Ta 6
Fiaɖuƒea Didi
1. (a) Nukae Yehowa wɔ le dziɖuɖu gome si to vovo na nusi amegbetɔwo wɔ? (b) Nukata míaƒe agbe si míatu ɖe Mawu ƒe Nya la dzi akpɔ mía ta?
NE WOTSƆ nu nyui aɖe le nawòm la, aleke nèwɔa nui? Mèdina vevie be wòasu ye si oa? Yehowa Mawu tsɔ agbe mavɔ nɔnɔ le dziɖuɖu deblibo te ƒe mɔnukpɔkpɔ le nawòm. Enye nyateƒe be dunyahela geɖe nye ame baɖawo le dziɖuɖu siwo li egbea me eye zi geɖe la, womewɔa ɖe woƒe tameɖoɖowo dzi o. Ne amegbetɔwo ɖo tame nyui hã la, womete ŋu he dziɖuɖu nyui vɛ Mawu ƒe dziɖulanyenye ƒe kpekpeɖeŋu manɔmee o. (Lododowo 20:24) Gake le ɣeyiɣiawo katã me la, Mawu le ɖoɖo wɔm be yeaɖo yeƒe Fiaɖuƒedziɖuɖu deblibo anyi, eye ekpea dzɔdzɔenyenyelɔ̃lawo katã be woava kpɔ viɖe le eme. Míate ŋu aɖo ŋu ɖe eƒe ŋugbedodowo ŋu eye wonye nyateƒe. Mate ŋu aka aʋatso o. Míate ŋu atsɔ kakaɖedzi atu míaƒe agbenɔnɔ ɖe eƒe Nya la dzi.—Nyaɖeɖefia 21:1-5; Tito 1:2.
2. (a) Ɣekaɣie Mawu gblɔ eƒe tameɖoɖo be yeaɖo Fiaɖuƒe dzɔdzɔe anyi, eye alekee? (b) Nukae Hebritɔwo 11:4-7 ɖe fia ku ɖe amesiwo kpɔ mɔ na Fiaɖuƒea ŋu?
2 Mawu ƒe tameɖoɖo be yeaɖo Fiaɖuƒe dzɔdzɔe anyi la menye nu yeye o. Esime wotɔ gbe Mawu ƒe fianyenye zi gbãtɔ le Eden-bɔa me la, Mawu ɖe eƒe tameɖoɖo gblɔ be yeaɖo “dzidzimevi” aɖe si “agbã” ta na Satana kple eƒe dzidzimeviwo la ɖa. (Mose I, 3:15; Romatɔwo 16:20) Abel, Henox, kple Noa xɔ Yehowa ƒe ŋugbedodo ma dzi se le blemaxexe ma ƒe nuvlowɔwɔwo me. Esi woka ɖe edzi be Mawu aɖo eteƒe na “amesiwo dinɛ vevie” ta la, wodo dzi le vlododowo me eye wotia be ‘yewoazɔ kple Mawu’ ahaɖe gbeƒã dzɔdzɔenyenye. (Hebritɔwo 11:4-7) Kpɔɖeŋu nyui kawoe nye si wonye na amesiwo katã xɔ Mawu ƒe Fiaɖuƒea ƒe ‘vava’ dzi se egbea!
ƑOME ÐEDZESI AÐE
3. Aleke Abraham nye kpɔɖeŋu nyui aɖe na mí le nya siwo le Mose I, 12:1-7 nui?
3 Le ƒe siwo wu 400 le Tsiɖɔɖɔa megbe la, Mawu na eme kɔ ƒã be “dzidzimevi” si ava nye fia si ŋugbe wodo la ado tso Abraham ƒe ƒomea me. Gake nukata wòanye Abraham mee wòado tso? Elabena Mawu kpɔ xɔse ɖedzesi aɖe le eyama me. Eyɔ Abraham tso wo dedu Ur si le Kaldea-nyigba dzi eye wòɖoe ɖe Kanaan-nyigba si nye dzronyigba dzi hegblɔ nɛ be:
“Wò me woayra anyigba dzi ƒomeawo katã le. . . . Wò dzidzimeviwo matsɔ anyigba sia ana.” (Mose I, 12:3, 7; Dɔwɔwɔwo 7:4)
Le esi teƒe be Abraham naku ɖe wo dedu ŋu la, egblẽe ɖi tegbee. Elɔ̃ faa be yeawɔ tɔtrɔ blibo le yeƒe agbenɔnɔ me ale be yeaɖo to Fiagã Aƒetɔ Yehowa bliboe. Enye kpɔɖeŋu nyui aɖe na amesiwo katã atsɔ woƒe agbe aɖe adzɔgbe na Yehowa egbea la vavã!
4. Aleke woyra Sara ɖe eƒe xɔse tae? (Hebritɔwo 11:11, 12)
4 Togbɔ be srɔ̃a Sara tsi ko vaseɖe eƒe nyagãkuku me hã la, Yehowa ka ɖe edzi na Abraham emegbe be: “Mayrae ale bena, wòava nye dukɔwo kple dukɔwo dziɖulawo dada.” (Mose I, 17:16) Esime Sara anukwareɖila la xɔ ƒe 90 la, woyrae wòdzi ŋutsuvi si nye Isak na Abraham, fia geɖe ƒe tɔgbui la.—Mateo 1:2, 6-11, 16; Nyaɖeɖefia 17:14.
5. Aleke woɖo Abraham kple Isak ƒe toɖoɖo teƒe na woe?
5 Emegbe Yehowa do Abraham kple Isak kpɔ tsɔ dzro wo mee. Egblɔ na Abraham be wòatsɔ tenuvi si Sara dzi nɛ la azɔ ŋkeke etɔ̃ ƒe mɔ ayi Moria-to la dzi eye wòatsɔe asa numevɔ na ye le afima. Le ɣemaɣi me la, anɔ eme be Isak tsi xɔ abe ƒe 25 ene eye ŋusẽ le eŋu be wòatsɔ nake si le kpekpem ayi toa dzi; ŋusẽ nɔ eŋu hã be wòaʋli le fofoa si xɔ ƒe 125 la si ne ɖe wòdi be yeawɔ nenema. Gake vifofoa kple via siaa ɖo to hewɔ woƒe akpa dzi le nudzɔdzɔ ʋãme sia me vaseɖe esime Yehowa ƒe dɔla ɖo asi Abraham dzi esi wòtsɔ hɛ be yeawui. Etsɔ agbo aɖe sa vɔ ɖe Isak teƒe.—Mose I, 22:1-14.
6. (a) Nyagblɔɖikpɔɖeŋu kae wowɔ le afima? (b) Nukata wòle be nàtsɔ ɖe le ŋugbedodo si le Mose I, 22:18 me vevie?
6 Le afisia la, Mawu nɔ alesi yeatsɔ ye ŋutɔ ƒe Vi asa vɔe be yeatsɔ aɖe ameƒomea ƒe xexeame ƒe nuvɔ̃ ɖae la ƒe kpɔɖeŋu wɔm le nyagblɔɖimɔ nu. (Yohanes 1:29; Galatiatɔwo 3:16) Elabena Mawu gblɔ na Abraham ɣemaɣi be:
“To wò dzidzimeviwo me woayra anyigba dzi dukɔwo katã le, elabena èɖo to nye gbe.”—Mose I, 22:15-18.
7. Míaƒe nuwɔna ka teƒee Yehowa aɖo na mí?
7 Toɖoɖo ƒe kpɔɖeŋu ɖedzesi kawoe nye si Abraham kple Isak nye! Womagblɔ na mí be míawɔ woƒe vɔsasa ma tɔgbe o gake ele vevie be míabɔbɔ mía ɖokui na Yehowa abe alesi wowɔe ene le lɔlɔ̃ vavã si le mía si nɛ ta. (Yakobo 4:7; Korintotɔwo II, 9:13) Ame ŋutɔ ɖokui kple eƒe nudidiwo tsɔtsɔ sa vɔe faa be woati ‘Fiaɖuƒea ƒe vava’ yome la dzea Yehowa ŋu ɣesiaɣi eye wòɖoa eteƒe na ame hã.—Mateo 6:33.
8. (a) Aleke Yakob ƒe nuwɔna to vovo na Esau tɔe? (b) Aleke Isak yra Yakob?
8 Isak ƒe vi Yakob hã nye ame bubu si ti Fiaɖuƒea yome. Gake nɔvia si nye venɔvi Esau ya do vlo nu kɔkɔewo eye wòkpɔ dzidzɔ ɖe Kanaan-nyɔnuwo kple ɖokuitɔdidi ƒe ŋutilãmenudidi ŋu. Eye edzra eƒe ŋgɔgbevinyenye xɔasia na Yakob ɖe bɔbɔ dzro ko ta! (Hebritɔwo 12:16) Yakob si ƒe susu nɔ gbɔgbɔmenuwo ŋu la de asixɔxɔ gã aɖe ŋgɔgbevinyenyea ŋu eye Yehowa kpɔ egbɔ be teƒeɖoɖo sia su esi eye wòna wòxɔ Isak si nye amegãɖeɖi la ƒe yayrawo gɔ̃ hã. Esau ɖe nyɔnu siwo subɔa gbɔgbɔ vɔ̃wo gake Yakob ya zɔ mɔ didi yi Mesopotamia be yeava ɖe srɔ̃ tso Yehowa subɔlawo dome. Isak tsɔ nya siawo do ŋusẽ Yakob ɣemaɣi be:
“Mawu ŋusẽkatãtɔ nayra wò, eye wòana nadzi asɔ gbɔ ɖe dzi, bena natrɔ azu dukɔ geɖe.”—Mose I, 25:27-34; 26:34, 35; 27:1-23; 28:1-4.
9. (a) Nukata wotrɔ Yakob ƒe ŋkɔ wòzu Israel? (b) Aleke eƒe kpɔɖeŋua aɖe vi na míi?
9 Emegbe esime wòsusɔ vie Yakob naxɔ ƒe 100 la, egaɖe asixɔxɔ gã dede gbɔgbɔmenuwo ŋu fia. Ete kame kple mawudɔla aɖe zã blibo be wòayra ye. Yehowa ɖe Eƒe ŋudzedzekpɔkpɔ ɖe Yakob ŋu fia hetrɔ eƒe ŋkɔ wòzu Israel, si gɔmee nye “ète kame kple Mawu.” (Mose I, 32:24-30) Woaɖo eteƒe na míawo hã egbea ne míedze agbagba ti gbɔgbɔmenu xɔasiwo yome eye míetsri xexe vɔ̃ɖi si me míele ƒe nuwɔnawo.—Mateo 6:19-21.
10. (a) Aleke nyagblɔɖi si le Mose I, 28:3 va emee? (b) Amesiwo ɖi anukware ƒe kpɔɖeŋu ʋãdziname siwo le Hebritɔwo 11:1–12:1 la dometɔ aɖewo ɖe?
10 Yehowa ƒo Yakob ƒe dzidzimeviwo nu ƒu wonye “dukɔ geɖe” vavã eye Mawu to Mose si nye Wo kple amegbetɔwo domenɔla, amesi Wòzã tsɔ dze Biblia ŋɔŋlɔ gɔme la, dzi gblɔ na Israel-dukɔa be:
‘Ne miaɖo to nye gbe la, mianye nunɔlawo ƒe fiaɖuƒe kple dukɔ kɔkɔe nam.’ (Mose II, 19:5, 6)
Nublanuitɔe la, esi ŋutilã me Israel-viwo meɖo to Mawu o ta la, womete ŋu va zu gbɔgbɔmefiaɖuƒe ma o. Gake ame geɖe wɔ nuteƒe na Mawu le dukɔ ma me—abe Israel-ʋɔnudrɔ̃lawo, nyagblɔɖilawo, kple Raxab si nye gbolo tsã gɔ̃ hã ene. Míate ŋu axlẽ nu tso ‘ɖaseɖila’ anukwaretɔ mawo ŋu le Hebritɔwo 11:1–12:1, eye dzideƒo nyui kae nye si wonye na amesiwo le mɔ kpɔm na ‘Mawu ƒe Fiaɖuƒea ƒe vava’ le míaƒe ɣeyiɣi siawo me!
11. Aleke nàte ŋu anɔ abe ɖasefo anukwaretɔ mawo ene?
11 Ðe nèdi be xɔse sesẽ nanɔ ye sia? Èdi fifia be yeanɔ abe ŋutsu kple nyɔnu xɔsetɔ siwo ‘denyigba si nyo wu la dzro wo, esi nye dziƒo tɔ,’ ẽ, amesiwo kpɔ mɔ na “du, si gɔmeɖoanyi li na, esi ƒe aɖaŋuwɔla kple tula enye Mawu” la enea? (Hebritɔwo 11:10, 16) Àbia be ‘Gake nukae nye “du” sia?’
DU SI MAWU TSO
12. “Du” ka yomee Mawu subɔla siwo nɔ anyi le blema la ti? (Kpɔ Hebritɔwo 11:22-32; Rut 1:8, 16, 17 hã.)
12 “Du” siae nye Mawu ƒe Fiaɖuƒe si ŋugbe wòdo la. Nukata míegblɔ nenema? Le blemaɣeyiɣiwo me la, du ɖeka nye fiaɖuƒe si dzi fia ɖeka ɖuna. Fia nyui gbãtɔ si woyɔ le Biblia mee nye ‘Melxizedek si nye Salem-dua ƒe fia kple Mawu, dziƒoʋĩtɔ ƒe nunɔla.’ Ƒe alafa geɖe megbe la, wova tso Yerusalem-dua ɖe teƒe ma eye abe Salem ke ene la, eva zu dziƒofiaɖuƒe si le Fiagã kple Nunɔlagã Yesu Kristo si me la ƒe kpɔɖeŋu. (Mose I, 14:1-20; Hebritɔwo 7:1, 2, 15-17; 12:22, 28) Togbɔ be Abraham kple Sara kpakple Isak kple Yakob menya nu geɖe tso “du” si dzi Mesia la aɖu fia ɖo la ŋu ɣemaɣi o hã la, wokpɔ mɔ nɛ vevie. Abraham “dzɔ dzi be, yeakpɔ ŋkeke la.” Wò hã àte ŋu akpɔ dzidzɔ ne èdi Fiaɖuƒeɖoɖo ma me nɔnɔ vevie le xɔse me.—Hebritɔwo 11:14-16; Yohanes 8:56.
13, 14. Aleke nya si Yakob gblɔ ɖi le eƒe kuba dzi dze emevava gɔmee?
13 Yakob dzi ŋutsuvi 12, amesiwo va zu tatɔ na Israel-to 12 la le ɣeyiɣi aɖe megbe. Esime Yakob nɔ eƒe kuba dzi la, egblɔ to 12 la dometɔ si me Mawu ƒe dziɖula si wona Fiaɖuƒeŋusẽe ado tso la ɖi be:
“Dzatavi enye Yuda. . . . Atamkayi magbe Yuda si nɔnɔ o, eye womaɖe fiatikplɔ ɖa le ekɔme o, vaseɖe esime amesi tɔ wònye [alo Silo] nava; amesi dukɔwo ana tae.” (Mose I, 49:9, 10)
Ðe Silo va tso Yuda-toa mea? Ẽ, eva!
14 Yakob ƒe nyagblɔɖia dze emevava gɔme le ƒe 600 kple edzivɔ megbe. Ɣemaɣie Yehowa tia ‘ŋutsu si dze eŋu’ tso Yuda-toa me. Eŋkɔe nye Dawid. Mawu ɖo ‘Yuda-toa ƒe dzata’ kalẽtɔ sia Eƒe dukɔ Israel kplɔla kple fiae. (Samuel I, 13:14; 16:7, 12, 13; Kronika I, 14:17) Yehowa do Fiaɖuƒe mavɔ ŋugbe na Fia Dawid.—Psalmo 89:21, 28-30.
15. Nukata Yehowa mu Yuda-fiaɖuƒea, eye ɣeyiɣi didi kae meganɔ anyi o?
15 Dawid si dze eƒe fiaɖuɖu gɔme le ƒe 1077 D.M.Ŋ. lae nye Yuda-fia siwo ɖu dzi le Yerusalem-dua me la ƒe gbãtɔ. Nu dze edzi na dukɔa le ɣeyiɣi siwo me eƒe fiawo ɖo to Yehowa. Gake ne fia aɖe va nye ame vɔ̃ɖi eye wòdze aglã ɖe Yehowa ƒe se dzɔdzɔeawo ŋu la, dukɔa kpea fu. (Lododowo 29:2) Zedekiya si nye Yuda-fia mamletɔ la vɔ̃ɖi ŋutɔ. Mawu ƒe nyagblɔɖila gblɔ le eŋu be: “Woaɖe fiakuku ɖi. . . . Anyiglãgo, anyiglãgo, anyiglãgowo ƒe anyiglãgo mawɔ woe; . . . vaseɖe esime amesi tɔ wònye la, nava, eye matsɔe nɛ.” Fiagã Aƒetɔ Yehowa mu fiaɖuƒe ma vaseɖe esime fia si “tɔ wònye” nava.—Xezekiel 21:31, 32.
FIA SI “TƆ WÒNYE” LA
16. Aleke Ŋɔŋlɔawo ɖe domenyila si tɔ Fiaɖuƒea anye tegbee la fiae?
16 Ameka ‘tɔe’ Dawid ƒe Fiaɖuƒea ‘anye’? Biblia-gbalẽ si nye Mateo ƒe kpukpui 17 gbãtɔwo ɖo eŋu. Woƒo nu tso ƒome si me “dzidzimevi” la ado tsoe la ŋu tso Abraham dzi vaseɖe Dawid dzi, eye wòva ɖo Yosef si va nye Maria srɔ̃ dzi. Esia fia be Maria viŋutsu gbãtɔ ‘tɔe’ Fiaɖuƒea ‘anye.’ Eyata le ƒe 2 D.M.Ŋ. ƒe gɔmedzedze la, mawudɔla Gabriel te ŋu gblɔ le ŋutsuvi si ƒe fu woafɔ nukutɔe ŋu be:
“[Àyɔ] eƒe ŋkɔ be Yesu. Eya la anye gã, eye woayɔe be dziƒoʋĩtɔ la ƒe Vi, eye Aƒetɔ [Yehowa] Mawu la atsɔ fofoa Dawid ƒe fiazikpui la anae; eye wòaɖu fia le Yakob ƒe aƒe dzi tegbetegbe, eye nuwuwu manɔe na eƒe fiaɖuƒe la o.” (Luka 1:26-33)
Le ƒe alafa geɖe siwo va yi me la, Yehowa to mɔ wɔnuku dzi wɔ ɖe eƒe tameɖoɖoa dzi be yeaɖo amesia si anye Dawid ƒe Fiaɖuƒea domenyila tegbee la zi dzi. Esi míele nusiawo me dzrom la, ɖe womedo ŋusẽ míaƒe xɔse le Mawu ƒe ŋugbe si wòdo be yeƒe ‘Fiaɖuƒea ava’ la ŋu oa?
17, 18. (a) Amekawo koe anyi dziƒofiaɖuƒea dome? (b) Amekawoe nye anukwaretɔ siwo woafɔ ɖe tsitre le anyigba dzi la dometɔ aɖewo? (d) Nukae wòle be esia nade dzi ƒo na mí be míawɔ?
17 Menye ɖe mí katã míakpɔ mɔ be míanɔ dziƒofiaɖuƒea me kple Yesu o, elabena eƒe nusrɔ̃lawo ƒe “ha sue” la koe wodzra mɔnukpɔkpɔ sia ɖo ɖi na. (Luka 12:32) Mɔkpɔkpɔ sia menɔ Fia Dawid gɔ̃ hã si o. Wogblɔ na mí be: “Dawid melia yi dziƒo o.” (Dɔwɔwɔwo 2:34) Yohanes Amenyrɔ̃ɖetsimela kple ŋutsu kple nyɔnu anukwareɖila bubu siwo nɔ anyi le blema hã meyi ɖe “dziƒofiaɖuƒe la” me o.—Mateo 11:11; Hebritɔwo 11:39, 40.
18 Gake woafɔ anukwaretɔ siawo siwo lé woƒe nuteƒewɔwɔ me ɖe asi la ɖe tsitre le anyigba sia dzi eye woaɖo wo dometɔ geɖe “amegãwoe” le Mawu ƒe Fiaɖuƒea me. (Psalmo 45:17) Ðe màdi be yeado dzaa na wo tso yɔdowo me eye yeade ha vivi kple wo oa? Àdi vavã! Ekema ɖoe kplikpaa hã be nàdi “du” ma vevie to alesi nàva zu ‘Mawu ƒe Fiaɖuƒea ƒe hadɔwɔla’ kple ame bubu siwo katã kpɔa ŋudzedze ɖe mɔnukpɔkpɔ wɔnuku ma ŋu egbea.—Kolosetɔwo 4:11.
[Nɔnɔmetata siwo le axa 52, 53]
WODI MAWU ƑE FIAÐUƑEA VEVIE
ABEL 3900 D.M.Ŋ. Lɔƒo
NOA 2970-2020 D.M.Ŋ.
ABRAHAM, SARA, ISAK, YAKOB 2018-1711 D.M.Ŋ.
YOSEF 1767-1657 D.M.Ŋ.
MOSE 1593-1473 D.M.Ŋ.
RAXAB 1473 D.M.Ŋ.
ƲƆNUDRƆ̃LAWO 1473-1117 D.M.Ŋ.
RUT, NAOMI 1300 D.M.Ŋ. Lɔƒo
DAWID 1107-1037 D.M.Ŋ.
NYAGBLƆÐILAWO 1117-442 D.M.Ŋ.
YOHANES AMENYRƆ̃ÐETSIMELA 2 D.M.Ŋ.-31 M.Ŋ.