Xexe aɖe si me Nuvlowɔwɔ Manɔ O Le Ŋgɔ

NE ÀTE ŋui la, kpɔ xexe aɖe si me nuvlowɔlawo mele o le susu me ɖa! Kpovitɔwo, gaxɔwo, alo nuvlowɔwɔ nutsitsiɖoɖo manyatalenu xɔasiwo mahiã o. Anye xexe aɖe si me amesiame ade bubu amewo ƒe agbe kple nunɔamesiwo ŋu le. Ðe ema dze abe numevivinya aɖe enea? Ðewohĩ abui nenema, gake tɔtrɔ wɔnuku sia tututu ƒe ŋugbee Biblia do. Ðe manyo be nàse nusi Ŋɔŋlɔawo gblɔ ɖi ku ɖe nuvlowɔwɔ kple nu vɔ̃ɖi bubu siwo yia edzi le anyigba sia dzi la ŋu oa?

Míexlẽ le Psalmo ƒe agbalẽa me be: “Dzi megaku wò le nu vlo wɔlawo ŋu o, eye megaʋã ŋu ɖe amesiwo wɔ nu tovo la ŋu o! Elabena woasi wo xoxoxo abe gbe ene, eye woayrɔ abe aŋgba ene. Ke ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.” (Psalmo 37:1, 2, 11) Le nyateƒe me la, ame aɖeke mate ŋu axe mɔ na Mawu be woagana ŋugbedodo sia kple ŋugbe dodzidzɔname bubu siwo katã wòdo la nava eme o.

Nusi dzi Mawu ato ahe yayra siawo vɛ enye eƒe Fiaɖuƒea. Le Aƒetɔ ƒe Gbedodoɖa me la, Yesu Kristo fia eyomedzelawo be woado gbe ɖa abia be Fiaɖuƒe sia nava eye be woawɔ Mawu ƒe lɔlɔ̃nu le “anyigba dzi, sigbe alesi wowɔna le dziƒo ene.” (Mateo 6:9, 10) Eteƒe madidi o, le Fiaɖuƒe ma me la, ahedada, teteɖeanyi, alo ɖokuitɔdidi maʋã anyigba dzi tɔ aɖeke be wòawɔ nu vlo o. Ðe eteƒe la, Mawu ƒe Nya gblɔ be: “Bli ado kpekpekpe le anyigba dzi kple towo tame.” (Psalmo 72:16) Le nyateƒe me la, Yehowa Mawu anɔ nu nyuiwo nam amesiame si le anyigba dzi yi ɖe mavɔmavɔ me. Vevietɔ wu la, lɔlɔ̃ na Mawu kple na amehavie aʋã amegbetɔƒomea me tɔwo, eye womagatsɔ nuvlowɔwɔ agblẽ xexeame gbeɖegbeɖe akpɔ o.