Akpa 3
Alesi Míawɔ Anya Be Mawu Li
1, 2. Gɔmeɖose kae kpena ɖe mía ŋu be míanya ne Mawu li?
MƆ SIWO dzi míato anya ne Mawu li alo meli o dometɔ ɖekae nye be míatsɔ gɔmeɖose sia si ŋu ɖikeke aɖeke mele o awɔ dɔe, esi nye be: Nuwɔwɔ bia be nuwɔla nanɔ anyi. Alesi nuwɔwɔa klitsui la, nenema ke wòle be ewɔla ƒe ŋutete nade ŋgɔe.
2 Le kpɔɖeŋu me, kpɔ aƒewòme ɖa. Kplɔ̃wo, zikpuiwo, abatiwo, zewo, agbawo, kple nuɖanu bubuwo katã ƒe anyinɔnɔ bia be wo wɔla nanɔ anyi, nenema ke nye gliawo, siminti si wode xɔa me, kple xɔdzisasrãwo hã. Gake ne wotsɔ nusiawo sɔ kple nu bubuwo la, nusiawo ya wɔwɔ le bɔbɔe. Esi wònye be ele be wɔla nanɔ anyi na nusiwo wɔwɔ le bɔbɔe ta la, ɖe susu mele eme be wɔla si ƒe nyasã de ŋgɔ boo wu nanɔ nu klitsuwo si oa?
Míaƒe Xexeme Wɔnuku La
3, 4. Aleke xexeame ƒe anyinɔnɔ kpe ɖe mía ŋu be míanya be Mawu li?
3 Hafi gaƒoɖokui nanɔ anyi la, ele be gaƒoɖokuiwɔla nawɔe. Ke míaƒe kekelixexeme wɔnuku la, si me Ɣe kple ɣletinyigba siwo ƒoa xlãe la zɔna ɖe game dzi pɛpɛpɛ ƒe alafa gbogbo aɖewoe nye sia ya ɖe? Ke ɣletivihatsotsogã, si woyɔna be Milky Way, si ƒe ɣletiviwo sɔ gbɔ wu biliɔn 100 ya ɖe? Èwu mo dzi kpɔ ɣletivi siawo kpɔ le zã mea? Wowɔ nuku na wòa? Ke bu tame tso xexeme gã nyadri si me ɣletivihatsotsogã biliɔn siwo womenya xexlẽme na o, si me míaƒe Milky Way la hã le la ŋu kpɔ! Hekpe ɖe eŋu la, kakaɖedzi le dziƒonu siawo ƒe zɔzɔ ɖe game dzi tututu ŋu ale gbegbe be le ƒe alafa geɖe me la wotsɔ wo sɔ kple gamedzidzenu siwo medana le game dzi o.
4 Ne gaƒoɖokui si ya wɔwɔ bɔbɔ ŋutɔ ne wotsɔe sɔ kple nusiawo bia be gaƒoɖokuiwɔla nanɔ anyi la, ke ele kokoko be xexeme si ƒe nukuwɔwɔ kple ŋɔdzidzi de ŋgɔ wu eye womele gbɔgblɔ me o la ƒe aɖaŋuwɔla kple wɔla nanɔ anyi. Eyatae Biblia gblɔ na mí be ‘míafɔ mo dzi ne míakpɔ nu,’ eye wòbia mí be: ‘Ameka wɔ nusiawo?’ Ŋuɖoɖoae nye: “[Eyae nye Mawu, amesi yɔa] wo katã ŋkɔ, eye wo dometɔ aɖeke mesusɔna o le eƒe ŋusẽ geɖe kple alɔkame sesẽ la nu.” (Yesaya 40:26) Eyata ŋusẽ makpɔmakpɔ si si nunya le, si kpɔa ŋusẽ ɖe nuwo dzie na xexeame li—eyae nye Mawu.
Wowɔ Anyigba la Etɔxɛe
5-7. Nyateƒe siwo ku ɖe anyigba la ŋu kawoe ɖee fia be Ame aɖee wɔe?
5 Zi alesi dzɔdzɔmeŋutinunyalawo srɔ̃ nu tso anyigba la ŋu yi emee la, zi nenemae wòdzena na wo be ɖe wowɔe etɔxɛe be amegbetɔ nanɔ edzi. Wo kple ɣe dome ƒe didime sɔ pɛpɛpɛ be wòate ŋu axɔ kekeli kple dzoxɔxɔ si hiã la tututu. Eƒoa xlã ɣea zi ɖeka le ƒe me eye wòvia ɖe dzogoe si sɔ dzi tututu ale be agbledeɣi vovovowo te ŋu le xexeame ƒe akpa geɖe. Anyigba la ŋutɔ trona ɖe eɖokui si gaƒoƒo 24 ɖesiaɖe, esi na be zã kple ŋkeke tsoa wo nɔewo dome. Ya vovovo siwo tsaka ƒo xlãe la le agbɔsɔsɔ nyuitɔ me be míate ŋu agbɔ wo eye woxea mɔ na ɣe ƒe keklẽ sẽŋu si agblẽ nu le ame ŋu la le yame hafi wòɖoa mía gbɔ. Tsi kple ke si hiã vevie hena agbledede hã le edzi.
6 Nu mawo kple bubuwo ƒe dɔwɔwɔ ɖekae manɔmee la, naneke mate ŋu anɔ agbe le anyigba dzi o. Ðe nusiawo katã dzɔ le vomea? Science News gblɔ be: “Ðeko wòwɔ abe ɖe nɔnɔme mawo tututu siwo sɔ pɛpɛpɛ mate ŋu adzɔ le vome o ene.” Ao, womate ŋu adzɔ nenema o. Wonye Aɖaŋuwɔla si ƒo wo katã ta si ƒe nuwɔwɔwo ŋu taɖodzinu le la ƒe asinudɔwo.
7 Ne ège ɖe aƒe dzeani aɖe me eye nèkpɔ be nuɖuɖu sɔ gbɔ ɖe eƒe xɔwo me, mɔ̃ nyui aɖe le xɔawo me si naa xɔa me xɔa dzo alo naa eme fana, eye pɔmpiwo le aƒea me tsi toa wo me la, nukae nàgblɔ? Àgblɔ be ɖeko wodzɔ ɖe wo ɖokui sia? Ao, àgblɔ godoo be nunyala aɖe ƒe aɖaŋudɔe eye ewɔ wo le beléle gã aɖe me. Beléle gã aɖee wotsɔ wɔ anyigba la hãe be wòana nusiwo edzinɔlawo hiã la wo, eye ewɔ nuku wu eye nuwo le edzi wu aƒe ɖesiaɖe.
8. Nu bubu siwo ku ɖe anyigba la ŋu kawo hãe ɖe Mawu ƒe ɖe tsɔtsɔ le mía me lɔlɔ̃tɔe fia?
8 Bu tame le nu gbogbo siwo dzia míaƒe dzidzɔkpɔkpɔ le agbe me ɖe edzi la hã ŋu kpɔ. Kpɔ seƒoƒo dama dzeaniwo kple woƒe ʋeʋẽ lilili si dzɔa dzi na amegbetɔ la ɖa. Nuɖuɖu hamehame siwo vivina na mí hã li. Avewo, towo, tawo, kple nuwɔwɔ bubu siwo nya kpɔna li. Ɣe ƒe amigogbagba si dzia míaƒe dzidzɔkpɔkpɔ ɖe agbe ŋu ɖe edzi hã ɖe? Eye le lãwo dome la, ɖe avũviwo, dadiviwo, kple lã bubuwo ƒe viwo ƒe fefe dzeaniwo medzɔa dzi na mí oa? Eyata nu wɔnuku dodzidzɔname geɖe siwo mehiã na agbe kura hafi o la le anyigba la dzi. Esiawo fia be lɔlɔ̃ ƒe ɖetsɔleme si me wobu amegbetɔwo ŋu le, be menye be míanɔ agbe ko o ke boŋ agbea navivi na mí hãe wotsɔ wɔ anyigba lae.
9. Amekae wɔ anyigba la, eye nukatae wòwɔe ɖo?
9 Eyata nyataƒoƒo si me nunya le enye be míalɔ̃ ɖe edzi be nusiawo katã Nala li, abe alesi Biblia-ŋlɔla la gblɔ le Yehowa Mawu ŋui ene be: “Wòe wɔ dziƒo kple anyigba.” Eye nukatae wòwɔe ɖo? Egblɔ tso Mawu ŋu tsɔ ɖo eŋui be, “eya amesi mè anyigba, eye wòwɔe; menye ɖe wòwɔe, be wòatsi ƒuƒlu o, ke boŋ ɖe wòmèe, be woanɔ edzi.”—Yesaya 37:16; 45:18.
Lãmenugbagbevi Suesue Wɔnuku La
10, 11. Nukatae lãmenugbagbevi suesuewo wɔ nuku ale gbegbe ɖo?
10 Ke nugbagbewo ya ɖe? Ðe woawo ya mehiã wɔla oa? Le kpɔɖeŋu me, bu tame tso lãmenugbagbeviwo ƒe suetɔ (cell) ƒe akpa wɔnukuwo ŋu kpɔ. Lãmenugbagbeviwo ŋuti nunyala Michael Denton gblɔ le eƒe agbalẽ si nye Evolution: A Theory in Crisis me be: “Nusiwo me agbe le le anyigba dzi egbea siwo bɔbɔ ɖe anyi wu, esiwo nye bacteria la, ƒe lãmenugbagbevi suewo ƒe wɔwɔme gɔmesese goglo ŋutɔ. Togbɔ be bacteria suetɔ kekeake ƒe lãmenugbagbeviwo le nyaŋui ale gbegbe hã la, . . . le dɔwɔwɔ gome la, wo dometɔ ɖesiaɖe nye mɔ̃ɖaŋudɔwɔƒe blibo si wowɔ wòle sue ale gbegbe si me dɔwɔnu siwo wowɔ le aɖaŋu blibo me be woawɔ nugbagbevi sue sia ƒe akpa vovovowo la le . . . ede ŋgɔ sasasã wu mɔ̃ ɖesiaɖe si amegbetɔ wɔ kpɔ, eye naneke mesɔ kplii kura le nusiwo me agbe mele o la dome o.”
11 Egblɔ tso agbe ƒe domenyinyi ƒe ŋusẽ si le lãmenugbagbevi ɖesiaɖe me ŋu be: “DNA [ŋusẽ si fiaa mɔ lãmenugbagbevia ƒe dɔwɔwɔ kple eƒe dzidzi] ƒe nyadzadzraɖoŋutete dzè le nyadzadzraɖomɔnu siwo katã ŋu wonya nu le la ŋu sasasã; wotrɔ asi le eŋu ale gbegbe be nyatakaka siwo katã hiã na nugbagbe deŋgɔ abe amegbetɔ ene, la ƒe kpekpeme nye gram memamã ɖe akpa miliɔn me ƒe akpe ʋee aɖewo ko. . . . Ne wotsɔ wo sɔ kple wo nɔewo la, nyasã si le agbe ƒe dɔwɔwɔ sia me kple alesi wònye nu klitsui la na be mía tɔ deŋgɔtɔ kekeake [siwo míewɔ] la dze fefenui. Enana míekpɔnɛ be míele tsɛ ŋutɔ.”
12. Nukae dzɔdzɔmeŋutinunyala aɖe gblɔ tso lãmenugbagbevi suesuewo ƒe dzɔtsoƒe ŋu?
12 Denton gblɔ kpee be: “Alesi lãmenugbagbevi siwo bɔbɔ ɖe anyi wu siwo wonya ƒe wɔwɔme klitsui la nye nusi de ŋgɔ ale gbegbe be womate ŋu alɔ̃ ɖe edzi be vomenudzɔdzɔ aɖe si megogo nusi wosusu be ate ŋu adzɔ gbɔ kura o gbɔe wòatso o.” Ele be eƒe aɖaŋuwɔla kple ewɔla nanɔ anyi.
Míaƒe Ahɔhɔ̃ Wɔnuku La
13, 14. Nukata ahɔhɔ̃ gawɔ nuku kura wu lãmenugbagbevi suesuewo?
13 Dzɔdzɔmeŋutinunyala sia gblɔ kpee be: “Le woƒe nu klitsu nyenye gome la, ne ètsɔ lãmenugbagbevi ɖeka sɔ kple ahɔhɔ̃ la, [lãmenugbagbevi la] meɖi naneke o. Ahɔhɔ̃meka suesue siwo ade miliɔn akpe ewo ye le amegbetɔ ƒe ahɔhɔ̃ me. Alɔevi siwo ade akpe bla nanewo alo akpe alafawo le ahɔhɔ̃meka sue ɖesiaɖe ŋu esi na kadodo nɔa wo kple ahɔhɔ̃ la me ka bubuwo dome. Amegbetɔ ƒe ahɔhɔ̃ me kadodo siawo katã ƒe ƒuƒoƒo gogo . . . miliɔn akpe teƒe miliɔn ɖeka.”
14 Denton yi edzi be: “Ne woatsɔ ahɔhɔ̃ la me kadodo vovovowo ƒe akpa alafa ɖeka lia awɔ dɔ etɔxɛe hã la, asɔ gbɔ sãa wu kadodo vovovo siwo katã le Anyigba la dzi.” Emegbe ebia be: “Ðe kadodo vovovo mawo gbegbe ate ŋu adzɔ tso nane si dzɔ le vome dzaa ko mea?” Edze ƒã be ele be ŋuɖoɖoa nanye ao. Ele be ahɔhɔ̃ la ƒe Aɖaŋuwɔla kple Ewɔla si bua ame ŋu nanɔ anyi.
15. Nya kawoe ame bubuwo gblɔ tso ahɔhɔ̃ la ŋu?
15 Amegbetɔ ƒe ahɔhɔ̃ la na be kɔmpiuta siwo de ŋgɔ wu kura gɔ̃ hã dze fefenuwoe. Dzɔdzɔmeŋutinunya ŋuti nuŋlɔla Morton Hunt gblɔ be: “Nyatakaka siwo míaƒe susu léna ɖi la sɔ gbɔ wu esiwo le egbegbenyadikɔmpiuta gãwo me la zi gbɔ zi biliɔn geɖe.” Eyata ahɔhɔ̃kola Ðk. Robert J. White ƒo nya ta be: “Nusi susɔ magawɔ koe nye malɔ̃ ɖe Nyasã aɖe si De Ŋgɔ Wu, si wɔ ahɔhɔ̃ la kple eƒe nyaléleɖi —nane si kɔkɔ akpa be amegbetɔ nase egɔme —la ƒe anyinɔnɔ dzi. . . . Ele be maxɔe se be nane si me susu le dzie esiawo katã to dzɔ, be Ame aɖee na wòdzɔ.” Ele be wòanye Amesi tsɔ ɖe le eme na ame hã.
Ʋu ƒe Wɔwɔme si Nye Nu Tɔxɛ
16-18. (a) Mɔ kawo nue ʋu nye nu tɔxɛ le? (b) Aleke wòle be míaƒo nya tae?
16 Bu tame le nu tɔxɛ si nye ʋu ƒe dɔwɔwɔ si tsɔa nunyiame kple ya tsanɛ le ŋutilã la me eye wòxea mɔ ɖe dɔxɔxɔ nu la hã ŋu. Ku ɖe ʋumenugbagbevi dzẽwo, si nye ʋu la ƒe akpa vevi aɖe ŋu la, agbalẽ si nye ABC’s of the Human Body gblɔ be: “Ʋumenugbagbevi ɖekaɖeka siwo sɔ gbɔ wu miliɔn 250 ye le ʋu ƒe gege ɖeka toŋ me . . . Ðewohĩ wo ame biliɔn akpe ɖeka 25 ye li, si sɔ gbɔ be ne woaɖo wo ɖe nɔewo nu ɖekaɖekae la, woaxɔ tennis bɔlƒoƒe ene. . . . Le second ɖesiaɖe me la, woɖɔa li wo dometɔ miliɔn 3.”
17 Ku ɖe ʋumenugbagbevi ɣi siwo nye ʋu si nye nu tɔxɛ la ƒe akpa aɖe ŋu la, agbalẽ sia ke gblɔ be: “Togbɔ be ʋumenugbagbevi dzẽ ɖeka ƒomevi koe li hã la, ʋumenugbagbevi ɣi hamehame geɖee li, ɖesiaɖe ƒomevi te ŋu wɔa ŋutilã la ƒe avuwo le mɔ si to vovo nu. Le kpɔɖeŋu me, ɖeka ƒomevi tsrɔ̃a lãmenugbagbevi siwo ku. Bubu aɖewo ƒomevi yɔa aɖi siwo wua dɔléle ƒe kutsetsewo, woxɔa aɖi le nu tutɔ siwo ge ɖe ŋutilã la me si, alo woɖua bacteria mawo ŋutɔŋutɔ hetua wo.”
18 Aleke ʋu la ƒe dɔwɔwɔ wɔ nuku hele ɖoɖo nue nye si! Ele be Mawu—ɖoɖowɔla si bua ame ŋu si ƒe nunya de ŋgɔ ŋutɔ—nanɔ nane si woɖo ɖe ɖoɖo deblibo nu alea eye wòtɔa kpɔ ɖe ame ŋu alea la si godoo.
Nukunu Bubuwo
19. Ne wotsɔ ŋku sɔ kple mɔ̃ siwo amegbetɔ wɔ la, aleke wòle?
19 Nu wɔnuku bubu geɖewo gali le amegbetɔ ƒe ŋutilã me. Ðekae nye ŋku, si wowɔ le aɖaŋu deŋgɔ me ale gbegbe be fotoɖemɔ̃ aɖeke mate ŋu ade enu o. Ɣletiviwo ŋuti nunyala Robert Jastrow gblɔ be: “Ewɔ abe aɖaŋu bliboe wotsɔ wɔ ŋku lae ene; yamenutomenukpɔmɔ̃wɔla aɖeke mate ŋu awɔ nusi nyo wui o.” Eye agbalẽ si nye Popular Photography ka nya ta be: “Amegbetɔ ƒe ŋku kpɔa nu hamehame vovovowo nyuie wu fotoɖemɔ̃. Ekpɔa nua ƒe didime, eƒe kekeme kple kɔkɔme, le dzogoe si keke ŋutɔ me, eye nua metɔtɔna ɖee o, eye ekpɔnɛ esime nua le azɔli dzi alo wòle dɔ wɔm . . . Fotoɖemɔ̃ tsɔtsɔ sɔ kple ame ƒe ŋku menye nutsɔtsɔsɔkplenu nyui o. Ame ƒe ŋku le abe kɔmpiuta deŋgɔtɔ si ƒo bubuawo katã ta, si si susu le eye wòte ŋu wɔa dɔ le nyawo ŋu, si ƒe ablaɖeɖe, kple alesi wòwɔa dɔe la dzè le nutovɛ, kɔmpiuta alo fotoɖemɔ̃ ɖesiaɖe si amegbetɔ wɔ kpɔ la ŋu ene.
20. Nukawoe nye amegbetɔ ƒe ŋutilã la ƒe akpa wɔnuku bubuwo dometɔ aɖewo?
20 Bu tame le mɔ wɔnuku si nu míaƒe ŋutinuwo wɔa dɔ kple wo nɔewoe esi menye míawoe dzea eƒe agbagba aɖeke hafi o la hã ŋu kpɔ. Le kpɔɖeŋu me, míeɖua nu vovovowo henoa nu vovovowo ɖe dɔme, gake ŋutilã la wɔa dɔ le wo ŋu wozua ŋusẽdonu na ametia. Kɔ nu vovovo mawo ɖe ʋu ƒe amideƒe kpɔ be afikae wòate ŋu akplɔ wò adee hã! Vidzidzi si nye vi fẽ si dze ani la—si ɖi edzilawo—le ɣleti asieke ko me ƒe nukunu la hã li. Eye gbegbɔgblɔ si nye nu sesẽ si ɖevi te ŋu srɔ̃na le ƒe ʋee aɖewo ko me ya ɖe?
21. Ne amesiwo bua tame bu ŋutilã la ƒe nukunuwo ŋu la, nukae wogblɔna?
21 Ẽ, nuwɔwɔ ƒe nukunu wɔmoya siwo le amegbetɔ ƒe ŋutilã me la naa míaƒe nu kuna. Mɔ̃ɖaŋuwɔla aɖeke mate ŋu awɔ nu mawo tɔgbe o. Ekema ɖe, nudzɔleɖokuisi si womefia mɔe o ate ŋu awɔ woa? Kpao! Ke boŋ ne tamebulawo de ŋugble le amegbetɔ ƒe ŋutilã ƒe ŋutinu wɔnukuawo ŋu la, wogblɔna abe hakpala la ene be: “Meda akpe na wò [Mawu] le alesi wowɔm nukutɔe la ta; wò dɔwɔwɔwo nye nukunu.”—Psalmo 139:14.
Wɔla Gãtɔ
22, 23. (a) Nukatae wòle be míalɔ̃ ɖe Wɔla la ƒe anyinɔnɔ dzi? (b) Nya kae Biblia gblɔ tso Mawu ŋu si sɔ?
22 Biblia gblɔ be: “Míenya be xɔ sia xɔ ame aɖee tui; ke Mawue tu nusianu si li la.” (Hebritɔwo 3:4, The Jerusalem Bible) Esi wònye aleke kee aƒe aɖe le klanyɛe o ele be etula nanɔ anyi ta la, ke ele be míaƒe xexeame si de ŋgɔ boo wu, kpakple agbe ƒomevi vovovo siwo le anyigba dzi la, ƒe tula alo wɔla nanɔ anyi. Eye esi míelɔ̃ ɖe amegbetɔ siwo to yameʋuwo, televisionwo, kple kɔmpiutawo wɔwɔ vɛ ƒe anyinɔnɔ dzi la, ɖe mele be míalɔ̃ ɖe Amesi wɔ ahɔhɔ̃ na amegbetɔwo be woatsɔ awɔ nu mawoe ya ƒe anyinɔnɔ dzi oa?
23 Biblia lɔ̃ ɖe edzi eye wòyɔe be “Mawu [vavãtɔ,] Yehowa, amesi wɔ dziƒowo, eye wòhe wo me, amesi keke anyigba kple eƒe numiemiewo ɖe nu, amesi na agbe dukɔ, si le edzi, kple gbɔgbɔ amesiwo zɔa edzi.” (Yesaya 42:5) Esɔ be Biblia gblɔ be: “Mía Aƒetɔ kple mía Mawu, wòe dze be, naxɔ ŋutikɔkɔe kple bubu kple ŋusẽ; elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.”—Nyaɖeɖefia 4:11.
24. Aleke míawɔ anya be Mawu li?
24 Ẽ, nusiwo Mawu wɔ la ate ŋu ana míanya be eli. “Elabena tso xexemewɔwɔ dzi la, ne wobua tame le eŋuti la, wokpɔa [Mawu ƒe] numanyakpɔ, si nye eƒe ŋusẽ mavɔmavɔ kple mawunyenye la kɔte le [Mawu ƒe] dɔwɔwɔwo me, bena taflatsedodo aɖeke naganɔ wo si o.”—Romatɔwo 1:20.
25, 26. Nukatae nu mazãmazã nyuie mefia be nua wɔla meli o?
25 Ne womezã nane si wowɔ la nyuie o la, mefia be nua wɔla meli o. Woate ŋu azã yameʋu ayi ŋutifafanugbee, abe ametsɔʋu ene. Gake woagate ŋu azãe abe bɔmbdaʋu ene atsɔ atsrɔ̃ nui. Ezazã tsɔ wu amee mefia be menye amee wɔe o.
26 Nenema ke alesi amewo wɔa nu gbegblẽ ale gbegbe zi geɖe la mefia be Wɔla mele wo si o, mefia be Mawu meli o. Eyatae nusi Biblia gblɔ la sɔ be: “Oo, mieflu mia ɖokui! Ðe tsu le abe zemela ene, eye nuwɔwɔ nagblɔ na ewɔla be: Menye wòe wɔm o, eye numeme nagblɔ na emela be: Mele ɖeke nyam oa?”—Yesaya 29:16.
27. Nukatae míate ŋu akpɔ mɔ be Mawu aɖo míaƒe biabia siwo ku ɖe fukpekpe ŋu la ŋuti?
27 Wɔla la ɖe eƒe nunya fia le nu wɔnuku klitsu siwo wòwɔ la me. Eɖee fia be yetsɔ ɖe le eme na mí le alesi wòwɔ anyigba lae wòsɔ nyuie hena míaƒe edzinɔnɔ, alesi wòwɔ míaƒe ŋutilã kple míaƒe susui le nukumɔ sia gbegbe nu, kple alesi wòwɔ nu nyui gbogbo aɖewo na míaƒe vivisese la me. Aɖe nunya kple ɖetsɔleme ma tɔgbe ke afia be wòana míanya nyabiabia siawo tɔgbe ƒe ŋuɖoɖo godoo: Nukatae Mawu ɖe mɔ ɖe fukpekpe ŋu? Nukae wòava awɔ le eŋu?
[Nɔnɔmetata si le axa 5]
Anyigba la, kple eƒe ya siwo tɔ kpɔ ɖe eŋu la, nye aƒe tɔxɛ si Mawu si tsɔa ɖe le ame me la wɔ
[Nɔnɔmetata si le axa 6]
Wowɔ anyigba la le lɔlɔ̃ kple beléle me be agbenɔnɔ navivi na mí ade edeƒe
[Nɔnɔmetata si le axa 7]
‘Katsiatsiã siwo le ahɔhɔ̃ ɖeka me la sɔ gbɔ wu kadodo siwo katã le Anyigba la dzi’—Lãmenugbagbeviwo ŋuti nunyala
[Nɔnɔmetata si le axa 8]
“Ewɔ abe aɖaŋu bliboe wotsɔ wɔ ŋku lae ene; yamenutomenukpɔmɔ̃wɔla aɖeke mate ŋu awɔ nusi nyo wui o.”—Ɣletiviwo ŋuti nunyala