehiel kple Simei tso Heman+ viwo dome; eye Semaya kple Uziel tso Yedutun+ viwo dome. 15 Woƒo wo nɔviwo nu ƒu, eye wokɔ wo ɖokuiwo ŋu heva le fia la ƒe sedede kple Yehowa ƒe nya nu, be woakɔ Yehowa ƒe aƒe la ŋu.+ 16 Eye nunɔlawo va Yehowa ƒe aƒe la me be woakɔ eŋu, eye woɖe nu makɔmakɔ ɖe sia ɖe si wokpɔ le Yehowa ƒe gbedoxɔa me la do goe va Yehowa ƒe aƒe la ƒe xɔxɔnu.+ Eye Lewi viwo xɔ wo helɔ wo yi Kidron-tɔʋu+ la nu. 17 Ale wode asi gbedoxɔa ŋu kɔkɔ me le ɣleti gbãtɔ ƒe ŋkeke gbãtɔ dzi, eye le ɣletia ƒe ŋkeke enyilia dzi la, wova ɖo Yehowa ƒe akpata la me.+ Wokɔ Yehowa ƒe aƒe la ŋu ŋkeke enyi, eye wowu enu le ɣleti gbãtɔ ƒe ŋkeke wuiadelia dzi.

18 Emegbe wova Fia Hizkiya gbɔ gblɔ be: “Míekɔ Yehowa ƒe aƒe blibo la katã ŋu: numevɔsamlekpui+ la kple eŋu dɔwɔnuawo+ katã, kplɔ̃ si dzi woɖoa abolowo ɖo ɖe wo nɔewo dzi*+ kple eŋu dɔwɔnuawo katã. 19 Eye míedzra dɔwɔnu siwo katã Fia Ahaz ɖe ɖa, siwo ŋu dɔ womegawɔna le eƒe fiaɖuɣi o esime wògbe nuteƒewɔwɔ+ la ɖo hekɔ wo ŋu,+ eye wole Yehowa ƒe vɔsamlekpui la ŋgɔ.”

20 Fia Hizkiya fɔ ŋdi kanya heƒo dumegãwo nu ƒu, eye woyi Yehowa ƒe aƒe la me. 21 Wotsɔ nyitsu adre, agbo adre, alẽtsui adre kple gbɔ̃tsu adre vɛ be woatsɔ asa nuvɔ̃vɔ ɖe fiaɖuƒe la kple kɔkɔeƒe la kpakple Yuda ta.+ Eya ta egblɔ na nunɔla siwo nye Aron ƒe dzidzimeviwo be woatsɔ wo asa vɔ le Yehowa ƒe vɔsamlekpui la dzi. 22 Wowu nyiawo,+ eye nunɔlawo tsɔ ʋu la hlẽ ɖe vɔsamlekpui+ la ŋu; emegbe wowu agboawo, eye wohlẽ ʋu la ɖe vɔsamlekpui la ŋu, eyome wowu alẽtsuiawo, eye wohlẽ ʋu la ɖe vɔsamlekpui la ŋu. 23 Azɔ wokplɔ nuvɔ̃vɔsa ƒe gbɔ̃tsuawo va fia la kple ha la ŋkume, eye wotsɔ woƒe asiwo da ɖe wo dzi. 24 Eye nunɔlawo wu wo, eye wotsɔ woƒe ʋu kɔ ɖe vɔsamlekpui la dzi tsɔ sa nuvɔ̃vɔe, ne woalé avu ɖe Israel blibo la katã ta, elabena Israel blibo la katã tae fia la gblɔ be woasa numevɔ la kple nuvɔ̃vɔ la ɖo.

25 Ena Lewi viwo va tɔ ɖe Yehowa ƒe aƒe la me, eye gakogoewo, kasaŋkuwo kple saŋkuwo+ le wo si, abe ale si David+ kple fia ƒe ŋutegakpɔla Gad+ kpakple nyagblɔɖila Natan+ ɖoe ene, elabena Yehowa ye de se la to eƒe nyagblɔɖilawo dzi. 26 Lewi viwo le tsitrenu kple David ƒe haƒonuawo, eye nunɔlawo hã lé kpẽawo+ ɖe asi.

27 Eyome Hizkiya gblɔ be woasa numevɔ la le vɔsamlekpuia dzi.+ Esi wodze numevɔa sasa gɔme la, Yehowa ƒe ha kple kpẽawo de asi ɖiɖi me, eye wokua kpẽawo wòsɔna ɖe Israel-fia David ƒe hadzinuawo ƒe ɖiɖi dzi. 28 Eye dukɔ blibo la katã bɔbɔa ta esime ha la kple kpẽawo le ɖiɖim—wole edzi alea va se ɖe esime wowu numevɔsa la nu. 29 Esi wowu numevɔsaa nu ko la, fia la kple ame siwo katã le egbɔ la bɔbɔ tsyɔ mo anyi. 30 Eye Fia Hizkiya kple amegãwo gblɔ na Lewi viwo be woatsɔ David+ kple ŋutegakpɔla Asaf+ ƒe nyawo akafu Yehowa. Eya ta wode asi ekafukafu me kple dzidzɔ, eye wobɔbɔ tsyɔ mo anyi.

31 Eye Hizkiya gblɔ be: “Esi woɖe mi ɖe vovo azɔ na Yehowa la, mite va ne miatsɔ vɔsawo kple akpedavɔsawo va Yehowa ƒe aƒe la me.” Eye ha la de asi vɔsaawo kple akpedavɔsaawo tsɔtsɔ vɛ me, eye ame sia ame si lɔ̃ tso dzi me faa la tsɔ numevɔsawo vɛ.+ 32 Numevɔsa siwo ameha la tsɔ vɛ la ƒe xexlẽme le nyi blaadre, agbo alafa ɖeka, alẽtsui alafa eve—wotsɔ nu siawo katã vɛ be woatsɔ asa numevɔ na Yehowa+— 33 eye nunana kɔkɔeawo hã le nyi alafa ade kple alẽ akpe etɔ̃. 34 Ðeko nunɔlawo mede ha be woaɖe ayi le numevɔsalãawo katã ŋu o, eya ta wo nɔvi Lewi viwo kpe ɖe wo ŋu,+ va se ɖe esime dɔa wu enu, eye nunɔlawo te ŋu kɔ wo ɖokuiwo ŋu,+ elabena Lewi viwo tsia dzi ɖe wo ɖokuiwo ŋuti kɔkɔ ŋu* wu nunɔlawo. 35 Azɔ hã, numevɔsaawo+ sɔ gbɔ, nenema kee nye ŋutifafavɔsawo+ ƒe amiwo hã, eye numevɔsawo ŋuti nunovɔsawo+ hã sɔ gbɔ. Ale wogaɖo Yehowa ƒe aƒe la me subɔsubɔdɔa te. 36 Eya ta Hizkiya kple dukɔ blibo la katã kpɔ dzidzɔ ɖe nu siwo Mawu vavã la wɔ na dukɔa ŋu,+ elabena wowɔ nu siawo katã le ɣeyiɣi kpui aɖe me.