Èdea Bubu Aƒetɔ ƒe Fiẽnuɖuɖua Ŋua?
1 Kristotɔ vavãwo bua Aƒetɔ ƒe Fiẽnuɖuɖu si woɖuna ƒe sia ƒe la wɔna vevii. (Kor. I, 11:24-26) Enye wɔna si na wokpɔa dzidzɔ gake wòganye ŋkubiãnya hã. Dzi dzɔa mí wòwua gbɔgblɔ le alesi mía Mawu lɔlɔ̃tɔ Yehowa na tafevɔsa la be wòahe viɖe mavɔ vɛ na mí ta. Ne ɖe mewɔ ɖoɖo sia o la, anye ne mɔkpɔkpɔ aɖeke manɔ mía si o. Gake le ɣeyiɣi ma ke me la, míeɖea bubu deto fiana ɖe Mawu ƒe Vi la ƒe kua ŋu. Aleke míate ŋu awɔ esiae?
2 Míaƒe Dzi Kple Susu Dzadzraɖo: Kristotɔwo ƒe ƒome geɖe dzraa woƒe dzi kple susu ɖo to Biblia me nuŋlɔɖi siwo ŋu wowɔ ɖoɖo le be woaxlẽ le ŋkeke ʋɛ siwo do ŋgɔ na Ŋkuɖodzia la xexlẽ me. Ne dzilawo na ƒome bliboa xlẽ nuŋlɔɖi siawo la, ana wo viwo nakpɔ ŋudzedze geɖe wu ɖe gɔmesese si le Aƒetɔ ƒe Fiẽnuɖuɖua ŋu la ŋuti. Esi wònye tafea tsyɔa nu míaƒe nuvɔ̃wo dzi ta la, míate ŋu awɔ mɔnukpɔkpɔa ŋudɔ ade ŋugble le mía ŋutɔwo míaƒe Kristotɔwo ƒe agbenɔnɔ kple xɔse ŋu. Míeɖea bubu fiana ne míelé to ɖe nyatakaka siwo wona la ŋu nyuie eye míede ŋugble le alesi Mawu ƒe Vi la ƒe kua ka mía ŋutɔwoe ŋu.
3 Fiaɖuƒe Akpataa me Dzadzraɖo le Bubumɔ Nu: Ele be hamemegãwo ƒe ha la nawɔ ɖoɖo siwo sɔ ne woadzra Fiaɖuƒe Akpataa me ɖo nyuie wòanɔ dzadzɛ na wɔna vevi sia. Ne hame siwo wu ɖeka ye azã akpataa la, ele be hamemegãwo ƒe hawo nawɔ nu aduadu le dzadzraɖo siawo me nyuie ale be mahiã be hame siwo ava zã akpataa ɖe wo nɔewo yome natrɔ naneke o negbe kpɔɖeŋunuawo ko.
4 Mele be woatsɔ nu gbogbowo aɖo atsyɔ̃ na afisi woaɖu ŋkuɖodzia le ale gbegbe be asixɔxɔ si le wɔna tɔxɛ sia ŋu nabu o. Le kpɔɖeŋu me, hame aɖewo tsɔ seƒoƒowo, akaɖiwo, balloon, kple ka siwo wotsɔ pepa siwo le amadede vovowo me wɔe, la ɖo atsyɔ̃e ɖe fesrewo nu, ɖe xɔdzisasrã la ŋu, kple ɖe kplɔ̃ kpakple nuƒolakplɔ̃a dzi. Esia masɔ o. Míadi gbeɖe be míaƒe Fiaɖuƒe Akpatawo naɖi Kristodukɔa ƒe sɔlemexɔ siwo woɖoa atsyɔ̃ na fũ le Easter kple Kristmas ɖuɣi o. Esia manye bubu si sɔ dede wɔna vevi sia ŋu o. Eye esia ahe amewo ƒe susu ɖa le nya siwo nuƒolaa agblɔ fiẽ vevi ma dzi ŋu.
5 Ne miaɖo avɔ ɖe kplɔ̃ si dzi kpɔɖeŋunuawo anɔ dzi la, mele be wòanye esi woɖo atsyɔ̃ na fũ alo si dzi woŋlɔ nu ɖo, si ahe amewo ƒe susu ɖa le abolo kple wein si le kplɔ̃a dzi la ŋu o. Ne miewɔ ɖoɖo be woatsɔ seƒoƒowo aɖo atsyɔ̃e la, ele be woasɔ ɖe nɔnɔmea nu. Esia ana amesiame ƒe susu anɔ Ŋɔŋlɔawo me nuƒo si woaƒo ŋu.
6 Wɔ Nu Bubutɔe ne Miekpã tso Ŋkuɖodzia Ðuƒe: Nusi nàwɔ ne ètrɔ gbɔ va aƒeme le Ŋkuɖodzia megbe hã aɖe alesi nèdea bubu wɔnaa ŋui afia. Le hame aɖewo me la, nɔvi aɖewo wɔa “Ŋkuɖodzi kplɔ̃ɖoɖowo” le wɔnaa megbe, afisi nunono kple ɣeɖuɖu yia edzi le vaseɖe zãtiƒe ke. Le kplɔ̃ɖoƒe siawo dometɔ aɖe me la, gbeƒãɖela eve nɔ agbegbegblẽ esi wono ahasesẽ wògbɔ eme. Aleke gbegbee esia nye bubumademade Yehowa kple Via si tsɔ eƒe agbe na ɖe míaƒe nuvɔ̃wo ta ŋui enye esi!—Tsɔe sɔ kple Mose II, 32:5, 6, 17-19; Dɔw. 7:41-43.
7 Míedi be míahe miaƒe susu ayi aɖaŋuɖoɖo aɖe si dze le Gbetakpɔxɔ, March 1, 1969, axa 160 dzi, afisi gblɔ be: “Zi geɖe ne Yehowa Ðasefowo ƒe ƒome aɖe tso kpekpe sia gbɔ va aƒeme la, woazã ɣeyiɣia atsɔ adzro gɔmesese si le Ŋkuɖodzia ŋu me. Ŋugbledede tso wɔnaa kple Biblia ƒe nuŋlɔɖi siwo ƒo nu tso eɖoɖo anyi ŋu dziɖeɖitɔe alea ate ŋu ana woawu fiẽ vevi dodzidzɔname sia nu nyuie. Aleke woate ŋu awɔ ade ŋugble le Yehowa ƒe dɔ gã wɔnukuwo ŋu ne le ɣeyiɣi ma ke me la, wole nu ɖum hele ahatsu nom esime haƒoƒo le ɖiɖim sesĩe?”—Kpɔ Gbetakpɔxɔ, February 1, 1976, ƒe axa 76 hã.
8 Togbɔ be nya siawo metsi tre ɖe ƒome alo gbeƒãɖelawo ƒe ƒuƒoƒo ɖekae be woaɖe modzaka ŋu o hã la, eku ɖe hadomeƒuƒoƒo siwo me ahasesẽ kple ɣeɖuɖu kpakple haƒoƒo sesĩe nɔna ŋu. Menye aleae Kristotɔ vavãwo ɖea woƒe dzidzɔkpɔkpɔ ɖe tafe nunana la ŋu fianae o! Ele be alesi míewɔa nui le fiẽ si míeɖu Ŋkuɖodzia kple le emegbe naɖee afia be míedea bubu deto wɔnaa kple alesi Mawu ƒe Vi la ku ɖe mía tae ŋu, heɖea ŋudzedzekpɔkpɔ fiana ɖe wo ŋu.—Tsɔe sɔ kple Korintotɔwo I, 11:20-22.
9 Aleke gbegbe míedaa akpe na Yehowa enye esi be eve mía nu hekpɔ nublanui na mí! Neva eme be ƒe sia ƒe wɔnaa nena mɔnukpɔkpɔ mí katã míaɖee afia be vavãe, míedea bubu lɔlɔ̃ ƒe mɔnuɖoɖo si Yehowa wɔ to tafevɔsaa dzi ŋu. Esia wɔwɔ to dzadzraɖo ɖe wɔnaa vevi sia ŋu kple to míaƒe agbenɔnɔ dzi akafu míaƒe dzidzɔ Mawu Yehowa, ahana nuteƒekpɔla dzianukwaretɔwo nagblɔ be: “Mawu le mia dome vavã.”—Kor. I, 14:25; Nyagb. 3:1.