Wogbugbɔ Mawu Ƒe Ŋkɔ Ðo Eteƒe

“ESI woɖe ŋkɔ Yehowa le Bibliawo me ƒe geɖe eye ɖewohĩ ƒe alafawo megbe la, eƒe egbegbe ɖasefowo koe nye Kristo-ha si tso eye wogbugbɔ ŋɔŋlɔdzesi eneawo ɖo eteƒe.”a

Nya siwo míetsɔ dze nyati sia gɔme la tso agbalẽ si nye Jeová dentro do Judaísmo e do Cristianismo (Yehowa le Yuda-subɔsubɔ Kple Kristotɔnyenye Me), si Assis Brasil, si nye Braziltɔ ŋlɔ me. Gake biabia la ate ŋu afɔ ɖe te be, Togbɔ be Biblia gɔmeɖeɖe ʋee aɖewo zã Mawu ƒe ŋkɔa le mɔ aɖewo nu hã la, nukatae subɔsubɔha bubuwo ɖee ɖa le woƒe Bibliawo me? Brasil gblɔ be “Woɖe Mawu ƒe ŋkɔa ɖa le aʋatsodzixɔse loo . . . , susu bubu aɖe loo, alo le didi be woado Yesu kple dadaa, Maria, ƒe ŋkɔwo ɖe dzi ta.”

Gake abe alesi Aƒetɔ Brasil gblɔe wòsɔe ene la: “New World Translation of the Holy Scriptures ɖɔ [Mawu ƒe] ŋkɔa si woɖe ɖa la ɖo keŋkeŋ le Portugalgbe me.” Aleke? Le susu sia nu be wogbugbɔ Yehowa ƒe ŋkɔa ɖo eteƒe le Biblia ma me. Ŋkɔ Yehowa dze le New World Translation la me wòwu zi gbɔ zi 7,200 sɔŋ.

Tso esime woɖe egbegbe gɔmeɖeɖe si le Portugalgbe me ɖe go zi gbãtɔ la, womã xexlẽme si wu miliɔn ade kple afã. Eyata eʋã nyadzɔdzɔŋlɔla aɖe wòŋlɔ tsɔ bia le Brazil nyadzɔdzɔgbalẽ Diário do Nordeste (Dzieheɣedzeƒe Nyadzɔdzɔgbalẽ) me be, “Ènya be ŋkɔ le Mawu sia?” Egbegbe Biblia gɔmeɖeɖe sia na ame miliɔn geɖe ate ŋu aɖo eŋu be, “Ẽ. Mawu ŋkɔe nye Yehowa.”

[Etenuŋɔŋlɔ]