TA 38

Nusita Wòle Be Míalɔ̃ Yesu

TSƆE be yele tɔdziʋu aɖe si le nyɔnyrɔm me. Àdi be ame aɖe nava ɖe ye atso emea?— Ke ne ame aɖe tsɔ eya ŋutɔ ƒe agbe na ɖe tawò tsɔ ɖe wò tso eme ɖe?— Emae nye nusi Yesu Kristo wɔ. Abe alesi míesrɔ̃e le Ta 37 lia me ene la, etsɔ eƒe agbe xe tafee ɖe mía ta be míate ŋu akpɔ ɖeɖe.

Ele eme baa be menye tsiléame mee Yesu ɖe mí tsoe ya o. Ke nuka mee wòɖe mí tsoe? Èɖo ŋku edzia?— Eɖe mí tso nuvɔ̃ kple ku si míexɔ tso Adam gbɔ la me. Togbɔ be ame aɖewo wɔ nuvɔ̃ gãwo hã la, Yesu ku ɖe woawo hã ta. Ðe nàtsɔ wò agbe ade ku me be nàtsɔ aɖe ame mawo tɔgbea?—

Biblia gblɔ be: “Bebli hafi ame aɖe aku ɖe ame dzɔdzɔe aɖe ta; ame nyui la, ɖewohĩ ame aɖe ado dzi aku ɖe eta.” Gake Biblia ɖe eme be Yesu ‘ku ɖe ame mavɔ̃mawuwo ta.’ Amesiwo mesubɔa Mawu o gɔ̃ hã le eme! Biblia gblɔ kpee be: “Esime míeganye nuvɔ̃wɔlawo la, Kristo ku ɖe mía ta.”—Romatɔwo 5:6-8.

Àte ŋu aɖo ŋku apostolo aɖe si wɔ nuvɔ̃ gãwo tsã la dzia?— Apostolo ma ŋlɔ be: ‘Kristo Yesu va xexeame be wòava ɖe nuvɔ̃wɔlawo. Amesiwo dome menye gãtɔ le.’ Apostolo si gblɔ nya mae nye Paulo. Egblɔ be tsã la yenye ‘ame manyanu’ eye be yenɔ ‘nuvɔ̃ me.’—Timoteo I, 1:15; Tito 3:3.

Wò ya bu alesi gbegbe Mawu ƒe lɔlɔ̃ loloe be wòdɔ Via ɖo ɖa be wòava ku ɖe amesiawo tɔgbe ta ŋu kpɔ! Tsɔ wò Biblia míaxlẽ nu tso esia ŋu le Yohanes ta 3, kpukpui 16. Wogblɔ le afima be: “Ale gbegbe Mawu lɔ̃a xexeame [si nye, amesiwo le anyigba dzi] bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.”

Yesu ɖee fia be yelɔ̃ mí abe alesi Fofoa lɔ̃ míi ene. Ðewohĩ àɖo ŋku edzi be le agbalẽ sia ƒe Ta 30 lia me la, míexlẽ nu tso fu siwo Yesu kpe le zã si wolée me la dometɔ aɖewo ŋu. Wokplɔe yi ɖe Nunɔlagã Kayafa ƒeme, afisi wodrɔ̃ ʋɔnu Eyama le. Wokplɔ aʋatsoɖaseɖilawo vɛ be woava gblɔ alakpanyawo ɖe Yesu ŋu, eye amewo tu kɔe. Ɣemaɣie Petro sẽ nu be yemenya Yesu o. Azɔ na míatsɔe be míele eteƒe le afima tututu le nusiwo dzɔ kplɔe ɖo la teƒe kpɔm.

Ŋu ke azɔ. Yesu nɔ ŋu zã bliboa katã. Esi ʋɔnu si nunɔlawo ɖi le zã me mesɔ le se nu o ta la, wowɔ kaba yɔ Sanhedrin, alo Yudatɔwo ƒe ʋɔnudrɔ̃ƒe kɔkɔtɔ, be woagadrɔ̃ ʋɔnu bubui. Le afisia hã wogatso Yesu nu be ewɔ nusiwo tsi tre ɖe Mawu ŋu.

Eyome nunɔlawo na wobla Yesu hekplɔe yi ɖe Roma mɔmefia Pilato ŋkumee. Wogblɔ na Pilato be: ‘Yesu tsi tre ɖe dziɖuɖua ŋu. Ele be woawui.’ Gake Pilato kpɔe dze sii be aʋatso kam nunɔlawo le ɖe esi. Eyata Pilato gblɔ na wo be: ‘Nyemekpɔ vodada aɖeke le amesia ŋu o. Maɖe asi le eŋu wòadzo.’ Gake nunɔlawo kple ame bubuawo do ɣli be: ‘Gbeɖe! Wui!’

Emegbe Pilato gadze agbagba gblɔe na ameawo ake be yeaɖe asi le Yesu ŋu wòadzo. Gake nunɔlawo de zi ameha la dome wodo ɣli be: ‘Ne èɖe asi le eŋu la, ke wò hã ètsi tre ɖe dziɖuɖua ŋu! Wui!’ Ameawo ƒe ɣlidodo de dzi bobobo. Ènya nusi Pilato wɔa?—

Eva lɔ̃ ɖe edzi na wo. Gbã la, ena woƒo Yesu. Emegbe etsɔe de asi na asrafowo be woawu. Wotsɔ ŋu wɔ kuku ɖɔ na Yesu eye woɖu fewu le eŋu be ta dem ague yewole nɛ. Eyome wotsɔ ati gã aɖe na Yesu be wòatsɔ eye wokplɔe yi ɖe dua godo yi afisi woyɔna be Ametakoliƒe. Le afima wotsɔ gatagbadzɛ klã Yesu ƒe asiwo kple afɔwo ɖe atia ŋu. Emegbe wofɔ atia ɖe dzi ale be Yesu le eŋu. Ʋu le ɖuɖum le eƒe abiawo me. Eƒe vevesese nu sẽ ale gbegbe.

Yesu meku enumake o. Ðeko wònɔ atia ŋu le afima. Nunɔlagãwo ɖu fewu le eŋu. Eye amesiwo tso eme va yina la gblɔ be: ‘Nenye Mawu Vie nènye la, ekema ɖi le fuwɔametia ŋu!’ Gake Yesu nya nusi Fofoa dɔe ɖo ɖa be wòava wɔ. Enya be ele be yeatsɔ yeƒe agbe deblibo ana ale be mɔnukpɔkpɔ nasu mía si na agbe mavɔ kpɔkpɔ. Mlɔeba anɔ abe ŋdɔ ga etɔ̃ me ene la, Yesu do ɣli sesĩe na Fofoa, eye wòku.—Mateo 26:36–27:50; Marko 15:1; Luka 22:39–23:46; Yohanes 18:1–19:30.

Aleke gbegbe Yesu to vovo na Adam enye esi! Adam meɖee fia be yelɔ̃ Mawu o. Egbe toɖoɖo Mawu. Eye Adam meɖee fia be yelɔ̃ míawo hã o. Wodzi mí katã ɖe nuvɔ̃ me le nuvɔ̃ si wòwɔ la ta. Gake Yesu ya ɖee fia be yelɔ̃ Mawu eye yelɔ̃ míawo hã. Eɖoa to Mawu ɣesiaɣi. Eye etsɔ eƒe agbe na ale be wòate ŋu aɖe nuvevi si Adam wɔ mí la ɖa na mí.

Èkpɔ ŋudzedze ɖe nu wɔnuku sia si Yesu wɔ na mí la ŋua?— Ne èle gbe dom ɖa na Mawu la, ɖe nèdaa akpe nɛ ɖe Via si wòtsɔ na mí ta?— Apostolo Paulo kpɔ ŋudzedze ɖe nusi Kristo wɔ nɛ ŋu. Paulo ŋlɔ bena Mawu ƒe Vi la ‘lɔ̃m eye wòtsɔ ye ŋutɔ ɖokui na ɖe tanye.’ (Galatiatɔwo 2:20) Yesu ku ɖe mía kpli wò siaa ta. Etsɔ eƒe agbe deblibo la na ale be míate ŋu akpɔ agbe mavɔ! Ðikekemanɔmee la, esia nye susu sẽŋu si ʋãa mí be míawo hã míalɔ̃ Yesu.

Apostolo Paulo ŋlɔ na Kristotɔ siwo nɔ Korinto be: ‘Kristo ƒe lɔlɔ̃ la ʋãa mí.’ Nukae Kristo ƒe lɔlɔ̃ la ʋãa mí míewɔna? Nukae nye wò susu?— De dzesi ŋuɖoɖo si Paulo na: ‘Kristo ku ɖe amewo katã ta, bene woanɔ agbe na Eyama. Menye be woanɔ agbe anɔ nusi dzea woa ŋutɔwo ŋu la wɔm o.’—Korintotɔwo II, 5:14, 15.

Àte ŋu agblɔ mɔ siwo nu nàte ŋu aɖee afia le be yele agbe nɔm be wòadze Kristo ŋu la dometɔ aɖewoa?— Enyo, ɖekae nye be nàgblɔ nusiwo nèsrɔ̃ tso eyama ŋu la na amewo. Alo bu esia ŋu kpɔ: Ðewohĩ wò ɖeka nèle afi aɖe, eye dada alo papa mate ŋu akpɔ nusi wɔm nèle o, eye ame bubu aɖeke hã mele kpɔwòm o. Ðe nànɔ nane siwo nènya be womadze Yesu ŋu o kpɔm le television alo Internet dzia?— Ðo ŋku edzi be Yesu le agbe fifia eye ate ŋu akpɔ nusianu si wɔm míele!

Susu bubu si ta wòle be míalɔ̃ Yesu enye be míedi be míasrɔ̃ Yehowa. Yesu gblɔ be: “Fofo la lɔ̃am.” Ènya nusita wòlɔ̃ Yesu kple nusita wòle be míawo hã míalɔ̃ea?— Esi Yesu lɔ̃ faa ku ɖe mía ta be Mawu ƒe lɔlɔ̃nu nava eme tae. (Yohanes 10:17) Eyata na míawɔ ɖe nusi Biblia gblɔ na mí la dzi, esi nye: “Mizu mawusrɔ̃lawo abe lɔlɔ̃viwo ene, eye mizɔ le lɔlɔ̃ me, abe alesi Kristo hã lɔ̃ mi, eye wòtsɔ eɖokui hena ɖe mia ta . . . ene.”—Efesotɔwo 5:1, 2.

Be míakpɔ ŋudzedze ɖe nusi Yesu wɔ na mí ŋu geɖe wu la, na míaxlẽ Yohanes 3:35; 15:9, 10; kple Yohanes I, 5:11, 12.

[Nɔnɔmetata siwo le axa 199]

Fu kawoe Yesu kpe esi wòtsɔ eƒe agbe na ɖe mía ta?

[Nɔnɔmetata si le axa 200]

Nukawoe míate ŋu awɔ atsɔ aɖee afia be míelɔ̃ Yesu?

[Nɔnɔmetata si le axa 201]

Amekae ate ŋu akpɔ nusianu si wɔm míele?