Fiaɖuƒe Ŋuti Nya 35 Lia

Ðe Amewo Katã Ava Lɔ̃ Wo Nɔewo Gbaɖegbea?

Havilɔlɔ̃ Megabɔ O

MƆKPƆKPƆ bu ɖe ame miliɔn geɖe, wolé blanui, eye womenya afisi woada ta ɖo o. Nyɔnu dɔdzikpɔlagã aɖe si xɔ dzudzu le dɔ me gblɔ be: ‘Gbeɖeka fiẽ la, ahosi aɖe si mía kplii míenɔ dziƒoxɔ dzisasrã ɖeka dzi va ƒo ʋɔ nam be yetsi akogo. Metsɔ gbe ɖɔɖɔe gblɔ nɛ kaŋ be vovo mele ŋunye o. Eɖe kuku be yeva ɖe fu nam eye wòtrɔ dzo.’

Ewɔ nublanui ŋutɔ be zã ma ke me koe ahosi la wu eɖokui. Emegbe nyɔnu dɔdzikpɔlagã la gblɔ be yesrɔ̃ “nu gã aɖe tso eme.”

Zi geɖe la, afɔkue dona tsoa havimalɔ̃malɔ̃ me. Esime aʋa dzɔ ɖe gbevovovodola siwo le Bosnia kple Herzegovina, siwo nye Yugoslavia ƒe akpa aɖe tsã dome la, wonyã ame miliɔn ɖeka kple edzivɔ de gbe hewu ame akpe geɖe. Amekawoe wu wo? Nyɔnuvi aɖe si wonyã le wo de fa konyi be: “Míaƒe aƒelikawoe. Míedze si wo.”

Wowu ame akpe alafa geɖe le Rwanda, eye zi geɖe la woa ŋutɔwo ƒe aƒelikawoe wu wo. The New York Times ka nya ta be: “Tsã la, Hututɔwo kple Tutsitɔwo [nɔ] anyi ɖekae, woɖea wo nɔewo, eye wometsi dzi ɖe ame ƒe Hututɔ alo Tutsitɔ nyenye ŋu alo nya gɔ̃ hã o. Kasia ko nya aɖe va dzɔ kpata” eye “wode asi wo nɔewo wuwu me.”

Nenema ke Yudatɔ kple Arabiatɔ siwo le Israel la li kple wo nɔewo ɖekae, gake wo dometɔ geɖe lé fu wo nɔewo. Nenema ke wòle le Katolikotɔ kple Protestanttɔ geɖe siwo le Ireland kple amesiwo le dzidzim ɖe edzi le dukɔ bubuwo me hã gomee. Lɔlɔ̃ nu metsi alea gbegbe le ŋutinya me kpɔ le xexeame o.

Nukatae Havilɔlɔ̃ Megabɔ O?

Mía Wɔla la ɖo eŋu. Eƒe Nya, Biblia, yɔ ɣeyiɣi si me míele la be “ŋkeke mamlɛawo.” Ɣeyiɣi si me Biblia ƒe nyagblɔɖi gblɔ be amewo ‘malɔ̃ wo nɔewo o’ lae nye sia. Yesu Kristo gblɔ ɖi le ‘ɣeyiɣi vɔ̃ siawo siwo me nɔnɔ sesẽ’ si wogayɔ le Ŋɔŋlɔawo me be “xexeame ƒe nuwuwu” ŋu be “ame geɖewo ƒe lɔlɔ̃ nu latsi.”—Timoteo II, 3:1-5; Mateo 24:3, 12.

Nɔvisimalémalé si le xexeame egbea nye nusiwo ɖo kpe edzi be míele xexe sia ƒe ŋkeke mamlɛawo me la dometɔ ɖeka. Gake dzidzɔtɔe la, egafia hã be eteƒe madidi o xexe yeye si me lɔlɔ̃ axɔ aƒe ɖo la ava xɔ ɖe ame mavɔ̃mawuwo ƒe xexe sia teƒe.—Mateo 24:3-14; Petro II, 2:5; 3:7, 13.

Gake ɖe nane li si dzi míanɔ te ɖo axɔe ase be tɔtrɔ sia ate ŋu ava nyateƒe—be amewo katã nasrɔ̃ alesi woalɔ̃ wo nɔewo eye woanɔ anyi ɖekae le ŋutifafa me kple wo nɔewoa?

Havilɔlɔ̃—Eli Nàte Ŋu Akpɔ

Ƒe Alafa Gbãtɔ me senyala aɖe bia Yesu be: “Amekae nye hanyevi mahã?” Ðikeke mele eme o be enɔ mɔ kpɔm be Yesu naɖo eŋu na ye be, ‘Mia tɔ Yudatɔwoe.’ Gake Yesu gblɔ ŋutinya aɖe tso Samariatɔ havilɔ̃la aɖe ŋu tsɔ ɖee fia be mía haviwoe dukɔ bubu me tɔwo hã nye.—Luka 10:29-37; Yohanes 4:7-9.

Yesu te gbe ɖe edzi be le lɔlɔ̃ na Mawu megbe la, havilɔlɔ̃e nye nusi wòle be wòagakpɔ ŋusẽ ɖe míaƒe agbenɔnɔ dzi. (Mateo 22:34-40) Gake ɖe amewo ƒe hatsotso aɖe nɔ anyi si me tɔwo lɔ̃ wo haviwo ŋutɔŋutɔ kpɔa? Kristotɔ gbãtɔwo lɔ̃ wo nɔewo! Wonya wo nyuie be ɖe wolɔ̃na na ame.—Yohanes 13:34, 35.

Ke egbea hã ɖe? Ðe ame aɖewo li siwo ɖea lɔlɔ̃ si ɖi Kristo tɔ fianaa? Encyclopedia Canadiana gblɔ be: “Dɔ si wɔm Yehowa Ðasefowo le nye agbegbɔgbɔ blema Kristotɔnyenye si nu Yesu kple eƒe nusrɔ̃lawo nɔ agbe ɖo kple egbugbɔgaɖoanyi . . . Nɔviwoe wo katã wonye.”

Nukae nya sia fia? Efia be Yehowa Ðasefowo meɖea mɔ naneke—ŋutigbalẽ ƒe amadede, dukɔmevinyenye loo alo gbegbɔgblɔ—naa woléa fu wo haviwo wo o. Eye womawu ame aɖeke hã o, elabena le kpɔɖeŋunyagbɔgblɔ nu la, wotsɔ woƒe yiwo tu kodziwoe eye wotsɔ woƒe akplɔwo tu hɛ gobɛwoe. (Yesaya 2:4) Le nyateƒe me la, wonya Ðasefowo nyuie be wotsoa woƒe dzi me faa kpena ɖe wo haviwo ŋu.—Galatiatɔwo 6:10.

Eyata mewɔ nuku o be California-nyadzɔdzɔgbalẽ Sacramento Union me nyati aɖe gblɔ be: “Esɔ gbɔ be míagblɔ be ne xexeame katã nɔ agbe ɖe Yehowa Ðasefowo ƒe dzixɔsewo nu la, ke ʋukɔkɔɖi kple fuléle nu ayi, eye lɔlɔ̃e axɔ aƒe ɖi.” Hungarytɔwo ƒe magazine si nye Ring ŋlɔla aɖe gblɔ be: “Meva kpɔe dze sii be ne Yehowa Ðasefowo ɖeɖee le anyigba dzi la, ne aʋawɔwɔ megali o, eye dɔ si kpovitɔwo akpɔ anɔ wɔwɔm koe nye mɔfiafia ʋuwo kple mɔzɔgbalẽviwo nana.”

Gake enye nyateƒe matrɔmatrɔ be ne amewo katã alé nɔvisi la, ke ele be tɔtrɔ gã aɖe nava xexeame katã. Aleke tɔtrɔ ma awɔ ava? (Taflatse kpɔ axa mamlɛa.)

Ɣeyiɣi Si Me Amewo Katã Alɔ̃ Wo Nɔewo

Gbedodoɖa aɖe si Yesu Kristo fia la ɖee fia be tɔtrɔ gã aɖe tu aƒe vɔ. Yesu fia mí le eƒe Todzimawunya xɔŋkɔa me be míado gbe ɖa be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!”—Mateo 6:10.

Nukae nye Mawu ƒe Fiaɖuƒea? Enye dziɖuɖu ŋutɔŋutɔ si aɖu dzi tso dziƒo. Ema tae woyɔe be “dziƒofiaɖuƒe.” Yesu, “Ŋutifafafia” lae Fofoa ɖo be wòanye eƒe dziɖula.—Mateo 10:7; Yesaya 9:5, 6; Psalmo 72:1-8.

Ne Mawu ƒe Fiaɖuƒea va la, nukae adzɔ ɖe xexe sia si me fuléle xɔ aƒe ɖo la dzi? ‘Fiaɖuƒe la agbã’ xexe sia me dziɖuɖu gblẽkuwo katã, “eye wòagblẽ wo.” (Daniel 2:44) Biblia ɖe nu me be: “Xexeame va yina . . . ; ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.”—Yohanes I, 2:17.

Biblia gblɔ le Mawu ƒe xexeme yeyea ŋu be: “Ame dzɔdzɔewo anyi anyigba la dome, eye woanɔ edzi tegbee.” (Psalmo 37:9-11, 29; Lododowo 2:21, 22) Ɣeyiɣi nyui ka gbegbee nye si wòanye! “Ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o.” (Nyaɖeɖefia 21:4) Kukuawo ke hã agagbɔ agbe, eye woatrɔ anyigba bliboa katã wòazu paradiso ŋutɔŋutɔ.—Yesaya 11:6-9; 35:1, 2; Luka 23:43; Dɔwɔwɔwo 24:15.

Hafi míanɔ Mawu ƒe xexe yeye ma me la, ele be míalɔ̃ mía nɔewo, abe alesi Mawu fia míi ene. (Tesalonikatɔwo I, 4:9) Biblia-nusrɔ̃vi aɖe si tso Ɣedzeƒedukɔ aɖe me gblɔ be: “Abe alesi Biblia do ŋugbee ene la, mele mɔ kpɔm na ɣeyiɣi si me amewo katã anya alesi woalé nɔvisii.” Eye míate ŋu aka ɖe edzi be Mawu awɔ ɖe eƒe ŋugbedodowo dzi! Egblɔ be: “Megblɔ nya . . . eye mawɔe hã.”—Yesaya 46:11.

Gake hafi nàkpɔ yayrawo le Mawu ƒe Fiaɖuƒea te la, ele be Biblia me sidzedze nasu asiwò, abe alesi wòle dzi anukwaretɔ miliɔn geɖe siwo le xexeame godoo si sumee ene. (Yohanes 17:3) Axa 32-gbalẽ gbadza si nye Nukae Mawu Di tso Mía Si? akpe ɖe ŋuwò. Ne èkpe nudɔgbalẽvi si le axa si do ŋgɔ la ɖo heɖoe ɖe dɔwɔƒe si tsɔ ɖe gbɔwò wu la, ɖe ate ŋu aka asiwò.

□ Madi be miaɖo agbalẽ gbadza si nye Nukae Mawu Di tso Mía Si? la ɖem.

□ Taflatse miva wɔ aƒeme Biblia nusɔsrɔ̃ femaxee kplim.

[Nɔnɔmetata Tsoƒe si le axa 2]

Tudamela kple kunuwɔwɔ le Bosnia: Reuters/Corbis-Bettmann