Ðe Yesu Do Ŋugbe Na Nu Vlo Wɔlaa Be Ava Nɔ Agbe Le Dziƒoa?

Nu si tae amewo biaa nya sia ɖoe nye be Yesu do ŋugbe na nu vlo wɔla si woklã ɖe ati ŋu le exa la be anɔ agbe le Paradiso me. Yesu gblɔ nɛ be: “Vavã mele egblɔm na wò egbea be: Ànɔ Paradiso me kplim.” (Luka 23:43) De dzesii be Yesu megblɔ afi si Paradiso ma anɔ o. Ke ɖe Yesu ƒe nyawo fia be nu vlo wɔlaa anɔ dziƒo kpli yea?

Gbã la, na míakpɔe ɖa be ɖe nu vlo wɔla ma ɖo nudidi siwo wodi tso ame siwo anɔ agbe le dziƒo si la gbɔ hã. Wonyrɔa ame siwo si agbenɔnɔ le dziƒo ƒe mɔnukpɔkpɔ su la kple tsi kpakple gbɔgbɔ kɔkɔe, si wɔnɛ be wozua Yesu ƒe nusrɔ̃lawo kple ame siwo Mawu xɔ abe viawo ene. (Yohanes 3:3, 5) Nu bubu aɖe si wodi tso wo sie nye be woanɔ agbe ɖe Mawu ƒe agbe nyui nɔnɔ ƒe dzidzenuwo nu eye woaɖe nɔnɔme nyuiwo abe anukwareɖiɖi, nuteƒewɔwɔ kple nublanuikpɔkpɔ ene afia. (1 Korintotɔwo 6:9-11) Ele hã be woawɔ nuteƒe na Mawu kple Kristo le woƒe anyigbadzinɔɣi va se ɖe woƒe kugbe. (Luka 22:28-30; 2 Timoteo 2:12) Ne woɖo nudidi siawo gbɔ ko hafi woate ŋu aɖee afia be yewodze be woafɔ yewo ɖe tsitre eye woatsɔ dɔ vevi si woawɔ le dziƒo, si nye be woanye nunɔlawo kple fiawo akpe ɖe Kristo ŋuti woaɖu ameƒomea dzi ƒe akpe ɖeka, la ana wo.—Nyaɖeɖefia 20:6.

Gake nu vlo wɔla si nɔ Yesu xa la ya nɔ agbe abe nu vlo wɔla ene heku hã abe nu vlo wɔla ene. (Luka 23:32, 39-41) Enye nyateƒe be ede bubu Yesu ŋu esi wògblɔ nɛ be, “Ðo ŋku dzinye ne èɖo wò fiaɖuƒe la me” ya. (Luka 23:42) Ke hã womenyrɔe ɖe tsi me o, eye mezu Yesu ƒe nusrɔ̃la si wotsɔ gbɔgbɔ kɔkɔe dzi hã o. Gakpe ɖe eŋu la, meɖee fia hã be yenye nu dzɔdzɔe wɔla kple nuteƒewɔla le eƒe agbenɔɣi o. Ekema ɖe wòasɔ be Yesu nado ŋugbe nɛ be ava ɖu fia kple ye kpakple ye yomedzela wɔnuteƒewo, siwo ɖee fia be yewonye fɔmaɖilawo, la le dziƒoa?—Romatɔwo 2:6, 7.

Bu kpɔɖeŋu sia ŋu kpɔ: Ne ame aɖe si fi wò ga la va ɖe kuku na wò be nàtsɔ yeƒe vodada ake ye la, ɖewohĩ àtiae be yemakplɔe ayi ʋɔnui o. Gake ɖe nàtsɔe aɖo wò asitsadɔ nu alo atsɔ wò ƒomea dzi kpɔkpɔ ade esia? Ame siwo dzi nèka ɖo bliboe la koe nàtsɔ dɔ siawo ade asi na. Nenema kee wòle be ame siwo si dziƒogbenɔnɔ ƒe mɔkpɔkpɔ le la naɖee afia be woate ŋu aka ɖe yewo dzi bliboe be yewoalé Mawu ƒe dzidzenu dzɔdzɔeawo me ɖe asi ne yewova le ameƒomea dzi ɖum. (Nyaɖeɖefia 2:10) Gake togbɔ be edze ƒãa le nu vlo wɔlaa ƒe nya mamlɛawo me be etrɔ dzi me hã la, meɖo kpe edzi be woate ŋu aka ɖe ye dzi bliboe o.

Gake ɖe Yesu megblɔ na nu vlo wɔlaa be anɔ dziƒo kpli ye gbe ma gbe ke oa? Mate ŋu anɔ alea o, elabena Yesu ŋutɔ hã meyi dziƒo gbe ma gbe o. Ke boŋ enɔ “anyigba ƒe tu me,” alo yɔdo me, ŋkeke etɔ̃. (Mateo 12:40; Marko 10:34) Le eƒe tsitretsitsi megbe gɔ̃ hã la, eganɔ anyigba dzi ŋkeke 40 hafi yi dziƒo. (Dɔwɔwɔwo 1:3, 9) Esia ta, manya wɔ be nu vlo wɔlaa nanɔ dziƒo kple Yesu gbe ma gbe ke o.

Ekema Paradiso ka mee nu vlo wɔlaa anɔ? Ne wofɔe ɖe tsitre la, anɔ anyigba dzi Paradiso la me; eye Yesue anɔ anyigbaa dzi ɖum ɣemaɣi. (Dɔwɔwɔwo 24:15; Nyaɖeɖefia 21:3, 4) Ne èdi be yeasrɔ̃ nu geɖe wu tso Paradiso ma kple nu siwo Mawu di tso asiwò ŋu la, àte ŋu ate ɖe Yehowa Ðasefo ɖe sia ɖe ŋu.