Wolé Dzi Ðe Ƒo Le Tsitretsiɖeŋu Me
AMEHA dze agbo aɖe he apostolo Paulo ƒe zɔhɛ eve siwo nye Gayo kple Aristarxo yi ɖe woƒe takpeƒe si wowɔa fefe le le Efeso. Esi woɖo afima la, ameha nɔ ɣli dom adãtɔe gaƒoƒo eve sɔŋ be: “Gãe nye Efesotɔwo ƒe Diana la!” (Dɔwɔwɔwo 19:28, 29, 34) Ðe Paulo ƒe zɔhɛawo te ŋu nɔ te sesĩe le tsitretsiɖeŋu sia mea? Nuka koŋue na nusia dzɔ?
Anye ƒe etɔ̃ enye ma si Paulo nɔ gbeƒã ɖem dzidzedzetɔe le Efeso dua me. Esia wɔe be Efesotɔ geɖe va dzudzɔ trɔ̃ subɔsubɔ. (Dɔwɔwɔwo 19:26; 20:31) Trɔ̃ si wosubɔna koŋ le Efeso enye vidzidzi ƒe mawunɔ Diana, si amewo tsɔa klosalo wɔa eƒe xɔ gã dzeani si ƒo xɔwo katã ta le dua me la wònɔa sue na wo ɖokuiwo. Wodoa trɔ̃ xɔ sia siwo wowɔ wòle sue la abe tilawo ene alo tsɔa wo dana ɖe aƒewo me. Le nyateƒe mea, Kristotɔwo ya maƒle trɔ̃ siawo o.—Yohanes I, 5:21.
Demetrio, si nye klosalonutulawo dometɔ ɖeka xɔe se be, Paulo ƒe subɔsubɔdɔa agblẽ nu le yewo ƒe asitsadɔ si me yewokpɔa ga geɖe tsonae la ŋu. Eto nyateƒea ƒe akpa aɖe gbɔgblɔ kple nyakpakpa kpee dzi na ehati aɖaŋudɔwɔla bubuwo xɔe se be amewo adzudzɔ Diana subɔsubɔ le Asia bliboa katã. Esi klosalonutula dzikudolawo nya dze ɣlidodo gɔme henɔ Diana kafum ko la, ʋunyaʋunya gã aɖe dzɔ eye du blibo la tɔ zi.—Dɔwɔwɔwo 19:24-29.
Ame akpeakpewo lɔ bibibi va ƒoƒu ɖe fefewɔƒe si me nukpɔla 25,000 ate ŋu anɔ la. Paulo di be yeaƒo nu na ameha dze agbo la, gake exɔlɔ̃wo dumegãwo gbe nɛ. Mlɔeba, dua me ƒe agbalẽŋlɔla te ŋu fa dzi na ameha la, eye Gayo kple Aristarxo te ŋu do le wosi me eye womewɔ vɔ̃ aɖeke wo o.—Dɔwɔwɔwo 19:35-41.
Egbea, Mawu ƒe amewo hã ate ŋu adze tsitretsiɖeŋulawo kple aglãdzelawo gɔ̃ hã si me le woƒe subɔsubɔdɔa wɔwɔ me. Wogblɔa nyanyuia edziedzi le du siwo me trɔ̃subɔsubɔ, agbegbegblẽnɔnɔ, kple aglãdzedze bɔ ɖo me. Ke hã, wosrɔ̃a apostolo Paulo dzinɔameƒotɔe, amesi ‘megbe nufiafia le gaglãgbe kple tso aƒe me yi aƒe me’ le Efeso dugã la me o. (Dɔwɔwɔwo 20:20) Eye woawo hã kpɔa dzidzɔ nenema ke ne wokpɔ be ‘Yehowa ƒe nya la le tsitsim hele dziɖuɖu kpɔm.’—Dɔwɔwɔwo 19:20.
[Nɔnɔmetata si le axa 30]
Efeso fefewɔƒe ƒe gligbagbãwo