Ta 6

Nya Ade Si Dzegɔ Ameƒomia

 1. (a) Nya kae Satana fɔ ɖe te le Eden? (b) Aleke nusi wògblɔ la fɔ nya ma ɖe tee?

NYA aɖe fɔ ɖe te si lɔ nuwɔwɔwo katã ɖe eme. Satana te ɖe Xawa ŋu hegblɔ nya aɖe si fia be wole nu gã aɖe tem woa kple srɔ̃a Adam. Ebia be: “Vavãe Mawu gblɔ bena migaɖu abɔmetiawo katã ƒe tsetse aɖeke o mahã?” Xawa ɖo eŋu be ati ɖeka ŋu koe Mawu gblɔ le be: “Migaɖu eƒe ɖeke o, eye migaka asi eŋu hã o, be miagaku o!” Ɣemaɣie Satana gblɔ tẽ be Yehowa ka aʋatso, eye wògblɔ be Xawa kple Adam ƒe agbe menɔ te ɖe to si woaɖo Mawu dzi o. Egblɔ be Mawu le nu nyui aɖe—si nye dzidzenuwo ɖoɖo na wo ɖokui le agbe me ƒe ŋutete la—tem eƒe nuwɔwɔwo. Satana gblɔ be: “Miele kuku ge akpɔ o; ke boŋ Mawu nyae bena, gbesigbe ke miaɖu eƒe ɖe la, miaƒe ŋku laʋu, eye mianɔ abe Mawu ene, anya nyui kple vɔ̃.” (Mose I, 3:1-5) Satana ble Xawa wòxɔe se be ne yewɔ nyametsotso na ye ɖokui la eme anyo na ye wu. Ema fia be Satana tɔ gbe gomekpɔkpɔ si le Mawu si be wòaɖu dzi kple mɔ si dzi wòtona ɖua dzie la le afima. Nya si do mo ɖa la lɔ xexeame katã ƒe fianyenye ɖe eme ŋutɔŋutɔ.

 2. Nukae ate ŋu akpɔ amegbetɔ atsu kple asi gbãtɔa ta hafi?

² Yehowa-lɔlɔ̃ ate ŋu akpɔ Xawa ta hafi. Bubu dede srɔ̃a ƒe tanyenye ŋu hã ate ŋu aɖo asi edzi be mawɔ nuvɔ̃ o hafi. Gake nusi dze abe nusi aɖe vi nɛ enumake ene la ŋu ko wòbu. Nusi ŋu wode se ɖo la va zu nudzroame nɛ. Esi Satana ƒe nyagbɔgblɔa blee vevie la, eda le Mawu ƒe se dzi. Azɔ ekplɔ Adam hã de eme. Togbɔ be Satana ƒe aʋatsokaka la meflu Adam o hã la, eya hã ɖe ŋudzedzemakpɔmakpɔ ɖe Mawu ƒe lɔlɔ̃ ŋu fia. Eŋe aɖaba ƒu Yehowa ƒe tanyenye dzi eye wòtia be yeawɔ ɖeka kple ye srɔ̃ aglãdzela la.—Mose I, 3:6; Tim. I, 2:13, 14.

 3. (a) Nya bubu kae do ƒome kplikplikpli kple Satana ƒe hoho ɖe Yehowa ƒe fianyenye ŋu? (b) Amekawoe wòlɔ ɖe eme?

³ Satana ƒe hoho ɖe Yehowa ƒe fianyenye ŋu la metɔ ɖe nusi dzɔ le Eden la dzi o. Le dzidzedze si wòkpɔ le afima megbe la etɔ gbe ame bubuwo ƒe nuteƒewɔwɔ na Yehowa. Eyata esia va zu nya bubu si do ƒome kplikplikpli kple gbãtɔa. Eƒe gbetɔamea va lɔ Adam ƒe dzidzimeviwo katã kple Mawu ƒe gbɔgbɔmeviwo katã kpakple Yehowa ƒe Ŋgɔgbevi si wòlɔ̃ vevie la kura gɔ̃ hã ɖe eme. Le Hiob ƒe ŋkekeawo me la, Satana gblɔ be amesiwo subɔa Yehowa la mesubɔnɛ le Mawu kple alesi wòɖua dzie la lɔlɔ̃ ta o, ke boŋ le ɖokuitɔdidi ƒe susuwo ta. Ehe glãka be ne wohe fukpekpe va wo dzi la wo katã woati ɖokuitɔdidi ƒe nudzodzrowo yome. Ðe eƒe nya la le emea?—Hiob 1:6-12; 2:1-6; Nyaɖ. 12:10.

Alesi Wowɔ Ðe Nya La Ŋue

 4. Nukatae amegbetɔ geɖewo mede Yehowa ƒe fianyenye dzi o?

⁴ Yehowa mebu be ame bubuwo mawɔ ɖeka kple Satana le aglãdzedze me o. Le nyateƒe me la esime Mawu nɔ afia tsom le Eden la eƒo nu tso amesiwo ava nye ‘da la ƒe dzidzime’ ŋuti. (Mose I, 3:15) Farisitɔ siwo ɖo nugbe hena wowu Yesu, kpakple Yuda Iskariot amesi fia Kristo yome mɔ la, nɔ amesiawo dome. Menye ɖe vodada ɖi ɖe wo o. Wonya nusi dze, gake woɖo koŋ tsi tre ɖe Yehowa kple eƒe dɔlawo ŋu. Gake ame gbogbo manyaxlẽ bubu siwo mewɔ ɖe Yehowa ƒe nudidiwo dzi o la wɔ nu le manyamanya me.—Dɔw. 17:29, 30.

 5. (a) Aleke amesiwo yi edzi wɔ nuteƒe na Yehowa la bu eƒe nyae, esi to vovo na Xawa ƒe nɔnɔme? (b) Aleke Noa ɖo kpe eƒe nuteƒewɔwɔ dzie, eye aleke míate ŋu akpɔ viɖe tso eƒe kpɔɖeŋua mee?

⁵ Amesiwo to vovo na amesiawo katãe nye ŋutsu kple nyɔnu xɔsetɔ siwo srɔ̃ nu ku ɖe wo Wɔla ŋuti eye woɖe woƒe nuteƒewɔwɔ na eyama abe woƒe Fiagã ene la fia. Woxɔ Mawu dzi se. Wonya be yewoƒe agbe nɔ te ɖe toɖoɖo eyama kple wɔwɔ ɖe eƒe nyawo dzi la dzi. Noa nye ame ma tɔgbe. Eyata esime Mawu gblɔ na Noa be, “Ŋutilãwo katã ƒe nuwuwu ɖo azɔ, . . . Kpa aɖakaʋu na ɖokuiwò” la, Noa wɔ ɖe Yehowa ƒe mɔfiafia dzi. Togbɔ be woxlɔ̃ nu ame bubu siwo nɔ anyi ɣemaɣi la hã la, woyi woƒe gbesiagbegbenɔnɔ dzi abe ɖe naneke madzɔ o ene. Gake Noa kpa aɖakaʋu gã aɖe eye wòtsɔ veviedodo ɖe gbe ƒã na ame bubuwo ku ɖe Yehowa ƒe mɔ dzɔdzɔewo ŋu. Abe alesi nuŋlɔɖia gblɔe ene la, “Noa wɔe; alesi Mawu de se nɛ la, nenema pɛ wòwɔ.”—Mose I, 6:13-22; kpɔ Hebritɔwo 11:7 kple Petro II, 2:5 hã.

 6. (a) Nu bubu kae dze le nuteƒewɔlawo ŋu? (b) Aleke Sara ɖe nɔnɔme siawo fiae, eye mɔ ka nue míate ŋu akpɔ viɖe tso eƒe kpɔɖeŋua me?

⁶ Bubu deto tsɔtsɔ na tanyenye ƒe gɔmeɖosea kpakple Yehowa si wolɔ̃ hã nye nu ɖedzesi aɖe le nuteƒewɔlawo ŋu. Womenɔna abe Xawa, amesi wɔ nu esime mebia srɔ̃a o la ene o. Eye womele abe Adam, amesi ŋe aɖaba ƒu Yehowa ƒe se dzi la ene o. Abraham srɔ̃ Sara ɖe nɔnɔme nyui siawo fia. Eyɔ Abraham be yeƒe “aƒetɔ” le dzime, ke menye le eƒe nuƒo me ɖeɖeko o. Gawu la, eya ŋutɔ lɔ̃ Yehowa eye wònye nyɔnu xɔsetɔ. Wo kple Abraham wokpɔ “mɔ na du [Mawu ƒe Fiaɖuƒe], si gɔmeɖoɖoanyi li na, esi ƒe aɖaŋuwɔla kple tula enye Mawu.”—Pet. I, 3:5, 6; Heb. 11:10-16.

 7. (a) Nɔnɔme kawo mee Mose de Yehowa ƒe fianyenye dzi le? (b) Aleke eƒe kpɔɖeŋua ate ŋu aɖe vi na míe?

⁷ Anɔ abe ƒe 430 ene tso esime Abraham dzo le wo denyigba dzi megbe la, Mose nɔ Yehowa ƒe fianyenye yome esime nya do mo ɖa le woa kple Egipte ƒe Farao dome. Menye ɖe Mose ka ɖe eɖokui dzi o. Ðe ema teƒe la, meka ɖe eƒe nuƒoƒo nyuie ƒe ŋutete dzi o. Gake eɖo to Yehowa. Le megbe si Yehowa nɔ nɛ kpakple to nɔvia Aron ƒe kpekpeɖeŋu dzi la Mose gblɔ Yehowa ƒe nya na Farao edziedzi. Farao sẽ to. Israel-viawo dometɔ aɖewo kura gɔ̃ hã ɖe ɖeklemi Mose vevie. Gake nuteƒewɔwɔtɔe la Mose wɔ ɖe se ɖesiaɖe si Yehowa de nɛ la dzi, eye to eyama dzi la woɖe Israel tso Egipte.—Mose II, 7:6; 12:50, 51.

 8. (a) Nukae ɖee fia be nuteƒe wɔwɔ na Yehowa lɔ nu geɖe wu nusi Mawu gblɔ kã le nuŋɔŋlɔ me la wɔwɔ ɖe eme? (b) Aleke ŋudzedze kpɔkpɔ ɖe nuteƒewɔwɔ sia ƒomevi ŋu akpe ɖe mía ŋu be míawɔ Yohanes I, 2:15 ŋudɔe?

⁸ Amesiwo wɔ nuteƒe na Yehowa mesusu be nusi wodi tso yewo si koe nye be yewoawɔ ɖe sea dzi, awɔ ɖe nusi Mawu ŋlɔ ɖi la ɖeɖeko dzi o. Esime Potifar srɔ̃ dze agbagba be yeable Yosef nu wòawɔ ahasi kpli ye la, Mawu mede se aɖeke si woŋlɔ ɖi si tsri ahasiwɔwɔ na ame o. Gake le nusi Yosef nya ku ɖe srɔ̃ɖeɖe ƒe ɖoɖo si Yehowa ɖo anyi le Eden ŋu ta la, enya be ame bubu srɔ̃ gbɔ si woadɔ la madze Mawu ŋu o. Medzro Yosef be yeado afisi Mawu aɖe mɔ na ye yeanɔ abe Egiptetɔwo ene ase ɖo la akpɔ o. Ezɔ ɖe Yehowa ƒe mɔwo dzi to ŋugble si wòde tso Mawu ƒe nu wɔwɔ kple ameƒomea ŋu kple nusi wòkpɔ be enye Mawu ƒe lɔlɔ̃nu la wɔwɔ anukwareɖiɖitɔe la dzi.—Mose I, 39:7-12; tsɔe sɔ kple Psalmo 77:12, 13.

 9. Aleke woɖee fia enuenue be Abosam nye aʋatsokala le nya si wòfɔ ɖe te le Hiob ƒe ŋkekea me la me?

⁹ Ne wodo amesiwo nya Yehowa ŋutɔŋutɔ la kpɔ vevie ŋutɔ gɔ̃ hã la, wometena ɖa le eyama ŋu o. Satana gblɔ be ne Hiob ƒe nunɔamesiwo megale esi o alo wowɔ funyafunyae la, amesia kura gɔ̃ hã si ŋu Yehowa ƒo nu le nyuie ŋutɔ la atrɔ megbe ade Mawu. Gake Hiob ɖee fia be Abosam nye aʋatsokala, eye ewɔ esia togbɔ be menya nusita dzɔgbevɔ̃e sia katã nɔ eyama dzi vam o gake. (Hiob 2:3, 9, 10) Esi Satana ganɔ agbagba dzem be yeaɖo kpe yeƒe nya dzi emegbe la, ena Babilon-fia aɖe si do dziku gblɔ na Hebri-ɖekakpui etɔ̃ be ne womede ta agu hesubɔ legba si yeli la o la, woade wo kpodzo me woaku. Esi woƒoe ɖe wo nu be woawɔ tiatia le fia la ƒe sededea kple Yehowa ƒe se si tsi tre ɖe trɔ̃subɔsubɔ ŋu dome la, wona wonya kɔte be Yehowae yewosubɔna eye eyae nye yewoƒe Fiagã. Nuteƒewɔwɔ na Mawu nɔ vevie na wo wu agbe.—Dan. 3:14-18.

10. Aleke mí amegbetɔ madeblibowo míate ŋu aɖee afia be míewɔa nuteƒe na Yehowa nyateƒe?

¹⁰ Ekema ɖe míaƒo nya ta be hafi ame nanye nuteƒewɔla na Yehowa la ele be wòade blibo eye be amesi wɔ vodada la do kpo nu keŋkeŋ mahã? Kura o! Biblia la gblɔ ɣeyiɣi siwo me Mose mewɔ nusi sɔ o la ŋuti nya na mí kã. Medzɔ dzi na Yehowa o, gake megbe Mose o. Togbɔ be apostoloawo nye kpɔɖeŋu nyui le nu geɖe me hã la, gbɔdzɔgbɔdzɔ nɔ wo ŋu. Nuteƒewɔwɔ bia be woaɖo to enuenu tso dzi me. Gake le míaƒe blibomademade ƒe domenyinyia ta la, ne míeɖo koŋ ŋe aɖaba ƒu Yehowa ƒe lɔlɔ̃nu dzi le nya aɖeke me o la, edzɔa dzi nɛ. Ne le gbɔdzɔgbɔdzɔ ta míewɔ nu gbegblẽ la, ele vevie be míatrɔ dzime anukwaretɔe eye míagawɔe atraɖii o. Míetoa ema dzi ɖenɛ fiana be míelɔ̃ nusi Yehowa gblɔ be enyo la vavã eye míeléa fu nusi wògblɔ be menyo o. Le avuléle ɖe nuvɔ̃wo ta ƒe asixɔxɔ si le Yesu ƒe vɔsa ŋu si dzi míexɔ se ta la, tenɔnɔ dzadzɛ ate ŋu anɔ mía si le Mawu ŋku me.—Amos 5:15; Dɔw. 3:19; Heb. 9:14.

11. (a) Amegbetɔwo dometɔ kae ɖe mawusosroɖa deblibo fia, eye nuka dzie esia ɖo kpee? (b) Aleke nusi wòwɔ la kpena ɖe mía ŋue?

¹¹ Gake ɖe wòanye be mawusosroɖa ƒe agbe deblibo manya nɔ na amegbetɔwo oa? Nya sia ƒe ŋuɖoɖo nye “nya ɣaɣla” ƒe 4,000 sɔŋ. (Tim. I, 3:16) Togbɔ be wowɔ Adam wònye ame deblibo hã la, meɖo mawusosroɖa ƒe kpɔɖeŋu si de blibo ɖi o. Amekae ate ŋu awɔ esia? Eƒe dzidzimevi nuvɔ̃meawo dometɔ aɖeke mate ŋui o. Yesu Kristo ɖeka koe nye amesi te ŋu wɔe. Nusi Yesu wɔ la ɖee fia be ne ɖe Adam, amesi nɔ nɔnɔme siwo nyo wu me la di be yeawɔ nuteƒe bliboe la ate ŋui hafi. Vodada la metso Mawu ƒe nuwɔwɔ gbɔ o. Eyata Yesu Kristo nye kpɔɖeŋu si míedi be míasrɔ̃, menye le toɖoɖo Mawu ƒe se ɖeɖe fia ɖeɖeko me o, ke boŋ le ɖokui tsɔtsɔ na Yehowa, Xexeame Katã ƒe Fiagã la me hã.

Nukae Nye Mía Ŋutɔwo Míaƒe Ŋuɖoɖo?

12. Nukata wòle be míalé ŋku ɖe míaƒe nɔnɔme ɖe Yehowa ƒe fianyenye ŋu la ŋuti ɣesiaɣi?

¹² Egbea la ele be mía dometɔ ɖesiaɖe nadze ŋgɔ xexeame katã ƒe nya la. Míate ŋu asi le enu o. Nenye be míegblɔ le gaglãgbe be Yehowa ƒe akpa dzie míele la, Satana tɔa ŋku mí. Ehea dzizizi vɛ tso akpa ɖesiaɖe eye ayi edzi awɔe nenema vaseɖe eƒe nuɖoanyi vɔ̃ɖi sia ƒe nuwuwu. Mele be míaɖe ŋu ɖi o. (Pet. I, 5:8) Míaƒe agbenɔnɔ ɖena akpa si dzi míele le nya gã la me la fiana.

13. (a) Nya kae ku ɖe aʋatsokaka kple fififi ƒe dzɔtsoƒe ŋu si le be wòana míatsri wo? (b) Ðo nyabiabia siwo le memamã sia ƒe nuwuwu ku ɖe nɔnɔme siwo nana ame aɖewo wɔa nu gbegblẽ mawo ŋuti la ŋu ɖekaɖeka.

¹³ Míate ŋu abu nuteƒemawɔmawɔ be mele vevie o le esi wòbɔ ɖe xexeame ta o. Nuteƒewɔwɔ bia be míazɔ ɖe Yehowa ƒe mɔ dzɔdzɔeawo dzi le agbe me nya ɖesiaɖe me. Abe kpɔɖeŋu ene la, de ŋugble le nya siwo gbɔna la ŋu:

(1) Satana ka aʋatso be wòakplɔ mía dzila gbãtɔwo ade nuvɔ̃ me. Eva zu “aʋatsokafofo.” (Yoh. 8:44)

Nɔnɔme kawo mee ɣeaɖewoɣi la ɖeviwo metoa nyateƒe na wo dzilawo le o? Nukata wòle vevie be sɔhɛ Kristotɔwo naƒo asa na esia? (Lod. 6:16-19)

Dɔwɔɖu me nuwɔna kawoe ate ŋu ana ame nanɔ “aʋatsokafofo” la ƒe akpa dzi ke menye nyateƒe ƒe Mawu la ƒe akpa dzi o? (Mixa 6:11, 12)

Ne míegblɔ nyawo be míadze nyuie wu alesi míele ŋutɔŋutɔ la, ne menya gblẽ nu le ame aɖeke ŋu o ko la, ɖe wònye nu gbegblẽa? (Ps. 119:163; tsɔe sɔ kple Dɔwɔwɔwo 5:1-11.)

Ne ame aɖe wɔ nuvɔ̃ gã aɖe la, nukatae wòle vevie be wòagadze agbagba be yeato aʋatsokaka dzi atsyɔ nu edzi o? (Lod. 28:13)

(2) Esime Xawa kple emegbe la Adam wowɔ ɖe nya si Satana gblɔ be woawɔ nyametsotso ku ɖe nyui kple vɔ̃ ŋu na wo ɖokui la dzi la, nu gbãtɔ si wowɔe nye be wotsɔ nane si menye wo tɔ o. Wozu fiafiwo.

Ðe fififi nyo nenye be hiã tu ame alo ne nu geɖe le amesi ƒe nuwo wotsɔ la sia? (Lod. 6:30, 31; Pet. I, 4:15)

Ðe megblẽ tututu o ne enye nuwɔna si bɔ le afisi míele alo nusi míetsɔ la le suea? (Rom. 12:2; Ef. 4:28; Luka 16:10)

14, 15. (a) Le Kristo ƒe Ƒe Akpe Ðeka Dziɖuɖua ƒe nuwuwu la, dodokpɔ kae ava amegbetɔƒomea katã dzi? (b) Aleke nusi míawɔ fifia la awɔ dɔ ɖe nusi ado tso eme na mí ɣemaɣi la dzie?

¹⁴ Le Kristo ƒe Ƒe Akpe Ðeka Dziɖuɖua me la, Satana kple eƒe gbɔgbɔ vɔ̃wo anɔ aʋli me eye womagate ŋu akpɔ ŋusẽ ɖe ameƒomea dzi o. Gbɔdzɔe ka gbegbee nye si wòanye! Gake le ƒe akpe ɖeka la ƒe nuwuwu la woaɖe asi le wo ŋu vie. Satana kple eyomedzelawo ahe xaxa ava ‘ame kɔkɔe’ siwo nye ameƒome si wɔgbugbɔ ɖo te la me tɔ siwo le nuteƒe wɔm la dzi. Aho abe ɖe wòyina aʋa wɔ ge kple “du lɔlɔ̃ la,” si nye Yerusalem Yeye si le dziƒo la ene to agbagba si wòadze be yeatsrɔ̃ dzɔdzɔenyenye si wòɖo anyi ɖe anyigba dzi la ɖa dzi.—Nyaɖ. 20:7-10.

¹⁵ Abe alesi Satana wɔe va yi ene la, awɔ beble ŋudɔ akpe ɖe ɖokuitɔdidi kple dada nyɔnyɔ ŋu be wòable amegbetɔwo be woagawɔ nuteƒe na Yehowa o. Ne mɔnukpɔkpɔ su mía si be míele agbe ɣemaɣi la, aleke míawɔ nue? Afikae míaƒe dzi anɔ le xexeame katã ƒe nya la gome? Esi wònye ameƒomea katã ade blibo ɣemaɣi ta la, nuteƒemawɔmawɔ ɖesiaɖe anye nusi woɖo koŋ wɔ eye ahe tsɔtsrɔ̃ mavɔ vɛ. Eyata be míawɔ nuteƒe ɣemaɣi la, ele vevie ale gbegbe be míatu wɔwɔ ɖe mɔfiafia ɖesiaɖe si Yehowa nana mí eɖanye to eƒe Nya alo eƒe habɔbɔa dzi o la dzi nyuie enumake ƒe nɔnɔme la ɖo fifia! Ne míewɔe nenema la míaɖe mía ɖokui tsɔtsɔ na eyama nyateƒetɔe abe Xexeame Katã ƒe Fiagã ene la afia.

Numetoto

● Nukae nye nya gã si dze ŋgɔ nuwɔwɔwo katã? Aleke wɔ wòva lɔ mí ɖe emee?

● Nukae ɖe dzesi le mɔ siwo nu ŋutsu kple nyɔnu siwo le axa 49 la dometɔ ɖesiaɖe wɔ nuteƒe na Yehowa la ŋu?

● Nukata wòle vevie be míakpɔ nyuie gbesiagbe be míato míaƒe agbenɔnɔ dzi ade bubu Yehowa ŋu?

[Nɔnɔmetata siwo le axa 49]

WODE YEHOWA ƑE FIANYENYE DZI

NOA

SARA

MOSE

YOSEF

HIOB

Aleke Míate ŋu Akpɔ Viɖe tso Woƒe Kpɔɖeŋu la Mee?