Ta 89

Nublanuikpɔkpɔ ƒe Dɔ Wɔwɔ le Yudea

KWASIÐA aɖewo do ŋgɔ la, Yudatɔwo dze agbagba be yewoawu Yesu le Mawuxɔ la ƒe Ðɔɖɔɖoŋkekenyuiea dzi le Yerusalem. Eyata eyi anyiehe nutome, ɖe teƒe aɖe si edze ƒã be medidi tso Galilea-ƒua gbɔ o.

Eteƒe medidi o, eganɔ dziehe lɔƒo yim ɖo ta Yerusalem eye wònɔ gbe ƒã ɖem le mɔa dzi le Perea, si nye nuto aɖe si le Yordan-tɔsisia ƒe ɣedzeƒe la ƒe duwo me. Esi wògblɔ kesinɔtɔ la kple Lazaro ŋuti lododoa vɔ la, egayi nusiwo wòfia do ŋgɔ esime wonɔ Galilea la fiafia eƒe nusrɔ̃lawo dzi.

Le kpɔɖeŋu me, egblɔ be anyo na ame “ne woatsɔ té atsi ɖe kɔ nɛ, eye woatsɔe aƒu gbe ɖe atsiaƒu me” wu be wòana Mawu ƒe ‘ɖevi suewo’ dometɔ ɖeka nakli nu. Ete gbe ɖe alesi wòhiã be woatsɔ nuvɔ̃ ake hã dzi eye wòɖe nu me be: “Eye ne [nɔvi aɖe wɔ] nuvɔ̃ ɖe ŋuwò zi adre le ŋkeke ɖeka dzi, eye wògatrɔ zi adre va ɖe kuku na wò la, tsɔe kee.”

Esime nusrɔ̃lawo bia be: “Na míaƒe xɔse nadzi ɖe edzi na mí” la, Yesu ɖo eŋu be: “Ne xɔse le mia si abe logoku ene la, miagblɔ na gboti sia be: Ho ɖokuiwò naɖado ɖe atsiaƒu me! eye aɖo to mi.” Eyata xɔse ʋee aɖe gɔ̃ hã ate ŋu awɔ nu gãwo.

Emegbe Yesu ƒo nu tso agbemenudzɔdzɔ ŋutɔŋutɔ aɖe si ɖe nɔnɔme si wòle be nenɔ Mawu ŋusẽkatãtɔ la subɔla si la fia ŋu. Yesu gblɔ be: “Mia dome ameka ƒe dɔla le agble ŋlɔm alo le lã nyim, eye ne etso agble va aƒe, wòagblɔ nɛ bena: Va kaba, eye nabɔbɔ nɔ anyi mahã? Alo menye ɖe wòagblɔ nɛ bena: Dzra nusi maɖu la ɖo, nasa avɔ ɖe ali asubɔm, vaseɖe esime meɖu nu, eye meno nu, eye esia megbe wò hã naɖu nu, eye nano nu o mahã? Alo ɖe wòada akpe na dɔla la bena, ewɔ nusiwo ƒe se wòde nɛ la dzi mahã? Nenema ke miawo hã ne miewɔ nusiwo katã woɖo na mi la, migblɔ bena: Dɔla madzemadzewo míenye; nusi le na mí be míawɔ la, eya koe míewɔ.” Eyata mele be Mawu subɔlawo nase le wo ɖokui me gbeɖe be yewole dɔmenyo wɔm na Mawu le esi yewole eyama subɔm ta o. Ele be mɔnukpɔkpɔ si su wo si be woade ta agu na eyama abe eƒe aƒemenɔla siwo dzi woaka ɖo ene la boŋ nanɔ ŋku dzi na wo ɣesiaɣi.

Anɔ eme be esi Yesu wɔ kpɔɖeŋu sia vɔ tetie dɔla aɖe va. Maria kple Marta siwo nye Lazaro nɔvinyɔnuwo, amesiwo le Betania si le Yudea ye dɔe ɖo ɖa. Dɔla la gblɔ be: “Aƒetɔ, kpɔ ɖa, amesi mèlɔa nu egbɔ o la, le dɔ lém.”

Yesu ɖo eŋu gblɔ be: “Dɔ sia menye kudɔe o, ke boŋ hena Mawu ƒe ŋutikɔkɔe, bena woakɔ Mawuvi la ŋuti to eyama me.” Esi Yesu tsi afisi wòle la hexɔ ŋkeke eve le afima vɔ megbe la, egblɔ na eƒe nusrɔ̃lawo be: “Mina, ne míagayi ɖe Yudea.” Gake woɖo ŋku edzi nɛ be: “Rabi, nyitsɔ laa Yudatɔwo di be, yewoaƒu kpe wò, eye nègale afima yi gea?”

Le nya ŋu ɖoɖo me la, Yesu bia be: “Alo menye gaƒoƒo wuievee le ŋkeke ɖeka me oa? Ne ame aɖe zɔ le ŋkeke me la, meklia nu o, elabena ele xexe sia me ƒe kekeli la kpɔm. Ke ne ame aɖe zɔ zã la, eklia nu, elabena kekeli la mele eyama me o.”

Anɔ eme be nusi gblɔm Yesu le gɔmee nye be ‘ŋkeke me gaƒoƒowo’ alo ɣeyiɣi si Mawu na ye hena yeƒe anyigba dzi subɔsubɔdɔa wɔwɔ mevɔ haɖe o, eye ame aɖeke mate ŋu awɔ naneke ye o, negbe ɖe ɣeyiɣi ma vɔ hafi. Ele be wòawɔ “ŋkeke” me ɣeyiɣi sue si susɔ nɛ la ŋudɔ bliboe, elabena emegbe “zã” le dodo ge esime eƒe futɔwo ana woawui.

Yesu gblɔ kpee be: “Mía xɔlɔ̃ Lazaro le alɔ̃ dɔm, gake la meyina, bena maɖanyɔe atso alɔ̃ me.”

Edze kɔte be esi nusrɔ̃lawo susui be Lazaro le gbɔgbɔm ɖe eme le alɔ̃ me eye esia nye dzesi si ŋu kakaɖedzi le be eƒe lãme asẽ la, wogblɔ be: “Aƒetɔ, ne ele alɔ̃ dɔm la, ekema eƒe lãme asẽ.”

Yesu ʋu eme na wo tẽ azɔ be: “Lazaro ku. Eye dzi dzɔm le mia ta bena, nyemele afima o, be miaxɔ ase, ke mina, ne míayi ɖe egbɔ.”

Toma nya be woate ŋu awu Yesu le Yudea gake esi wòdi be yeanɔ megbe nɛ ta la, ede dzi ƒo na nɔvia nusrɔ̃lawo be: “Mina, ne míawo hã míayi, bena míaku kpakplii.” Eyata nusrɔ̃lawo tsɔ woƒe agbe de afɔku me eye wokplɔ Yesu ɖo yi nublanuikpɔkpɔdɔ sia wɔƒee le Yudea-nutoa me. Luka 13:22; 17:1-10; Yohanes 10:22, 31; 40-42; 11:1-16.

▪ Afikae Yesu nɔ gbe ƒã ɖem le ɣeyiɣi kpui aɖe do ŋgɔ?

▪ Nufiafia kawoe Yesu gagbugbɔ gblɔ, eye agbemenudzɔdzɔ ka ŋue wòƒo nu le be yeatsɔ afia nu vevi ka?

▪ Nya kae wova gblɔ na Yesu, eye nukae “ŋkeke” kple “zã” si wòyɔ la fia?

▪ Nya si Toma gblɔ be, ‘Mina ne míayi ne míaku kpakplii’ gɔme ɖe?