Ne ‘Ya Le Ƒoƒom Le Mía Kpem’

Esime Nyanyuiŋlɔla Marko nɔ nusi teƒe Yesu ƒe nusrɔ̃lawo kpɔ esime wonɔ tɔdziʋu me nɔ agbagba dzem be yewoatso Galilea Ƒua ɖɔm la, egblɔ be “wole fu kpem le [ʋua kuku] me; elabena ya ƒo le wo kpem.” Esi Yesu kpɔtɔ nɔ ƒua dzi la, ekpɔ fu si kpem wonɔ, eye wòzɔ ƒua dzi nukutɔe ɖakpe wo. Esi ‘wòge ɖe wo gbɔ le ʋu la me la, ya la dzudzɔ.’—Marko 6:48-51.

Biblia-ŋlɔla sia ke ka nya ta be le ɣeyiɣi aɖe si do ŋgɔ me la, “ahom sesẽ aɖe va tu.” Eye Yesu “[blu] ɖe ya la ta, . . . tete ya la dzudzɔ ƒoƒo, eye ɖoɖoe gã aɖe zi.”—Marko 4:37-39.

Togbɔ be mɔnukpɔkpɔ mesu mía si egbea be míakpɔ nudzɔdzɔ wɔnuku siawo teƒe o hã la, míate ŋu asrɔ̃ nu geɖe tso wo me. Esi míenye amegbetɔ madeblibowo le ɣeyiɣi vɔ̃wo me ta la, míevo tso fukpekpe ƒe yaƒoƒowo me o. (Timoteo II, 3:1-5) Le nyateƒe me la, míasee le mía ɖokui me ɣeaɖewoɣi be dodokpɔ siwo vaa mía dzi ƒe fukpekpewo nu le sesẽm abe ahom sesẽ si le tutum ene. Gake míate ŋu akpɔ gbɔdzɔe! Yesu le mía kpem be: “Mite va gbɔnye, mi amesiwo katã le agbagba dzem, eye agba le mia wum la, eye nye la, mana dzudzɔ mi.”—Mateo 11:28.

Ne edze abe ɖe ‘ya le ƒoƒom le mía kpem’ ene la, míaƒe dzi ate ŋu ‘adze eme.’ Alekee? Ne míeɖo ŋu ɖe Yehowa Mawu ƒe ŋugbedodo siwo medoa kpo nu o la ŋu.—Tsɔe sɔ kple Yesaya 55:9-11; Filipitɔwo 4:5-7.