Woyɔ Mawu ƒe Ŋkɔa le Israel
ƑE ALAFA geɖe enye sia si Yuda-subɔsubɔ me kɔnyinyiwo tsri Mawu ƒe ŋkɔ, Yehowa, yɔyɔ na emenɔlawo keŋkeŋ. Le Mishnah la ƒe nya nu la, ‘gome aɖeke manɔ amesiame si ayɔ Mawu ƒe ŋkɔa si le xexe si ava va me o.’—Sanhedrin 10:1.a
Le January 30, 1995, dzi la, amesi nye Sepharditɔwo ƒe rabiwo ƒe tatɔ tsã le Israel ɖoe koŋ yɔ Mawu ƒe ŋkɔa. Eyɔ ŋkɔa esi wònɔ Kabalatɔwo ƒe ɖɔɖɔɖo gbedodoɖa si woyɔna be tikkun la dom ɖa. Wodoa gbe sia ɖa ale be Mawu nate ŋu agbugbɔ ɖekawɔwɔ si nɔ xexeame godoo, si me subɔsubɔ sia me nɔlawo gblɔ be gbɔgbɔ vɔ̃wo gblẽ la ƒe akpa aɖe aɖo anyi. February 6, 1995, ƒe nyadzɔdzɔgbalẽ si ŋkɔe nye Yedioth Aharonoth gblɔ be: “Esia nye kɔnu aɖe si ƒe ŋusẽ gɔme menya sena o si wɔe be agbalẽvi tɔxɛ aɖe si menye ame hahoowoe wodzranɛ na o la ko mee nya siwo wogblɔna le kɔnua wɔɣi la le.” Wosusui be Mawu ƒe ŋkɔ yɔyɔ le nɔnɔme sia me dea kpekpeme tɔxɛ aɖe biabia la ŋu.
Enye nusi ɖe dzesi be Biblia de se na Mawu subɔlawo be woazã Mawu ƒe ŋkɔ, Yehowa. (Mose II, 3:15; Lododowo 18:10; Yesaya 12:4; Zefanya 3:9) Ŋkɔ ma dze zi gbɔ zi 7,000 kloe le Biblia gbãtɔ si woŋlɔ ɖe Hebrigbe me la me. Ke hã Biblia xlɔ̃ nu mí le Mawu ƒe ŋkɔ zazã le mɔ gbegblẽ nu ŋu. Se Ewoawo ƒe etɔ̃lia gblɔ be: “Mègayɔ Yehowa, wò Mawu, ƒe ŋkɔ yakayaka o, elabena Yehowa magbe tohehe na amesiwo yɔa eƒe ŋkɔ dzodzro la o.” (Mose II, 20:7) Aleke woate ŋu ayɔ Mawu ƒe ŋkɔ yakayakae? Yudatɔwo ƒe Agbalẽtaha ƒe numeɖeɖe aɖe de dzesii be menye Mawu ƒe ŋkɔa ‘zazã abe nu maɖinu’ ene koe Hebri nyagbe si gɔme woɖe be “yakayaka” la fia o, ke ate ŋu afia “yayra siwo mehiã o gbugbɔgagblɔ edziedzi” hã.
Ekema aleke wòle be míabu Kabalatɔwo ƒe ɖɔɖɔɖo gbedodoɖa lae? Afikae wòdzɔ tso? Le ƒe alafa 12 lia kple 13 lia M.Ŋ. me la, vivime Yuda-subɔsubɔ aɖe ƒomevi si woyɔna be Kabala va nɔ ŋkɔ xɔm. Le ƒe alafa 16 lia me la, rabi aɖe si ŋkɔe nye Isaac Luria tsɔ “tikkunim” de Kabalatɔwo ƒe kɔnuwo me. Wozã Mawu ƒe ŋkɔa abe gbesa si ŋu ŋusẽ tɔxɛ le ene, eye wòva zu Kabalatɔwo ƒe kɔnuwɔwɔ ƒe akpa aɖe. Ðe nèsusui be esia nye Mawu ƒe ŋkɔ zazã ɖe mɔ si sɔ nua?—Mose V, 18:10-12.
Aleke ke nàɖo biabia ma ŋui o, àlɔ̃ ɖe edzi be Mawu ƒe ŋkɔ yɔyɔ le dutoƒo le egbegbe Israel nye nudzɔdzɔ aɖe si mebɔ o. Gake Mawu ŋutɔ gblɔ ɖi be: “[Miagblɔ] le ɣemaɣi be: ‘Mikafu Yehowa, miyɔ eƒe ŋkɔ, miɖe eƒe nuwɔwɔwo fia le dukɔwo dome, miɖe gbeƒãe be, eƒe ŋkɔ de dzi. Midzi ha na Yehowa, elabena ewɔ nu klitsuwo; woanya esia le anyigba blibo la dzi.’ ”—Yesaya 12:4, 5.
Dzidzɔtɔe la, Yehowa Ðasefo siwo le Israel le agbagba ɖesiaɖe dzem be yewoakpe ɖe yewoƒe aƒelikawo ŋu ne Yehowa ŋuti sidzedze vavãtɔ nasu wo si abe alesi wole ewɔm le dukɔ 230 kple edzivɔ mee ene. Wole mɔ kpɔm be ame gbogbo aɖewo ava se mawunyakpukpuiwo abe esi le Psalmo 91:14 ene gɔme be: “Maɖee, elabena eku ɖe [nye Yehowa ŋu]; makɔe aɖo kɔkɔƒe, elabena enya nye ŋkɔ.”
[Etenuŋɔŋlɔ]
a Mishnah la nye numeɖenyawo ƒe ƒuƒoƒo aɖe si wotsɔ kpe ɖe Ŋɔŋlɔawo me se la ŋu, eye rabi siwo woyɔ be Tannaim (nufialawo) ƒe numeɖeɖewo dzie wotui ɖo. Ƒe alafa evelia ƒe nuwuwu kple alafa etɔ̃lia ƒe gɔmedzedze M.Ŋ. mee woŋlɔ wo wòzu agbalẽ.
[Nɔnɔmetata si le axa 28]
Le Negeb afisia la, Yehowa ƒe amewo le eƒe ŋkɔ kple eƒe Nya fiam ame bubuwo
[Nɔnɔmetata si le axa 29]
Nuŋɔŋlɔ si dzi Mawu ƒe ŋkɔ dze le