Yesu—Nu Si Ta Wòku Ðo
“Amegbetɔvi la . . . [va be] yeatsɔ yeƒe luʋɔ [alo, agbe] ana wòanye tafe ɖe ame geɖewo ta.”—MARKO 10:45.
YESU nya nu siwo ava dzɔ ɖe ye dzi. Enyae be yemanɔ agbe le ŋutifafa me ɣeawokatãɣi o. Ke boŋ woawu ye ŋutasesẽtɔe esime yele yeƒe ƒe 30-awo me, eye edzra ɖo nyuie hã ɖe eƒe kua ŋu.
Biblia gblɔ tso Yesu ƒe kua ŋu be ele vevie ŋutɔ. Numekugbalẽ aɖe gblɔ be woƒo nu tso Yesu ƒe kua ŋu tẽe zi gbɔ zi 175 le Kristotɔwo Ƒe Hela Ŋɔŋlɔawo, alo Nubabla Yeyea me. Gake nu ka tae wòle be Yesu nakpe fu ahaku ɖo? Ehiã be míanya, elabena Yesu ƒe kua ate ŋu aɖe vi na mí ŋutɔ le agbe me.
▪ Nu si Yesu nɔ mɔ kpɔm na Le Yesu ƒe anyigba dzi nɔnɔ ƒe ƒe mamlɛtɔ me la, exlɔ̃ nu eƒe nusrɔ̃lawo enuenu ku ɖe fu si wòakpe kple ku si wòava ku la ŋu. Esi Yesu kple eƒe apostolo 12-awo nɔ mɔ dzi yina Yerusalem be wòaɖu Ŋutitotoŋkekenyuia zi mamlɛtɔ la, egblɔ na wo be: “Woade Amegbetɔvi la asi na nunɔlawo ƒe tatɔwo kple agbalẽfialawo, eye woatso kufia nɛ, eye woadee asi na dukɔwo me tɔwo, eye woaɖu fewu le eŋu, eye woaɖe ta ɖe eŋu, eye woaƒoe kple atam, eye woawui.”a (Marko 10:33, 34) Nu kae na wòka ɖe edzi be nu siawo tututue ava dzɔ ɖe ye dzi?
Yesu nya nu tso nyagblɔɖi gbogbo siwo le Hebri Ŋɔŋlɔawo me, siwo ƒo nu tso ale si eƒe agbe ava wu enui ŋu, la ŋu nyuie. (Luka 18:31-33) Bu nyagblɔɖi siawo dometɔ aɖewo kple Ŋɔŋlɔ siwo kpe ɖe wo ŋu, siwo ɖe ale si wova emee, la ŋu kpɔ.
Nu siwo adzɔ ɖe Mesia la dzi dometɔ aɖewoe nye esi:
▪ Woafia eyome mɔ ɖe klosalo 30 ta.—ZAXARIYA 11:12; MATEO 26:14-16.
▪ Woaƒoe aɖe ta ɖe eŋu.—YESAYA 50:6; MATEO 26:67; 27:26, 30.
▪ Woahee ɖe ati ŋu.—PSALMO 22:17; MARKO 15:24, 25.
Woaɖe alɔme le eŋu esi wòle fuwɔametia ŋu.—PSALMO 22:8, 9; MATEO 27:39-43.
▪ Woawui, ke womaŋe eƒe ƒu aɖeke o.—PSALMO 34:21; YOHANES 19:33, 36.
Nyagblɔɖi siawo kple bubu geɖewo va eme ɖe Yesu dzi. Mate ŋu adzɔ gbeɖe be eya ŋutɔ nana nu siawo nava eme o. Ale si nyagblɔɖi siawo katã va eme ɖe Yesu dzi la ɖo kpe edzi be vavãe, Mawue dɔe.b
Gake nu ka tae wòhiã be Yesu nakpe fu ahaku?
▪ Yesu ku ale be woakpɔ nya vevi aɖewo gbɔ Yesu nya nu tso nya vevi si ka ame sia ame le xexea me godoo, si fɔ ɖe te le Eden bɔa me la ŋu. Gbɔgbɔmenuwɔwɔ aɖe si dze aglã la ble Adam kple Xawa, si wɔe be wotiae be yewomaɖo to Mawu o. Esi atsu kple asi sia dze aglã la, nya aɖe fɔ ɖe te, si nye be: Ðe Mawu dze aɖu xexea katã dzia, alo be ɖe wòɖua dzi le mɔ nyuitɔ nua? Nu vɔ̃ si wowɔ la fɔ nya bubu ɖe te: Ðe amegbetɔwo ate ŋu awɔ nuteƒe na Mawu ne wodo wo kpɔa?—1 Mose 3:1-6; Hiob 2:1-5.
Le Yehowa ƒe dziɖulanyenye, kpakple amegbetɔwo ƒe nuteƒewɔwɔ ƒe nyaa siaa gome la, Yesu na wokpɔ ŋuɖoɖo nyuitɔ kekeake si womate ŋu ake ɖii o. Yesu to ale si wòɖo to bliboe “yi ɖa se keke ku me ke . . . le fuwɔameti ŋu” dzi ɖee fia be yede Mawu dzi be eyae dze anye xexea katã dzi ɖula. (Filipitɔwo 2:8) Yesu ɖee fia hã be amegbetɔ deblibo ate ŋu awɔ nuteƒe na Yehowa le dodokpɔ sesẽtɔ kekeake gɔ̃ hã me.
▪ Yesu ku ale be ameƒomea nakpɔ ɖeɖe Nyagblɔɖila Yesaya gblɔe ɖi be Mesia si ŋugbe wodo la ƒe fukpekpe kple eƒe kua anye avuléle ɖe amegbetɔwo ƒe nu vɔ̃wo ta. (Yesaya 53:5, 10) Yesu se esia gɔme nyuie, eye wòlɔ̃ faa be yeatsɔ “yeƒe luʋɔ ana wòanye tafe ɖe ame geɖewo ta.” (Mateo 20:28) Eƒe vɔsakua ʋu mɔ ɖi na amegbetɔ madeblibowo be ƒomedodo nyui nanɔ woa kple Yehowa dome, eye be woaɖe wo tso nu vɔ̃ kple ku si me. Yesu ƒe kua na mɔnukpɔkpɔ su mía si be míaƒe asi nagasu nu si Adam kple Xawa bu, si nye agbe tegbee nɔnɔ le nɔnɔme siwo de blibo me le anyigba dzi.c—Nyaɖeɖefia 21:3, 4.
▪ Nu si nàte ŋu awɔ Le nyati siawo siwo kplɔ wo nɔewo ɖo me la, míedzro nu siwo Biblia gblɔ tso Yesu ŋu—afi si wòtso, ale si wònɔ agbee, kple nu si ta wòku ɖo la me. Nyateƒenya siwo me míedzro ku ɖe Yesu ŋu la ate ŋu akpe ɖe ame ŋu wòaɖɔ susu totro siwo le esi ku ɖe Yesu ŋu la ɖo. Gake mese ɖe afi ma o, ne míenɔ agbe ɖe wo nu la, woana míakpɔ yayra geɖe—agbea adze edzi na mí egbea, eye míakpɔ agbe mavɔ le etsɔme. Biblia gblɔ nu siwo wòle be míawɔ be yayra siawo nasu mía si la na mí.
▪ Srɔ̃ nu geɖe tso akpa si Yesu Kristo wɔna le Yehowa ƒe tameɖoɖowo me vava me ŋu.—YOHANES 17:3.
▪ Xɔ Yesu dzi se to eɖeɖe fia le wò agbenɔnɔ me be èxɔe abe wò Ðela ene.—YOHANES 3:36; DƆWƆWƆWO 5:31.
Adzɔ dzi na Yehowa Ðasefowo be yewoakpe ɖe ŋuwò nàsrɔ̃ nu geɖe tso Yesu Kristo, Mawu ƒe “Tenuvi,” ame si dzi míate ŋu ato axɔ nunana si nye “agbe mavɔ” la ŋu.—Yohanes 3:16.
[Etenuŋɔŋlɔwo]
a Yesu yɔ eɖokui zi geɖe be “Amegbetɔvi la.” (Mateo 8:20) Menye ɖeko nyagbe sia fia be enye amegbetɔ ŋutɔŋutɔ ko o, ke eɖee fia hã be eyae nye ‘amegbetɔ vi’ si ŋu woƒo nu tsoe le Biblia me nyagblɔɖiwo me.—Daniel 7:13, 14.
b Ne èdi be yeanya nu geɖe tso nyagblɔɖi siwo va eme ɖe Yesu dzi ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe megbenyawo ƒe tanya si nye “Yesu Kristo—Mesia si Ŋugbe Wodo.” Yehowa Ðasefowoe tae.
c Ne èdi be yeanya nu geɖe tso asixɔxɔ si le Yesu ƒe vɔsakua ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 5 lia si ƒe tanyae nye “Tafe La—Mawu ƒe Nunana Gãtɔ Kekeake.”