Fiaɖuƒe Gbeƒãɖelawo Ka Nya Ta

Woaɖe Gbeƒã Fiaɖuƒeŋutinyanyui La

ƑE ALAFA geɖe enye sia si Mawu ƒe futɔ gãtɔ, Satana Abosam, zã dunyahedziɖuɖuwo kple alakpasubɔsubɔ ayetɔe tsɔ le agbagba dzem be Kristotɔnyenye vavãtɔ nagakaka o. Gake mɔnu siawo ado kpo nu. Yesu gblɔe ɖi be “woaɖe gbeƒã [menye “ɖewohĩ woaɖe gbeƒã” alo, “woate ŋu aɖe gbeƒã” o] fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã.”—Mateo 24:14.

Satana ƒe kpododonu va dze ƒã le Greece. Le dukɔ ma me la, Greece ƒe Othodoks Sɔlemeha la te kpɔ be yewoaɖo asi Yehowa Ðasefowo dzi be womagaɖe gbeƒã Fiaɖuƒeŋutinyanyui la o. Gake abe alesi nuteƒekpɔkpɔ si gbɔna la ɖee fia ene la, Biblia me nyateƒewo va ɖoa dzinyuitɔwo gbɔ mlɔeba togbɔ be tsitretsiɖeŋu li hã.

Anɔ abe ƒe 30 enye si va yi la, Greece ƒe Orthodoks-nunɔla aɖe xɔ nyanyui la eye wògblɔ gɔ̃ hã be yedi be yeava zu Yehowa Ðasefo. Gake eƒe ƒometɔwo tsi tre ɖe eƒe afɔɖeɖe sia ŋu vevie eye woƒoe ɖe enu wòdzudzɔ hadede kple Ðasefowo. Eyi edzi nɔ eƒe nunɔladɔa wɔm be yeƒe nu nadze eƒe ƒometɔwo ŋu; gake ekpɔnɛ dzea sii ɣesiaɣi be Yehowa Ðasefowo kpe ɖe ye ŋu yesrɔ̃ nyateƒea eye be alakpasubɔsubɔ me bubunɔƒe tae yena ta ɖo.

Gake eƒoa nu dea Yehowa Ðasefowo dzi ne mɔnukpɔkpɔ su esi. Zi geɖe la, exlɔ̃a nu amewo gɔ̃ hã be ne wodi be yewoasrɔ̃ Biblia me nyateƒewo la, ke ele be woasrɔ̃ nu kple Ðasefowo. Esi ƒeawo nɔ yiyim la, ame aɖewo wɔ ɖe eƒe aɖaŋuɖoɖoa dzi.

Nyitsɔ laa la, nunɔla la va dze dɔ vevie eye wòkpɔe be yele kuku ge kpuie. Esi wònɔ kɔdzi la, eyɔ viawo eye wo katã va ƒo ƒu ɖe eƒe abati gbɔ.a Egblɔ na wo be ne yeku la, woate ŋu agakpɔ ye. Eƒo nu na wo tso Biblia ƒe nufiafia be Yehowa afɔ amewo ɖe tsitre be woanɔ agbe le paradiso me le anyigba dzi ŋu, gake ne wodi vavã be woagakpɔ ema teƒe la, ke ele be woasrɔ̃ nyateƒea tso Biblia me eye woado le alakpasubɔsubɔ me. Ebia tso wo si be woade ha kple Yehowa Ðasefowo eye woasrɔ̃ alesi woawɔ azu Kristotɔ vavãtɔwo la tso wo gbɔ.

Eteƒe medidi hafi nunɔla la ku o. Gake nu nyuiwo do tso aɖaŋu si wòɖo na viawo hafi gblẽ wo ɖi la me. Vianyɔnu tsi tre ɖe Yehowa Ðasefowo kple woƒe dɔa ŋu vevie abe eƒe ƒometɔ bubuwo ke ene. Gake mete ŋu gbe fofoa ƒe kubadziɖaŋu vevi la dzi wɔwɔ o, eyata eteƒe medidi o eva kpɔ Yehowa Ðasefowo hedze Biblia sɔsrɔ̃ gɔme. Nyitsɔ laa la, eya ŋutɔ va zu Ðasefo, etsɔ eƒe agbe ɖe adzɔgbe na Yehowa Mawu eye etsɔ nyɔnyrɔ̃xɔxɔ ɖe tsi me wɔ eƒe adzɔgbeɖeɖea ƒe kpɔɖeŋui.

Le Greece kple dukɔ 230 bubuwo me la, Yehowa Ðasefowo ɖoa ŋu ɖe Mawu ƒe gbɔgbɔ kɔkɔea ƒe ŋusẽ ŋu. Gbɔgbɔ kɔkɔe lae le megbe na wo bliboe wotsɔ le gome kpɔm le Yesu ƒe nyagblɔɖia me vava me: “Miaxɔ gbɔgbɔ kɔkɔe, si le mia dzi va ge la, ƒe ŋusẽ, eye mianye nye ɖaseɖilawo le Yerusalem kple Yudea katã kple Samaria, eye vaseɖe anyigba ƒe seƒe ke.”—Dɔwɔwɔwo 1:8.

[Etenuŋɔŋlɔ]