Biblia Sɔsrɔ̃ Viɖe Le Eme Na Wòa?

“MELE be woaxlẽe ne nunɔla aɖeke meli o.” Nuxlɔ̃ame sia dze le Katolikotɔwo ƒe Biblia aɖewo ƒe axa gbãtɔwo dzi. Kay Murdy, si le Katolikotɔwo ƒe Biblia Nusrɔ̃ƒe le Los Angeles, gblɔ be: “Biblia zazã edziedzi mema mí Katolikotɔwo o, gake nɔnɔmea le tɔtrɔm.” Ede dzesii be ne Katolikotɔwo kpɔ alesi Ŋɔŋlɔ Kɔkɔeawo ate ŋu akpɔ ŋusẽ ɖe woƒe agbe dzi dze sii ko la, “dzodzro ɖoa woa ŋutɔwo me vevie ɖe Biblia ŋu.”

Magazine si nye U.S. Catholic ƒo nu tso nya si mawunyasrɔ̃ƒe dzikpɔla aɖe gblɔ ŋu be Katolikotɔ siwo gena ɖe Biblia-srɔ̃ƒuƒoƒowo me sena le wo ɖokui me be “nu geɖe to yewo Katolikotɔwo ŋu, eye be kesinɔnu geɖe le Biblia me. Wodina be yewoƒe asi nasu kesinɔnu siawo si wosusu be woto yewo ŋu la dzi.”

Aleke kee nyaa ɖale o, “kesinɔnu” kawoe li si ŋu Biblia-nusrɔ̃vi ate ŋu ake ɖo? De ŋugble le nusia ŋu kpɔ: Àdi be yeanya alesi yeanɔ tee ɖe gbesiagbegbenɔnɔ me dzimaɖitsitsiwo nua? Aleke nàte ŋu atu ŋutifafa ɖoe le ƒomea me? Nukatae amemabumabunuwɔwɔ kple nɔnɔme siwo tsi tre ɖe hadomegbenɔnɔ ŋu bɔ alea gbegbe ɖo? Nuka gbɔe egbe sɔhɛwo ƒe ŋutasẽnuwɔwɔwo tso? Míate ŋu akpɔ biabia siawo kple bubu siwo ɖua ta na ame ƒe ŋuɖoɖo siwo ŋu kakaɖedzi le le Mawu ƒe Nya, Biblia, me eye woanye “kesinɔnuwo” nyateƒe, menye na Katolikotɔwo alo Protestanttɔwo ɖeɖeko o ke boŋ na Buddhatɔwo, Hindutɔwo, Moslemtɔwo, Shintotɔwo, mawudzimaxɔselawo kple Mawu ƒe anyinɔnɔ ŋuti ɖikelawo gɔ̃ hã. Abe alesi hakpala la gblɔe ene la, ‘Mawu ƒe nya nye akaɖi na eƒe afɔ kple kekeli na eƒe toƒe.’ Ate ŋu anyee na wò hã.—Psalmo 119:105.