Nyataƒonya

1, 2. Nu ka tae wòle vevie be míatu xɔse ɖo fifia? Wɔ eƒe kpɔɖeŋu.

XƆSE. Menye ɖeko nya sia nya se ko o, ke eganye nɔnɔme si nyoa ame ŋu ŋutɔ. Ke hã ne míese xɔse ŋkɔ la, anyo be míabu nya bubu aɖe hã ŋu; eyae nye: “Nuwɔwɔ Kpata!” Nya lae nye be, ne xɔse mele mía si o la, ke ele be míatui ɖo kaba. Eye ne xɔse le mía si la, ehiã kpata be míado ŋusẽe ahakpɔ eta. Nu ka tae?

² Tsɔe be èle mɔ legbee aɖe zɔm to gbedadaƒo. Èhiã na tsi vevie. Ne èke ɖe tsi aɖe ŋu la, ele be nàlé be nɛ be ɣe naganoe o. Esi nèle tsia nom la, ele be nàdi bubu aɖo eteƒe be wòagavɔ hafi nàɖo afi si yim nèle o. Egbea la, mí katã míele gbedadaƒo le kpɔɖeŋunyagbɔgblɔ nu, míele xexe aɖe si me xɔse vavã le vevem le abe ale si tsi vena le kuɖiɖinyigba dzi ene. Abe ale si ɣe ate ŋu ano tsi kaba ne womelé be nɛ alo ku bubu ɖo eteƒe o ene la, nenema kee xɔse hã nu ate ŋu atsi ne womekpɔ eta alo do ŋusẽe o. Míehiã na xɔse vevie; abe ale si ko míate ŋu anɔ agbe tsi manomanoe o ene la, nenema kee míate ŋu ayi edzi anɔ ƒomedodo nyui me kple Yehowa ne xɔse mele mía si o.—Rom. 1:17.

 3. Nu kae Yehowa na mí be wòakpe ɖe mía ŋu míatu xɔse ɖo, eye nu eve kawo dzie wòle be míaɖo ŋku awɔ?

³ Yehowa nya ale si gbegbe míehiã xɔsee, eye wònya ale si wòsesẽ be woatu xɔse ɖo ahalé eme ɖe asi egbea. Ðikeke mele eme o be susu ma tae wòna xɔse ƒe kpɔɖeŋuwo mí be míasrɔ̃ ɖo. Yehowa ƒe gbɔgbɔ ʋã apostolo Paulo wòŋlɔ bena: ‘Mizu ame siwo to xɔse kple dzigbɔɖi me nyi ŋugbedodowo dome la srɔ̃lawo.’ (Heb. 6:12) Eye susu ma tae Yehowa ƒe habɔbɔa de dzi ƒo na mí be míadze agbagba asrɔ̃ ŋutsu kple nyɔnu wɔnuteƒewo, abe esiwo ƒe ŋutinyawo me míedzro le agbalẽ sia me ene la ƒe kpɔɖeŋuwo ɖo. Gake nu kae wòle be míawɔ fifia? Mina míaɖo ŋku nu eve dzi: (1) Ehiã be míayi edzi anɔ ŋusẽ dom míaƒe xɔse; (2) ehiã be míayi edzi ana míaƒe ŋku nanɔ míaƒe mɔkpɔkpɔa dzi tututu.

 4. Aleke Satana ɖee fia be yenye xɔse ƒe futɔ, ke hã nu ka tae mele be dzi naɖe le mía ƒo o?

⁴ Yi edzi nànɔ ŋusẽ dom wò xɔse. Xɔse ƒe futɔ gãtɔe nye Satana. Xexe sia dzi ɖula la trɔ asi le nuɖoanyi sia ŋu ale gbegbe be xɔse va le ko abe ale si tsi vena le gbedadaƒo ene. Futɔ sia sesẽ wu mí boo. Gake ɖe wòle be esia nana míanɔ vɔvɔ̃m be míate ŋu atu xɔse ɖo ahalé eme ɖe asi oa? Kura o! Yehowa nye ame siwo katã dina be xɔse vavãtɔ nanɔ yewo si la ƒe Xɔlɔ̃ vevitɔ. Eka ɖe edzi na mí be esi yele míaƒe akpa dzi ta la, míate ŋu atsi tsitre ɖe Abosam ŋu ahana wòasi le mía gbɔ gɔ̃ hã! (Yak. 4:7) Míetsia tsitre ɖe Abosam ŋu ne míedia ɣeyiɣi gbe sia gbe doa ŋusẽ míaƒe xɔse hetunɛ ɖo. Aleke míawɔ esiae?

 5. Aleke ŋutsu kple nyɔnu wɔnuteƒe siwo ŋu Biblia ƒo nu tsoe la wɔ hafi xɔse su wo si? Ðe eme.

⁵ Abe ale si míekpɔe va yi ene la, wometsɔ xɔse dzi ŋutsu kple nyɔnu wɔnuteƒe siwo ŋu Biblia ƒo nu tsoe la o. Ale si wonɔ agbee la nye kpeɖodzi vavã be Yehowa ƒe gbɔgbɔ kɔkɔea ye nana xɔse sua ame si. (Gal. 5:22, 23) Wodo gbe ɖa bia Yehowa ƒe kpekpeɖeŋu, eye eya hã yi edzi nɔ ŋusẽ dom woƒe xɔse. Mina míasrɔ̃ woƒe kpɔɖeŋu, eye míaƒe ŋku nanɔ edzi ɣesiaɣi be Yehowa naa eƒe gbɔgbɔ kɔkɔea ame siwo bianɛ hewɔa nu le ɖekawɔwɔ me kple woƒe gbedodoɖawo la faa. (Luka 11:13) Ðe nu bubu aɖe li míagawɔa?

 6. Aleke míawɔ be Biblia me ŋutinyawo sɔsrɔ̃ naɖe vi na mí geɖe wu?

⁶ Ame siwo ɖe xɔse sẽŋu fia la ƒe kpɔɖeŋu ʋɛ aɖewo ko mee míedzro le agbalẽ sia me. Ame bubu geɖewo gali! (Xlẽ Hebritɔwo 11:32.) Wo dometɔ ɖe sia ɖe ƒe ŋutinya le etɔxɛ, eye míate ŋu asrɔ̃ nu nyui geɖe tso wo gbɔ ne míelé fɔ ɖe Biblia sɔsrɔ̃ ŋu. Ne míetoa xɔsetɔ siwo ŋu Biblia ƒo nu tsoe la ƒe ŋutinyawo me dzradzradzra la, míate ŋu ado ŋusẽ míawo ŋutɔwo ƒe xɔse o. Hafi nu si xlẽm míele la naɖe vi na mí bliboe la, ehiã be míadi ɣeyiɣi adzro nɔnɔme siwo me Biblia ŋutinyawo dzɔ le kple nya siwo ƒo xlã wo la me nyuie. Ne míeɖoa ŋku edzi ɣesiaɣi be ŋutsu kple nyɔnu mawo hã nye ame madeblibo siwo ƒe “seselelãmewo sɔ kple mía tɔwo” la, míava se nu siwo me woto la me nyuie wu. (Yak. 5:17) Eye ne míetsɔ mía ɖokui ɖo wo teƒe la, míate ŋu akpɔ ale si woanya se le wo ɖokui me esime woto kuxi kple nɔnɔme sesẽ siwo le abe mía tɔwo ene me la le susu me.

7-9. (a) Aleke ŋutsu kple nyɔnu xɔsetɔ siwo ŋu Biblia ƒo nu tsoe la dometɔ aɖewo ase le wo ɖokuiwo me ne woasubɔ Yehowa abe ale si míele ewɔm egbea ene? (b) Nu ka tae wòle be míato nuwɔnawo dzi ado ŋusẽ míaƒe xɔse?

⁷ Míetoa míaƒe nuwɔnawo hã dzi doa ŋusẽ míaƒe xɔse. Nya lae nye be, ‘xɔse dɔwɔwɔ manɔŋui nye nu kuku.’ (Yak. 2:26) Bu dzidzɔ si gbegbe ŋutsu kple nyɔnu siwo ƒe ŋutinyawo me míedzro la akpɔ ne ɖe woawɔ sie mɔnukpɔkpɔ su be woawɔ dɔ si Yehowa de mía si egbea la ŋu kpɔ!

⁸ Le kpɔɖeŋu me, aleke nèsusu be Abraham ase le eɖokui me ne wogblɔ nɛ be ate ŋu asubɔ kple Yehowa subɔla siwo wɔ ɖeka hedea ta agu le Fiaɖuƒe Akpata dzeaniwo alo takpekpe gãwo me, afi siwo wodzroa ŋugbedodo siwo wòkpɔ le “adzɔge” ɖaa la me tsitotsito le, ke menye be wòafɔ kpewo aɖi vɔsamlekpui le gbedadaƒo hafi asubɔe o? (Xlẽ Hebritɔwo 11:13.) Ke ne wogblɔ na Eliya be eƒe dɔa mabia be wòawu Baal ƒe nyagblɔɖilawo eye wòanɔ subɔsubɔdɔ wɔm na Yehowa le fia vɔ̃ɖi gbexɔse aɖe ƒe dziɖuɖu te o, ke boŋ be wòayi amewo gbɔ aɖagblɔ akɔfanya kple mɔkpɔkpɔgbedeasi na wo le ŋutifafa me ɖe? Ðe ŋutsu kple nyɔnu xɔsetɔ mawo siwo ŋu Biblia ƒo nu tsoe la matsɔ dzidzɔ blibo alɔ̃ asubɔ Yehowa abe ale si míele ewɔm egbeae ene oa?

⁹ Eya ta mina míato dɔwɔwɔwo me ayi edzi anɔ ŋusẽ dom míaƒe xɔse. Ne míewɔe alea la, ekema míele ŋutsu kple nyɔnu xɔsetɔ siwo ƒe ŋutinya le Mawu ƒe Nya si tso gbɔgbɔ me la me ƒe kpɔɖeŋuwo srɔ̃m. Abe ale si míegblɔe le Ŋgɔdonyaa me ene la, woava nɔ na mí abe xɔlɔ̃ veviwo ene. Ke hã eteƒe madidi o, míava nɔ anyi kple xɔlɔ̃ mawo ahade ha kpli wo ŋutɔŋutɔ.

10. Dzidzɔ kae míakpɔ le Paradisoa me?

¹⁰ Wò ŋku nenɔ wò mɔkpɔkpɔa dzi tututu. Tso ɣeaɖeɣi ke la, ŋutsu kple nyɔnu wɔnuteƒewo nana mɔkpɔkpɔ si tso Mawu gbɔ la doa ŋusẽ woƒe xɔse. Ke wò ya ɖe? Le kpɔɖeŋu me, bu dzidzɔ si gbegbe wòanye be nàkpɔ Mawu subɔla wɔnuteƒewo ne wova fɔ wo le ‘ame dzɔdzɔewo ƒe tsitretsitsi’ la me ŋu kpɔ. (Xlẽ Dɔwɔwɔwo 24:15.) Nya kawoe nàdi be yeabia wo?

11, 12. Le xexe yeyea me la, nya kawoe nàdi be yeabia (a) Habel? (b) Noa? (d) Abraham? (ɖ) Rut? (e) Abigail? (ɛ) Ester?

¹¹ Ne èkpɔ Habel la, ɖe nàdi vevie be wòagblɔ ale si edzilawo nɔ la na yea? Alo ɖewohĩ àbiae be: “Ðe nèƒo nu na kerubi siwo nɔ Eden bɔa nu dzɔm la kpɔa? Woɖo eŋu na wòa?” Ke ne èkpɔ Noa ya ɖe? Ðewohĩ àdi be yeabiae be: “Ðe nènɔa vɔvɔ̃m na Nefilimwoa? Aleke nèwɔ kpɔ lã mawo katã dzi le aɖakaʋua me le ƒe ma me?” Ne èdo go Abraham la, ɖewohĩ àbiae be: “Ðe nèdogo Sem kpɔa? Ame kae fia nu wò tso Yehowa ŋu? Ðe wòsesẽ na wò be nàʋu le Ur dua mea?”

¹² Azɔ bu nya siwo nàdi be yeabia nyɔnu xɔsetɔ siwo woafɔ ɖe tsitre la hã ŋu kpɔ. Ðewohĩ àbia be, “Rut, nu kae ʋã wò nèva zu Yehowa subɔla?” “Abigail, ɖe nènɔ vɔvɔ̃m be yeagblɔ na Nabal be yekpe ɖe David ŋua?” “Ester, aleke nuwo va nɔ na mia kple Mardoxai esi miaƒe ŋutinya si le Biblia me la wu enu?”

13. (a) Nya kawo ƒomevie ame siwo woafɔ ɖe tsitre la adi be yewoabia wò? (b) Aleke nèsena le ɖokuiwò me ku ɖe mɔnukpɔkpɔ si ava su asiwò be nàde ha kple ŋutsu kple nyɔnu xɔsetɔ siwo nɔ anyi le blema la ŋu?

¹³ Le nyateƒe me la, nya geɖe anɔ ŋutsu kple nyɔnu wɔnuteƒe mawo hã si be yewoabia wò. Dzidzɔ ka gbegbee nye esi wòanye na wo be nàƒo nu tso ŋkeke mamlɛawo ƒe nudzɔdzɔ ɖedzesiawo kple ale si Yehowa yra eƒe amewo le ɣeyiɣi sesẽ mawo me ŋu na yewo! Ðikeke mele eme o be, ne wose ale si Yehowa na eƒe ŋugbedodowo katã va emee la, awɔ dɔ ɖe wo dzi ŋutɔ. Ɣemaɣi la, magahiã be míanɔ agbagba dzem be míakpɔ Mawu subɔla siwo ƒe ŋutinyawo le Biblia me la le susu me o. Woawo ŋutɔwo woanɔ Paradisoa me kpli mí! Eya ta yi edzi nànɔ nu sia nu si nàte ŋu awɔ la wɔm be ame mawo nanɔ abe ame siwo kpɔm nèle fifia ene. Yi edzi nàsrɔ̃ woƒe xɔse. Neva eme be nàsubɔ Yehowa kpli wo ɖekae abe xɔlɔ̃ veviwo ene tegbee!