“Tso Egbea dzi la, Mexɔe Se be Mawu aɖe Li Vavã”

UKRAINE-NYƆNU aɖe, si ŋkɔe nye Alexandra, si le Prague, Czech Republic, kpã tso dɔme yina ɖe aƒeme. Esime wòva ʋuɖoƒe la, ekpɔ akplovi aɖe, si klim amewo nɔ la le anyigba. Esi wòtsɔ akplovia la, nusi wòkpɔ le eme wɔ nuku nɛ ŋutɔ. Czech tɔwo ƒe gagbalẽ, si nye koruna 5,000-tɔ, gbogbo aɖewoe nɔ eme! Ame aɖeke hã menɔ gbɔgblɔm be yeƒe akplovi bu o. Esi wònye be amedzroe Alexandra nye le Czech Republic ta la, nuwo nɔ sesẽm nɛ ale gbegbe. Nukae wòawɔ?

Esime wògbɔ va aƒeme la, etsɔ akplovia fia vianyɔnu Victoria. Wodi nutɔa ƒe ŋkɔ kple adrɛs le akplovia me do kpoe. Ke hã, wokpɔ pepa kakɛ aɖe ya le eme si dzi woŋlɔ xexlẽdzesi aɖewo ɖo. Ga dede gadzraɖoƒe ŋuti nuŋlɔɖi ƒe xexlẽdzesi le pepaa ƒe axa ɖeka, eye xexlẽdzesi bubuwo le eƒe axa evelia. Gadzraɖoƒe aɖe si le nutoa me ŋuti nyatakaka aɖewo kple pepa bubu si dzi woŋlɔ “330,000 koruny” (anɔ abe Amerika dɔlar 10,000 ene) ɖo la hã nɔ akplovia me. Ga home ma tututue nɔ akplovia me.

Alexandra zã xexlẽdzesiawo dometɔ ɖeka si wòsusu be anye telefon xexlẽdzesi la tsɔ ƒo ka na gadzraɖoƒea, gake kaƒoƒoa meyi o. Eyata woa kple vianyɔnua woyi ɖe gadzraɖoƒea ɖaƒo nu tso nusi wofɔ la ŋu. Wobia be woadi amesi tɔe ga dede gadzraɖoƒe ŋuti nuŋlɔɖi ƒe xexlẽdzesi si yewokpɔ le akplovia me nye. Gadzraɖoƒea tsa eƒe nuŋlɔɖiwo me ʋuu, gake womekpɔ ame aɖeke si zãa xexlẽdzesi ma le wo gbɔ o. Le ŋufɔke la, Alexandra gatrɔ yi ake kple xexlẽdzesi bubu si le akplovia me. Nyateƒee, nyɔnu aɖe zãa xexlẽdzesi sia le gadzraɖoƒea. Alexandra kple Victoria ƒo ka na nyɔnua, eye etɔe ga la nye vavã. Esi wova do go kple nyɔnua la, eda akpe na wo geɖe eye wòbia be, “Nukae wòle be maxe hafi ate ŋu axɔ ga la?”

Victoria ɖo eŋu be: “Míele mɔ kpɔm be naxe naneke o. Ne ɖe ga la dzro mí la, anye ne míetsɔe vɛ na wò o.” Egblɔ le Czechgbe si mese nyuie o me be: “Esi míenye Yehowa Ðasefowo tae míete ŋu trɔ ga la vɛ na wò ɖo. Míaƒe dzitsinya si míetsɔ Biblia na hehee la meɖe mɔ na mí be míazi nusi menye mía tɔ o la dzi o.” (Hebritɔwo 13:18) Nyɔnua gblɔ dzidzɔtɔe be: “Tso egbea dzi la, mexɔe se be Mawu aɖe li vavã.”