‘Èɖe Wo Fia Vidzĩwo’

Àdi be yeanya nyateƒe si ku ɖe Mawu ŋu, si fia be nàdze si ame si wònye, nu siwo wòlɔ̃ kple nu siwo wòlé fuia? Yehowa Mawu ɖe eŋuti nyateƒe bliboa fia le eƒe Nya, Biblia me. Gake menye ame sia ame koe ate ŋu axlẽ Biblia ake ɖe nyateƒe ma ŋu o. Nu ka tae? Elabena mɔnukpɔkpɔe wònye be ame nanya Mawu ŋuti nyateƒea, eye menye amewo katã sie wòsuna o. Na míadzro nu si Yesu gblɔ ku ɖe nya sia ŋu la me kpɔ.—Xlẽ Mateo 11:25.

Wodze mawunyakpukpui ma me nyawo gɔme be: ‘Ɣemaɣi la, Yesu ɖo ŋu gblɔ bena.’ Eya ta anɔ eme be nya si Yesu gblɔ ɖe nya sia yome la ku ɖe nu si dzɔ va yi teti ko la ŋu. Ðeko Yesu ka mo na Galilea dugã etɔ̃ me tɔ siwo mexɔ edzi se o togbɔ be ewɔ nukudɔwo le duawo me hafi la ŋu koe nye ema. (Mateo 11:20-24) Ðewohĩ àbia be, ‘Aleke wòate ŋu adzɔe be amewo nakpɔ Yesu ƒe nukudɔ mawo teƒe gake woagbe nyateƒenya siwo wògblɔ la dzi xɔxɔ se?’ Woƒe dzimesesẽ tae womexɔ edzi se o ɖo.—Mateo 13:10-15.

Yesu nyae be hafi míate ŋu anya Mawu ŋuti nyateƒe si le Biblia me la, míehiã nu eve: Woawoe nye Mawu ƒe kpekpeɖeŋu kple dzi nyui si anɔ mía si. Yesu gblɔ be: “Fofo, dziƒo kple anyigba ƒe Aƒetɔ, mekafu wò le dutoƒo, elabena èɣla nu siawo ɖe nunyalawo kple tagbɔɖaɖɛtɔwo, eye nèɖe wo fia vidzĩwo.” Ède dzesi nu si tae míate ŋu agblɔ be nyateƒea nyanya tso Mawu ŋu le Biblia me la nye mɔnukpɔkpɔa? Gome le Yehowa si be wòatia ame si wòaɖe nyateƒea afia, elabena eyae nye “dziƒo kple anyigba ƒe Aƒetɔ.” Gake esia mefia be Mawu kpɔa ame ŋkume le go sia me o. Ke nu ka tae wòɖea Biblia me nyateƒea fiaa ame aɖewo, eye meɖenɛ fiana ame bubuwo ya o?

Yehowa vea ɖokuibɔbɔlawo nu, ke menye dadalawo o. (Yakobo 4:6) Eɣlaa nyateƒea ɖe “nunyalawo kple tagbɔɖaɖɛtɔwo,” siwo nye xexe sia me nunyalawo kple agbalẽnyala siwo susui be yewomehiã na eƒe kpekpeɖeŋu o, le woƒe dada kple ale si woɖoa dzi ɖe wo ɖokuiwo ŋu ta. (1 Korintotɔwo 1:19-21) Gake eɖea nyateƒea fiaa “vidzĩwo,” siwo nye ame siwo si dzi nyui le, siwo bɔbɔa wo ɖokuiwo abe ɖeviwo ene la. (Mateo 18:1-4; 1 Korintotɔwo 1:26-28) Mawu ƒe Vi, Yesu, de dzesi ɖokuibɔbɔlawo kple dadalawo siaa. Subɔsubɔhakplɔla geɖe siwo nye agbalẽnyalawo kple dadalawo mese Yesu ƒe gbedeasia gɔme o, gake tɔƒodela bɔbɔɖokuiwo ya se egɔme. (Mateo 4:18-22; 23:1-5; Dɔwɔwɔwo 4:13) Le ɣeyiɣi ma ke me la, kesinɔtɔwo kple agbalẽnyala siwo bɔbɔ wo ɖokui ɖe anyi le dzi me la va zu Yesu yomedzelawo.—Luka 19:1, 2, 8; Dɔwɔwɔwo 22:1-3.

Nya si míebia le gɔmedzedzea me la gafɔ ɖe te be: Àdi be yeanya Mawu ŋuti nyateƒea? Ne èdii la, ke ɖewohĩ adzɔ dzi na wò be nànya be Mawu mekpɔa ŋudzedze ɖe ame siwo bua wo ɖokuiwo nunyalawoe le xexe sia me la ŋu o. Gake evea ame siwo ɖewohĩ xexe sia me nunyalawo abu ame tsɛwoe la nu. Ne èbɔbɔ ɖokuiwò srɔ̃ Mawu ƒe Nyaa la, wò hã àte ŋu ava nɔ ame siwo ase eŋuti nyateƒea gɔme la dome—nunana xɔasie esia nye tso Yehowa gbɔ. Nyateƒe ma nyanya ate ŋu ana nàkpɔ dzidzɔ le agbe me fifia, eye wò asi nasu “agbe vavã la,” si nye agbe tegbee nɔnɔ le dzɔdzɔenyenye ƒe xexe yeye si ŋugbe Mawu do be ava kpuie me la dzi.a—1 Timoteo 6:12, 19; 2 Petro 3:13.