Dɔwɔwɔwo
14 Ke Paulo kple Barnaba yi Yudatɔwo ƒe ƒuƒoƒe le Ikonio, eye woƒo nu nyuie ale gbegbe be Yudatɔwo kple Helatɔwo ƒe ha gã aɖe va zu xɔsetɔwo. 2 Gake Yudatɔ siwo mexɔe se o la gblẽ to na dukɔwo me tɔwo, eye woƒoe ɖe ameawo* nu wotsi tsitre ɖe nɔviawo ŋu.+ 3 Ke wonɔ afi ma ɣeyiɣi didi aɖe, eye Yehowa* do ŋusẽ wo woƒo nu dzinɔameƒotɔe, eye wòto wo dzi na wowɔ dzesiwo kple nukunuwo tsɔ ɖi ɖase le eƒe nya kple amenuveve la ŋu.+ 4 Ke ameha la dome ma le dua me; wo dometɔ aɖewo de Yudatɔwo dzi, eye bubuawo de apostoloawo dzi. 5 Esi dukɔwo me tɔwo kple Yudatɔwo kpakple woƒe dziɖulawo siaa ɖoe be yewoado vlo wo ahaƒu kpe wo+ la, 6 wosee eye wosi yi Likaonia du siwo nye Listra, Derbe kple nuto siwo ƒo xlã wo la me.+ 7 Ale woyi edzi gblɔ nya nyui la le afi ma.
8 Ke ŋutsu aɖe le Listra le anyinɔƒe, si nye tekunɔ. Enye tekunɔ tso dadaa ƒe dɔ me, eye mezɔ azɔli kpɔ o. 9 Ŋutsu sia nɔ to ɖom esi Paulo nɔ nu ƒom. Paulo nɔ ŋku lém ɖe eŋu tututu, eye esi wòkpɔ be xɔse le esi be woayɔ dɔe+ la, 10 egblɔ kple gbe sesẽ be: “Tso nàtsi tsitre ɖe wò afɔwo dzi.” Eye ŋutsua ti kpo hede asi azɔlizɔzɔ me.+ 11 Esi amehawo kpɔ nu si Paulo wɔ la, wodo ɣli gblɔ le Likaoniagbe me be: “Mawuwo trɔ zu amegbetɔwo heɖi va mía gbɔ!”+ 12 Eye wona ŋkɔ Barnaba be Zeus, ke wona ŋkɔ Paulo ya be Hermes, elabena eyae xɔa ŋgɔ le nuƒoƒo me. 13 Eye Zeus si ƒe gbedoxɔ le dua ƒe dodonu la ƒe nunɔla tsɔ nyitsuwo kple seƒoƒotsihewo va dua ƒe agbo nu, eye wòdi be ye kple amehaawo yewoasa vɔ.
14 Ke esi apostolo Barnaba kple Paulo see la, wodze woƒe awuwo, eye woƒu du ɖo ameha la dome gblɔ kple ɣli be: 15 “Ŋutsuwo, nu ka tae miele nu siawo wɔm? Amegbetɔ siwo ŋu gbɔdzɔgbɔdzɔwo le koe míawo hã míenye abe miawo ke ene.+ Eye nya nyui la gblɔm míele na mi, be miatrɔ tso nu dzodzro siawo gbɔ ava Mawu gbagbe si wɔ dziƒo kple anyigba kple atsiaƒu kpakple wo me nuwo katã la gbɔ.+ 16 Le dzidzime siwo va yi me la, eɖe mɔ na dukɔwo katã be woazɔ woawo ŋutɔwo ƒe mɔwo dzi,+ 17 togbɔ be medzudzɔ ɖaseɖiɖi le eɖokui ŋu hafi o,+ elabena ewɔa nyui na mi, enaa tsidzadza mi tso dziƒo eye wònaa nukuwo wɔna le wo wɔɣi,+ eye wòtsɔa nuɖuɖu kple dzidzɔ yɔa miaƒe dziwo me fũu.”+ 18 Togbɔ be wogblɔ nya siawo hã la, bebli hafi woxe mɔ na amehaawo be womesa vɔ na wo o.
19 Ke Yudatɔwo tso Antiokia kple Ikonio va, eye woƒoe ɖe amehaawo nu+ woƒu kpe Paulo, eye wohee do goe le dua me, elabena wosusu be eku.+ 20 Ke esi nusrɔ̃lawo va ƒo xlãe la, etso eye wòyi ɖe dua me. Esi ŋu ke la, eya kple Barnaba wodzo yi Derbe.+ 21 Esi wogblɔ nya nyui la na dua me tɔwo hewɔ nusrɔ̃la geɖewo vɔ la, wotrɔ yi Listra kple Ikonio kple Antiokia. 22 Le afi ma la, wodo ŋusẽ nusrɔ̃laawo*+ hede dzi ƒo na wo be woayi edzi anɔ xɔse la me, eye wogblɔ na wo be: “Xaxa geɖewo me to ge míala hafi ayi ɖe Mawu Fiaɖuƒe la me.”+ 23 Woɖo hamemetsitsiwo hã na wo le hame ɖe sia ɖe me,+ eye esi wotsi nu dɔ hedo gbe ɖa+ la, wotsɔ wo de Yehowa,* ame si dzi woxɔ se la, si me.
24 Eyome woyi ɖato Pisidia heva Pamfilia,+ 25 eye esi wogblɔ nya la le Perga vɔ la, wotso eme yi Atalia. 26 Tso afi ma woɖo tɔdziʋu va Antiokia. Afi siae wobia Mawu ƒe amenuveve na wo le tsã hena dɔ si nu wowu fifia+ la.
27 Esi wova ɖo, eye woƒo hamea nu ƒu la, wogblɔ nu siwo katã Mawu wɔ to wo dzi la na wo, be eʋu xɔse ƒe ʋɔtru la na dukɔwo me tɔwo.+ 28 Ale wonɔ nusrɔ̃lawo gbɔ eteƒe didi.