1 Korintotɔwo

16 Ke le nudzɔdzɔ si woaɖo ɖe ame kɔkɔeawo ŋuti la,+ miwɔ ɖe mɔfiame siwo mena hame siwo le Galatia la dzi. 2 Le kwasiɖa ɖe sia ɖe ƒe ŋkeke gbãtɔ dzi la, mia dometɔ ɖe sia ɖe nadzra nane ɖo le eƒe ŋutete nu, ale be mahiã be mava ɖo hafi miadzɔ nu o. 3 Ke ne meva ɖo la, madɔ ŋutsu siwo dzi mieda asi ɖo le miaƒe agbalẽawo me+ la be woatsɔ miaƒe dɔmenyonunana la ayi Yerusalem. 4 Gake ne esɔ be nye hã mayi la, ekema woayi kplim.

5 Ke ne metso Makedonia la, mava mia gbɔ, elabena Makedonia+ to ge mele; 6 eye ɖewohĩ manɔ mia gbɔ vie, alo matsi mia gbɔ le vuvɔŋɔli la gɔ̃ hã, ale be miaɖom ɖa vie ne mayi afi si wòle be magayi. 7 Nyemedi be makpɔ mi fifia ne metso eme va yina o, elabena mele mɔ kpɔm be ne Yehowa* ɖe mɔ la, mava nɔ mia gbɔ vie.+ 8 Ke manɔ Efeso+ va se ɖe Pentekoste Ŋkekenyui la dzi, 9 elabena woʋu dɔwɔwɔ ƒe ʋɔtru gã aɖe nam,+ gake tsitretsiɖeŋula geɖewo li.

10 Ne Timoteo+ va ɖo la, mikpɔ egbɔ be vɔvɔ̃ nagaɖoe le mia dome o, elabena Yehowa* ƒe dɔ wɔmee wòle+ abe nye ke ene. 11 Eya ta ame aɖeke megado vloe o. Mikplɔe ɖo ɖa le ŋutifafa me, ne wòava gbɔnye afi sia, elabena mele eya kple nɔviawo lalam.

12 Ke le mía nɔvi Apolo+ ŋuti la, meɖe kuku nɛ vevie be eya kple nɔviawo nava mia gbɔ. Gake meɖoe be yeava mia gbɔ fifia o, ke ne ekpɔ asinu la, ava.

13 Minɔ ŋudzɔ,+ minɔ tsitre sesĩe le xɔse la me,+ miwɔ ŋutsu,+ misẽ ŋu.+ 14 Miwɔ miaƒe nuwo katã le lɔlɔ̃ me.+

15 Ke mele nu xlɔ̃m mi, nɔviwo: Mienyae be Stefana ƒe aƒe lae nye kutsetse gbãtɔ le Akaya, eye wotsɔ wo ɖokuiwo ɖo anyi hena ame kɔkɔewo subɔsubɔ. 16 Miawo hã miyi edzi miabɔbɔ mia ɖokui na ame siawo tɔgbi kple ame siwo katã le asi kpem ɖe dɔa ŋu aduadu hele kutri kum.+ 17 Ke mekpɔ dzidzɔ le Stefana,+ Fortunato kple Akaiko ƒe anyinɔnɔ ŋuti, elabena esi miele afi sia o la, woxɔ ɖe mia teƒe. 18 Elabena wofa akɔ na nye gbɔgbɔ kple miawo hã mia tɔ. Eya ta mikpɔ ŋudzedze ɖe ame siawo tɔgbi ŋu.

19 Hame siwo le Asia la do gbe na mi. Akwila kple Priskila* kpakple hame si le woƒe aƒe me+ la do gbe na mi vevie le Aƒetɔ la me. 20 Nɔviawo katã do gbe na mi. Mitsɔ nugbugbɔ kɔkɔe do gbe na mia nɔewo.

21 Nye Paulo ƒe gbedoname, si metsɔ nye ŋutɔ nye asi ŋlɔ lae nye esi.

22 Ne ame aɖe melɔ̃ Aƒetɔ la o la, neɖi eŋu kpékpekpe. Oo, mía Aƒetɔ, va! 23 Mía Aƒetɔ Yesu ƒe amenuveve nanɔ kpli mi. 24 Nye lɔlɔ̃ nanɔ kpli mi katã le Kristo Yesu me.