Nu Vevi Eve Siwo Naa Srɔ̃ɖeɖe Nɔa Anyi Didina

1, 2. (a) Ɣeyiɣi didi kae woɖo be srɔ̃ɖeɖe nanɔ anyi ase ɖo? (b) Aleke woawɔe wòava eme?

ESIME Mawu te ŋutsu kple nyɔnu gbãtɔ ƒo ƒui le srɔ̃ɖeɖe me la, naneke menɔ anyi si fia be ɣeyiɣi kpui aɖe ko ƒe nue ɖekawɔwɔ ma anye o. Ðe wòɖoe be Adam kple Xawa nanɔ wo nɔewo gbɔ le woƒe agbe me katã. (Mose I, 2:24) Dzidzenu si Mawu ɖo na srɔ̃ɖeɖe si ŋu bubu le ye nye be ŋutsu ɖeka kple nyɔnu ɖeka nanɔ wo nɔewo gbɔ. Srɔ̃tɔ ɖeka alo wo ame evea ƒe gbɔdɔdɔ ƒe agbegbegblẽnɔnɔ vɔ̃ɖi ko ŋue Ŋɔŋlɔawo ɖe mɔ ɖo be woate ŋu anɔ te ɖe edzi agbe srɔ̃ eye woagate ŋu aɖe ame bubu.—Mateo 5:32.

² Ðe ame eve ate ŋu anɔ anyi ɖekae le dzidzɔ me ɣeyiɣi aɖe si teƒe adidi ŋutɔa? Ẽ, eye Biblia yɔ nu vevi, alo safui, eve, siwo ana wòate ŋu ava eme alea. Ne srɔ̃ŋutsu kple srɔ̃nyɔnu tsɔ wo wɔ dɔe la, aʋu dzidzɔkpɔkpɔ kple yayra geɖe ƒe ʋɔtru na wo. Woawoe nye nu vevi kawo?

 3. Lɔlɔ̃ ƒomevi etɔ̃ kawoe wòle be srɔ̃tɔwo natu ɖo?

³ Nu vevi gbãtɔe nye lɔlɔ̃. Enyo be míade dzesii be lɔlɔ̃ ƒomevi vovovo ŋue woƒo nu tsoe le Biblia me. Ðekae nye vividodoɖeameŋu ƒe nu malɔ̃malɔ̃ le ame gbɔ, si nye lɔlɔ̃ si ƒomevi nɔa xɔlɔ̃ veviwo dome. (Yohanes 11:3) Bubue nye lɔlɔ̃ si nɔa ƒometɔwo dome. (Romatɔwo 12:10) Etɔ̃liae nye gbɔdɔdɔ ƒe lɔlɔ̃ si ate ŋu anɔ ŋutsu kple nyɔnu dome. (Lododowo 5:15-20) Le nyateƒe me la, ɖe wòle be srɔ̃ŋutsu kple srɔ̃nyɔnu siaa natu lɔlɔ̃ siawo katã ɖo. Gake lɔlɔ̃ ƒomevi bubu li si nye enelia, si le vevie wu bubuawo.

 4. Nukae nye lɔlɔ̃ ƒomevi enelia?

⁴ Le gbe gbãtɔ si me woŋlɔ Kristotɔwo ƒe Hela Ŋɔŋlɔawo ɖo me la, nya si wozã na lɔlɔ̃ enelia siae nye a·gaʹpe. Wozã nya ma le Yohanes I, 4:8, afisi wogblɔ na mí le be: “Mawu enye lɔlɔ̃.” Nyateƒee, ‘míelɔ̃a Mawu, elabena etre mía lɔlɔ̃.’ (Yohanes I, 4:19) Kristotɔ tua lɔlɔ̃ sia ɖo gbã na Yehowa Mawu eye emegbe na ehavi amegbetɔwo. (Marko 12:29-31) Wogazã nya a·gaʹpe le Efesotɔwo 5:2 hã, afisi gblɔ be: “Mizɔ le lɔlɔ̃ me, abe alesi Kristo hã lɔ̃ mi, eye wòtsɔ eɖokui hena ɖe mia ta . . . ene.” Yesu gblɔ be lɔlɔ̃ sia ƒomevie woatsɔ ade dzesi ye yomedzela vavãtɔwoe: “Esia me amewo katã woanyae le bena, nye nusrɔ̃lawo mienye, ne lɔlɔ̃ [a·gaʹpe] le mia dome.” (Yohanes 13:35) De dzesi alesi wozã a.ga’pe le Korintotɔwo I, 13:13 hã: “Xɔse kple mɔkpɔkpɔ kpakple lɔlɔ̃, nu etɔ̃ siawo nɔa anyi; ke lɔlɔ̃ [a.ga’pe] la ƒo wo katã ta.”

5, 6. (a) Nukatae lɔlɔ̃ ƒo xɔse kple mɔkpɔkpɔ ta? (b) Nukawoe nye susu aɖewo siwo tae lɔlɔ̃ ana srɔ̃ɖeɖe nanɔ anyi adidi?

⁵ Nukae na a·gaʹpe lɔlɔ̃ sia ƒo xɔse kple mɔkpɔkpɔ ta? Gɔmeɖose—gɔmeɖose dzɔdzɔe—siwo le Mawu ƒe Nya la mee kpɔ ŋusẽ ɖe edzi. (Psalmo 119:105) Enye ɖokuitɔmadimadi ƒe ɖetsɔleme na ame bubuwo be woawɔ nusi le dzɔdzɔe henyo le Mawu ƒe nukpɔsusu nu na wo, ne edze abe amesi wole ewɔm na dze nɛ alo medze nɛ o hã. Lɔlɔ̃ sia kpena ɖe srɔ̃tɔwo ŋu be woawɔ ɖe Biblia ƒe aɖaŋuɖoɖo sia dzi, be: “Mihe adodo kple mia nɔewo, eye mitsɔ ke mia nɔewo, ne nya aɖe le ame aɖe si ɖe ame aɖe ŋuti la, alesi [Yehowa, NW] hã tsɔ ke mii la, miawo hã miwɔ nenema ke!” (Kolosetɔwo 3:13) Srɔ̃tɔ siwo lɔ̃a wo nɔewo la, ‘tsɔa lɔlɔ̃ [a·gaʹpe] deto lɔ̃a wo nɔewoe,’ eye wotunɛ ɖo, ‘elabena lɔlɔ̃ tsyɔa nuvɔ̃wo ƒe agbɔsɔsɔ dzi.’ (Petro I, 4:8) De dzesii be lɔlɔ̃ tsyɔa vodadawo dzi. Menye ɖe wòɖea wo ɖa o, elabena vodada magbe amegbetɔ madeblibo aɖeke ŋu nɔnɔ o.—Psalmo 130:3, 4; Yakobo 3:2.

⁶ Ne srɔ̃tɔwo srɔ̃ Mawu kple wo nɔewo lɔlɔ̃ sia la, woƒe srɔ̃ɖeɖea anɔ anyi adidi eye dzidzɔ anɔ eme, elabena “lɔlɔ̃ la nu metsina gbeɖe o.” (Korintotɔwo I, 13:8) Lɔlɔ̃ nye “blibonyenye . . . ƒe nublanu.” (Kolosetɔwo 3:14) Ne èɖe srɔ̃ la, aleke mia kple srɔ̃wò miawɔ atu lɔlɔ̃ sia ƒomevi ɖo? Mixlẽ Mawu ƒe Nya la ɖekae, eye miaƒo nu le eŋu. Mide ŋugble le Yesu ƒe lɔlɔ̃ ƒe kpɔɖeŋu ŋu eye midze agbagba miasrɔ̃e, abu tame awɔ nu abe eya ene. Tsɔ kpe ɖe eŋu la, mide Kristotɔwo ƒe kpekpe siwo me wofiaa Mawu ƒe Nya la le. Eye mido gbe ɖa miabia Mawu be wòakpe ɖe mia ŋu miatu lɔlɔ̃ deŋgɔ sia ƒomevi si nye Mawu ƒe gbɔgbɔ kɔkɔe ƒe kutsetse la ɖo.—Lododowo 3:5, 6; Yohanes 17:3; Galatiatɔwo 5:22; Hebritɔwo 10:24, 25.

 7. Nukae nye sisiɖa, eye amekae wòle be neɖe sisiɖa fia le srɔ̃ɖeɖe me?

⁷ Ne srɔ̃tɔ eve lɔ̃a wo nɔewo nyateƒe la, ekema woasi wo wo nɔewo ɖa hã, eye sisiɖae nye nu vevi evelia si na wokpɔa dzidzɔ le srɔ̃ɖeɖe me. Woɖe sisiɖa gɔme be enye “ame bubuwo ŋu bubu, kple bubudede wo ŋu.” Mawu ƒe Nya la xlɔ̃ nu Kristotɔwo katã, si me srɔ̃ŋutsuwo kple srɔ̃nyɔnuwo hã le, be: “Mitre mia nɔewo bubu.” (Romatɔwo 12:10) Apostolo Petro ŋlɔ be: “Mi ŋutsuwo la, minɔ anyi kple [mia srɔ̃wo] le nunya me, esi wonye gbɔdzɔgbɔdzɔtɔwo wu la ŋuti, eye mitsɔ bubu na wo.” (Petro I, 3:7) Woxlɔ̃ nu srɔ̃nyɔnu be ‘nesi srɔ̃a ɖa.’ (Efesotɔwo 5:33) Ne èdi be yeade bubu ame aɖe ŋu la, wò dɔme anyo na amea, ade bubu eya amea ŋutɔ kple eƒe susu siwo wògblɔ ŋu, eye àlɔ̃ be yeawɔ nusianu si sɔ si wòabia tso asiwò.

8-10. Mɔ kawoe nye esiwo nu sisiɖa ana nali ke eye dzidzɔ nanɔ eme la ƒe ɖewo?

⁸ Amesiwo di be dzidzɔ nanɔ yewoƒe srɔ̃ɖeɖe me sia wo srɔ̃wo ɖa to alesi ‘womekpɔa nusi nye woawo ŋutɔ ɖeɖeko tɔ dzi o, ke boŋ wokpɔa nusi nye wo srɔ̃wo tɔ hã dzi’ me. (Filipitɔwo 2:4) Womebua nusi anyo na woawo ŋutɔ ɖeɖeko ŋu o—esi anye ɖokuitɔdidi. Ke boŋ wobua nusi ade wo srɔ̃wo dzi wu hã ŋu. Le nyateƒe me, wodaa ema ɖe nɔƒe gbãtɔ.

⁹ Sisiɖa akpe ɖe srɔ̃tɔwo ŋu be woalɔ̃ ɖe nukpɔsusuwo ƒe vovototo dzi. Mesɔ be woakpɔ mɔ be ame eve ƒe susu nasɔ pɛpɛpɛ le nusianu me o. Nusi le vevie na srɔ̃ŋutsu la, srɔ̃nyɔnu ya mabui nu vevii nenema o, eye nusi dzɔa dzi na srɔ̃nyɔnu la madzɔ dzi na srɔ̃ŋutsu o. Gake ele be wo dometɔ ɖesiaɖe nade bubu nɔvia ƒe nukpɔsusuwo kple tiatiawo ŋu, zi alesi manye dada le Yehowa ƒe sewo kple gɔmeɖosewo dzi o ko. (Petro I, 2:16; tsɔe sɔ kple Filemon 14.) Tsɔ kpe ɖe eŋu la, ele be wo dometɔ ɖesiaɖe nade bubu nɔvia ŋu to alesi womagblɔ nya alo awɔ fefe siwo adae ɖe anyi, le dutoƒo loo alo le woawo ɖeɖe dome o la me.

¹⁰ Ẽ, lɔlɔ̃ na Mawu kpakple na ame nɔewo kple ame nɔewo sisiɖa nye safui eve siwo ʋua srɔ̃ɖeɖe si me anyo ƒe ʋɔtru na ame. Aleke woate ŋu azã wo le srɔ̃gbenɔnɔ ƒe akpa siwo le vevie wu la dometɔ aɖewo mee?

11. Ameka dzie Ŋɔŋlɔawo tɔ asii be eyae nye ta le srɔ̃ɖeɖe me?

¹¹ Biblia gblɔ na mí be wowɔ ŋutsu kple nɔnɔme siwo akpe ɖe eŋu be wòanye ƒome ƒe ta si akpɔ dzidzedze. Le esia ta Yehowa abia akɔnta ŋutsua le srɔ̃a kple viawo ƒe ŋutilã me kple gbɔgbɔ me nyonyo ŋu. Ele be wòawɔ nyametsotso siwo da sɔ siwo me Yehowa ƒe lɔlɔ̃nu dze le eye wòaɖo mawusosroɖagbenɔnɔ ƒe kpɔɖeŋu nyui ɖi. “Mi nyɔnuwo la, mibɔbɔ mia ɖokui na mia ŋutɔwo mia srɔ̃wo abe Aƒetɔ la ene; elabena ŋutsue nye ta na nyɔnu, abe alesi Kristo hã nye ta na hame la ene.” (Efesotɔwo 5:22, 23) Gake Biblia gblɔ be ta le srɔ̃ŋutsua hã si, Amesi kpɔ ŋusẽ ɖe edzi. Apostolo Paulo ŋlɔ be: “Mele didim bena, mianyae bena, ŋutsu sia ŋutsu ƒe ta enye Kristo, ke nyɔnu ƒe ta enye ŋutsu, ke Kristo ƒe ta enye Mawu.” (Korintotɔwo I, 11:3) Srɔ̃ŋutsu nyanu srɔ̃a alesi wòazã eƒe tanyenye la to eya ŋutɔ ƒe ta, Kristo Yesu, sɔsrɔ̃ me.

12. Kpɔɖeŋu nyui kae Yesu ɖo le ɖokuibɔbɔ ɖeɖefia kple tanyenye ŋudɔwɔwɔ siaa me?

¹² Ta le Yesu hã si, eyae nye Yehowa, eye ebɔbɔa eɖokui Nɛ alesi dze. Yesu gblɔ be: “Nyemedia nye ŋutɔ nye lɔlɔ̃nu o, ke boŋ amesi dɔm ɖa la ƒe lɔlɔ̃nu ko.” (Yohanes 5:30) Kpɔɖeŋu nyui kae nye si! Yesue nye “nuwɔwɔwo katã ƒe ŋgɔgbevi.” (Kolosetɔwo 1:15) Eyae va zu Mesia la. Eyae ava nye Kristotɔ amesiaminawo ƒe hamea ƒe Ta kple Mawu Fiaɖuƒea ƒe Fia si woatia, eye wòaƒo mawudɔlawo katã ta. (Filipitɔwo 2:9-11; Hebritɔwo 1:4) Togbɔ be teƒe kɔkɔ sia ava su Yesu si eye mɔkpɔkpɔ deŋgɔ siawo gbegbe nɔ esi esime wònye amegbetɔ hã la, mewɔ nu adãtɔe, dzimesesẽtɔe, alo di nusi gbɔ eme tso ame gbɔ o. Menye ŋutasesẽdziɖula, eye wònɔa ŋkuɖoɖo edzi dzi na eƒe nusrɔ̃lawo ɣesiaɣi be ele be woabu ye o. Yesu lɔ̃ ame eye wòse veve ɖe ame nu, vevietɔ ɖe amesiwo wote ɖe anyi la nu. Egblɔ be: “Mite va gbɔnye, mi amesiwo katã le agbagba dzem, eye agba le mia wum la, eye nye la mana dzudzɔ mi. Mitsɔ nye kɔkuti la ɖo mia ɖokui dzi, eye miasrɔ̃ nu tso gbɔnye, elabena nye dɔme fa, eye mebɔbɔ ɖokuinye ɖe anyi le dzi me, eye miakpɔ dzudzɔ na miaƒe luʋɔwo. Elabena [nye] kɔkuti la le bɔbɔe, eye nye agba la le wodzoe.” (Mateo 11:28-30) Amewo se vivi le egbɔ nɔnɔ me.

13, 14. Aleke srɔ̃ŋutsu si lɔ̃a srɔ̃a azã eƒe tanyenye le Yesu sɔsrɔ̃ mee?

¹³ Enyo be srɔ̃ŋutsu si di be dzidzɔ nanɔ yeƒe ƒomegbenɔnɔ me la nabu Yesu ƒe nɔnɔme nyoameŋuawo ŋu. Srɔ̃ŋutsu nyui menye ame wɔadã kple ŋutasesẽdziɖula si zãa eƒe tanyenye tsɔ klẽa ŋku dea srɔ̃a o. Elɔ̃a nyɔnua hedea bubu eŋu boŋ. Ne Yesu ‘bɔbɔ eɖokui ɖe anyi le dzi me’ la, ke enye nusita wògale vevie wu be srɔ̃ŋutsu la nanɔ nenema ke le esi eya mele abe Yesu ene o ta, elabena eya wɔa vodada. Ne ewɔ vodada la, edina be ye srɔ̃ nase eme na ye. Eyata srɔ̃ŋutsu si bɔbɔa eɖokui la lɔ̃na ɖe eƒe vodadawo dzi, togbɔ be nya siwo nye “Meɖe kuku; tɔwò dzɔ,” gbɔgblɔ asesẽ nɛ hã. Anɔ bɔbɔe na srɔ̃nyɔnu be wòade bubu srɔ̃ŋutsu si mewɔa nu wògbɔa eme o eye wòbɔbɔa eɖokui la ŋu wu srɔ̃ŋutsu si nye dadala kple dzimesesẽtɔ. Nenema ke srɔ̃nyɔnu si sia srɔ̃a ɖa hã aɖe kuku ne etɔ medzɔ o.

¹⁴ Mawu wɔ nyɔnu kple nɔnɔme nyui siwo wòate ŋu azã be eya hã nana dzidzɔ nanɔ srɔ̃ɖeɖea me. Srɔ̃ŋutsu nyanu alɔ̃ ɖe esia dzi eye madze agbagba be yeaxe mɔ ɖe wo ɖeɖefia nu o. Zi geɖe la, nyɔnu geɖe te ŋu sea veve ɖe ame ti eye wote ŋu dea dzesi amewo ƒe nuhiahiãwo kple seselelãmewo wu ŋutsuwo, eye nɔnɔme siawo hiã le ƒomedzikpɔkpɔ kple ame nɔewo dome ƒomedodo ƒe nyonyo me. Zi geɖe la, nyɔnua bina ɖe aƒea me dzadzraɖo be wòanye teƒe si woanɔ ame ƒe dzi nadze eme me ŋutɔ. Nɔnɔme wɔnuku kple dzɔdzɔmenunana nyui geɖe le “nyɔnu zazɛ̃” si ƒe nya wogblɔ ɖe Lododowo ta 31 la si, eye eɖe vi na eƒe ƒomea bliboe. Nukatae? Elabena srɔ̃a ƒe dzi ‘ɖoa ŋu’ ɖe eŋu.—Lododowo 31:10, 11.

15. Aleke srɔ̃ŋutsu ate ŋu aɖe lɔlɔ̃ kple sisiɖa si ɖi Kristo tɔ afia srɔ̃ae?

¹⁵ Le dukɔ aɖewo me la, alesi wobua srɔ̃ŋutsu ƒe ŋusẽe la gbɔ eme, ale be wobua nya teti si woabiae hã amemabumabui. Vovototo boo aɖeke manɔ alesi ŋutsua awɔ nu ɖe eƒe kluvi ŋu kple alesi wòawɔe ɖe srɔ̃a ŋu dome o. Menye wo kple srɔ̃anyɔnu dome koe tanyenye zazã ɖe mɔ gbegblẽ nu ma gblẽna o, egblẽna wo kple Mawu dome ƒomedodo hã me. (Tsɔe sɔ kple Yohanes I, 4:20, 21.) Le go bubu me hã, srɔ̃ŋutsu aɖewo ɖea asi le tanyenye la ŋu eye wonaa wo srɔ̃nyɔnuwo ɖoa tɔ ɖe aƒea nu. Srɔ̃ŋutsu si bɔbɔa eɖokui ɖe Kristo te alesi dze la metafaa srɔ̃anyɔnu alo kloa bubu le eŋu o. Esrɔ̃a Yesu ƒe ɖokuitsɔtsɔsavɔlɔlɔ̃ boŋ eye wòwɔna abe alesi Paulo xlɔ̃ nui ene, be: “Mi ŋutsuwo la, milɔ̃ mia ŋutɔwo mia srɔ̃wo, abe alesi Kristo hã lɔ̃ hame la, eye wòtsɔ ye ŋutɔ ɖokui hena ɖe eta la ene.” (Efesotɔwo 5:25) Kristo Yesu lɔ̃ eyomedzelawo ale gbegbe be wòku ɖe wo ta. Srɔ̃ŋutsu nyui adze agbagba be yeasrɔ̃ ɖokuitɔmadimadi ƒe nɔnɔme ma, adi srɔ̃a ƒe nyonyo, le esi wòatsɔ nu geɖe fũ anɔ fu ɖem nɛ teƒe. Ne srɔ̃ŋutsu bɔbɔ eɖokui na Kristo eye wòɖea lɔlɔ̃ kple sisiɖa siwo ɖi Kristo tɔ fiana la, aʋã srɔ̃a wòadi be yeabɔbɔ ye ɖokui nɛ.—Efesotɔwo 5:28, 29, 33.

16. Nɔnɔme kawoe wòle be srɔ̃nyɔnu naɖe afia le wo kple srɔ̃a dome ƒomedodo me?

¹⁶ Ɣeyiɣi aɖe le Adam wɔwɔ vɔ megbe la, “Yehowa Mawu gblɔ bena: Menyo bena ame la natsi akogo o; mawɔ kpeɖeŋutɔ, si asɔ ɖe eŋu la nɛ.” (Mose I, 2:18) Mawu wɔ Xawa be wòanye “kpeɖeŋutɔ,” menye hoʋlila o. Womeɖo srɔ̃ɖeɖe anyi be wòanɔ abe tɔdziʋu si me ʋumefia siwo le ho ʋlim kple wo nɔewo le la ene o. Ele be srɔ̃ŋutsua nazã tanyenye le lɔlɔ̃ me, eye srɔ̃nyɔnua naɖe lɔlɔ̃, sisiɖa, kple ɖokuibɔbɔ si tso dzime fia.

17, 18. Mɔ siwo nu srɔ̃nyɔnu ate ŋu anye kpeɖeŋutɔ vavã le na srɔ̃a ƒe ɖewo ɖe?

¹⁷ Gake srɔ̃nyɔnu nyui nyenye yi ŋgɔ wu nyɔnua ƒe ɖokuibɔbɔ ko. Edzea agbagba be yeanye kpeɖeŋutɔ ŋutɔŋutɔ le alesi wòkpea asi ɖe srɔ̃aŋutsu ŋu le nyametsotso siwo ŋutsua wɔna me la me. Nyateƒee, esia wɔwɔ nɔa bɔbɔe nɛ wu ne elɔ̃ ɖe ŋutsua ƒe nyametsotsowo dzi. Gake ne melɔ̃ ɖe wo dzi o gɔ̃ hã la, eƒe asikpekpeɖeŋu tso dzime ate ŋu ana nu nyui geɖe wu nado tso ŋutsua ƒe nyametsotsowo me.

¹⁸ Srɔ̃nyɔnu ate ŋu akpe ɖe srɔ̃aŋutsu ŋu wòanye ta nyui le mɔ bubuwo hã nu. Ate ŋu agblɔ alesi wòkpɔa ŋudzedze ɖe agbagba siwo dzem wòle be yeanye ta nyui la ŋu, le esi wòanɔ nya hem ɖe eŋu alo wòana wòase le eɖokui me be eƒe nuwɔna aɖeke mate ŋu adze ye ŋu o teƒe. Le eƒe nunyuiwɔwɔ ɖe srɔ̃aŋutsu ŋu me la, ele be wòaɖo ŋku edzi be “gbɔgbɔ fatu, si nɔa anyi kpoo, . . . xɔ asi sesẽ le Mawu ŋku me,” menye le ye srɔ̃ ɖeɖeko ŋkume o. (Petro I, 3:3, 4; Kolosetɔwo 3:12) Ke ne srɔ̃aŋutsua menye xɔsetɔ o ɖe? Enye xɔsetɔ alo menye xɔsetɔ o, Ŋɔŋlɔawo de dzi ƒo na srɔ̃nyɔnuwo be “woalɔ̃ wo srɔ̃wo kple wo viwo, woanye ɖokuidziɖulawo, ame dzadzɛwo, aƒe me dɔwɔlawo, dɔmenyotɔwo, eye woabɔbɔ wo ɖokui na woa ŋutɔ wo srɔ̃wo, bena woagagblɔ busunya ɖe mawunya la ŋuti o.” (Tito 2:4, 5) Ne nya siwo ku ɖe dzitsinya ŋu do mo ɖa la, anɔ bɔbɔe na srɔ̃ŋutsu dzimaxɔsetɔ be wòade bubu srɔ̃anyɔnu ƒe didi ŋu wu ne egblɔe le “dɔmefafa kpakple [vɔvɔ̃]” me. Srɔ̃ŋutsu dzimaxɔsetɔ aɖewo srɔ̃wo ƒe “agbenɔnɔ nya aɖeke magblɔ la [ɖe] wo, esi wokpɔ [woƒe] agbenɔnɔ dzadzɛ le vɔvɔ̃ me ɖa la.”—Petro I, 3:1, 2, 15; Korintotɔwo I, 7:13-16.

19. Ke ne srɔ̃ŋutsu bia tso srɔ̃a si be wòada Mawu ƒe se dzi ɖe?

¹⁹ Ke ne srɔ̃ŋutsu bia tso srɔ̃a si be wòawɔ nusi nu Mawu de se ɖo ɖe? Ne edzɔ alea la, ele be nyɔnua naɖo ŋku edzi be Mawue nye yeƒe Dziɖula gãtɔ. Adze kpɔɖeŋu si apostoloawo ɖo ɖi esime dziɖuɖumegãwo bia tso wo si be woada Mawu ƒe se dzi la yome. Dɔwɔwɔwo 5:29 gblɔ be: “Ele be [míabu Mawu dziɖulae, NW] awu amewo.”

20. Nukae nye nu vevi aɖe si me lɔlɔ̃ kple sisiɖa hiã le vevie?

²⁰ Lɔlɔ̃ kple sisiɖa hiã le srɔ̃ɖeɖe ƒe akpa bubu hã me—le dzeɖoɖo me. Srɔ̃ŋutsu si lɔ̃a srɔ̃a aɖo dze kple nyɔnua le nyɔnua ƒe dɔwo, eƒe kuxiwo, kple eƒe susu le nya vovovowo ŋu la ŋuti. Nusia hiã nyɔnua. Srɔ̃ŋutsu si dia ɣeyiɣi tsɔ ɖoa dze kple srɔ̃a eye wòɖoa to nya si gblɔm wòle le nyateƒe me la ɖenɛ fiana be yelɔ̃e eye yedea bubu eŋu. (Yakobo 1:19) Nyɔnu aɖewo faa konyi be ɣeyiɣi kpui aɖe koe yewo srɔ̃wo tsɔna ɖoa dze kple yewo. Ewɔ nublanui. Nyateƒee, le vovomanɔanyi ɣeyiɣi siawo me la, ɖewohĩ srɔ̃ŋutsuwo awɔ dɔ gaƒoƒo geɖe le gbɔme, eye ganyawo ƒe sesẽ ana wo srɔ̃nyɔnuwo hã nanɔ dɔ wɔm. Gake ele be srɔ̃tɔwo naɖo ɣeyiɣi ɖi koŋ na wo nɔewo. Ne menye nenema o la, wo dometɔ ɖesiaɖe ava nɔ nu wɔm le eɖokui si. Kuxi sesẽwo ate ŋu atso eme ne wose le wo ɖokui me be ezu dzizizi na yewo be yewoadi ame aɖe si ase veve ɖe yewo ti le srɔ̃ɖeɖea godo.

21. Aleke nuƒoƒo si sɔ la ana dzidzɔ nanɔ srɔ̃ɖeɖe mee?

²¹ Alesi srɔ̃ŋutsuwo kple srɔ̃nyɔnuwo ƒoa nu na wo nɔewo le vevie. “Nya dzeto la . . . evivina na luʋɔ, eye wòyɔa dɔ ƒuwo.” (Lododowo 16:24) Ame srɔ̃ nye xɔsetɔ alo dzimaxɔsetɔ o, Biblia ƒe nuxlɔ̃amea ku ɖe wo ŋu, be: “Mina amenuveve kple dze nanɔ miaƒe nya me ɖaasi.” (Kolosetɔwo 4:6) Ne ŋkekea me sẽ na wo dometɔ aɖe la, nɔvia ƒe veveseseɖeamenunya ʋee aɖewo ate ŋu akpe ɖe eŋu geɖe ŋutɔ. “Nya, si wogblɔ ɖe egblɔɣi la, sikatɔtɔŋuti wònye le klosalogba me.” (Lododowo 25:11) Ame ƒe gbe ƒe ɖiɖime kple nya siwo woazã la tiatia le vevie. Le kpɔɖeŋu me, ame aɖe ate ŋu agblɔ na nɔvia le dziku kple dzizizimɔ nu be: “Tu ʋɔ ma la!” Gake aleke gbegbe ‘dze anɔ eme’ wui enye esi ne wogblɔ le tufafa kple nugɔmesese na ame nɔewo me be, “Meɖe kuku tu ʋɔa sea.”

22. Nɔnɔme kawoe hiã na srɔ̃tɔwo bene dzeɖoɖo nyui nanɔ wo dome?

²² Dzeɖoɖo nyui kpɔa dzidzedze ne wogblɔa nya kple gbe ɖɔɖɔe, eye amenuveve dze le ame ƒe ŋkume kpɔkpɔ kple ame ƒe ŋutinuwo ŋudɔwɔwɔ me, eye dɔmenyo, nugɔmesese, kple tufafa kpe ɖe eŋu. Ne srɔ̃ŋutsu kple srɔ̃nyɔnu dze agbagba be dzeɖoɖo nyui nanɔ yewo dome la, woate ŋu agblɔ woƒe nuhiahiãwo na wo nɔewo, eye woate ŋu anye akɔfafa kple kpekpeɖeŋu na wo nɔewo le dziɖeleameƒo kple nuteɖeamedziɣiwo. Mawu ƒe Nya la de dzi ƒo be: “Mifa akɔ na dzikatsoƒoetɔwo.” (Tesalonikatɔwo I, 5:14) Ɣeaɖewoɣi dzi aɖe le srɔ̃ŋutsua ƒo eye wòaɖe le srɔ̃nyɔnua hã ƒo ɣebubuɣiwo. Woate ŋu ‘aƒo nu akɔfafatɔe’ atsɔ atu wo nɔewo ɖo.—Romatɔwo 15:2.

23, 24. Aleke lɔlɔ̃ kple bubu akpe ɖe wo ŋui ne masɔmasɔwo do mo ɖa? Gblɔ eƒe kpɔɖeŋu aɖe.

²³ Srɔ̃tɔ siwo me lɔlɔ̃ kple bubu le na wo nɔewo la mabu nusianu si me womelɔ̃ ɖe nu ɖeka dzi le o la nya gãe o. Woadze agbagba vevie be yewomagado ‘dziku helĩhelĩ’ ɖe yewo nɔewo ŋu o. (Kolosetɔwo 3:19) Ele be wo ame evea naɖo ŋku edzi be “nyaŋuɖoɖo fafɛ tsia dziku nu.” (Lododowo 15:1) Kpɔ nyuie be màgada srɔ̃wò ɖe anyi ne egblɔ eƒe dzimenyawo na wò alo nàbu fɔe o. Bu nya siawo be wonye mɔnukpɔkpɔ na ye be yease eƒe nukpɔsusu gɔme nyuie boŋ. Mi ame evea midze agbagba miaƒo nu tso nya siwo me miaƒe susu to vovo le ŋu bene miakpɔ ta na wo le ɖekawɔwɔ me.

²⁴ Miɖo ŋku ɣeyiɣi si me Sara ɖo aɖaŋu aɖe na srɔ̃aŋutsu, Abraham, si mewɔ ɖeka kple eƒe seselelãmewo o dzi. Gake Mawu gblɔ na Abraham be: “Ðo to Sara.” (Mose I, 21:9-12) Abraham wɔ ɖe edzi, eye woyrae. Nenema ke ne srɔ̃nyɔnu do susu aɖe ɖa si to vovo na srɔ̃a ƒe susu la, ele be ŋutsua naɖo to asee ya teti. Le ɣeyiɣi ma ke me la, mele be srɔ̃nyɔnua naxɔ nya la katã azu eɖokui tɔe o ke boŋ ele be wòaɖo to ase nya si le srɔ̃a si. (Lododowo 25:24) Enye amemalɔ̃malɔ̃ kple bubumademadeameŋu be ŋutsua alo nyɔnua nadi be ɣesiaɣi yeƒe lɔlɔ̃nu koe woawɔ.

25. Aleke dzeɖoɖo nyui ana dzidzɔ nanɔ srɔ̃ɖeɖe me ƒomedodo kplikplikplitɔwo mee?

²⁵ Dzeɖoɖo nyui hiã le srɔ̃tɔwo ƒe gbɔdɔdɔ gome hã. Ðokuitɔdidi kple ɖokuidzimaɖumaɖu ate ŋu agblẽ nu le srɔ̃ɖeɖe me ƒomedodo kplikplikplitɔ sia ŋu vevie. Numeɖeɖe nanekemaɣlamaɣlae, tsɔ kpe ɖe dzigbɔɖi ŋu, le vevie. Ne wo dometɔ ɖesiaɖe di nɔvia ƒe nyonyo ɖokuitɔmadimaditɔe la, ƒã hafi gbɔdɔdɔ azu nya sesẽ. Le nya sia kple bubuwo me la, “ame aɖeke nagadi ye ŋutɔ tɔ o, ke nusi nye ame bubu tɔ la boŋ.”—Korintotɔwo I, 7:3-5; 10:24.

26. Togbɔ be dzidzɔ kple kuxiwo anɔ srɔ̃ɖeɖe ɖesiaɖe me hã la, aleke Mawu ƒe Nya la dziwɔwɔ akpe ɖe srɔ̃tɔwo ŋui be woakpɔ dzidzɔ?

²⁶ Aɖaŋu nyui kawoe nye si Mawu ƒe Nya la ɖona! Nyateƒee, ɣeyiɣi nyuiwo kple ɣeyiɣi vɔ̃wo anɔ srɔ̃ɖeɖe ɖesiaɖe me. Gake ne srɔ̃tɔwo bɔbɔ wo ɖokui ɖe Yehowa ƒe tamesusu te abe alesi wòdze le Biblia me ene, eye wotu ƒomedodo si le wo dome ɖe gɔmeɖose ƒe lɔlɔ̃ kple bubu dzi la, woate ŋu aka ɖe edzi be yewoƒe srɔ̃ɖeɖea anɔ anyi adidi eye dzidzɔ anɔ eme. Esia wɔwɔ ana be menye wo nɔewo ŋu koe woade bubui o ke boŋ woadee Yehowa Mawu, srɔ̃ɖeɖe Gɔmeɖoanyila la, hã ŋu.