Alesi Ƒomewo Wɔna Nɔa Te Ðe Dɔmavɔleameŋu Nu

WOATE ŋu aɖe tenɔnɔ ɖe nu nu gɔme be “ŋutete si woatsɔ anɔ te ɖe nuteɖeamedzi si le fu ɖem na ame nu dzidzedzetɔe.” (Taber’s Cyclopedic Medical Dictionary) Ebia be woakpe akɔ kple dɔmavɔleameŋu le mɔ si nu awɔe be dzi nanɔ ƒowò eye wò susume navo vaseɖe afi aɖe. Eye esi dɔmavɔleameŋu nye ƒomea ƒe agbanɔamedzi ta la, ehiã be ƒomea me tɔ ɖesiaɖe natsɔ lɔlɔ̃ ana kpekpeɖeŋu nuteƒewɔwɔtɔe be ƒomea nate ŋu anɔ te ɖe enu dzidzedzetɔe. Mina míadzro mɔ siwo nu ƒomewo nɔa te ɖe dɔmavɔleameŋuwo nui la dometɔ aɖewo me.

Nunyanya tso Eŋu Ðea Vi

Ðewohĩ womate ŋu ada dɔa o, gake nunyanya tso alesi woanɔ te ɖe enui ŋu ate ŋu ana be susume kple seselelãme fuɖename si dɔlélea he vɛ la dzi naɖe akpɔtɔ. Esia wɔ ɖeka kple blema lododo si gblɔ be: “Ŋutsu nugɔmesela ɖea ŋusẽ fiana.” (Lododowo 24:5) Aleke ƒomea awɔ anya alesi wòanɔ te ɖe enui?

Afɔɖeɖe gbãtɔe nye be woadi ɖɔkta si lɔ̃na ƒoa nu faa hekpena ɖe ame ŋu, amesi alɔ̃ faa agbɔ dzi ɖi aɖe nusianu me tsitotsito na dɔnɔa kple ƒomea. Agbalẽ si nye A Special Child in the Family, gblɔ be: “Ðɔkta nyuitɔ tsɔa ɖe le eme na ƒome bliboa katã, eye enye amesi bi ɖe atikewɔmɔnu siwo hiã la katã me.”

Afɔɖeɖe si kplɔe ɖoe nye be nàyi edzi anɔ biabia siwo le tẽ biam vaseɖe esime nèse nɔnɔmea gɔme nyuie alesi nàte ŋui. Gake ɖo ŋku edzi be ne èle ɖɔktaa gbɔ la, anɔ bɔbɔe be wò susu natɔtɔ eye nàŋlɔ nya siwo nèdi be yeabia la be. Aɖaŋuɖoɖo si akpe ɖe ŋuwòe nye be nàŋlɔ nya siwo nèdi be yeabia la ɖi do ŋgɔ. Vevietɔ àdi be yeanya nusi yeakpɔ mɔ na tso dɔlélea kple eŋuti tikewɔwɔwo me kple nusi nàwɔ tso eŋui.—Kpɔ aɖaka si nye “Nya Siwo Ƒomea Ate Ŋu Abia Ðɔkta.”

Ele vevie ŋutɔ be woana nyatakaka siwo hiã la ɖevi si ŋu dɔmavɔleameŋu le la nɔviwo. Vidada aɖe ɖe nu me be: “Ðe kuxia me na wo tso gɔmedzedzea. Anɔ bɔbɔe be woase le wo ɖokui me be woŋe aɖaba ƒu yewo dzi ne womenya nusi le dzɔdzɔm o.”

Ƒome aɖewo hã kpɔ nyatakaka siwo kpe ɖe wo ŋu esi wowɔ numekuku le agbalẽdzraɖoƒewo, agbalẽdzraƒewo, alo le Internet dzi—eye zi geɖe la, wokpɔa nyatakaka siwo kɔ nu me tsitotsito le dɔléle aɖewo koŋ ŋu.

Agbe Ðɔʋu Nɔnɔ Vaseɖe Afisi Wòanya Wɔ

Esɔ le dzɔdzɔme nu be ƒometɔwo nadi be yewoana dɔnɔa nanɔ agbe ɖɔʋu vaseɖe afisi wòanya wɔ. Le kpɔɖeŋu me, bu Neil du Toit, si míeyɔ le nyati gbãtɔ me ŋu kpɔ. Nusiwo eƒe dɔlélea gblẽ le eŋu la kpɔtɔ ɖea fu nɛ. Ke hã ezãa gaƒoƒo 70 dzinu sia dzinu tsɔ wɔa dɔ si wòsea vivi na wu ɖesiaɖe—si nye eƒe mɔkpɔkpɔ si nɔ te ɖe Biblia dzi la gbɔgblɔ na eƒe nutoa me tɔwo. Egblɔ be: “Mekpɔa dzidzɔ ememetɔ hã ne mena Biblia me nufiame le hamea me.”

Agbe ɖɔʋu nɔnɔ bia hã be woate ŋu aɖe lɔlɔ̃ afia, eye ame bubuwo hã nalɔ̃ amea, be woase vivi le dzidzɔdonuwo wɔwɔ me, eye mɔkpɔkpɔ nanɔ ame si. Dɔnɔawo akpɔtɔ adi be yewoase vivi na agbe vaseɖe afisi woƒe dɔlélea kple atikewɔmɔnuwo aɖe mɔ ase ɖo. Vifofo aɖe si ƒe ƒome nɔ te ɖe dɔléle nu wu ƒe 25 ɖe nu me be: “Míelɔ̃a gododo, gake le vinyeŋutsua ƒe nɔnɔmea ta la, míete ŋu wɔa fefe siwo bia be woasi du o. Eyata míefea fefe bubuwo. Míedona yia teƒe siwo womewɔa lãmesẽfefewo le o.”

Ẽ, ŋutete aɖewo kpɔtɔ nɔa dɔnɔawo ŋu si na wokpɔa dzidzeme aɖe sinu le agbe me. Le alesi dɔlélea le nu la, wo dometɔ geɖe kpɔa dzidzɔ ne wokpɔ nu dzeani hese gbeɖiɖi siwo nya se. Zi geɖe alesi woate ŋu aɖu wo ɖokui dzi ahaɖe dzi ɖi le agbe ƒe akpa vovovoawo me la, zi geɖe nenemae wòanɔ bɔbɔe be woanɔ agbe ɖɔʋu vaseɖe afisi anya wɔ.

Seselelãme Sesẽwo Dzi Ðuɖu

Tenɔnɔ ɖe enu ƒe akpa vevi aɖe bia be woasrɔ̃ alesi woawɔ nu ɖe seselelãme siwo gblẽa nu le ame ŋu nui. Esiawo dometɔ ɖekae nye dzikudodo. Biblia lɔ̃ ɖe edzi be nanewo ate ŋu adzɔ si ana ame nado dziku. Gake exlɔ̃ nu mí hã be ‘míagbɔ dzi ɖi le dziku me.’ (Lododowo 14:29) Nukatae nunya le eme be woawɔe nenema? Numekugbalẽ aɖe gblɔ be dziku “ate ŋu anɔ nu gblẽm le ŋuwò eye wòana nàse veve, alo ana nàgblɔ nya tɔame siwo nu nàse veve ɖo emegbe.” Dzikudodo zi ɖeka gɔ̃ hã ate ŋu agblẽ nu le ame ŋu si axɔ ɣeyiɣi didi hafi wòaɖɔ ɖo.

Biblia kafui be: “Ɣe la nagaɖo to ɖe miaƒe dzibibi o.” (Efesotɔwo 4:26) Edze ƒã be míate ŋu awɔ naneke atsɔ ahe ɣe la ƒe to ɖoɖo ɖe megbe o. Gake míate ŋu aɖe afɔ afa míaƒe “dzibibi” nu kaba ale be míagayi edzi anɔ nu gblẽm le mía ŋutɔwo kple ame bubuwo ŋu o. Eye anɔ bɔbɔe kura be nàkpɔ nɔnɔme aɖe gbɔ nyuie wu ne wò dzi fa.

Nɔnɔmewo aka ɖe eme agagblẽ ɖe edzi na wò ƒomea abe alesi wòdzɔna le ƒome ɖesiaɖe mee ene. Ame geɖe kpɔe be yewo te ŋu nɔa te ɖe enu bɔbɔe wu ne yewo gblɔ yewoƒe dzimenyawo na yewo nɔewo, alo na ame aɖe si sea veve ɖe ame nu eye ame ƒe nu wɔa nublanui nɛ. Nenema tututue wònɔ le Kathleen gome. Gbã la, enɔ dadaa si ŋu kansa le dzi kpɔm, eye emegbe wòva kpɔ srɔ̃aŋutsu si blanuiléle atraɖii va nɔ fu ɖem na, eye emegbe Alzheimer-dɔ (si nye dɔléle si gblẽa nu le susua ŋu) hã va dze edzi la dzi. Elɔ̃ ɖe edzi be: “Eva dzɔ be mekpɔa gbɔdzɔe kple dzidzeme ne meƒo nu kple xɔlɔ̃ siwo sea nu gɔme.” Rosemary, amesi kpɔ dadaa dzi ƒe eve la lɔ̃ ɖe nya mawo dzi. Egblɔ be: “Nuƒoƒo kple xɔlɔ̃ vavãtɔ kpena ɖe ŋunye medana sɔna le susume kple seselelãme gome.”

Gake megawɔ mo yaa na wò nenye be èle nu ƒom eye aɖatsi le dodom le ŋkume na wò o. Agbalẽ si nye A Special Child in the Family, gblɔ be: “Avifafa faa dzimaɖitsitsiwo kple vevesesewo nu, eye akpe ɖe ŋuwò be nàɖu wò nuxaxa dzi.”a

Nukpɔsusu Nyui Nenɔ Asiwò

Nunyala Fia Salomo gblɔ be “didi si le mewò be yeanɔ agbe la ate ŋu alé wò ɖe te ne èdze dɔ.” (Lododowo 18:14, Today’s English Version) Egbegbe numekulawo va de dzesii be zi geɖe la ewɔ abe nusi dɔnɔwo kpɔa mɔ na—eɖanye be nɔnɔmea aka ɖe eme alo agblẽ ɖe edzi o—kpɔa ŋusẽ ɖe atike si wowɔna na wo dzi ene. Gake aleke ƒomea awɔ be mɔkpɔkpɔ nakpɔtɔ anɔ esi ne dɔléle si anɔ anyi didi dze ƒomea me tɔ aɖe dzi?

Togbɔ be womaŋe aɖaba aƒu dɔlélea dzi o hã la, ƒomewo te ŋu nɔa te ɖe enu bɔbɔe wu ne wotsɔ woƒe susu ɖo nusiwo wogate ŋu wɔna ŋu. Vifofo aɖe lɔ̃ ɖe edzi be: “Nɔnɔmea ate ŋu ana mɔkpɔkpɔ nabu ɖe wò kura, gake ele be nàde dzesii be nu geɖe gakpɔtɔ le asiwò. Èkpɔtɔ le agbe, ƒometɔwo kple xɔ̃wòwo li.”

Togbɔ be mele be woabu dɔmavɔleameŋu nu tsɛe o hã la, nukokoedoname ɖɔʋu kpena ɖe ame ŋu be mɔkpɔkpɔ nagabu ɖe ame o. Nukokoedoname ƒe nɔnɔme si le Du Toit ƒomea me la nye esia ƒe kpɔɖeŋu. Neil du Toit nɔvinyɔnu suetɔ kekeake Collette, ɖe eme be: “Le esi míesrɔ̃ alesi míanɔ te ɖe nɔnɔme aɖewo nui ta la, míete ŋu tsɔa nanewo siwo dzɔna ɖe mía dzi wɔa nukokoe, si dze abe aɖe fu na ame bubuwo ya vevie ene. Gake ema wɔwɔ kpena ɖe ame ŋu be wòaɖe dzi ɖi.” Biblia na kakaɖedzi mí be “dzi kpɔdzidzɔ nana lãme hayana.”—Lododowo 17:22.

Gbɔgbɔmenu Siwo Ŋu Asixɔxɔ Le Wu Ðesiaɖe

Nu vevi aɖe si ana Kristotɔwo nanɔ ŋute le gbɔgbɔme enye be ‘woatsɔ gbedodoɖa kple kukuɖeɖe ana Mawu nanya woƒe dzimedidiwo.’ Emetsonua anye ŋugbe si wodo le Biblia me be: “Mawu ƒe ŋutifafa, si ƒo gɔmesesewo katã ta la, adzɔ miaƒe dziwo kple miaƒe tamesusuwo ŋu.” (Filipitɔwo 4:6, 7) Vidada aɖe si kpɔ via eve siwo ŋu dɔmavɔleameŋu le dzi hena ƒe 30 la gblɔ be: “Míeva srɔ̃e be Yehowa kpena ɖe ame ŋu be wòanɔ te ɖe nɔnɔmea nu. Eléa ame ɖe te vavã.”

Gakpe ɖe eŋu la, paradisonyigba si me vevesese kple fukpekpe manɔ o si ƒe ŋugbe Biblia do la doa ŋusẽ ame geɖe. (Nyaɖeɖefia 21:3, 4) Braam gblɔ be: “Le dɔmavɔleameŋu si le míaƒe ƒomea me ta la, Mawu ƒe ŋugbe si wòdo la gale vevie na mí wu be ‘xɔdrɔ̃wo ati kpo abe zi ene, eye aɖetututɔwo ƒe aɖe atso aseye.’” Abe alesi wòle le ame geɖe gome ene la, Du Toit ƒomea le mɔ kpɔm vevie na Paradiso si me “duametɔ aɖeke magblɔ be, yele dɔ lém o.”—Yesaya 33:24; 35:6.

Lé dzi ɖe ƒo. Vevesese kple fukpekpe siwo le fu ɖem na ameƒomea ŋutɔ nye dzesi siwo fia be nɔnɔme nyuiwo tu aƒe la ƒe akpa aɖe. (Luka 21:7, 10, 11) Ke hã fifi laa la, dɔnɔdzikpɔla kple dɔnɔ geɖe ate ŋu aɖi ɖase be le nyateƒe me Yehowa nye ‘dɔmetɔtrɔ Fofo kple akɔfafawo katã ƒe Mawu, amesi fa akɔ na mí le míaƒe xaxa blibo la katã me.’—Korintotɔwo II, 1:3, 4.

[Etenuŋɔŋlɔwo]

[Aɖaka/Nɔnɔmetata si le axa 8]

Nya Siwo Ƒomea Ate Ŋu Abia Ðɔkta

• Aleke dɔlélea dzea egɔmee, eye aleke wòava nɔ?

• Dzesi kawoe adze, eye aleke woawɔ alé wo nu?

• Atikewɔmɔnu vovovo kawoe li?

• Atikewɔwɔ me tsonu gbegblẽwo, afɔku, kple viɖe kawoe le atikewɔmɔnu vovovoawo ŋu?

• Nukawoe woate ŋu awɔ be nɔnɔmea naka ɖe eme eye nukawoe wòle be woaƒo asa na?

[Aɖaka/Nɔnɔmetata si le axa 11]

Alesi Nàwɔ Ana Kpekpeɖeŋu

Ame aɖewo madi be yewoasrã ƒomea kpɔ alo ana kpekpeɖeŋu o le esi womenya nusi woagblɔ alo alesi woawɔ nu ɖe nɔnɔmea ŋui o ta. Ame bubuwo anye gaglãsudolawo, eye ne wotea tɔ ɖe nusi wosusu be akpe ɖe ƒomea ŋu dzi la, ate ŋu atɔtɔ ƒomea ɖe edzi. Ekema aleke ame awɔ ana kpekpeɖeŋu ƒome si me tɔ aɖe dze dɔmavɔleameŋu, evɔ manɔ nu dem ƒomea ƒe nya siwo metsɔ egbɔ me o?

Ðo to veveseseɖeamenutɔe. Yakobo 1:19 gblɔ be ‘miɖe abla le nusese me.’ Nye toɖola nyui natsɔ aɖee fia be yetsɔa ɖe le eme eye nàɖe mɔ na ƒometɔwo be woagblɔ woƒe dzimenyawo ne wodi be yewoaƒo nu. Anɔ bɔbɔe na wo wu be woawɔ ema ne wode dzesii be ‘ame ƒe nu wɔa nublanui na wò.’ (Petro I, 3:8) Gake nenɔ susume na wò be ame alo ƒome eve aɖeke mewɔa nu ɖe dɔmavɔleameŋu ŋu le mɔ ɖeka ma ke nu o. Eyata Kathleen, si kpɔ dadaa dzi eye emegbe srɔ̃aŋutsu, si dzi dɔmavɔleameŋu dze hã va kpe ɖe eŋu la gblɔ be: “Mègaɖo aɖaŋu o, negbe ɖe nènya nusianu ku ɖe dɔlélea alo nɔnɔmea ŋu hafi.” (Lododowo 10:19) Azɔ ɖo ŋku edzi be ne ènya nu tso dɔlélea ŋu hã la, dɔnɔa kple eƒe ƒomea ate ŋu atso nya me be yewomabia alo axɔ wò aɖaŋuɖoɖo o.

Na kpekpeɖeŋu si hiã. Togbɔ be ele be nàɖɔ ŋu ɖo be màgade nu ƒomea ƒe nya siwo metsɔ gbɔwò o me hã la, tsɔ ɖokuiwò na nenye be wohiã wò kpekpeɖeŋu. (Korintotɔwo I, 10:24) Braam, si ƒe nyawo míeyɔ le nyati siawo katã me la gblɔ be: “Mía xɔlɔ̃ Kristotɔwo kpe ɖe mía ŋu ale gbegbe. Le kpɔɖeŋu me, le ɣeyiɣi siwo me Michelle ƒe nɔnɔmea va ɖo ŋkubiã me eye míeva dɔ kɔdzi la, mía xɔlɔ̃ siwo ade ene vaseɖe ade nɔa mía gbɔ zã bliboa katã ɣesiaɣi. Wonaa kpekpeɖeŋu si míehiã la mí ɣesiaɣi.” Braam srɔ̃ Ann, gblɔ kpee be: “Enye vuvɔŋɔli si nu sẽ ale gbegbe, eye wonaa mí detsi bubu ƒomevi gbesiagbe hena kwasiɖa ɖeka. Detsi xɔdzo kple vividodoɖeameŋu ƒe lɔlɔ̃ si woɖe fia mí la do ŋusẽ mí.”

Do gbe ɖa kpli wo. Ɣeaɖewoɣi la, ate ŋu adzɔ be naneke gobii meli si nàte ŋu awɔ o. Gake nusiwo dea dzi ƒo na ame wu la dometɔ ɖekae nye Ŋɔŋlɔawo me nya tuameɖo aɖe me dzodzro kple dɔnɔawo kple woƒe ƒomeawo alo gbedodoɖa tso dzi me kpli wo. (Yakobo 5:16) Nicolas, si xɔ ƒe 18 si dada blanuiléle mavɔleameŋu ɖea fu na la gblɔ be: “Mègabu ŋusẽ si gbedodoɖa kpɔna ɖe amesiwo ŋu dɔmavɔleameŋu le kple woƒe ƒomewo dzi—kple gbedodoɖa kpli wo ɖekae—nu tsɛe gbeɖe o.

Ẽ, kpekpeɖeŋu nyuitɔ ate ŋu awɔ geɖe le kpekpe ɖe ƒomewo ŋu be woanɔ te ɖe nuteɖeamedzi si dɔmavɔleameŋu hena vɛ la nu. Biblia gblɔe ale: “Xɔlɔ̃ lɔ̃a ame ɣesiaɣi, ɖe wodzia ame nɔvi be wòatsɔ hiãkame ɖe ame ti.”—Lododowo 17:17, The New English Bible.

[Aɖaka/Nɔnɔmetata si le axa 12]

Ne Dɔlélea Awui

Ƒome aɖewo madi be yewoaƒo nu tso woƒe lɔlɔ̃tɔ si ɖo kudo nu ƒe ku ŋu o. Gake agbalẽ si nye Caring—How to Cope gblɔ be “ne ènya nane tso nusi nàkpɔ mɔ na kple nusi nàwɔ ŋuti la, ate ŋu akpe ɖe ŋuwò be nàɖe dzi ɖi.” Togbɔ be vovototo anɔ afɔ siwo tututu woaɖe me, le nutoa me sewo kple kɔnuwo nu hã la, aɖaŋuɖoɖo aɖewoe nye si siwo ŋudɔ ƒomea ate ŋu awɔ ne wole woƒe lɔlɔ̃tɔ si ŋuti dɔléle si awui le la dzi kpɔm le aƒeme.

Do Ŋgɔ

 1. Bia ɖɔktaa ne wòagblɔ nusiwo nàkpɔ mɔ na le ŋkeke kple gaƒoƒo mamlɛawo me, kple nusi nàwɔ ne amea ku le zã me.

 2. Ŋlɔ amesiwo wòahiã be nàtsi ku na ƒe ŋkɔwo da ɖi.

 3. Bu alesi miawɔ kunuae ŋu:

• Nukae nye dɔnɔa ƒe didiwo?

• Woaɖii alo woatɔ dzoea? Tsɔ ga si kunuwɔla vovovowo xɔna la sɔ kple wo nɔewo.

• Ɣekaɣie woawɔ kunua? Na ɣeyiɣi be amewo nate ŋu awɔ ɖoɖo ɖe mɔzɔzɔ ŋu.

• Amekae akpɔ kunua alo ŋkuɖodzi ɖoɖowo dzi?

• Afikae woawɔe le?

 4. Ne atike na dɔnɔa megale ŋute o gɔ̃ hã la, ate ŋu anya nusiwo gblɔm wole hele wɔwɔm le egbɔ. Kpɔ nyuie be miagagblɔ nane si miedi be wòase o le egbɔ o. Àte ŋu aƒo nu nɛ kple gbe bɔbɔe ahalé eƒe asiwo bene kakaɖedzi nagaɖo eme.

Ne Lɔlɔ̃tɔa Ku

Nusiwo ame bubuwo ate ŋu awɔ atsɔ akpe ɖe ƒomea ŋu enye si:

 1. Na ɣeyiɣi si sɔ ƒomea be woawo ɖeɖe nanɔ ame kukua gbɔ ale be woate ŋu abu alesi woakpɔ kua gbɔe la ŋu.

 2. Do gbe ɖa kple ƒomea.

 3. Ne ƒomea dzra ɖo vɔ la, ɖewohĩ woahiã kpekpeɖeŋu be woana nyanya amesiwo gbɔna:

• Ðɔkta si awɔ kua ŋuti nuŋlɔɖi eye wòana ku ɖaseɖigbalẽ.

• Kunuwɔla, amekukudzraɖolawo, alo amesiwo tɔa dzo ame kukuwo, be woava kɔ ame kukua.

• Ƒometɔwo kple xɔlɔ̃wo. (Àte ŋu agblɔ nya sia ƒomevi ŋuɖɔɖotɔe be: “Meƒo ka be mana nànya nu tso [dɔnɔa ƒe ŋkɔ] ŋu. Evem ŋutɔ be nya vɔ̃e le asinye na wò. Abe alesi nènyae ene la, [dɔléle] le fu ɖem nɛ ɣeyiɣi aɖee nye sia, eye wòku [ɣeyiɣi kple teƒea].)

• Nyadzɔdzɔgbalẽ ƒe dɔwɔƒe be wòaɖe gbeƒã kua ne mielɔ̃.

 4. Ðewohĩ ƒomea adi be ame aɖe nakpe ɖe yewo ŋu be yewoawɔ ɖoɖo ɖe kunuwɔwɔa ŋu.

[Nɔnɔmetata si le axa 9]

Ele be ƒometɔwo nawɔ nusianu si woate ŋui be woanɔ agbe ɖɔʋu alesi woate ŋui

[Nɔnɔmetata si le axa 10]

Gbedodoɖa kple ƒomea ate ŋu akpe ɖe wo ŋu woanɔ te ɖe enu