Ta 80

Alẽkpɔawo kple Alẽkplɔla La

YESU va Yerusalem hena Mawuxɔ la ƒe Ðɔɖɔɖoŋkekenyuie, alo Hanukah si nye ŋkekenyuie aɖe si wotsɔ ɖoa ŋku alesi wogbugbɔ kɔ gbedoxɔa ŋu na Yehowa dzi la ɖuɖu. Le ƒe 168 D.M.Ŋ. me, esi nye abe ƒe 200 ene do ŋgɔ la, Antioxo IV Epifanes xɔ Yerusalem sesẽe eye wòƒo ɖi gbedoxɔa kple eƒe vɔsamlekpuia. Gake le ƒe etɔ̃ megbe la, wogaxɔ Yerusalem ake eye wogbugbɔ kɔ gbedoxɔa ŋu. Le ema megbe la, woɖua eŋukɔkɔ ake alo ɖɔɖɔɖo ƒe ŋkekenyuie ƒe sia ƒe.

Woɖua Ðɔɖɔɖoŋkekenyuie sia le Kislew, si nye Yudatɔwo ƒe ɣleti si sɔ kple November ƒe nuwuwu lɔƒo kple December ƒe gɔmedzedze lɔƒo le míaƒe egbegbeɣletigbalẽa dzi la, ƒe ŋkeke 25 lia dzi. Eyata ŋkeke alafa ɖeka kple nu vi aɖe koe susɔ hena ƒe 33 M.Ŋ. ƒe Ŋutitotoŋkekenyuie vevi la ɖuɖu. Esi wònye ɣeyiɣi si me vuvɔ wɔna ta la, apostolo Yohanes yɔe be “vuvɔŋɔli.”

Yesu gblɔ kpɔɖeŋu aɖe azɔ si me wòƒo nu le alẽkpɔ etɔ̃ kple akpa si eya ŋutɔ wɔna abe Alẽkplɔla Nyui ene la ŋu le. Alẽkpɔ gbãtɔ si ŋu wòƒo nu le la ku ɖe Mose ƒe Se ƒe nubabla ƒe ɖoɖoa ŋu. Sea nɔ abe kpɔtɔtɔ ene, esi ɖe Yudatɔwo ɖe vovo tso dukɔ siwo mele nubabla tɔxɛ sia me kple Mawu o la ƒe nuwɔna gblẽkuwo gbɔ. Yesu ɖe eme be: “Vavã, vavã mele egblɔm na mi bena: Amesi metoa agboa nu heyina ɖe alẽxɔa me o, ke wòyi ɖaliaa afi bubu gena ɖe eme la, eya nye fiafitɔ kple adzodala. Ke amesi toa agboa nu heyina ɖe eme la, alẽwo ƒe kplɔla wònye.”

Ame bubuwo va eye wogblɔ be yewoe nye Mesia alo Kristo la, gake womenye alẽkplɔla vavã si ŋu Yesu yi edzi ƒo nu le la o; egblɔ be: “Eya la agbonudzɔla ʋuna nɛ, eye alẽwo sea eyama ƒe gbe, eye wòyɔa ye ŋutɔ tɔwo katã ƒe ŋkɔ, . . . Ke womele ame tutɔ yome dze ge o, ke boŋ woasi le egbɔ, elabena womedzea si ame tutɔwo ƒe gbe o.”

Alẽkpɔ gbãtɔa ƒe “agbonudzɔla” enye Yohanes Amenyrɔ̃ɖetsimela la. Abe agbonudzɔla ene la, Yohanes ‘ʋui na’ Yesu to eyama ɖeɖe fia kpɔɖeŋu ƒe alẽ mawo siwo wòakplɔ ayi gbeɖuƒee la dzi. Mlɔeba la, woxɔ alẽ siawo siwo ƒe ŋkɔ Yesu yɔna la ɖe alẽkpɔ bubu me abe alesi wòɖe emee ene be: “Vavã, vavã mele egblɔm na mi bena: Nyee nye agbo na alẽawo,” esi gɔmee nye be eyae nye alẽkpɔ yeye aɖe ƒe agbo. Esime Yesu wɔ nubabla yeyea kple eƒe nusrɔ̃lawo eye wòkɔ gbɔgbɔ kɔkɔea ɖe wo dzi tso dziƒo le Pentekoste-ŋkeke si kplɔe ɖo dzi la, woxɔ wo de alẽkpɔ yeye sia me.

Esi Yesu gale eƒe wɔƒe sia me ɖem la, egblɔ be: “Nyee nye agbo la; ne ame aɖe to menye yi ɖe eme la, akpɔ ɖeɖe, eye wòakpɔ nyiƒe. . . . Nye la meva, bena woakpɔ agbe kple agbɔsɔsɔ. . . . Nyee nye alẽkplɔla nyui la; eye menya tɔnyewo, eye tɔnyewo hã nyam; sigbe alesi Fofo la nyam, eye nye hã menya Fofo la ene, eye metsɔ nye agbe ɖo anyi ɖe alẽawo ta.”

Ɣeyiɣi kpui aɖe do ŋgɔ la, Yesu fa akɔ na eyomedzelawo bena: “Ha sue, megavɔ̃ o! Elabena edze mia Fofo la ŋu be, yeatsɔ fiaɖuƒe la na mi.” Alẽha sue sia, siwo ƒe xexlẽme va nye ame 144,000 mlɔeba la, va alẽkpɔ yeye, alo evelia, sia me. Gake Yesu yi edzi gblɔ be: “Alẽ bubuwo le asinye, siwo metso alẽxɔ sia me o, eye ele nam be, makplɔ woawo hã, eye woase nye gbe, eye woazu alẽha ɖeka kple alẽkplɔla ɖeka.”

Esi wònye ‘alẽ bubuawo’ “metso alẽxɔ sia me o” ta la, ele be alẽkpɔ bubu si nye etɔ̃lia nanɔ anyi na wo. Teƒe vovovoe ava nye alẽkpɔ alo alẽxɔ eve mamle siawo me nɔlawo ƒe nɔƒe. ‘Alẽha sue’ si le kpɔ ɖeka me la aɖu fia kple Kristo le dziƒo, eye ‘alẽ bubuawo’ siwo le kpɔ keme me la anɔ Paradiso me le anyigba dzi. Gake togbɔ be alẽawo le kpɔ vovovo me hã la, ŋuʋaʋã mele wo me o, eye womesena le wo ɖokui me be mamã le yewo dome hã o, elabena abe alesi Yesu gblɔe ene la, ‘wozu alẽha ɖeka’ le “alẽkplɔla ɖeka” te.

Yesu Kristo, Alẽkplɔla Nyui la tsɔ eƒe agbe na faa ɖe alẽha evea siaa ta. Egblɔ be: “Nye ŋutɔe tsɔe ɖo anyi le ɖokuinye si; ŋusẽ le asinye, be matsɔe ɖo anyi, eye ŋusẽ le asinye, be magatsɔe. Nenem se sia la mexɔa tso Fofonye gbɔ.” Esi Yesu gblɔ nya sia la, mamã ɖo Yudatɔwo dome.

Ameha la me tɔ geɖe gblɔ be: “Gbɔgbɔ vɔ̃ le eme, eye eƒe tame da; nukaŋuti miele to ɖomi mahã?” Gake ame bubuwo gblɔ be: “Nenem nya siawo la menye amesi me gbɔgbɔ vɔ̃ le la, ƒe nyawo o.” Eye edze ƒã be esi wole nu ƒom tso ame aɖe si wodzi ŋkuagbãtɔe si ŋu wòda gbe le ɣleti eve do ŋgɔ ŋu la, wogblɔ kpee be: “Ðe gbɔgbɔ vɔ̃wo ate ŋu aʋu ŋkuwo na ŋkuagbãtɔ mahã?” Yohanes 10:1-22; 9:1-7; Luka 12:32; Nyaɖeɖefia 14:1, 3; 21:3, 4; Psalmo 37:29.

▪ Nukae nye Ðɔɖɔɖoŋkekenyuie la, eye ɣekaɣie woɖunɛ?

▪ Nukae nye alẽkpɔ gbãtɔ, eye amekae nye eƒe agbonudzɔla?

▪ Aleke agbonudzɔla la ʋui na Alẽkplɔla lae, eye nuka mee woxɔ alẽawo dee le ema megbe?

▪ Amekawoe le Alẽkplɔla Nyui la ƒe alẽkpɔ eveawo me, eye alẽha nenie wova zu?