Ta 68

Nufiafia Bubuwo le Ŋkeke Adrelia Dzi

AGBADƆMEŊKEKENYUI la ƒe ŋkeke mamlea si nye adrelia ƒe nuwɔnawo gale edzi yim. Yesu le nu fiam le gbedoxɔa ƒe afisi woyɔna be “nunyuiedzraɖoƒe” la. Edze ƒã be esia le afisi woyɔna be Nyɔnuwo ƒe Nɔƒe, afisi nudzɔɖakawo le be woada nudzɔdzɔwo ɖe wo me.

Ŋkekenyuia ɖuɣi ƒe fiẽ ɖesiaɖe la, keklẽ tɔxɛ aɖe nɔa gbedoxɔa ƒe akpa sia. Woɖi akaɖiti gã ene ɖe afisia, eye agba gã ene siwo yɔ kple ami la li na wo dometɔ ɖesiaɖe. Keklẽ si tso akaɖi siawo siwo le agba 16 la ƒe ami zãm me la nu sẽ ale gbegbe be ete ŋu klẽna ɖoa didiƒe le zã me. Nusi Yesu gblɔ azɔ la aɖo ŋku nusia dzi na eƒe nyaselawo. Yesu gblɔ be: “Nyee nye xexeame ƒe kekeli la; amesi ke dzea yonyeme la, mele viviti la me zɔ ge akpɔ o, ke boŋ agbe la ƒe kekeli anɔ esi.”

Farisitɔwo tsi tre ɖe eŋu be: “Wò ŋutɔ ɖokuiwò ŋuti nèle ɖase ɖim le, wò ɖaseɖiɖi la menye nyateƒe o.”

Yesu ɖo eŋu na wo be: “Nye la, ne meɖi ɖase le nye ŋutɔ ɖokuinye ŋuti hã la, nye ɖaseɖiɖi la nye nyateƒe; elabena menya afisi metso va kple afisi meyina; miawo la mienya afisi metso va alo afisi meyina o.” Egblɔ kpee be: “Nyee nye amesi le ɖase ɖim le ɖokuinye ŋuti, eye Fofo, si dɔm ɖa la, ɖia ɖase le ŋutinye.”

Farisitɔwo bia be: “Afika fofowò la le?”

Yesu ɖo eŋu be: “Mienya mía kple Fofonye o. Ðe mienyam la, mianya Fofonye hã.” Togbɔ be Farisitɔwo di be woalé Yesu hã la, ame aɖeke meka asi eŋu o.

Yesu gagblɔ be: “Nye la mele dzodzo ge, . . . Afisi nye la meyina la, miawo la miate ŋu ava o.”

Yudatɔwo dze biabia gɔme be: “Ðe wòyina eɖokui wu ge, esi wògblɔ bena: Afisi nye la meyina la, miawo la miate ŋu ava o mahã?”

Yesu ɖe eme be: “Miawo la anyigba mietso, ke nye la dziƒo metso; miawo la xexe sia me mietso, nye la nyemetso xexe sia me o.” Azɔ egblɔ kpee be: “Ne miexɔe se bena, nyee nye esi o la, miaku ɖe miaƒe nuvɔ̃wo me.”

Yesu le nu ƒom tso eƒe anyinɔnɔ do ŋgɔ na amegbetɔzuzu kple Mesia alo Kristo si ŋugbe wodo si wònye la ŋuti. Gake la wobia, ɖikekemanɔmee la kple amemabumabu geɖe, be: “Wò la ameka nènye?”

Esi wogbe Yesu alea la, eɖo eŋu be: ‘Nukata kura megale nu ƒom na mi ɖo?’ Gake egayi edzi gblɔ be: “Amesi dɔm ɖa la, enye nyateƒetɔ, eye nusiwo nye hã mese le egbɔ la, nu mawo ke megblɔna na xexeame.” Yesu yi edzi be: “Ne miekɔ Amegbetɔvi la ɖe dzi la, ekema miadze sii bena, nyee; eye bena nyemewɔa naneke le ɖokuinye si o, ke boŋ abe alesi Fofonye fiam ene la, nu mawo ke megblɔna. Eye amesi dɔm ɖa la, li kplim, eye megblẽ nye ɖeka ɖi o; elabena nye la mewɔa nusi dzea eŋu ɖaa.”

Esi Yesu gblɔ nya siawo la, ame geɖe xɔ edzi se. Amesiawoe wògblɔ na be: “Ne mienɔ nye nya la me la, ekema nye nusrɔ̃la vavãwo mienye, eye miadze si nyateƒe la, eye nyateƒe la lawɔ mi ablɔɖeviwoe.”

Amesiwo tsi tre ɖe eŋu la tso nya le enu be: “Abraham ƒomeawo míenye, eye míenye ame aɖeke ƒe kluvi kpɔ o; aleke wɔ nègblɔ bena: Miazu ablɔɖeviwo mahã?”

Togbɔ be Yudatɔwo nɔ dukɔ bubuwo ƒe dziɖuɖu te hã la, womelɔ̃ ɖe edzi be ameteɖeanyila aɖeke nye aƒetɔ ɖe yewo dzi o. Womelɔ̃ be woayɔ yewo be kluviwo o. Gake Yesu fia asii na wo be le nyateƒe me la kluviwoe wonye. Le mɔ ka nu? Yesu gblɔ be: “Vavã, vavã mele egblɔm na mi bena: Amesiame, si le nuvɔ̃ wɔm la, nuvɔ̃ ƒe kluvi wònye.”

Alesi Yudatɔwo medi be yewoalɔ̃ ɖe edzi be yewonye nuvɔ̃ ƒe kluviwo o la na wonɔ afɔku ƒe nɔnɔme me. Yesu ɖe eme be: “Kluvi menɔa aƒeme ɖaa o, aƒevi la nɔa anyi ɖaa.” Esi domenyinyi ƒe gomekpɔkpɔ mele kluvi si o ta la, ele afɔku si nye be woate ŋu anyãe ɣesiaɣi la me. Vi si wodzi ɖe aƒea me ŋutɔŋutɔ alo amesi woxɔ abe vi ene ɖe aƒea me koe nɔa anyi “ɖaa,” si fia be anɔ anyi ŋkeke alesi wòle agbe.

Yesu yi edzi be: “Ne Vi la wɔ mi ablɔɖeviwo la, ekema mianye ablɔɖeviwo vavã.” Eyata nyateƒe si wɔa ame ablɔɖevie nye nyateƒea ku ɖe Yesu Kristo si nye Vi la ŋu. Eƒe amegbetɔ ƒe agbe deblibo si wòtsɔ sa vɔe la dzi koe amesiame ato azu ablɔɖevi tso nuvɔ̃ si hea ku vɛ la me. Yohanes 8:12-36.

▪ Afikae Yesu fia nu le le ŋkeke adrelia dzi? Nukae dzɔna le afima le zã me, eye aleke esia do ƒome kple Yesu ƒe nufiafiae?

▪ Nukae Yesu gblɔ ku ɖe afisi wòtso la ŋu, eye nukae wòle be esia naɖe afia ku ɖe amesi wònye la ŋu?

▪ Mɔ ka nue Yudatɔwo nye kluviwo le, gake nyateƒe kae awɔ wo ablɔɖeviwoe?