Ta 6

Ŋugbedodovi La

LE ESI teƒe be Yosef kple Maria natrɔ ayi ɖe Nazaret la, wotsi Betlexem. Eye esi Yesu xɔ ŋkeke enyi la, wotso aʋa nɛ abe alesi Mawu ƒe Se si wòde na Mose gblɔe ene. Edze abe ɖe wònye kɔnu be woatsɔ ŋkɔ na ŋutsuvi le ŋkeke enyiagbe ene. Eyata wotsɔ ŋkɔ na wo vi la be Yesu, abe alesi mawudɔla Gabriel gblɔ na wo do ŋgɔ ene.

Ede ɣleti ɖeka va yi, eye Yesu xɔ ŋkeke 40. Afikae edzilawo kɔe yi fifia? Wokɔe yi ɖe Yerusalem gbedoxɔ si didi tso afisi wole la gbɔ agbadroƒe ʋee aɖewo ko la me. Le Mawu ƒe Se si wòde na Mose nu la, wobia tso vidada si be wòana ŋutikɔklɔ ƒe nunana le gbedoxɔa me ne edzi ŋutsuvi wòxɔ ŋkeke 40.

Nu mae Maria wɔ. Gake etsɔ xevi sue eve yii abe nunana ene. Esia ɖe nane fia ku ɖe Yosef kple eƒe ganyawo ŋu. Mose ƒe Sea fia be ele be woana agbovi si xɔ asi wu xewo. Gake ne vidada mate ŋu ana esia o la, ate ŋu ana akpakpa eve alo ahɔne eve.

Le gbedoxɔa me la, amegã ɖeɖi aɖe xɔ Yesu ɖe asi. Eŋkɔe nye Simeon. Mawu ɖee fiae be akpɔ Kristo alo Mesia si ŋugbe yedo la hafi aku. Esi Simeon va gbedoxɔa me le ŋkeke sia dzi la, gbɔgbɔ kɔkɔea fia ɖevi si Yosef kple Maria lé ɖe asi lae.

Esi Simeon xɔ Yesu ɖe asi la, eda akpe na Mawu gblɔ be: “Aƒetɔ, azɔ èdo mɔ wò dɔla le ŋutifafa me le wò nya la nu; elabena nye ŋkuwo kpɔ wò xɔxɔ, si nèdzra ɖo ɖe dukɔwo katã ƒe ŋku me; kekeli ƒe nyaɖeɖefia na trɔ̃subɔlawo kple wò dukɔ Israel ƒe ŋutikɔkɔe.”

Esi Yosef kple Maria wose esia la, ewɔ mo yaa na wo. Tete Simeon yra wo eye wògblɔ na Maria bena “woɖo [via] anyi na ame geɖewo ƒe anyidzedze kple tsitretsitsi le Israel” eye be nuxaxa atɔ Maria ƒe luʋɔ abe yi ɖaɖɛ ene.

Hana, nyɔnu nyagblɔɖila si xɔ ƒe 84 la nɔ anyi gbemagbe. Le nyateƒe me la, medzona le gbedoxɔa me o. Le gaƒoƒo ma tututu me la, ete ɖe wo ŋu eye wòdze akpe dada na Mawu kple nu ƒoƒo tso Yesu ŋuti na amesiwo katã aɖo toe.

Aleke gbegbe gbedoxɔ me nudzɔdzɔ siawo na Yosef kple Maria kpɔ dzidzɔe nye si! Kakaɖedzitɔe la, esiawo katã ɖo kpe edzi be ɖevi la nye Amesi Ŋugbe Mawu Do. Luka 2:21-38; Mose III, 12:1-8.

▪ Anɔ eme be ɣekaɣie wònye kɔnu be woatsɔ ŋkɔ na ɖevi ne Israel-viwo dzi ŋutsuvi?

▪ Nukae wobia tso Israel-vidada si nenye be viaŋutsuvi xɔ ŋkeke 40, eye aleke wɔwɔ ɖe nudidi sia dzi ɖe Maria ƒe ganyawo ƒe nɔnɔme fiae?

▪ Amekawoe kpɔ amesi Yesu nye la dze sii le ŋkeke sia dzi, eye aleke woɖee fiae?