Ŋkɔ Le Mawu Sia?
Ale si ame geɖewo ɖoa nya sia ŋui:
▪ “Eŋkɔe nye Mawu.”
▪ “Ŋkɔ ŋutɔŋutɔ mele esi o.”
Nya kawoe Yesu gblɔ?
▪ “Miawo mido gbe ɖa ale: ‘Mía Fofo si le dziƒowo, wò ŋkɔ ŋuti nakɔ.’” (Mateo 6:9) Yesu xɔe se be ŋkɔ le Mawu si.
▪ “Mena wonya wò ŋkɔ la, eye mana woanyae, ale be lɔlɔ̃ si nètsɔ lɔ̃m la nanɔ wo me, eye manɔ ɖekawɔwɔ me kpli wo.” (Yohanes 17:26) Yesu na amewo nya Mawu ƒe ŋkɔ.
▪ “Miegale kpɔ ye ge o, va se ɖe esime miagblɔ be, ‘Woayra ame si gbɔna le Yehowa ƒe ŋkɔ me!’” (Luka 13:35; Psalmo 118:26) Yesu zã Mawu ƒe ŋkɔ la.
MAWU ŋutɔ yɔ eƒe ŋkɔ na mí. Woŋlɔ ɖi be egblɔ be: “Nyee nye Yehowa, ŋkɔnyee.”a (Yesaya 42:8) Ŋkɔ Yehowa ye nye Hebrigbe me ŋkɔ si Mawu tsɔ na eɖokui la ƒe gɔmeɖeɖe si ame akpa gãtɔ zãna le Eʋegbe me. Ðewohĩ awɔ nuku na wò be nàsee be Hebrigbe me ŋkɔ tɔxɛ sia dze zi akpe geɖe le Biblia ƒe asinuŋɔŋlɔgbalẽ xoxotɔwo me. Le nyateƒe me la, edze le Biblia me zi gbɔ zi geɖe wu ŋkɔ bubu ɖe sia ɖe.
Ame aɖewo aɖo nyabiase si nye “Mawu ƒe ŋkɔ ɖe” ŋu be eyae nye “Mawu.” Gake le nyateƒe me la, esia mena nyatakaka boo aɖeke mí tso eŋu o, ɖeko wòle abe ale si woaɖo nyabiase si nye “Ame kae ɖu dzi le akɔdada sia me?” ŋu be “Hoʋlila lae” ene. Esiawo dometɔ aɖeke menye ŋuɖoɖo gobi aɖeke o, elabena menye ŋkɔ ŋutɔŋutɔwoe “Mawu” kple “hoʋlila” nye o.
Nu ka tae Mawu ɖe eƒe ŋkɔ fia mí? Ewɔ esia bene míadze si ye nyuie wu. Le kpɔɖeŋu me, woate ŋu ayɔ ame aɖe be Aƒetɔ, Dɔtɔ, Papa, alo Tɔgbui, le ale si nɔnɔmeawo le la nu. Dzesideŋkɔ siawo ɖe nane fia mí tso amea ŋu ya. Gake amea ƒe ŋkɔ ŋutɔŋutɔ nana míeɖoa ŋku nu sia nu si míenya tso eŋu la dzi. Nenema kee dzesideŋkɔ siwo nye Aƒetɔ, Ŋusẽkatãtɔ, Fofo, kple Wɔla hea susu yia Mawu ƒe dɔwɔwɔwo ƒe akpa vovovowo dzi. Gake eƒe ŋkɔ ŋutɔŋutɔ, Yehowa, koe nana míeɖoa ŋku nu sia nu si míenya tso eŋu la dzi. Ðe màlɔ̃ ɖe edzi be hafi nàte ŋu anya Mawu nyuie la, ele be nànya eƒe ŋkɔ oa?
Ele vevie be nànya ŋkɔ ma, eye wògale vevie hã be nànɔ ezãm. Nu ka tae? Elabena Biblia gblɔ na mí be: “Ame sia ame si yɔa Yehowa ƒe ŋkɔ la, woaɖee.”—Romatɔwo 10:13; Yoel 3:5.
[Etenuŋɔŋlɔ]
a Ne èdi numeɖeɖe ku ɖe gɔmesese si le Mawu ƒe ŋkɔa ŋu kple nu si tae ŋkɔa medze le Biblia gɔmeɖeɖe aɖewo me o la, àte ŋu akpɔ agbalẽ si nye Nuka Tututue Nye Biblia ƒe Nufiafia? ƒe axa 195-197. Yehowa Ðasefowoe tae.
[Nya si ɖe dzesi si le axa 6]
Woate ŋu ayɔ ame aɖe be Aƒetɔ, Dɔtɔ, Papa, alo Tɔgbui, le ale si nɔnɔmeawo le la nu. Gake amea ƒe ŋkɔ ŋutɔŋutɔ nana míeɖoa ŋku nu sia nu si míenya tso amea ŋu la dzi