BIBLIA ME BIABIAWO ƑE ŊUÐOÐOWO
Ðe Mawu ɖoa to gbedodoɖawo katã?
Mawu ɖoa to dukɔ ɖe sia ɖe me tɔwo ƒe gbedodoɖa. (Psalmo 145:18, 19) Eƒe Nya, Biblia la, de dzi ƒo na mí be míagblɔ nya sia nya si le mía si la nɛ. (Filipitɔwo 4:6, 7) Ke hã, Mawu mekpɔa ŋudzedze ɖe gbedodoɖa aɖewo ŋu o. Le kpɔɖeŋu me, gbedodoɖa siwo wolé ɖe susu me hegbugbɔ nɔa gbɔgblɔm atraɖii la medzea Mawu ŋu o.—Xlẽ Mateo 6:7.
Gakpe ɖe eŋu la, Yehowa mekpɔa ŋudzedze ɖe ame siwo ɖonɛ koŋ dana le eƒe sewo dzi la ƒe gbedodoɖawo ŋu o. (Lododowo 28:9) Le kpɔɖeŋu me, le Biblia ŋlɔɣiwo la, Mawu gbe toɖoɖo Israel vi siwo ɖi ʋufɔ la ƒe gbedodoɖawo. Eya ta eme kɔ ƒãa be hafi Mawu naɖo to míaƒe gbedodoɖawo la, ele be míaɖo nudidi aɖewo gbɔ.—Xlẽ Yesaya 1:15.
Nu kae míawɔ be Mawu naɖo to mí?
Ne xɔse mele mía si o la Yehowa mase míaƒe gbedodoɖawo o. (Yakobo 1:5, 6) Ele be míaka ɖe edzi be eli eye wòtsɔa ɖe le eme na mí. Míate ŋu ado ŋusẽ míaƒe xɔse ne míesrɔ̃a Biblia, elabena kpeɖodziwo kple nyateƒenya siwo le Mawu ƒe Nya la mee nana xɔse vavã sua ame si.—Xlẽ Hebritɔwo 11:1, 6.
Ele be míado gbe ɖa tso dzi me le ɖokuibɔbɔ me. Yesu si nye Mawu ƒe Vi kura gɔ̃ hã bɔbɔ eɖokui esime wòdo gbe ɖa. (Luka 22:41, 42) Eya ta le esi míanɔ gbe ɖem na Mawu ne míele gbe dom ɖa nɛ teƒe la, ele be míadze agbagba anya eƒe nudidiwo to Biblia la xexlẽ me. Ekema míate ŋu ado gbe ɖa wòawɔ ɖeka kple eƒe lɔlɔ̃nu.—Xlẽe 1 Yohanes 5:14.