Nyateƒe Si Ku Ðe Aʋatsokaka Ŋu

“AƲATSOKALA!” Ðe wogblɔ nya tɔame ma na wò kpɔa? Ne wogblɔe na wò kpɔ la, ɖikeke mele eme o be ènya alesi wòvea amee.

Abe alesi seƒoƒogba dzeani agbã ne wotu asii xlã ɖe anyigba ene la, nenema ke aʋatsokaka ate ŋu agblẽ ƒomedodo nyui mee. Nyateƒee, àte ŋu aɖɔ nusi wògblẽ la ɖo le ɣeyiɣi aɖe megbe ya, gake ɖewohĩ ƒomedodoa magaɖo eƒe nɔnɔ akpɔ gbeɖe o.

Agbalẽ si nye Lying—Moral Choice in Public and Private Life gblɔ be: “Amesiwo va kpɔnɛ be woble yewo la ɖɔa ŋu ɖo le wo kple amea dome dzadzraɖo ŋu. Eye aʋatso si wova de dzesii la nɔa woƒe susu me wotsɔ léa ŋku ɖe woƒe tsã dzixɔsewo kple nuwɔnawo ŋu.” Ne aʋatsokaka va dze la, nazãbubu kple ɖikeke va gblẽa ƒomedodo si me dzeɖoɖo nyui kple ŋuɖoɖeameŋu nɔ tsã la me.

Esi aʋatsokaka hea nɔnɔme manyomanyo siawo katã vɛ ta la, ele be míabia be, ‘Aleke nɔnɔme gbegblẽ sia wɔ dze egɔme?’

Aʋatso Gbãtɔ

Esi Yehowa Mawu wɔ ame eve gbãtɔ siwo nye Adam kple Xawa la, eda wo ɖe aƒe si nye abɔ dzeani aɖe me. Amebeble alo ametafatafa aɖeke menɔ woƒe aƒea me o. Paradisoe wònye nyateƒe!

Gake ɣeaɖeɣi le Xawa wɔwɔ megbe la, Satana Abosam te ɖe nyɔnua ŋu hetsɔ nudzroame aɖe ɖo eŋkume. Egblɔ na Xawa be ne eɖu ‘ati la ƒe tsetse’ si nu Mawu de se ɖo la, maku abe alesi Mawu gblɔ ene o. Ke boŋ ‘anɔ abe Mawu ene, anya nyui kple vɔ̃.’ (Mose I, 2:17; 3:1-5) Xawa xɔ Satana dzi se. Egbe atikutsetsea ɖu, eye wòtsɔ ɖe na srɔ̃a hã. Gake le esi teƒe be Adam kple Xawa nava zu abe Mawu ene le ŋugbe si Satana do nu la, wova zu nuvɔ̃wɔla maɖotowo, kple gbegblẽ ƒe kluviwo boŋ. (Petro II, 2:19) Eye aʋatso gbãtɔ ma si Satana ka na wòva zu “aʋatsowo katã fofo.” (Yohanes 8:44, Today’s English Version) Eteƒe medidi o nuvɔ̃wɔla etɔ̃awo va kpɔe be nu medzea edzi na ame o ne woka aʋatso alo woɖo ŋu ɖe aʋatsokaka ŋu.

Emetsonu Wuamewo

Yehowa di be yeƒe nuwɔwɔwo katã—le dziƒo kple anyigba dzi—nanya be womagbe tohehe na amesi aɖoe koŋ agbe toɖoɖo o. Etso ɖe eŋu kaba bu fɔ gbɔgbɔmenuwɔwɔ dzeaglã la be wòanɔ eƒe agbe mamlɛ le Mawu ƒe habɔbɔ kɔkɔe la godo. Tsɔ kpe ɖe eŋu la, Yehowa Mawu akpɔ egbɔ be wotsrɔ̃ Satana ɖa keŋkeŋ. Esia adzɔ esime “dzidzimevi” si ƒe vava ŋugbe Mawu do la agbã ta nɛ wòaku.—Mose I, 3:14, 15; Galatiatɔwo 3:16.

Wonyã Adam kple Xawa ya ɖa le Eden-bɔa me. Mawu gblɔ tohenya sia na Adam be: “Fifia ate wò, hafi nakpɔ abolo aɖu, vaseɖe esime nagatrɔ azu anyi, elabena eya mee woɖe wò tsoe. Anyi nènye, eye anyi ke nagatrɔ azu!” Le ɣeyiɣi aɖe megbe la, eya kple Xawa siaa woku, abe alesi tututu Mawu gblɔe ɖi ene.—Mose I, 3:19.

Esi ameƒome bliboa nye Adam ƒe dzidzimeviwo ta la, wotsɔ wo ‘dzra ɖe nuvɔ̃ te.’ Amegbetɔwo katã nyi blibomademade si hea ku vɛ la dome. (Romatɔwo 5:12; 6:23; 7:14) Nu dziŋɔ ka gbegbee nye si do tso aʋatso gbãtɔ ma me!—Romatɔwo 8:22.

Nɔnɔme si Xɔ Aƒe Ðe Amewo Me

Esi wometsrɔ̃ Satana kple eƒe dɔla siwo wɔ ɖeka kplii le aglãdzedze ɖe Mawu ŋu me haɖe o ta la, mele be wòawɔ nuku na mí be woʋãa amewo ‘wokaa aʋatso’ o. (Timoteo I, 4:1-3) Ewɔe be aʋatsokaka xɔ aƒe ɖe amegbetɔwo dome vevie. Los Angeles Times de dzesii be: “Aʋatsokaka va xɔ amewo me ale gbegbe be fifia amewo megatsia dzi ɖe eŋu kura o.” Egbea ame geɖe bua aʋatsokaka ɖe dunyahehe kple dunyahelawo koŋ ŋu, gake ènya be subɔsubɔhakplɔlawo hã le aʋatsokala vɔ̃ɖitɔwo domea?

Amesiwo tsi tre ɖe Yesu ŋu le mawusubɔsubɔ gome la kaka aʋatsonya le eŋu le eƒe anyigbadzisubɔsubɔdɔa wɔɣi. (Yohanes 8:48, 54, 55) Ebu fɔ wo le gaglãgbe be: “Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ. . . . Ne ele aʋatso kam la, eƒoa nu tso eya ŋutɔ ɖokui me, elabena aʋatsokala kple aʋatsokafofo wònye.”—Yohanes 8:44.

Èɖo ŋku aʋatso si wokaka esime wokpɔ be Yesu ƒe yɔdo tsi ƒuƒlu le eƒe tsitretsitsi megbe la dzia? Biblia gblɔ be nunɔlagãwo “[tsɔ] klosalo geɖe na asrafoawo bena: Migblɔ bena: Eƒe nusrɔ̃lawo va le zã me, eye wofii yii, esime míedɔ alɔ̃.” Wokaka aʋatsonya sia ɖe teƒe geɖe, eye wotsɔe flu ame geɖe. Aleke gbegbe subɔsubɔhakplɔla mawo vɔ̃ɖii enye si!—Mateo 28:11-15.

Aʋatsonya Siwo Le Mawusubɔsubɔ me Egbea

Aʋatso gã kae subɔsubɔhakplɔlawo kana egbea? Esɔ kple esi Satana gblɔ na Xawa be: “Miele kuku ge akpɔ o.” (Mose I, 3:4) Gake Xawa ku nyateƒe, eye etrɔ yi anyigba, ɖe anyi si me woɖee tsoe la me.

Gake ɖeko wòdze abe ɖe wòku ene eye wòyi edzi nɔ agbe ŋutɔŋutɔ le nɔnɔme bubu aɖe mea? Ðe ku nye mɔ si dzi wotona gava nɔa agbe bubu koa? Biblia megblɔ be Xawa ƒe akpa aɖe yi edzi nɔ agbe o. Eƒe luʋɔ mekpɔtɔ nɔ agbe o. Tomaɖomaɖo Mawu na wòwɔ nuvɔ̃, eye Biblia gblɔ be: “Luʋɔ, si wɔ nuvɔ̃ la, eyae aku.” (Xezekiel 18:4) Wowɔ Xawa wònye luʋɔ gbagbe abe srɔ̃a ke ene, eye agbe si wònɔ esi wònye luʋɔ gbagbe la nue tso. (Mose I, 2:7) Biblia gblɔ le nɔnɔme si me ame kukuwo le ŋu be: “Kukuawo menya naneke o.” (Nyagblɔla 9:5) Gake nukae sɔlemehawo katã fiana?

Zi geɖe la, sɔlemehawo fiaa nu be luʋɔ makumaku le amegbetɔwo si eye be edona va nɔa agbe bubu le ku me—le dzidzɔkpɔkpɔ me loo alo le fukpekpe me. Le kpɔɖeŋu me, The Catholic Encyclopedia gblɔ be: “Sɔlemeha la fiaa nu le dzomavɔ ƒe vevesesewo ƒe mavɔmavɔnyenye ŋu eme kɔna ƒã be enye nyateƒe ƒe dzixɔse si ame aɖeke mate ŋu agbe alo atɔ gbee ne menye ɖe wòtsi tre ɖe sɔlemeha ƒe nufiafia la ŋu o.”—Babla 7, axa 209, ƒe 1913 me tɔ.

Aleke gbegbe nufiafia ma to vovo na nusi Biblia gblɔ eme kɔ enye si! Biblia fia nu be ne ame ku la, “egbugbɔna yia eƒe anyi gbɔ; gbemagbe eƒe tameɖoɖowo nu yina.” (Psalmo 146:4) Eyata le Biblia ƒe nya nu la, ame kukuwo mate ŋu ase veve aɖeke o, elabena womenya naneke kura o. Eyata Biblia ƒoe ɖe mía nu be: “Nusianu, si wò asi ate ŋu awɔ la, wɔe kple wò ŋusẽ; elabena nuwɔwɔ alo tamebubu, sidzedze alo nunya mele tsieƒe, afisi yi ge nala o.”—Nyagblɔla 9:10.

Ehiã be Míanɔ Ŋudzɔ

Abe alesi wotsɔ nunɔlawo ƒe aʋatsonyawo flu ame geɖe le Yesu ƒe ŋkekea mee ene la, nenema ke wòate ŋu adzɔ be woatsɔ subɔsubɔhakplɔla siwo li egbea ƒe alakpanufiafiawo aflu míi. Amesiawo tsɔ “Mawu ƒe nyateƒe la ɖɔ li aʋatsokaka,” eye wodoa alakpanufiafia si ƒe ɖewoe nye amegbetɔ ƒe luʋɔ ƒe makumakunyenye kple susu si nye be woawɔ fu amegbetɔwo ƒe luʋɔwo le dzomavɔ aɖe me la ɖe ŋgɔ.—Romatɔwo 1:25.

Tsɔ kpe ɖe eŋu la, egbe subɔsubɔhawo katã bua amegbetɔ ƒe kɔnyinyi kple xexemenunya kpakple Biblia me nyateƒe be wonye nu ɖeka. (Kolosetɔwo 2:8) Esia na wobua Mawu ƒe se siwo ku ɖe agbenyuinɔnɔ ŋu—siwo me anukwareɖiɖi kple gbɔdɔdɔnuwɔna ŋuti sewo hã le—be go aɖewo me koe woawɔ wo dzi le, ke menye le nusianu me o. Wogblɔ nusi dona tsoa eme la le Time magazine me nya sia me be: “Ne amewo kea ɖi se siwo kplɔa woƒe nuwɔwɔ ɖe wo nɔewo ŋu, eye womegasea egɔme, alo lɔ̃na ɖe edzi o la, wokaa aʋatso geɖe wu.”—Tsɔe sɔ kple Yesaya 59:14, 15; Yeremya 9:4.

Amesiwo medea asixɔxɔ nyateƒe ŋu boo o dome nɔnɔ na wòsesẽna be woawɔ ɖe Mawu ƒe nuxlɔ̃ame be mígaka aʋatso o dzi. Nukae ate ŋu akpe ɖe mía ŋu be míato nyateƒe ɣesiaɣi?

Nyateƒea ƒe Akpa Dzi Nɔnɔ

Míaƒe didi be míade bubu mía Wɔla ŋu nye ameʋãnu nyuitɔ kekeake si ana míato nyateƒe. Eɖe dzesi be Biblia yɔe be enye “Mawu nuteƒetɔ.” (Psalmo 31:6) Eyata ne míaƒe didi wònye be míadze mía Wɔla, amesi lé fu “aʋatsoɖe” ŋu la, aʋã mí be míasrɔ̃e. (Lododowo 6:17) Aleke míate ŋu awɔ esiae?

Mawu ƒe Nya la sɔsrɔ̃ veviedodotɔe ate ŋu ana nusi hiã ale be “amesiame nagblɔ nyateƒe na ehavi” la mí. (Efesotɔwo 4:25) Gake nusi Mawu di tso mía si nyanya ɖeɖe mesɔ gbɔ o. Ne míete ŋu toa nyateƒe ɣesiaɣi o abe alesi wòle le ame geɖe gome le xexeame egbea ene la, ke ahiã be míadze agbagba vevie awɔ nenema. Ahiã be míasrɔ̃ kpɔɖeŋu si apostolo Paulo ɖo eye míazi mía ɖokui dzi. Paulo ŋlɔ bena: “Meƒoa nye ŋutilã wòdoa ʋusrã, eye mewɔnɛ kluvi.”—Korintotɔwo I, 9:27.

Nu bubu si akpe ɖe mía ŋu le aʋa si wɔm míele be míato nyateƒe ɣeawokatãɣi mee nye gbedodoɖa. Ne míeɖe kuku na Yehowa bia eƒe kpekpeɖeŋu la, míate ŋu akpɔ “ŋusẽ ƒe agbɔsɔsɔ, si gbã go.” (Korintotɔwo II, 4:7) Nyateƒee, ɖewohĩ be “nyateƒenuyi” nanɔ ame si ɖaa eye woatsri “alakpaɖe” la anye avu kple kɔ. (Lododowo 12:19) Gake míate ŋu awɔ nenema le Yehowa ƒe kpekpeɖeŋu me.—Filipitɔwo 4:13.

Ðo ŋku edzi ɣesiaɣi be Satana Abosam ye na wòdzena abe ɖe aʋatsokaka nye nusi sɔ wòawɔ ene. Eble nyɔnu gbãtɔ si nye Xawa, eye wòtsɔ tamevɔ̃ɖoɖo ka aʋatso nɛ. Gake míenya afɔku siwo katã do tso Satana ƒe aʋatsomɔwo me nyuie. Ameƒomea kpe fu manyagblɔ aɖewo le ɖokuitɔdidi ƒe aʋatsokaka ɖeka kple ɖokuitɔdila etɔ̃ ta—Adam, Xawa, kple Satana.

Ẽ, nyateƒe si ku ɖe aʋatsokaka ŋue nye be esɔ kple aɖi wuame. Gake dzidzɔtɔe la, míate ŋu awɔ nane le eŋu. Míate ŋu adzudzɔ aʋatsokaka ale be Yehowa, Mawu si ƒe “amenuveve kple nuteƒewɔwɔ sɔ gbɔ” la nakpɔ ŋudzedze ɖe mía ŋu yi ɖe mavɔmavɔ me.—Mose II, 34:6.

[Nya si ɖe dzesi si le axa 11]

Aʋatsokaka ƒe nugblẽƒe le abe seƒoƒogba ƒe gbagbã ene

[Nɔnɔmetata si le axa 13]

Woate ŋu atsɔ aʋatsokaka asɔ kple aɖi wuame