Ta 97

Weinbɔ me Dɔwɔlawo

ETEƑE medidi o esi Yesu gblɔ be: “Ame geɖe, siwo nye mlɔetɔwo, lazu gbãtɔwo, eye gbãtɔwo lazu mlɔetɔwo.” Azɔ egblɔ ŋutinya aɖe tsɔ wɔ esia ƒe kpɔɖeŋue fia. Edze egɔme be: “Dziƒofiaɖuƒe la ɖi aƒetɔ aɖe, si do go ŋdikanya, be yeadɔ dɔwɔlawo ɖe yeƒe weinbɔ me.”

Yesu yi edzi be: “Ke esi [aƒetɔ la] kple dɔwɔlawo nyi denario ɖeka ƒe asi ɖe ŋkeke ɖeka dzi la, eɖo wo ɖe eƒe weinbɔ la me. Eye esi wòdo go le gaƒoƒo etɔ̃lia me la, ekpɔ ame bubuwo le tsitre le asi me le kuvia me; eye wògblɔ na wo bena: Miawo hã miheyi ɖe weinbɔ la me, eye nusi ke anyo la, mana mi. Eye woyi. Ke egado go le gaƒoƒo adelia kple asiekelia me, eye wògawɔ nenema ke. Ke esi wòdo go le gaƒoƒo wuiɖekelia me la, ekpɔ ame bubuwo le tsitre, eye wògblɔ na wo bena: Nukaŋuti mietsi tre le kuvia me ɖe afisia ŋkeke blibo la katã mahã? Wogblɔ nɛ bena: Elabena ame aɖeke medɔ mí o. Egblɔ na wo bena: Miawo hã miheyi ɖe weinbɔ la me.”

Aƒetɔ la, alo weinbɔtɔ lae nye Yehowa Mawu, eye weinbɔa ye nye Israel-dukɔa. Weinbɔa me dɔwɔlawoe nye amesiwo wokplɔ va Se ƒe nubabla la mee; woawo koŋ ye nye Yudatɔ siwo nɔ agbe le apostoloawo ŋɔli. Amesiwo wɔ dɔ ŋkeke bliboa koe woƒo asi kplii. Fetua ye nye denario ɖeka na ŋkeke ɖeka ƒe dɔwɔwɔ. Esi ‘gaƒoƒo etɔ̃liae’ nye ŋdi ga 9 ta la, amesiwo woyɔ le gaƒoƒo 3 lia, 6 lia, 9 lia, kple 11 lia wɔ dɔ gaƒoƒo 9, 6, 3, kple 1 ko.

Gaƒoƒo 12, alo ŋkeke bliboa ƒe dɔwɔlawo tsi tre ɖi na Yudatɔwo ƒe kplɔla siwo wɔ mawusubɔsubɔdɔ ɣeawokatãɣi. Womele abe Yesu ƒe nusrɔ̃lawo, amesiwo zã woƒe agbemeŋkekewo ƒe akpa gãtɔ tsɔ kplɔ ɖɔe alo tsɔ wɔ ŋutilãmedɔ bubuwo ene o. Ƒe 29 M.Ŋ. ƒe kele me koe “aƒetɔ” la dɔ Yesu Kristo ɖa be wòaƒo amesiawo nu ƒu be woanye eƒe nusrɔ̃lawo. Eyata wova zu “mlɔetɔwo,” alo weinbɔ me dɔwɔla siwo va le gaƒoƒo 11 lia dzi.

Mlɔeba la, kpɔɖeŋudɔwɔŋkekea va eƒe nuwuwu le Yesu ƒe ku me, eye gamea su be woaxe fe na dɔwɔlawo. Wowɔ nusi to vovo kura si nye be woaxe fe na amesiwo va mamlea la do ŋgɔ, abe alesi woɖe emee ene be: “Ke esi fiẽsi ɖo la, weinbɔtɔ la gblɔ na eƒe xɔnuvi bena: Yɔ dɔwɔlawo vɛ, eye nana fetu wo, eye nadze egɔme atso mlɔetɔwo dzi vaseɖe gbãtɔwo dzi. Eye esi gaƒoƒo wuiɖekelia me tɔwo va la, wo katã woxɔ denario ɖekaɖeka. Ke esi gbãtɔwo va la, wobu xa bena, yewoaxɔ ɖewo ɖe dzi, eye woawo hã xɔ denario ɖekaɖeka. Eye esi woxɔe la, woli liʋiliʋi le aƒetɔ la ŋuti gblɔ bena: Ame mlɔetɔ siawo wɔ dɔ gaƒoƒo ɖeka ko, eye nèwɔ wo wosɔ kpli mí, amesiwo kpe hiã ŋkeke blibo la katã, eye ŋdɔkutsu ɖu mí la. Eye wòɖo eŋu gblɔ na wo dometɔ ɖeka bena: Xɔ̃nye, nyemewɔ nu madzɔmadzɔ ɖe ŋuwò o, alo mía kpli wò la menye denario dzi míenyi asi ɖo o mahã? Tsɔ tɔwò nayi; gake melɔ̃ bena, mana mlɔetɔ sia, abe alesi mena wò ene. Alo ɖe mɔ mele asinye bena, mawɔ nusi nye tɔnye la ŋuti dɔ, alesi melɔ̃ o mahã? Alo nye dɔmenyonyo ŋutie nèle ŋku biãm ɖe ŋutinye ɖo mahã?” Le nya la ta ƒoƒo me la, Yesu gblɔ nya aɖe si wògblɔ do ŋgɔ la be: “Nenem [ye] mlɔetɔwo lazu gbãtɔwo, eye gbãtɔwo lazu mlɔetɔwo.”

Denario la xɔxɔ va eme, menye le Yesu ƒe ku me o, ke boŋ le ƒe 33 M.Ŋ. ƒe Pentekoste-ŋkekea dzi, esime Kristo, “xɔnuvi” la, kɔ gbɔgbɔ kɔkɔe ɖe eƒe nusrɔ̃lawo dzi. Yesu ƒe nusrɔ̃la siawo le abe “mlɔetɔwo,” alo gaƒoƒo 11 lia me dɔwɔlawo ene. Denario la metsi tre ɖi na gbɔgbɔ kɔkɔea si wona wo la ŋutɔ o. Denario la nye nane si nusrɔ̃lawo azã le anyigba dzi afisia. Enye nane si dzi woƒe agbenɔnɔ, woƒe agbe mavɔ kpɔkpɔ nɔ te ɖo. Eyae nye mɔnukpɔkpɔ si nye be woanye gbɔgbɔ me Israel-viwo, amesiwo wosi ami na be woaɖe gbe ƒã Mawu ƒe Fiaɖuƒea.

Eteƒe medidi hafi amesiwo wodɔ ɖe dɔa me gbã la kpɔe dze sii be woxe fe na Yesu ƒe nusrɔ̃lawo o, eye wokpɔ wo wole kpɔɖeŋudenario la zãm. Gake wole nane si yi ŋgɔ wu gbɔgbɔ kɔkɔea kple Fiaɖuƒea ƒe mɔnukpɔkpɔ siwo kpe ɖe eŋu la dim. Woƒe liʋiliʋilili kple tsitretsiɖeŋunyawo dze le Kristo ƒe nusrɔ̃lawo, dɔwɔla siwo nye “mlɔetɔwo” le weinbɔa me la yome titi me.

Emevava si nye ƒe alafa gbãtɔ me tɔ koe nye Yesu ƒe kpɔɖeŋua me vava? Ao, le nɔƒe kple agbanɔamedzi siwo Kristodukɔa ƒe osɔfowo xɔ ta la, woawoe nye ame ‘gbãtɔ’ siwo wodɔ ɖe Mawu ƒe kpɔɖeŋuweinbɔa me. Wobu gbeƒãɖela siwo tsɔ wo ɖokui katã ke, siwo dea ha kple Gbetakpɔxɔ Biblia kple Trakt Habɔbɔa be woawoe nye ame ‘mlɔetɔ’ siwo xɔ dɔdasi vavã le Mawu ƒe subɔsubɔ me. Gake le nyateƒe me la, amesiawo tututu siwo osɔfowo do vloe ye xɔ denario la—si nye subɔsubɔ abe Mawu ƒe Dziƒofiaɖuƒea teƒenɔla siwo wosi ami na ene ƒe bubunɔƒe la. Mateo 19:30–20:16.

▪ Nukae weinbɔa tsi tre ɖi na? Amekawoe weinbɔa tɔ kple gaƒoƒo 12 kpakple gaƒoƒo 1 dɔwɔlawo nye kpɔɖeŋu na?

▪ Ɣekaɣie kpɔɖeŋudɔwɔŋkekea wu enu, eye ɣekaɣie woxe fea?

▪ Nukae denario la xexe nye kpɔɖeŋu na?