Mena Ta O
LE October 5, 1995, dzi la, wowɔ dɔ na Matt Tapio si xɔ ƒe 14 be woaɖe nane si te ahɔhɔ̃ ƒe akpa si tsiã kple dzimeƒu me nɛ. Enye nutete si wua ame. Esia nye amekoko gbogbo siwo me wòato le ƒe eve kple afã siwo gbɔna me la dometɔ gbãtɔ. Emegbe woawɔ kansa dɔlékuiwutike kple keklẽŋusẽ sẽŋuwo ƒe dɔdamɔnuwo nɛ.
Matt nɔ Michigan, U.S.A., afisi wòdena dziɖuɖusuku kple Kristotɔwo ƒe kpekpewo le. Ezã mɔnukpɔkpɔwo tsɔ ƒo nu na eƒe nufialawo kple sukuhatiwo le eƒe dzixɔsewo ŋuti eye wòkpɔ gome le amewo gbɔ yiyi le dutoƒo subɔsubɔdɔa hã me. Le eƒe kɔdziyiyi edziedziawo me la, ena Biblia-srɔ̃gbalẽ alafa geɖe amesiwo wòdoa goe le afima—etsɔ eƒe agbenɔƒe eve kple afã mamlɛawo dome ɣleti 18 nɔ kɔdzii.
Zi geɖe la, edzena abe ɖe Matt matsi agbe o ene, gake ɖeko wòtoa eme dona. Esi wokplɔe yina ɖe kɔadzi ɣeaɖeɣi la, eku ƒenyi eye meganɔ gbɔgbɔm o. Enumake wogbɔ ya ɖe eƒe dzitodzitowo me be eƒe dzitodzito kple dzi nagawɔ dɔ, eye wògbɔ agbe. Esi eƒe mo kɔ la, ewó avi kple ɣli be: “Aʋakalẽtɔe menye! Aʋakalẽtɔe menye! Nyemenye amesi naa ta bɔbɔe o!” Amewo gblɔ be Matt ƒe Mawu dzixɔsee na be wònɔ agbe ɣeyiɣi didi ma.
Nusi dzroa Matt vevie la va eme nɛ le January 13, 1996, dzi esime wòxɔ nyɔnyrɔ tsɔ ɖo kpe eƒe adzɔgbeɖeɖe na Yehowa Mawu dzii. Exɔ nyɔnyrɔa le ta si wowɔ na eya ɖeka ko, le vɔvɔ̃ na dɔxɔleameŋu ta la me. Le ŋkeke ʋee aɖewo megbe la, egatrɔ yi ɖe kɔadzi be woagawɔ dɔ nɛ ake. Le August 1997 me la, Matt ɖe nu tsiã ɖe enu kwasiɖa geɖe, gake esi wogawɔ dɔ nɛ megbe la, ŋusẽ gaɖo eŋu.
Le esiawo katã me la, Matt gakpɔtɔ doa nukokoe na amewo henɔa hatse kam kple ɖɔktawo kpakple dɔnɔdzikpɔlawo. Womete ŋu se nusitae wòte ŋu doa nukokoe na amewo nenema la gɔme o. Ðɔktawo dometɔ ɖeka gblɔ nɛ be: “Matt, nenye nyee nye wò la, ɖe mana woahe xɔmetsovɔ atsyɔ nye abati ŋkume atsyɔ avɔ ta agblɔ be ame aɖeke megate ɖe ŋunye o.”
Le February 1998 me la, Matt gbɔ va aƒeme mlɔeba tso kɔadzi le eƒe yiyi siwo nye mamlɛtɔwo dometɔ ɖeka me. Dzi dzɔe ale gbegbe be yegale agbe gbɔ va aƒeme ale be esi wòge ɖe xɔa me la, egblɔ be: “Dzi le dzɔyem ale gbegbe! Mina míado gbe ɖa.” Enumake edo gbe ɖa na Yehowa tsɔ gblɔ eƒe dzidzɔkpɔkpɔa nɛ. Le dzinu eve megbe, le April 19 lia dzi la, kansa la wui.
Do ŋgɔ la, woƒo nya aɖewo siwo wobia Matt helé ɖe mɔ̃ dzi la le Yehowa Ðasefowo ƒe kpekpe aɖe me le wo gbɔ Fiaɖuƒe Akpata me. Wobiae be: “Nukae nàdi be yeagblɔ na mí amesiwo ŋu ŋusẽ vi aɖe le la tso míaƒe subɔsubɔdɔa kple Kristotɔwo ƒe kpekpewo ŋuti?”
Matt ɖo eŋu be: “Miwɔ nusi miate ŋui la fifia. . . . Miate ŋu anya nusi ava dzɔ o. . . . Gake nuka ke ɖadzɔ o, migadzudzɔ ɖaseɖiɖi tso Yehowa ŋu gbeɖegbeɖe o.”