Nunya si Woatsɔ ‘Akpɔ Nusi Ava Dzɔ Do Ŋgɔ’

“DUKƆ, si dome adaŋudede mele o, eye nyasã aɖeke mele wo me o la wonye. Ðe wònye nunyalawo wonye la, ne wodze si nusia, eye ne wobu nusi ava dzɔ ɖe wo dzi la ŋu [do ŋgɔ].”—Mose V, 32:28, 29.

Mose ye gblɔ nya siawo na Israel-viwo esime wonɔ Ŋugbedodonyigba la ƒe liƒo dzi. Mose nɔ egblɔm ɖi be ɣeyiɣi aɖe ava esime woagbe nu le Yehowa gbɔ eye womatsɔ ɖeke le nusi ado tso woƒe nuwɔnawo me la me o. Le ƒe alafa siwo kplɔe ɖo me la, Israel-viwo—siwo me fia geɖe hã nɔ—ŋe aɖaba ƒu Mawu ƒe nuxlɔ̃amewo dzi.

Le kpɔɖeŋu me, Salomo nya Mawu ƒe se si gblɔ be womegaɖe amesiwo subɔa mawu bubuwo to vovo na Yehowa o. (Mose V, 7:1-4) Ke hã eva ɖe “dutanyɔnu geɖewo.” Nukae do tso eme? Biblia ƒe nuŋlɔɖia gblɔ be: “Eye wòva me, esime Salomo tsi la, srɔ̃awo trɔ eƒe dzi ɖe mawu bubuwo ŋu, eye eƒe dzi menɔ Yehowa, eƒe Mawu la ŋu blibo abe fofoa Dawid ƒe dzi ene o.” (Fiawo I, 11:1, 4) Togbɔ be Salomo nye nunyala hã la, mezã nuŋububu nyui si hiã be ‘wòakpɔ nusi adzɔ do ŋgɔ’ ne meɖo to Mawu ƒe sededewo o.

Ke míawo hã ɖe? Míate ŋu aƒo asa na vevesese geɖe ne míede ŋugble nyuie do ŋgɔ le nyametsotso siwo míawɔ le agbe me ŋu. Le kpɔɖeŋu me, woxlɔ̃ nu Kristotɔwo be ‘woakɔ wo ɖokui ŋuti tso ŋutilã kple gbɔgbɔ ƒe ɖiƒoƒo sia ɖiƒoƒo me.’ (Korintotɔwo II, 7:1) Susu le nya sia me, gake nuŋububu nyui mele ame geɖe si wokpɔa nusi ado tso eme ne womewɔ ɖe Paulo ƒe nuxlɔ̃amea dzi do ŋgɔ o. Le kpɔɖeŋu me, sɔhɛ geɖe tsɔa atamanono ƒoa ɖi woƒe ŋutilã kple susu be esia ana yewoadze nunyalawo kple ame tsitsiwoe. Aleke gbegbe wòwɔa wɔnublanui enye si le ƒe aɖewo emegbe, ne le agbe si wo dometɔ aɖewo nɔ va yi ta wova zu dzidɔlélawo, dzitodzito me kansa lélawo, alo dzitodzito me tetedɔlélawo!

Ele vevie be míade ŋugble nyuie le míaƒe nyametsotso kple nuwɔna me tsonuwo ŋu nyuie. Esɔ be Paulo ŋlɔe be: “Nusi ke ame ƒãna la, esia ke wòaŋe. Elabena amesi ƒã nu ɖe eƒe ŋutilã me la, aŋe gbegblẽ atso eƒe ŋutilã me; ke amesi ƒã nu ɖe Gbɔgbɔ me la, aŋe agbe mavɔ atso Gbɔgbɔ me.”—Galatiatɔwo 6:7, 8.