Goemenuɖuɖu Ði Ðase

LE ANYIGBAƲUƲU si dzɔ le Kobe, Japan, le January si va yi me ƒe ŋkeke aɖewo megbe la, nuɖuɖukpɔkpɔ sesẽ na nuto siwo ŋu wògblẽ nu le me tɔwo ŋutɔ. Gake nuɖuɖu mehiã Yehowa Ðasefowo o, le kpekpeɖeŋu si wo xɔlɔ̃wo na wo dɔmenyotɔe ta. Ŋkeke eve alo etɔ̃ gbãtɔwo le anyigbaʋuʋua megbe la, hame siwo tsɔ ɖe wo gbɔ ɖo mɔlikple ɖe wo. Eteƒe medidi o, wo xɔlɔ̃ siwo tsɔ ɖe le eme na wo nɔ nuɖuɖu siwo le goe me ɖom ɖe wo. Ame geɖe ŋlɔ nya sue aɖewo kpe ɖe goemenuɖuɖuawo ŋu tsɔ ɖe alesi wotsɔ ɖe le eme na amesiwo dzi afɔku dzɔ ɖo fiae. Amesiwo xɔ nuɖuɖuawo gblɔ be “aɖatsi” ge ɖe nuɖuɖu ɖesiaɖe dzi le esi aɖatsi nɔ gegem le mo na yewo esime yewonɔ dzesidenya kpuiawo xlẽm.

Yehowa Ðasefowo mã woƒe nuɖuɖua kple amesiwo hiã tu. Ðasefo aɖe nɔ eƒe ŋdɔnu ɖum le ʋu me esime eya kple ehati aɖe si wɔa dɔ le dɔwɔha ɖeka me eye menye Ðasefo o la nɔ mɔ zɔm yina teƒe aɖe. Eyata ena goemenuɖuɖu si wòxɔ la ƒe ɖee.

Dɔwɔhatia biae be: “Afikae nèƒle goe me ŋdɔnuɖuɖu sia le?” Nɔviŋutsua ɖe Ðasefowo ƒe kpekpeɖeŋunadɔa me nɛ. Ŋutsua gblɔ ŋudzedzekpɔkpɔtɔe be: “Ŋkeke aɖewoe nye sia si nyemegaɖu amagbewo kpɔ o. Makpɔtɔ ɖe ɖi atsɔ yi na nye ƒomea le aƒeme.”

Zi etɔ̃lia si dɔwɔhatia gaxɔ nuɖuɖua la, etsɔ yɛn 3,000 (ade United States dɔlar 35) na Ðasefoa hegblɔ be: “Menya nu tso miaƒe dɔwo ŋu, eyata taflatse ɖe mɔ nam madzɔ nu atsɔ ado alɔ miaƒe dɔa. Mekpɔ ŋudzedze ɖe ŋdɔnuɖuɖu siwo nènam la ŋu. Nyateƒee, mia nɔviwo katã nye ame nyuiwo.”