Nyabiabia Siwo Tso Exlẽlawo Gbɔ

Ðe wòanya wɔ be míanya nyagblɔɖi siwo le Hebri Ŋɔŋlɔawo me ku ɖe Mesia la ŋu ƒe agbɔsɔsɔme pɛpɛpɛa?

Ne míesrɔ̃ Hebri Ŋɔŋlɔawo nyuie la, míakpɔ nyagblɔɖi blananewo siwo va eme ɖe Yesu Kristo dzi. Nyagblɔɖi siawo gblɔ afi si woadzi Mesia la le kple ƒome si me wòadzɔ tso, ɣeyiɣi si me wòado, nu siwo wòawɔ, ale si woawɔ nu ɖe eŋu, kpakple akpa si wòawɔ le Yehowa Mawu ƒe ɖoɖowo me la ɖi. Nyagblɔɖi siawo katã ƒe ƒuƒoƒo kpe ɖe mía ŋu míekpɔe dze sii be Yesu ye nye Mesia la. Gake ehiã be míaɖɔ ŋu ɖo ne míele agbagba dzem be míanya nyagblɔɖi siwo le Hebri Ŋɔŋlɔawo me ku ɖe Mesia la ŋu ƒe xexlẽme tututu.

Menye ame sia amee lɔ̃ ɖe nyagblɔɖi siwo ku ɖe Mesia la ŋu alo esiwo meku ɖe eŋu o la dzi o. Aƒetɔ Alfred Edersheim ŋlɔ ɖe eƒe numekugbalẽ aɖe me be, le blema rabiwo ƒe nuŋlɔɖiwo me la, wotia Hebri Ŋɔŋlɔawo ƒe akpa vovovo 456 be woku ɖe Mesia la ŋu, togbɔ be womeyɔ Mesia la tẽe le Ŋɔŋlɔawo ƒe akpa mawo dometɔ geɖe me o hã. (The Life and Times of Jesus the Messiah [Yesu Mesia La Ƒe Agbenɔnɔ Kple Eƒe Ɣeyiɣia]) Ne míelé ŋku ɖe nuŋlɔɖi 456 siwo ŋu woƒo nu tsoe ŋu nyuie la, míakpɔe be nyabiasewo fɔ ɖe te nenye be wo dometɔ aɖewo nye nyagblɔɖi siwo ku Yesu Kristo ŋu nyateƒe hã. Le kpɔɖeŋu me, Aƒetɔ Edersheim gblɔ be Yudatɔwo bua 1 Mose 8:11 be eku ɖe Mesia la ŋu. Wogblɔ be “amitiɖɔmee si ahɔne la tsɔ vae la tso Mesia Toa dzi.” Agbalẽŋlɔlaa gayɔ 2 Mose 12:42 hã. Esi wònɔ ale si Yudatɔwo mese mawunyakpukpui sia gɔme nyuie o me ɖem la, egblɔ be: “Abe ale si Mose do tso gbedadaƒo la, nenema kee Mesia la ado tso Roma.” Ðikeke mele eme o be, asesẽ na agbalẽnyala geɖewo kple ame bubuwo be woakpɔ ɖekawɔwɔ si le mawunyakpukpui eve siawo kple Yesu Kristo ŋuti numeɖeɖe sia si menye nyateƒe o la dome.

Nenye be míatsɔ míaƒe susuwo aɖo nyagblɔɖi siwo va eme ɖe Yesu Kristo dzi ŋutɔŋutɔ la ɖeɖe ŋu gɔ̃ hã la, míakpɔe be asesẽ be míalɔ̃ ɖe xexlẽme aɖe koŋ dzi. Le kpɔɖeŋu me, bu Yesaya ta 53, afi si Mesia la ŋuti nyagblɔɖi vovovowo le ŋu kpɔ. Nyagblɔɖi siwo le Yesaya 53:2-7 la dometɔ aɖewoe nye: “Nɔnɔme kple ɖekadzedze mele eŋu o . . . Amegbetɔwo do vloe, eye wogbee . . . Eyae tsɔ míaƒe dɔlélewo . . . Wode abi eŋu le míaƒe dzidadawo ta . . . Abe alẽ, si wokplɔ yina wuwu ge ene la . . . Nenema eya hã meke nui o.” Ðe míabu Yesaya ta 53 ƒe akpa sia katã be enye Mesia la ŋuti nyagblɔɖi ɖeka, alo ɖe míabu Mesia la ŋuti nya siawo dometɔ ɖe sia ɖe be enye nyagblɔɖi le eɖokui sia?

De ŋugble tso Yesaya 11:1, afi si gblɔ be “atilɔ amie tso Isai ƒe atitakpo me, eye dzedze atso eƒe ke me atse ku,” la hã ŋu kpɔ. Le kpukpui 10 lia me la, nyagblɔɖi sia gadze ake eye wozã nya mawo tɔgbi. Ðe míabu mawunyakpukpui eve siawo be wonye nyagblɔɖi vovovo evea, alo abe nyagblɔɖi ɖeka si wogbugbɔ gblɔ enea? Eme kɔ ƒãa be, ale si míeƒo nya ta le Yesaya ta 53 kple Yesaya ta 11 ŋu la akpɔ ŋusẽ ɖe Mesia la ŋuti nyagblɔɖi agbɔsɔsɔme si míayɔ la dzi.

Eya ta anyo be míaganɔ nyagblɔɖi siwo le Hebri Ŋɔŋlɔawo me ku ɖe Mesia la ŋu ƒe agbɔsɔsɔme aɖe koŋ yɔm o. Yehowa ƒe habɔbɔa ta agbalẽ gbogbo aɖewo siwo ƒo nu tso Yesu ŋuti nyagblɔɖi blananewo kple ale si wova emee ŋu.a Nyagblɔɖi mawo siwo ŋu woƒo nu tso ate ŋu akpe ɖe mía ŋu eye woanye dzideƒotsoƒe na mí le míaƒe ɖokuisinusɔsrɔ̃ kple ƒomenusɔsrɔ̃, kpakple gbedzisubɔsubɔdɔa siaa me. Gawu la, aleke kee nyagblɔɖi siwo ku ɖe Mesia la ŋu ɖasɔ gbɔe o, wonye kpeɖodzi sẽŋu na mí be Yesu ye nye Kristo, alo Mesia la.

[Etenuŋɔŋlɔ]