Nu Kae Wòle Be Woafia Ðeviwo?

“Ŋɔŋlɔ blibo la tso Mawu ƒe gbɔgbɔ me, eye wònyo na nufiafia, na nyagbename, na ɖɔɖɔɖo, na amehehe le dzɔdzɔenyenye me.”—2 TIMOTEO 3:16.

EHIÃ be woafia nyateƒe si ku ɖe Mawu ŋu la ɖeviwo. Afi kae woakpɔ nufiame sia le? Woakpɔe le mawusubɔsubɔgbalẽ si ŋu wodea asixɔxɔe wu le xexea me godoo, si nye Biblia, me.

Biblia le abe lɛta si tso Mawu gbɔ ene. Mawu ɖe ame si wònye fia mí le lɛta sia me, eye enaa agbe nyui nɔnɔ ŋuti mɔfiamewo viawo katã, tsitsiawo kple ɖeviwo siaa. De dzesi nufiame siwo le Biblia me la dometɔ aɖewo kple nu siwo ɖeviwo kura gɔ̃ hã ate ŋu asrɔ̃ tso wo me.

Nu kae Mawu di be míanya tso ye ŋu?

◼ Nu si Biblia fia: “Ne woadze sii be, ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!”—Psalmo 83:19.

Nufiamea: Menye ŋusẽ dzro aɖe koe Mawu nye o, ke boŋ Ame ŋutɔŋutɔ si si ŋkɔ lee wònye.

◼ Nu si Biblia fia: “Yehowa dzroa dziwo katã me kpɔna, eye wònya tamesusuwo katã! Ne èdii la, ana be nakpɔe.” —1 Kronika 28:9.

Nufiamea: Yehowa Mawu tsɔ ɖe le eme na mí katã, ɖevi suewo hã le eme. (Psalmo 10:14; 146:9) Edi be míasrɔ̃ nu tso ye ŋu.

◼ Nu si Biblia fia: “Migate . . . tsyɔ̃eviwo ɖe anyi o. Ne ète wo ɖe anyi, eye wodo ɣli yɔm la, ekema maɖo to woƒe ɣlidodo la.”—2 Mose 22:21-23.

Nufiamea: Yehowa sea ɖeviwo gɔ̃ hã ƒe gbedodoɖawo. Míate ŋu aƒo nu kple Mawu enuenu ahagblɔ míaƒe dzimesusuwo kple ale si míesena le mía ɖokui me nɛ.

◼ Nu si Biblia fia: “Wole Mawu tetekpɔ dzi ɖaa, eye wodo dziku na Israel ƒe kɔkɔetɔ la.”—Psalmo 78:41.

Nufiamea: Nya siwo míegblɔna kple nu siwo míewɔna la wɔa dɔ ɖe Yehowa dzi, eya ta ele be míabu nuwo ŋu nyuie hafi aƒo nu alo aɖe afɔ aɖe.

Aleke wòle be míawɔ nu ɖe ame ƒomevi bubuwo ŋu?

◼ Nu si Biblia fia: “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.”—Dɔwɔwɔwo 10:34, 35.

Nufiamea: Ne Mawu lɔ̃ ame ƒomeviwo katã la, ke mele be míada ame aɖewo ɖe anyi le esi woƒe ŋutigbalẽ ƒe amadede alo mo ƒe dzedzeme to vovo na mía tɔ ta o.

◼ Nu si Biblia fia: “Minɔ dzadzraɖoɖi ɣesiaɣi be miaʋli mɔkpɔkpɔ si le mia si la ta le ame sia ame si abia nya mi tso eŋu la ŋkume, gake mitsɔ tufafa kple bubu deto wɔ esiae.”—1 Petro 3:15.

Nufiamea: Ne míele dze ɖom tso mawusubɔsubɔ ŋu la, ele be míaƒo nu tso míaƒe dzixɔsewo ŋu kple kakaɖedzi, gake le tufafa me. Azɔ hã, ele be míade bubu ame siwo ƒe dzixɔsewo to vovo na mía tɔwo la ŋu.

Aleke wòle be míawɔ nu ɖe míaƒe ƒomea me tɔwo ŋu?

◼ Nu si Biblia fia: “Ðeviwo, miɖo to mia dzilawo le nu sia nu me, elabena esia dzea ame ŋu le Aƒetɔ la me.”—Kolosetɔwo 3:20.

Nufiamea: Ne ɖeviwo nye toɖolawo la, woɖenɛ fiana be yewolɔ̃ yewo dzilawo, eye yewodi be yewoadze Mawu ŋu.

◼ Nu si Biblia fia: “Miyi edzi miado dzi anɔ anyi kple mia nɔewo, eye miatsɔ anɔ mia nɔewo kem faa ne nya aɖe le ame aɖe si ɖe nɔvia ŋu. Ale si Yehowa tsɔ ke mi faa la, miawo hã miwɔ nenema ke.”—Kolosetɔwo 3:13.

Nufiamea: Ɣeaɖewoɣi la, míaƒe ƒometɔwo kple ame bubuwo ate ŋu awɔ nu siwo ate ɖe mía dzi. Gake ne míedi be Mawu natsɔ míaƒe vodadawo ake mí la, ele be míawo hã míatsɔe ake amewo.—Mateo 6:14, 15.

Nu ka tae wòle be míaɖi anukware ahanyo dɔme?

◼ Nu si Biblia fia: “Esi mieɖe aʋatsokaka ɖa azɔ la, mia dome ame sia ame neto nyateƒe na ehavi.”—Efesotɔwo 4:25.

Nufiamea: Ne míetoa nyateƒe la, ekema míele Mawu srɔ̃m, eye esia adzɔ dzi nɛ. Ne míedaa alakpa la, míava nɔ abe Mawu ƒe futɔ Abosam, ame si nye “aʋatsokafofo” la ene.—Yohanes 8:44; Tito 1:2.

◼ Nu si Biblia fia: “Nu sia nu si miedina be amewo nawɔ na mi la, ele be miawo hã miawɔ nenema ke na wo.”—Mateo 7:12.

Nufiamea: Ele be míabu míaƒe ƒometɔwo kple ame bubu siwo le míaƒe nutoa me ƒe seselelãmewo, nukpɔsusuwo, kple hiahiãwo ŋu. Ne ‘míesea veve ɖe ame nu’ la, ame bubuwo hã adi be yewoanyo dɔme na mí.—1 Petro 3:8; Luka 6:38.

Kpɔɖeŋu siawo ɖee fia be Biblia me nufiamewo ate ŋu akpe ɖe ɖeviwo ŋu woava zu ame tsitsi siwo kpɔa ŋudzedze ɖe nu ŋu, amebulawo, kple ame siwo sea veve ɖe ame nu. Gake ame kae wòle be wòafia nu siawo ɖeviwo?