Dze Agbagba Nànya Nɔviwòwo
1 Biblia gblɔ le xɔlɔ̃ vavã ŋu be enye amesi kuna ɖe ame ŋu wu ame nɔvi gɔ̃ hã, eye eƒe lɔlɔ̃ kple nuteƒewɔwɔ nu metsina o, eye enye amesi kpena ɖe ehavi ŋu le xaxa me. (Lod. 17:17; 18:24) Ne míedze agbagba be míanya mía nɔewo eye míalɔ̃ mía nɔewo la, xɔlɔ̃ mawo tɔgbe mave le hamea me o.—Yoh. 13:35.
2 Mɔnukpɔkpɔ nyui siwo me míadze si mía nɔviwo le nɔa anyi do ŋgɔ na kpekpeawo kple le kpakpã le kpekpeawo vɔ megbe. Nukata màva do ŋgɔ kaba, eye nàlala vie ne wokpã be nàte ŋu ase vivi le hadede si dea dzo ame me la me o? Dze xɔ̃ nɔvi vovovo siwo dome ame tsitsi siwo si nuteƒekpɔkpɔ le, kple amesiwo nètsi wu alo amesiwo ŋu kpena hã eye nàɖo dze kpli wo.
3 Do Dzeɖoɖo Ða: Wɔ geɖe wu gbedodo na nɔviwo dzro ko. Àte ŋu ado dzeɖoɖo ɖa to nuƒoƒo tso gbeadzi nuteƒekpɔkpɔ aɖe loo, magazine yeye aɖe me nyati dodzidzɔname aɖe, alo nuƒoƒo tso kpekpe si nu miewu teti me nyati aɖe ŋu me. Àte ŋu asrɔ̃ nu geɖe tso nɔviwòwo ŋu ne ènye toɖola nyui, eye nèdea dzi ƒo na wo be woaƒo nu tso woƒe nuteƒekpɔkpɔwo kple nusiwo srɔ̃m wole la ŋu. Biabia tso ame si be wòagblɔ alesi wòwɔ va dze si Yehowa gɔ̃ hã ate ŋu ahe nya geɖe ɖe go. Ame aɖewo to nɔnɔme siwo doa ŋusẽ ame ƒe xɔse me le woƒe agbe me, eye ame bubuwo le nɔnɔme sesẽ siwo mava susu me na ame o me tom fifi laa. Esia kpɔkpɔ dze sii akpe ɖe mía ŋu be míanye xɔlɔ̃ vavã siwo ate ŋu akpɔ ame bubuwo ƒe nɔnɔmewo kple nuhiahiãwo adze sii kaba ahana kpekpeɖeŋu wo.
4 Midze Xɔ̃ Mia Nɔewo: Le nɔvinyɔnu aɖe ƒe vinyɔnu sue ƒe ku megbe la, esesẽ nɛ be wòadzi Fiaɖuƒeha siwo ƒo nu tso tsitretsitsia ŋu. Egblɔ be: “Gbeɖeka nɔvinyɔnu aɖe si nɔ akpataa ƒe akpa kemɛ la kpɔm menɔ avi fam. Eva gbɔnye, kpla asi kɔ nam, eye wòdzi haa ƒe akpa mamlɛa kplim. Lɔlɔ̃ na nɔviŋutsuawo kple nɔvinyɔnuawo va yɔ menye fũ eye mekpɔ dzidzɔ ɖe kpekpeawo dede ŋu ale gbegbe, elabena mekpɔe dze sii be Fiaɖuƒe Akpata me, afisiae míekpɔa kpekpeɖeŋu tsonɛ.” Ele be míadze xɔ̃ mía nɔviwo to akɔfafa na wo ne ehiã kple to dzidedeƒo na wo me.—Heb. 10:24, 25.
5 Esi xexe xoxo sia ƒe amemiamiawo nu le sesẽm ɖe edzi la, mina míaɖoe kplikpaa be míanya mía nɔviwo nyuie wu. Dzidedeƒo na mía nɔewo lɔlɔ̃tɔe alea anye yayra na mí katã.—Rom. 1:11, 12.