Agbalẽnyalagã aɖe Trɔ Biblia Gbalẽ aɖe Ŋlɔɣi

Germanytɔ Carsten Peter Thiede si nya nu tso blemagbalẽwo ŋu gblɔ be kpeɖodzi sẽŋu li be ƒe alafa gbãtɔ mee woŋlɔ Mateo ƒe Nyanyuigbalẽa ƒe blemagbalẽ kakɛ etɔ̃awo (siwo woyɔna be Magdalen ƒe Blemagbalẽ).

Esi Thiede tsɔ agbalẽ kakɛawo (siwo me Mateo ta 26 ƒe akpa aɖewo le) sɔ kple blema dɔwɔwɔ ŋuti lɛta aɖe si wofɔ le Egipte la, egblɔ be Egiptetɔwo ƒe nuŋlɔɖia sɔ kple “Magdalen Blemagbalẽa tututu kloe—le ŋɔŋlɔdzesi ɖekaɖekawo ƒe dzedzeme kple nɔnɔme kpakple alesi woŋlɔ woe me.” Thiede kple Matthew D’Ancona si kpe ɖe eŋu woŋlɔ agbalẽ si nye Eyewitness to Jesus—Amazing New Manuscript Evidence About the Origin of the Gospels ƒo nya ta le woƒe agbalẽa me be alesi nuŋlɔɖi eveawo ɖi wo nɔewoe ɖee fia be ɣeyiɣi ma ke mee woŋlɔ wo. Ɣekaɣie? Ŋkeke si woɖo ɖe dɔwɔwɔ ŋuti lɛta la dzie nye “‘Le Aƒetɔ Nero ƒe ƒe 12 lia, Epeiph 30 lia me’—si nye July 24, 66 [M.Ŋ.] le míaƒe ɣletigbalẽa dzi.”

Nufialagã Philip W. Comfort gblɔ le nyati si wota ɖe Tyndale Bulletin me be: “Ne ɣletiŋkekea de pɛpɛpɛ la, ke eɖe dzesi vevie ŋutɔ elabena afia be ƒe alafa ma si me woŋlɔe tututu mee woŋlɔ Mateo ƒe Nyanyuigbalẽ si wotsɔ asi ŋlɔe.” Esia hã awɔe be Magdalen Blemagbalẽa nanye Nyanyuigbalẽ ƒe kakɛ xoxotɔ kekeake si li.

[Nɔnɔmetata si le axa 29]

Magdalen ƒe Blemagbalẽa, lolomea enye sia

[Afi Si Míexɔ Mɔɖeɖe Tso]

By permission of the President and Fellows of Magdalen College, Oxford