Nuŋɔŋlɔ Akpa Vevi Si Wòwɔ Le Blema Israel

ÈXLẼ Iliad alo Odyssey siwo nye blema Hela hakpanya didi wɔdɔɖeamedzi eve aɖewo la ƒe akpa aɖewo kpɔa? Wosusui be ƒe alafa asiekelia alo enyilia D.M.Ŋ. mee woŋlɔ wo. Ne míetsɔ hakpanya siawo sɔ kple Biblia, si ŋɔŋlɔ gɔme wodze ƒe alafa geɖewo do ŋgɔ la, nya kae míagblɔ? Agbalẽ si nye The Jewish Bible and the Christian Bible gblɔ be: “Biblia ƒo nu tso nuŋɔŋlɔ kple nuŋlɔɖiwo ŋu ade zi 429 ya teti. Esia ɖe dzesi ŋutɔ ne míeɖo ŋkui be zi ɖeka koe woƒo nu tso nuŋɔŋlɔ ŋu le Iliad me, eye womeƒo nu tso eŋu kura le Odyssey ya me o.”

Agbalẽ si nye The Oxford Encyclopedia of Archaeology in the Near East gblɔ be “edze abe nuŋɔŋlɔ nye subɔsubɔ ƒe akpa vevi aɖe le blema Israel ene.” Le kpɔɖeŋu me, woŋlɔ Se ƒe nubabla la da ɖi, eye emegbe woxlẽnɛ edziedzi le dutoƒo na ŋutsuwo, nyɔnuwo, kple ɖeviwo siaa. Woƒoa ƒu xlẽnɛ hesrɔ̃nɛ ɖekae, eye ame ɖekaɖekawo hã xlẽnɛ le wo ɖokuiwo si. Le ŋkulelé ɖe Sea ƒe akpa aɖewo ŋu vɔ megbe la, Liverpool Yunivɛsiti ƒe nufialagã Aƒetɔ Alan Millard ƒo nya ta be: “Edze ƒã be, wobu nuxexlẽ kple nuŋɔŋlɔ be ewɔa akpa vevi aɖe le ame siwo le ɖoƒe ɖe sia ɖe kloe ƒe agbenɔnɔ me.”—Mose V, 31:9-13; Yosua 1:8; Nexemya 8:13-15; Psalmo 1:2.

Apostolo Paulo gblɔ ale si wòle be Kristotɔwo nabu nuŋlɔɖi kɔkɔeawoe ale: “Nusi ke woŋlɔ ɖi tsã la, woŋlɔe le míaƒe nufiafia ta, bene míatsɔ ŋɔŋlɔawo ƒe dzidodo kple akɔfafa akpɔ mɔkpɔkpɔ.” Ðe nèɖea ŋudzedzekpɔkpɔ vavãtɔ fiana ɖe Biblia ŋu to exexlẽ edziedzi mea?—Romatɔwo 15:4.