KRISTOTƆWO ƑE AGBENƆNƆ
Wɔ Ðe Yehowa Ƒe Mɔfiame Siwo Ku Ðe Agbe Nyui Nɔnɔ Ŋu Dzi
Yehowa Mawu ɖo mɔfiame siwo nu amegbetɔwo katã anɔ agbe ɖo la ɖi. Le kpɔɖeŋu me, ede se be ŋutsu kple nyɔnu siwo ɖe wo nɔewo la, nagagbe wo nɔewo o. (Mt 19:4-6, 9) Elé fu gbɔdɔdɔ manɔsenu ɖe sia ɖe. (1Ko 6:9, 10) Ena mɔfiamewo hã ku ɖe awudodo kple dzadzraɖo ŋu si na eƒe amewo to vovo.—5Mo 22:5; 1Ti 2:9, 10.
Le xexea me egbea la, ame geɖe mewɔna ɖe Yehowa ƒe mɔfiamewo dzi o. (Ro 1:18-32) Woɖe mɔ ame akpa gãtɔ ƒe awudodo, dzadzraɖo kple nuwɔna kpɔ ŋusẽ ɖe wo dzi. Ame geɖe ƒe ŋukpego gbã eya ta wowɔa ŋukpenanuwo eye wobua fɔ ame siwo ƒe susu to vovo na wo tɔ la.—1Pe 4:3, 4.
Esi míenye Yehowa Ðasefowo taa, ele be míawɔ ɖe Mawu ƒe mɔfiame siwo ku ɖe agbe nyui nɔnɔ ŋu dzi dzinɔameƒotɔe. (Ro 12:9) Aleke míawɔe? Ele be míatsɔ aɖaŋudzedze ana amewo nanya nu siwo dzea Mawu ŋu. Gake ele be míawo ŋutɔwo hã míayi edzi anɔ agbe nyui. Le kpɔɖeŋu me, ne míele ŋugble dem le awu siwo míado kple ale si míadzra ɖoe ŋu la, ele be míabia mía ɖokuiwo be: ‘Yehowa ƒe mɔfiamewo dzie mewɔna loo alo xexea tɔa? Ðe nye awudodo kple dzadzraɖo na amewo kpɔnɛ be Kristotɔ mawuvɔ̃lae menyea?’ Ne mele television dzi wɔna kple video siwo makpɔ tiam la, ele be mabia ɖokuinye be: ‘Ðe wòadzɔ dzi na Yehowa? Ame ka ƒe mɔfiamewo le agbe nyui nɔnɔ ŋue wòdona ɖe ŋgɔ? Ðe nu siwo metsɔna ɖea modzakae la ana ale si mebua agbe nyui nɔnɔe la me nagbɔdzɔa? (Ps 101:3) Ðe woaɖia nye ƒometɔwo kple ame bubuwo nua?’—1Ko 10:31-33.
Nu ka tae wòle vevie be míawɔ ɖe Yehowa ƒe mɔfiame siwo ku ɖe agbe nyui nɔnɔ ŋu la dzi? Elabe madidi o, Kristo Yesu atsrɔ̃ dukɔwo eye wòatsi vɔ̃ɖinyenye nu. (Eze 9:4-7) Ame siwo wɔa Mawu ƒe lɔlɔ̃nu koe asusɔ. (1Yh 2:15-17) Eya ta mina míayi edzi awɔ ɖe Yehowa ƒe mɔfiame siwo ku ɖe agbe nyui nɔnɔ ŋu la dzi, ale be ame siwo kpɔa míaƒe agbe nyui nɔnɔ nakafu Mawu.—1Pe 2:11, 12.
Nu kae nye awudodo kple dzadzraɖo ɖena fiana tso mɔfiame siwo nu menɔa agbe ɖo la ŋu?
MIKPƆ VIDEO SI NYE NYE YEHOWA XƆLƆ̃—ŊUTSU ÐEKA, NYƆNU ÐEKA, EYOME MIADZRO BIABIA SIWO GBƆNA ME:
Nu ka tae wònyo be míawɔ ɖe Yehowa ƒe mɔfiame siwo ku ɖe agbe nyui nɔnɔ ŋu la dzi?
Nu ka tae wòle be dzilawo nafia nu wo viwo tso Yehowa ƒe mɔfiame siwo ku ɖe agbe nyui nɔnɔ ŋu tso ɖevime ke?
Aleke ɖeviwo kple tsitsiawo siaa ate ŋu akpe ɖe amewo ŋu be Mawu ƒe nyuiwɔwɔ naɖe vi na wo?