Luʋɔ Ŋuti Nyateƒea Nyanya Le Vevie
“Miadze si nyateƒe la, eye nyateƒe la lawɔ mi ablɔɖeviwoe.”—YOHANES 8:32.
1. Nukata wòle vevie be míadzro luʋɔ kple ku ŋuti dzixɔse siwo le mía si me?
SUBƆSUBƆHA kple nuto si me amewo nɔ koŋue kpɔa ŋusẽ ɖe woƒe dzixɔse le Agbenɔnɔ le Ku Megbe ŋu dzi. Abe alesi míekpɔe ene la, dzixɔseawo le vovovo eye ɖewoe nye be luʋɔa ɖoa eƒe taɖodzinu mamlɛtɔ gbɔ le gbugbɔgadzɔ gbogbo aɖewo megbe kple dzixɔse si nye be ame ƒe nuwɔna le eƒe agbenɔnɔ ɖeka mee fiaa nusi ava dzɔ ɖe amea dzi mlɔeba. Eyata ame aɖe aka ɖe edzi be ne yeku la, yeava wɔ ɖeka kple ŋusẽ kɔkɔtɔ, ame bubu agblɔ be yeaɖo Nirvana, eye ame bubu hã agblɔ be yeaxɔ teƒeɖoɖo le dziƒo. Ekema kae nye nyateƒea? Esi míaƒe dzixɔsewo kpɔa ŋusẽ ɖe míaƒe nɔnɔme, nuwɔnawo, kple nyametsotsowo dzi ta la, ɖe mele be míadi vevie be míakpɔ ŋuɖoɖo na biabia ma oa?
2, 3. (a) Nukata míate ŋu aka ɖe nya si Biblia gblɔ le luʋɔ ŋu dzi? (b) Abe alesi wogblɔe le Biblia me ene la, nukae nye nyateƒea le luʋɔ ŋu?
2 Biblia si nye agbalẽ xoxotɔ kekeake le xexeame la ƒo nu tso amegbetɔ ƒe ŋutinya si tso keke amegbetɔ si nye luʋɔ gbãtɔ la wɔɣi ke ŋu. Xexemenunya kple amewo ƒe kɔnyinyiwo mele eƒe nufiafiawo me o. Biblia gblɔ nyateƒe si ku ɖe luʋɔ ŋu eme kɔ: Wò luʋɔe nye wò ŋutɔ, ame kukuwo mele agbe le mɔ aɖeke nu o, eye Mawu afɔ amesiwo le eƒe susu me ɖe tsitre le ye ŋutɔ ƒe ɣeyiɣi dzi. Nukae nusiawo nyanya ate ŋu afia na wò?
3 Yesu Kristo gblɔ na eyomedzelawo be: “Miadze si nyateƒe la, eye nyateƒe la lawɔ mi ablɔɖeviwoe.” (Yohanes 8:32) Ẽ, nyateƒea naa ablɔɖe ame. Gake nuka mee nyateƒe si ku ɖe luʋɔ ŋu ana ablɔɖe mí tsoe?
Ablɔɖekpɔkpɔ tso Vɔvɔ̃ Kple Mɔkpɔkpɔbuɖeame Me
4, 5. (a) Vɔvɔ̃ kae nyateƒe si ku ɖe luʋɔ ŋu ɖena ɖa? (b) Aleke tsitretsitsi mɔkpɔkpɔa na dzideƒo ƒewuivi aɖe si dze dɔ si va wui mlɔeba?
4 The World Book Encyclopedia gblɔ be: “Ame akpa gãtɔ vɔ̃na na ku eye wodzea agbagba be yewoaɖee ɖa le susu me.” Ŋutinyaŋlɔla aɖe gblɔ be: “Nya ‘ku’ va zu nusi womegayɔna o kloe le Ɣetoɖoƒedukɔwo me.” Eye le nuto aɖewo me la, wozãa nyagbɔgblɔwo abe “etrɔ megbe” kple “megali o” zi geɖe tsɔ gblɔa ame ƒe kui. Vɔvɔ̃ na ku alea nye vɔvɔ̃ na nusi womenya o, elabena le ame akpa gãtɔ gome la, nya ɣaɣlae ku nye. Sidzedze nyateƒe si ku ɖe nusi dzɔna ne míeku ŋu na míevona tsoa vɔvɔ̃ sia me.
5 Le kpɔɖeŋu me, bu nusi nɔ susu me na Michaelyn si xɔ ƒe 15 la ŋu kpɔ. Edze ʋumenugbagbeviɣidɔ eye wòdze ŋgɔ ku nublanuitɔe. Dadaa si ŋkɔe nye Paula ɖo ŋku nya sia dzi be: “Michaelyn gblɔ be meɖe fu na ye be yeaku o elabena yenya be ɣeyiɣi kpui aɖe ƒe nu koe ku nye. Míeƒo nu geɖe tso Mawu ƒe xexe yeyea kple amesiwo katã woafɔ ɖe tsitre ŋu. Xɔse sesẽ aɖe le Michaelyn si na Yehowa Mawu eye exɔ tsitretsitsia hã dzi se vevie—ɖikeke aɖeke menɔ eme o.” Tsitretsitsi mɔkpɔkpɔa na nyɔnuvi dzideƒotɔ sia vo tso ku ƒe ŋɔdzidoname me.
6, 7. Mɔkpɔkpɔbuɖeame ka mee nyateƒe si ku ɖe luʋɔ ŋu naa ablɔɖe mí tsoe? Gblɔ eƒe kpɔɖeŋu.
6 Ŋusẽ kae nyateƒea kpɔ ɖe Michaelyn dzilawo dzi? Fofoa si ŋkɔe nye Jeff gblɔ be: “Mía vinyɔnuvia ƒe kue nye nusi do nuxaxa na mí wu nu bubu ɖesiaɖe si dzɔ ɖe mía dzi kpɔ. Gake míeɖoa ŋu ɖe Yehowa ƒe tsitretsitsi ŋugbedodoa ŋu, eye míele mɔ kpɔm na ŋkeke si dzi míagawɔ atuu na míaƒe lɔlɔ̃tɔ Michaelyn ake. Ðekawɔwɔ dodzidzɔname kae nye si wòanye!”
7 Ẽ, luʋɔ ŋuti nyateƒea na ame vona tsoa mɔkpɔkpɔbuɖeame si lɔlɔ̃tɔ aɖe ƒe ku ahe vɛ me. Naneke mate ŋu aɖe vevesese kple nuxaxa si lɔlɔ̃tɔ ƒe ku dona na ame ɖa keŋkeŋ ya o. Gake tsitretsitsi mɔkpɔkpɔa ɖea konyifafa dzi kpɔtɔna eye wòna míete ŋu nɔa te ɖe vevesesea nu bɔbɔe wu.
8, 9. Vɔvɔ̃ ka mee nyateƒe si ku ɖe nɔnɔme si me ame kukuwo le ŋu naa ablɔɖe mí tsoe?
8 Ŋɔŋlɔawo me nyateƒe si ku ɖe nɔnɔme si me ame kukuwo le ŋu naa ablɔɖe mí tso vɔvɔ̃ na ame kukuwo hã me. Esi ame geɖe siwo ame kukuwo ŋuti aʋatsodzixɔse ƒe kɔnuwo ɖe aboyoe tsã va srɔ̃ nyateƒe sia la, womegatsia dzi ɖe fiƒoƒodeame, afakadzesiwo, atiblɛwo, kple trɔ̃wo ŋu o, eye womegagblẽa ga ɖe vɔsasa ŋu be woatsɔ alé avu tɔgbui kukuwo bene woagatrɔ ava wɔ fu ame gbagbewo hã o. Le nyateƒe me la, esi “kukuawo menya naneke o” ta la, nusiawo wɔwɔ meɖea vi aɖeke o.—Nyagblɔla 9:5.
9 Nyateƒe wònye be luʋɔ ŋuti nyateƒe si le Biblia me la naa ablɔɖe ame eye kakaɖedzi le eŋu. Gake bu mɔkpɔkpɔ tɔxɛ aɖe si Biblia tsɔ ɖo ŋkuwòme ŋu kpɔ.
[Nɔnɔmetata si le axa 29]
Nyateƒe si ku ɖe luʋɔ ŋu na nèvona tsoa vɔvɔ̃ na ku, vɔvɔ̃ na ame kukuwo, kple mɔkpɔkpɔbuɖeame si lɔlɔ̃tɔ ƒe ku hena vɛ me