Fiaɖuƒe Gbeƒãɖelawo Ka Nya Ta

Woxɔ Woƒe Xɔse ƒe Teƒeɖoɖo

APOSTOLO Paulo nye ŋutsu aɖe si ƒe xɔse ɖedzesi ŋutɔ, eye ede dzi ƒo na haxɔsetɔwo be woawo hã woatu xɔse ɖo nenema. Egblɔ be: “Amesi ke tena va Mawu gbɔ la, naxɔ ase be, Mawu li, eye wònye teƒeɖola na amesiwo dinɛ vevie.” (Hebritɔwo 11:6) Nuteƒekpɔkpɔ siwo gbɔna tso Mozambique la ɖe alesi Yehowa ɖoa eteƒe na amesiwo si xɔse sẽŋu le eye wòɖoa gbe siwo wodona ɖa kple kutrikuku ŋui la fia.

• Nɔvinyɔnu ahosi aɖe si tso Niassa ƒe dziehe nuto me tsi dzi ɖe alesi wòawɔ woa kple via ade nayi “Mawu ƒe Agbemɔ” Nutome Gã Takpekpe la ŋu. Gakpɔmɔnu ɖeka kolia si le esi koe nye nudzadzra le asi si le wo gbɔ la me, gake esi takpekpea wɔɣi nɔ aƒe tum la, ga si wòatsɔ axe woa kple eƒe ƒomea ƒe ketekeɖofe hena yiyi dzaa koe nɔ esi. Ke hã eɖoe kplikpaa be yeaɖo ŋu ɖe Yehowa ƒe mɔnuɖoɖowo ŋu eye wòyi edzi wɔ ɖoɖo hena takpekpea yiyi.

Woa kple via adeawo ɖo ketekea. Esi wonɔ mɔa dzi la, gaxɔlaa te ɖe eŋu be yeaxɔ ga le esi. Esi wòkpɔ be ede akɔtagbalẽvi la, ebia nyae tso dzesidegbalẽvi si wònye ŋu. Nɔvinyɔnua gblɔ nɛ be Yehowa Ðasefowo ƒe nutome gã takpekpeyilawo ƒe akɔtadzesidee. Gaxɔlaa bia be: “Afikae woawɔ takpekpe sia le?” Esi wòse be Nampula nuto si didi tso wo gbɔ kilometa 300 mee wole takpekpea wɔ ge le la, nukutɔe la, ga si woxɔna ƒe afã koe wòyɔ nɛ! Emegbe etsɔ eya kple eƒe ƒomea ƒe tɔtrɔgbɔ tiket nɛ ɖe gaa ƒe afã kpɔtɔea nu. Aleke gbegbe dzi dzɔe enye si be yeɖo ŋu ɖe Yehowa ŋu!—Psalmo 121:1, 2.

• Nyɔnu aɖe si doa vevie sɔlemedede vevie la do gbe ɖa na Mawu ƒe 25 sɔŋ be wòafia mɔ nyuitɔ si dzi yeato asubɔe la ye. Sɔleme si wòdena wɔa sɔlemekɔnuwo kple dekɔnuwo tsakana, eye mexɔe se be subɔsubɔ sia tɔgbe dzea Mawu ŋu o.

Egblɔ be: “Meɖoa ŋku Yesu ƒe nya siwo woŋlɔ ɖe Mateo 7:7 be: “Mibia, eye woana mi; midi, eye miakpɔ; miƒo ʋɔa, eye woaʋui na mi” la dzi ɣesiaɣi. Esi ŋɔŋlɔ sia le tame nam ta la, medoa gbe ɖa na Mawu ɣesiaɣi be wòafia nyateƒe lam. Gbeɖeka míaƒe osɔfo bia tso amesiwo katã dzraa nu le asi si le mía gbɔ me si be woatsɔ ga home aɖe akpe ɖe woƒe adzɔnu aɖewo ŋu vɛ na ye ale be yeayra ɖe wo dzi. Mebui be mesɔ le Ŋɔŋlɔawo nu be wòabia nusiawo o, ale nyemetsɔ naneke yii o. Esi osɔfoa kpɔe be nyemetsɔ ‘nunana’ aɖeke vɛ o la, ete nye dzudzu le hameviawo katã ŋkume. Gbemagbe la, mede dzesii be menye aleae Mawu di be woasubɔ yee o, eyata medo le haa me. Le ɣeyiɣi ma ke me la, meyi gbedodoɖa dzi vevie be makpɔ nyateƒea.

“Mlɔeba la, melé dzi ɖe ƒo hete ɖe ƒonyemetɔ aɖe si nye Yehowa Ðasefo ŋu. Etsɔ trakt aɖe nam, eye esi mexlẽe la, mekpɔe dze sii enumake be Mawu nɔ nye gbedodoɖawo ŋu ɖom nam. Le ɣeyiɣi aɖe megbe la, ŋutsu si mía kplii míenɔ anyi hã te ŋudzedzekpɔkpɔ ɖe Biblia me nyateƒewo ŋu, eye míeɖe mía nɔewo azɔ le se nu. Gake emegbe la, srɔ̃nye va dze dɔ vevie. Gake tso eƒe dɔlélea ƒe gɔmedzedze vaseɖe esime wòaku la, ede dzi ƒo nam be malé nyateƒea me ɖe asi ale be míagado go ake le Paradiso me.

“Medaa akpe na Yehowa ɖaa be eɖo nye gbedodoɖawo ŋu eye wòfia mɔ nyuitɔ si nu masubɔe le lam. Egaɖo nye gbedodoɖawo ŋu nam le mɔ sia nu be vi enyi siwo katã le asinye va zu Yehowa subɔla ɖeadzɔgbewo.”