Xexeame Ŋutifafa—Afikae Wòatso Ava?

ÐE XEXEAME katã ƒe hehenana kple mawusubɔsubɔ ate ŋu ahe ŋutifafa vɛa? Esia nye Ðk. Robert Muller si nye Dukɔ Ƒoƒuawo ƒe dɔdzikpɔlagã ƒe kpeɖeŋutɔ tsã kple amesi xɔ Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnuwo ƒe Nyawo Gbɔkpɔƒea ƒe nunana ɖe Ŋutifafa ƒe Hehenana ta le ƒe 1989 me la ƒe didi. Woka nya ta le The Vancouver Sun nyadzɔdzɔgbalẽ me be Ðk. Muller “xɔe se be ele be woafia nu sukuvi siwo le xexeame katã tso nyateƒe vevi siwo ku ɖe anyigba, amegbetɔ ƒe nɔnɔmewo kple adãmawɔmawɔ ŋu tsitotsito.” Ebui be ɣeyiɣi aɖe ava si me nusrɔ̃ƒe siwo le xexeame katã afia nu ɖeviwo le Dukɔ Ƒoƒuawo ŋu be enye ŋutifafa ƒe mɔkpɔkpɔ nyuitɔ kekeake. Sun gblɔ be exɔe se hã be “ele be xexemesubɔsubɔhawo katã naƒo ƒu azu habɔbɔ yeye aɖe si anɔ abe Dukɔ Ƒoƒuawo ene si woayɔ be Subɔsubɔha Ƒoƒuawo.” Azɔ “subɔsubɔhawo ƒe nufiafiawo katã ado adãmawɔmawɔ ɖe ŋgɔ.”

Ðe ŋutifafa ava xexeame ŋutɔŋutɔ gbaɖegbea? Ẽ, ava godoo! Gake menye amegbetɔ ƒe habɔbɔ aɖeke dzie wòato ava o. Ƒe 2,700 kple edzivɔ enye si va yi la, nuŋlɔla aɖe si gbɔgbɔ ʋã gblɔ ŋutifafa ŋuti hehenana dzɔtsoƒe kɔkɔtɔ kekeake, esi wogblɔ ɖi be dzinyuitɔwo anye “Yehowa ƒe nusrɔ̃viwo,” eye woƒe ŋutifafa “asɔ gbɔ.”—Yesaya 54:13.

Biblia gblɔ be Mawue nye amesi ‘naa ŋutifafa.’ (Romatɔwo 16:20) Fifia gɔ̃ hã la, xexeme katã ƒe hehenanadɔ wɔnuku aɖe le edzi yim esi Yehowa le nu fiam eƒe amewo be ‘woadi ŋutifafa eye woati eyome,’ be “woatsɔ woƒe yiwo atu kodziwoe,” eye “womagasrɔ̃ aʋawɔwɔ hã azɔ o.”—Petro I, 3:11; Yesaya 2:2-4.

Mawu kpɔa ŋudzedze ɖe tadedeagu si wotu ɖe nyateƒe dzi, si me alakpa kple beble aɖeke mele o ŋu heyranɛ. (Mateo 15:7-9; Yohanes 4:23, 24) Tadedeagu vavãtɔ si wɔ ɖeka kple Mawu ƒe Nya koe ate ŋu awɔe be amewo nanɔ anyi le ŋutifafa kple ɖekawɔwɔ me eye lɔlɔ̃ vavãtɔ nanɔ wo si na wo nɔewo.—Yohanes 13:35.

Be nànya nu geɖe tso nusi Mawu ƒe Nya gblɔ le xexemeŋutifafa ŋu la, míekpe wò be nàŋlɔ agbalẽ aɖo ɖe magazine sia talawo.