Ðe Wòle Be Naxɔ Edzi Asea?

ÐE NÈXƆ Mawuɖekaetɔ̃ la dzi sea? Ame akpa gãtɔ xɔ edzi se le Kristodukɔa me. Ẽ, eyae nye sɔlemehawo ƒe nufiafia vevitɔ ƒe alafa geɖewo.

Le esia ta la, àsusui be womate ŋu ahe nya aɖeke tso eŋu o. Gake nya ku ɖe eŋu, eye nyitsɔ laa la, amesiwo nye edzidelawo dometɔ aɖewo gɔ̃ hã na nyaʋiʋlia nu gasẽ ɖe edzi.

Nukatae mele be woabu nya sia ŋu vie ko aɖe asi le eŋu o? Nusitae nye be Yesu ŋutɔ gblɔ be: “Agbe mavɔ enye si: be woanya wò, Mawu vavã ɖeka kolia la, kple Yesu Kristo si nèdɔ ɖa la.” Eyata míaƒe etsɔ me si gbɔna katã la nɔ te ɖe alesi míanya amesi tututu Mawu nye la dzi, eye ema fia be míake ɖe Mawuɖekaetɔ̃ ƒe nyaʋiʋlia ƒe dzɔtsoƒe ŋu. Eyata nukatae wò ŋutɔ madzro nya la me akpɔ o?—Yohanes 17:3, Katolikotɔwo ƒe Jerusalem Bible (JB).

Nukpɔsusu vovovo li ku ɖe Mawuɖekaetɔ̃ ƒe nufiafia la ŋu. Gake esi kaka wue nye be ame etɔ̃e le Mawuƒokpli la me siwo nye Fofo la, Vi la, kple Gbɔgbɔ Kɔkɔe la; gake woƒo ƒu nye Mawu ɖeka ko. Nufiafia la gblɔ be ame etɔ̃awo sɔ, wonye mavɔmavɔtɔwo, womewɔ wo o, elabena wonɔ anyi tso mavɔ me yi mavɔ me le Mawuƒokpli la me.

Gake ame bubuwo gblɔna be Mawuɖekaetɔ̃ la nye aʋatso, be Mawu Ŋusẽkatãtɔ la ɖeɖekoe ɖe dzesi abe amesi le vovo ene, enye mavɔtɔ, kple amesi nye ŋusẽkatãtɔ. Wogblɔna be Yesu nɔ abe mawudɔlawo ene le eƒe anyinɔnɔ do ŋgɔ na amegbetɔzuzu me, enye gbɔgbɔmeme si ɖe vovo ɖe eɖokui si, si Mawu wɔ, eye le susu sia ta la, ele be gɔmedzedze nanɔe nɛ. Wofiaa nu be Yesu mesɔ kple Mawu Ŋusẽkatãtɔ la kpɔ gbeɖe le gɔmesese aɖeke nu o; enye amesi bɔbɔ ɖe Mawu te ɣesiaɣi eye wògabɔbɔ ɖe ete kokoko. Woxɔ edzi se hã be menye amee gbɔgbɔ kɔkɔe la nye o ke boŋ Mawu ƒe gbɔgbɔ si nye eƒe dɔwɔŋusẽe wònye.

Mawuɖekaetɔ̃ la dzidelawo gblɔna be menye subɔsubɔhawo ƒe kɔnyinyi dzi koe wotui ɖo o ke boŋ wotui ɖe Biblia hã dzi. Amesiwo ʋlia nya le nufiafia sia ŋu gblɔna be menye Biblia ƒe nufiafiae wònye o, eye ŋutinyagbalẽ aɖe gblɔ kura gɔ̃ hã be: “[Mawuɖekaetɔ̃] bliboa dzɔ tso trɔ̃subɔsubɔ me.”—The Paganism in Our Christianity.

Ne nyateƒee Mawuɖekaetɔ̃a nye la, ekema enye Yesu dada ɖe anyi be woagblɔ be mesɔ kple Mawu ɣeaɖekeɣi kpɔ o eye be menye Mawuƒokpli la ƒe akpa aɖeke o. Gake ne aʋatsoe Mawuɖekaetɔ̃a nye la, ekema enye Mawu Ŋusẽkatãtɔ la dada ɖe anyi be woayɔ ame aɖe be esɔ kplii, eye egavɔ̃ɖi wu gɔ̃ hã be woayɔ Maria be enye “Mawu Dada.” Ne aʋatsoe Mawuɖekaetɔ̃a nye la, ekema enye vlododo Mawu be woagblɔ be: “Ne womexɔ Xɔse sia dzi se bliboe, ɖimaƒomaƒoe o la, ɖikekemanɔmee la, woatsrɔ̃ tegbee godoo. Eye Katolikotɔwo ƒe Xɔsee nye si: míedea ta agu na Mawu ɖeka le Mawuɖekaetɔ̃ me,” abe alesi wogblɔe ɖe agbalẽ si nye Catholicism me ene.

Eyata susu nyuiwo li siwo ta wòle be nadi be yeanya nyateƒea ku ɖe Mawuɖekaetɔ̃ la ŋu. Gake hafi míadzro afisi wòdzɔ tso kple alesi wogblɔna be nyateƒee wònye me la, anye kpekpeɖeŋu na mí be míakɔ nusi tututu nufiafia sia nye la me nyuie wu. Nuka tututue nye Mawuɖekaetɔ̃ la? Aleke amesiwo de edzi la ɖea emee?

[Nɔnɔmetata siwo le axa 2]

Miame: Egiptetɔwo ƒe ƒe akpe evelia (D.M.Ŋ.) me nukpakpa.Amon-Ra, Ramses II, kple Mut ƒe Mawuetɔ̃ƒokpli la. Ðusime: Ƒe alafa wuienelia me (M.Ŋ.) Mawuɖekaetɔ̃ ƒe nukpakpa si nye Yesu Kristo, Fofo la, kple gbɔgbɔ kɔkɔe la. De dzesii be ame etɔ̃e gake afɔ ene koe le wo si.