Dɔwɔwɔwo

23 Paulo nɔ Sanhedrin la me tɔwo kpɔm tututu eye wògblɔ be: “Ŋutsuwo, nɔviwo, metsɔ dzitsinya si ŋuti kɔ bliboe+ zɔ le Mawu ŋkume va se ɖe egbe sia.” 2 Esi wògblɔ esia la, nunɔlagã Anania ɖe gbe na ame siwo tɔ ɖe egbɔ la be woaƒo nugbɔ nɛ. 3 Eye Paulo gblɔ nɛ be: “Mawu aƒo wò, wò, gli si wosi akalo na. Ðe nènɔ anyi be yeadrɔ̃ ʋɔnum le Se la nu, evɔ nègale Se la dzi dam esi nèɖe gbe be woaƒoma?” 4 Ame siwo tɔ ɖe afi ma la gblɔ nɛ be: “Mawu ƒe nunɔlagã la dzum nèlea?” 5 Eye Paulo gblɔ be: “Nɔviwo, nyemenya be nunɔlagãe wònye o. Elabena woŋlɔ ɖi be, ‘Mègagblɔ nya vlo aɖeke ɖe wò dukɔdziɖula ŋu o.’ ”+

6 Ke esi Paulo de dzesii be akpa ɖeka nye Zadukitɔwo, eye akpa evelia nye Farisitɔwo la, egblɔ sesĩe le Sanhedrin la be: “Ŋutsuwo, nɔviwo, Farisitɔ+ kple Farisitɔwo ƒe vi menye. Ame kukuwo ƒe tsitretsitsi ŋuti mɔkpɔkpɔ la tae wole ʋɔnu drɔ̃mem ɖo.” 7 Esi wògblɔ esia la, nyaʋiʋli ɖo Farisitɔwo kple Zadukitɔwo dome, eye ameha la dome ma. 8 Elabena Zadukitɔwo gblɔna be tsitretsitsi loo, alo mawudɔla, alo gbɔgbɔ aɖeke meli o, ke Farisitɔwo ya xɔ edzi se* be wo katã woli.+ 9 Eya ta ɣli ɖi hoo, eye agbalẽfiala siwo le Farisitɔwo ƒe akpa dzi la tso, eye wote nyahehe dzikutɔe be: “Míekpɔ vɔ̃ aɖeke le ame sia ŋu o, gake ne gbɔgbɔ aɖe alo mawudɔla aɖee ƒo nu nɛ+ la, . . .” 10 Azɔ esi nyaʋiʋli la nu va sẽ ɖe edzi la, aʋafiagã la vɔ̃ be woava vuvu Paulo, eye wòɖe gbe be asrafoawo nayi aɖahee tso wo dome, ne woakplɔe ava asrafowo nɔƒe la.

11 Ke le zã si kplɔe ɖo me la, Aƒetɔ la va tsi tsitre ɖe egbɔ, eye wògblɔ nɛ be: “Lé dzi ɖe ƒo!+ Elabena ale si ko nèle ɖase ɖim tsitotsito le ŋunye le Yerusalem la, nenema kee nàɖi ɖase le Roma hã.”+

12 Esi ŋu ke la, Yudatɔwo ɖo nugbe heka atam be, ne yewomewu Paulo o kpaa, yewomaɖu nu alo ano nu o. 13 Ame siwo ɖo nugbe heka atam alea la sɔ gbɔ wu ame blaene. 14 Ame siawo yi nunɔlawo ƒe tatɔwo kple amegãwo gbɔ gblɔ be: “Míeka atam be ne míewu Paulo o kpaa, míade naneke nu me o. 15 Eya ta mi kple Sanhedrin la mina aʋafiagã la nanya be yewodi be wòakplɔe ava yewo gbɔ, abe ɖe miedi be yewoaku eƒe nya la me tsitotsito wu ene. Gake hafi wòava ɖo afii la, míanɔ klalo awui.”

16 Ke Paulo ƒe nyruiyɔviŋutsu aɖe se ale si wole eɖom be yewoade xa ɖi nɛ la, eye wòge ɖe asrafowo nɔƒe la heva fi tofi na Paulo. 17 Eye Paulo yɔ asrafomegãwo dometɔ ɖeka va egbɔ gblɔ nɛ be: “Kplɔ ɖekakpui sia yi aʋafiagã la gbɔ, elabena nya aɖe le esi wòagblɔ nɛ.” 18 Eya ta ekplɔe yi aʋafiagã la gbɔ, eye wògblɔ be: “Gamenɔla Paulo yɔm eye wòbia tso asinye be makplɔ ɖekakpui sia ava gbɔwò, elabena nya aɖe le esi na wò.” 19 Aʋafiagã la lé eƒe alɔnu, eye wòkplɔe ɖe kpɔe hebiae be: “Nya kae nèdi be yeagblɔ nam?” 20 Egblɔ nɛ be: “Yudatɔwo ɖo tame be yewoabia be nàkplɔ Paulo ava Sanhedrin la etsɔ, abe ɖe wole didim be yewoaku eƒe nyaa me tsitotsito wu tsã ene.+ 21 Gake mègalɔ̃ ɖe edzi na wo o, elabena wo dometɔ siwo wu blaene de xa ɖi nɛ, eye woka atam be, yewomaɖu nu alo ano nu o va se ɖe esime yewowui hafi;+ eye azɔ wole klalo hele mɔ kpɔm be nàlɔ̃ aɖoe ɖa.” 22 Eya ta aʋafiagã la do mɔ ɖekakpuia, gake ede se nɛ be: “Mègagblɔe na ame aɖeke be yegblɔ nya siawo nam o.”

23 Eye wòyɔ asrafomegãwo dometɔ eve gblɔ na wo be: “Mina asrafo alafa eve kple sɔdola blaadre kpakple akplɔtsɔla alafa eve nadzra ɖo ne woayi Kaisarea le zã ƒe gaƒoƒo etɔ̃lia* dzi. 24 Midi sɔwo hã na Paulo ne wòado ne miakplɔe ayi na nutodziɖula Felike dedie.” 25 Eye wòŋlɔ agbalẽ si me nyawo yi ale:

26 “Nye, Klaudio Lisia ye le agbalẽ sia ŋlɔm na Bubutɔ Nutodziɖula Felike: Medo gbe na wò! 27 Yudatɔwo lé ŋutsu sia, eye wode ewu ge kloe, ke mewɔ kaba kplɔ nye asrafowo hexɔ nɛ,+ elabena mese be Romatɔe wònye.+ 28 Esi medi be manya nu si ta wole enu tsom ɖo ta la, mekplɔe yi woƒe Sanhedrin la.+ 29 Mekpɔe be woawo ŋutɔwo ƒe Se+ la ŋu nyaʋiʋliwo tae wotso enu ɖo, gake nutsotsoawo dometɔ aɖeke mefia be edze ku alo dze na gamenɔnɔ o. 30 Ke esi wova fi tofi nam be wole nugbe ɖom ɖe ŋutsu sia ŋu+ ta la, mele eɖom ɖe wò enumake, eye mana enutsolawo nava gblɔ nya siwo wotsɔ ɖe eŋu la le ŋkuwòme.”

31 Ale asrafo siawo kplɔ Paulo+ yi Antipatris le zã me abe ale si wode se na wo ene. 32 Esi ŋu ke la, wona sɔdolawo yi mɔzɔzɔa dzi kplii, ke asrafoawo ya trɔ gbɔ va asrafowo nɔƒea. 33 Sɔdolaawo va ɖo Kaisarea, wotsɔ agbalẽ la na nutodziɖula la, eye wokplɔ Paulo hã de esi. 34 Exlẽ agbalẽa, eye wòbia be nuto ka mee wòtso hã, eye wòva nya be etso Kilikia.+ 35 Egblɔ nɛ be: “Ne nuwòtsolawo hã va ɖo+ la, ekema mase nya siwo katã le asiwò.” Eye wòde se be woadzɔ eŋu le Herodes ƒe fiasã la me.