Ta 98

Nyaʋiʋli Ðo Nusrɔ̃lawo Dome Esime Yesu ƒe Kuɣi Gogo

YESU kple eƒe nusrɔ̃lawo gogo Yordan-tɔsisia, si wotso tso Perea-nutoa me yina ɖe Yudea. Ame bubu geɖewo hã le mɔa zɔm kpli wo yina ɖe ƒe 33 M.Ŋ. ƒe Ŋutitotoŋkekenyuiea si wòsusɔ abe kwasiɖa ɖeka ko ene na la ɖuƒe.

Yesu le ŋgɔ na nusrɔ̃lawo, eye alesi eƒe ŋku biãe la wɔ mo yaa na wo. Ðo ŋku edzi be kwasiɖa ʋee aɖewo do ŋgɔ esi Lazaro ku eye Yesu di be yeadzo le Perea-nutoa me ayi Yudea la, Toma de dzi ƒo na ame bubuawo be: “Mina, ne míawo hã míayi, bena míaku kpakplii.” Gaɖo ŋku edzi be le Yesu ƒe Lazaro fɔfɔ vɔ megbe la, Sanhedrin la wɔ ɖoɖo be yewoana woawu Yesu. Eyata mewɔ nuku o be vɔvɔ̃ lé nusrɔ̃lawo esi wogage ɖe Yudea ake.

Be Yesu nadzra wo ɖo ɖe nusi le ŋgɔgbe ŋu la, eɖe kpɔ ame 12 la ɖeɖe eye wògblɔ na wo be: “Kpɔ ɖa, míeyina Yerusalem, eye woade Amegbetɔvi la asi na nunɔlagãwo kple agbalẽfialawo, eye woatso kufia nɛ, eye woatsɔe ade asi na trɔ̃subɔlawo; eye woaɖu fewu le eŋuti, eye woaɖe ta ɖe eŋu, eye woaƒoe kple atam, eye woawui, eye ŋkeke etɔ̃agbe la atsi tre.”

Esiae nye zi etɔ̃lia le ɣleti ʋee siwo va yi me si Yesu gblɔ eƒe ku kple tsitretsitsi ŋu nya na eƒe nusrɔ̃lawo. Eye togbɔ be woɖo toe hã la, wodo kpo egɔme sese. Ðewohĩ esi woxɔ se be woagaɖo Israel-fiaɖuƒea anyi ɖe anyigba dzi ake, eye wole mɔ kpɔm na ŋutikɔkɔe kple bubu xɔxɔ le anyigba dzi fiaɖuƒe me kple Kristo tae.

Salome, si nye apostolo Yakobo kple Yohanes dada hã nɔ amesiwo yina Ŋutitotoŋkekenyuiea ɖuƒe la dome. Yesu yɔ ŋutsu siawo be “dziɖegbeviwo,” ɖikekemanɔmee la, alesi woƒe nya dzi sẽ tae. Ɣeyiɣi aɖee nye esia si ame eve siawo di vevie be yewoanɔ nɔƒe vevi le Kristo ƒe Fiaɖuƒea me, eye wona wo dada nya woƒe didi sia. Eva Yesu gbɔ azɔ ɖe wo ta eye wòbɔbɔ ɖe eŋkume hebia be wòawɔ nane na wo.

Yesu biae se be: “Nuka dim nèle?”

Nyɔnua ɖo eŋu be: “Na bena, nye ŋutsuvi eve siawo nabɔbɔ nɔ anyi, ɖeka nanɔ wò nuɖusi me, eye ɖeka nanɔ wò mia me le wò fiaɖuƒe la me.”

Esi Yesu nya amesiwo gbɔ nubiabia sia tso ta la, egblɔ na Yakobo kple Yohanes be: “Mienya nusi biam miele o. Alo miate ŋu ano kplu, si no ge malaa?”

Woɖo eŋu be: “Míate ŋui.” Togbɔ be ɖeko Yesu gblɔ na wo tetie nye ma be yeadze ŋgɔ yometiti dziŋɔ eye woawu ye mlɔeba hã la, edze abe ɖe womese nusi “kplu” si no ge wòle la nye la gɔme o ene.

Ke hã la, Yesu gblɔ na wo be: ‘Miano nye kplu la nyateƒe, gake anyinɔnɔ ɖe nye ɖusi kple mia me sia la, eya menye tɔnye be mana o, ke boŋ amesiwo Fofonye dzrae ɖo ɖi na la tɔe.’

Le ɣeyiɣi aɖe megbe la, apostolo ewo bubuawo se nusi Yakobo kple Yohanes bia la, eye eku dzi na wo. Ðewohĩ Yakobo kple Yohanes ƒe nu sẽ le nyaʋiʋli si nɔ apostoloawo dome do ŋgɔ le amesi nye gãtɔ ŋu la me. Nusi wole biabiam fifia ɖee fia be womewɔ ɖe nusi Yesu xlɔ̃ wo le nya sia ŋuti la dzi o. Ewɔ nublanui be woƒe nɔƒe gã nɔnɔ didi la nu gãse le wo me kokoko.

Eyata be Yesu nakpɔ nyaʋiʋli sia kple alesi wòna dɔme ve ame susɔeawoe gbɔ la, eyɔ ame 12 la vɛ. Le nu xɔxlɔ̃ wo lɔlɔ̃tɔe me la, egblɔ be: “Mienya bena, dukɔwo ƒe dziɖulawo nye aƒetɔwo ɖe wo dzi, eye amegãwo kpɔ ŋusẽ ɖe wo dzi. Neganɔ nenema le mia dome o; ke amesi ke di bena, yeazu amegã le mia dome la, nanye miaƒe subɔla; eye amesi ke di bena, yeanye gbãtɔ le mia dome la, nanye miaƒe dɔla.”

Yesu ɖo kpɔɖeŋu si wòle be woasrɔ̃ la ɖi, abe alesi wòɖe emee ene be: “Abe alesi Amegbetɔvi la meva bena, woasubɔ ye o, ke boŋ bena yeasubɔ, eye yeatsɔ [yeƒe] agbe la ana ɖe ame geɖewo ƒe xɔxɔ ta la ene.” Menye ɖeko Yesu subɔ ame bubuwo o ke boŋ ele wo subɔsubɔ dzi yi ge yiɖase esime wòaku ɖe ameƒomea ta hã! Ehiã na nusrɔ̃lawo be nɔnɔme si ɖi Kristo tɔ si nye be woasubɔ eye woanye suetɔ ke menye be woadi nɔƒe kɔkɔ nɔnɔ o la nanɔ woawo hã si. Mateo 20:17-28; Marko 3:17; 9:33-37; 10:32-45; Luka 18:31-34; Yohanes 11:16.

▪ Nukatae vɔvɔ̃ lé nusrɔ̃lawo azɔ?

▪ Aleke Yesu dzra eƒe nusrɔ̃lawo ɖoe ɖe nusi le ŋgɔgbe gbɔna la ŋu?

▪ Nukae wova bia Yesu, eye dɔ kae wòwɔ ɖe apostolo bubuawo dzi?

▪ Aleke Yesu kpɔ kuxi si le apostoloawo dome la gbɔe?