Ta Wuietɔ̃lia
Xɔname Kple Dzidzɔkpɔkpɔ le Mesia ƒe Dziɖuɖua Te
1. Ƒo nu tso gbɔgbɔmenɔnɔme si me dukɔ si Mawu bla nu kpli nɔ le Yesaya ƒe ŋkekeawo me ŋu.
MAWU ƒe dukɔ si wòbla nu kpli la nɔ gbɔgbɔmenɔnɔme gbegblẽ aɖe me le Yesaya ƒe ŋkekeawo me. Le fia wɔnuteƒewo abe Uziya kple Yotam ene ƒe fiaɖuɣi gɔ̃ hã la, dukɔa me tɔ geɖe de ta agu le nuxeƒewo. (Fiawo II, 15:1-4, 34, 35; Kronika II, 26:1, 4) Esime Xizkiya va zu fia la, eva hiã be wòaɖe Baal-subɔsubɔ me nuzazãwo kple nuwɔnawo ɖa le anyigba la dzi. (Kronika II, 31:1) Eyata mewɔ nuku o be Yehowa de dzi ƒo na eƒe amewo be woatrɔ va ye gbɔ eye wòna wonya tohehe si woaxɔ!
2, 3. Aleke Yehowa dea dzi ƒo na amesiwo dina be yewoasubɔe togbɔ be nuteƒemawɔmawɔ bɔ hã?
2 Gake menye ameawo katãe nye aglãdzela vɔ̃ɖiwo o. Nyagblɔɖila nuteƒewɔlawo nɔ Yehowa si, eye anɔ eme be Yudatɔ aɖewo ɖo to wo. Nya fakɔname aɖe le Yehowa si na amesiawo. Esi nyagblɔɖila Yesaya ƒo nu tso alesi woagblẽ nu le Yuda ŋu ŋɔdzitɔe le Asiriatɔwo ƒe amedzidzedzea me ŋu vɔ la, gbɔgbɔ ʋãe wòŋlɔ nya siwo vivi wu le Biblia bliboa katã me la dometɔ ɖeka tsɔ ƒo nu tso yayra siwo ava le Mesia ƒe dziɖuɖu te ŋu.a Yayra siawo ƒe akpa aɖewo va eme le mɔ sue aɖe nu esime Yudatɔwo trɔ gbɔ tso aboyo me le Babilon. Gake nyagblɔɖi bliboa le eme vam le mɔ si lolo wu nu egbea. Enye nyateƒe be Yesaya kple Yudatɔ nuteƒewɔla bubuwo menɔ agbe kpɔ yayra siawo teƒe ya o. Gake wotsɔ xɔse kpɔ mɔ na yayra mawo eye woakpɔ alesi Yesaya ƒe nyawo va emee ne wofɔ wo ɖe tsitre.—Hebritɔwo 11:35.
3 Yehowa ƒe ame siwo li egbea hã hiã dzideƒoname. Agbenyuinɔnɔ si le gbegblẽm ɖe edzi kabakaba le xexeame, tsitretsitsi ɖe Fiaɖuƒegbedasia ŋu vɔ̃ɖitɔe, kple ame ŋutɔ ƒe gbɔdzɔgbɔdzɔwo nye kuxi na wo katã. Nya lédziname siwo Yesaya ŋlɔ le Mesia la kple eƒe fiaɖuɖu ŋu ate ŋu ado ŋusẽ Mawu ƒe amewo ahakpe ɖe wo ŋu be woanɔ te ɖe kuxi siawo nu.
Mesia—Enye Kplɔla Vavã Aɖe
4, 5. Nya kae Yesaya gblɔ ɖi le Mesia la ƒe vava ŋu, eye aleke Mateo zã Yesaya ƒe nyaawo wòdze ƒãe?
4 Ƒe alafa geɖe do ŋgɔ na Yesaya ƒe ɣeyiɣia la, Hebritɔ Biblia ŋlɔla bubuwo hã ƒo nu tso Mesia, si nye Kplɔla vavãtɔ si Yehowa adɔ ɖo ɖe Israel la ƒe vava ŋu. (Mose I, 49:10; Mose V, 18:18; Psalmo 118:22, 26) Fifia Yehowa to Yesaya dzi gagblɔ eŋuti nya bubuwo. Yesaya ŋlɔ bena: “Atilɔ amie tso Isai ƒe atitakpo me, eye dzedze atso eƒe ke me atse ku.” (Yesaya 11:1; tsɔe sɔ kple Psalmo 132:11.) “Atilɔ” kple ‘atidzedze’ siaa fia be Mesia la anye Isai ƒe dzidzimevi to via Dawid, amesi wosi ami ŋutɔŋutɔ na wòzu Israel-fia la dzi. (Samuel I, 16:13; Yeremya 23:5; Nyaɖeɖefia 22:16) Ne Mesia vavã la do la, “atilɔ” sia si tso Dawid ƒeme la atse ku nyuiwo.
5 Yesue nye Mesia si ŋugbe wodo. Nyanyuiŋlɔla Mateo ƒo nu wòku ɖe nya siwo le Yesaya 11:1 ŋu esime wògblɔ be Yesu “Nazaretetɔ” la na nyagblɔɖilawo ƒe nyawo va eme. Le esi wonyi Yesu le Nazaret ta la, woyɔe be Nazaretetɔ, si nye ŋkɔ si edze abe edo ƒome kple Hebrigbe me nya si wozã na ‘atidzedze’ le Yesaya 11:1 ene.b—Mateo 2:23, NW ƒe etenuŋɔŋlɔ; Luka 2:39, 40.
6. Fia ka tɔgbe ye wogblɔ ɖi be Mesia la anye?
6 Dziɖula ka ƒomevie Mesia la anye? Ðe wòanɔ abe Asiria-fia ŋutasẽla si wɔa nusianu si dzea eŋu, amesi tsrɔ̃ Israel-dziehefiaɖuƒe la enea? Kura o. Yesaya gblɔ le Mesia la ŋu be: “Yehowa ƒe gbɔgbɔ, si nye nunya kple gɔmesese ƒe gbɔgbɔ, adaŋudede kple ŋusẽ ƒe gbɔgbɔ, sidzedze kple Yehowa vɔvɔ̃ ƒe gbɔgbɔ la, anɔ edzi. Yehowa vɔvɔ̃ ƒe nu anyo eŋu.” (Yesaya 11:2, 3a) Menye ami ŋutɔŋutɔe wokɔ ɖe Mesia la ƒe tame o, ke boŋ Mawu ƒe gbɔgbɔ kɔkɔe ye. Esia dzɔ le Yesu ƒe nyɔnyrɔxɔɣi, esime Yohanes Amenyrɔɖetsimela kpɔ Mawu ƒe gbɔgbɔ kɔkɔe wòɖi ɖe Yesu dzi abe akpakpa ene. (Luka 3:22) Yehowa ƒe gbɔgbɔ ‘nɔ Yesu dzi,’ eye eɖe esia fia esime wòwɔ nu le nunya, gɔmesese, adaŋudede, ŋusẽ, kple sidzedze me. Nɔnɔme nyui kawo gbegbee nye si le fia la si!
7. Ŋugbe kae Yesu do na eyomedzela nuteƒewɔlawo?
7 Yesu yomedzelawo hã ate ŋu axɔ gbɔgbɔ kɔkɔe. Yesu gblɔ le eƒe nuƒo aɖe me be: “Azɔ mi amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana Gbɔgbɔ kɔkɔe amesiwo bianɛ la o mahã?” (Luka 11:13) Eyata mele be míahe ɖe megbe gbeɖe le Mawu ƒe gbɔgbɔ kɔkɔe biabia me loo alo adzudzɔ eƒe kutsetse nyuiawo tutuɖo o—woawoe nye “lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, anukwaretɔnyenye, dɔmefafa, ɖokuidziɖuɖu.” (Galatiatɔwo 5:22, 23) Yehowa do ŋugbe be yeaɖo gbe si Yesu yomedzelawo ado ɖa abia “nunya, si tso dziƒo” la ŋu be wòakpe ɖe wo ŋu woanɔ te ɖe agbemekuxiwo nu dzidzedzetɔe.—Yakobo 1:5; 3:17.
8. Aleke Yehowa vɔvɔ̃ ƒe nu nyoa Yesu ŋui?
8 Nukae nye Yehowa vɔvɔ̃ si Mesia la ɖena fiana? Edze ƒã be menye ɖe ŋɔdzi léa Yesu le Mawu ŋu, eye wòvɔ̃na na eƒe fɔbuame o. Ke boŋ Mesia la sia Mawu ɖa etɔxɛe, eye mawusubɔsubɔ me bubu si me lɔlɔ̃ le le esi nɛ. Abe Yesu ene la, amesi nye mawuvɔ̃la dina ɣesiaɣi be ‘yeawɔ nusi dzea eŋu.’ (Yohanes 8:29) Yesu to eƒe nuƒoƒo kple kpɔɖeŋu me fia nu be zɔzɔ le Yehowa vɔvɔ̃ nyuitɔ me gbesiagbe na wokpɔa dzidzɔ si ƒo ɖesiaɖe ta.
Ʋɔnudrɔ̃la Dzɔdzɔe si Nye Nublanuikpɔla
9. Kpɔɖeŋu kae Yesu ɖo ɖi na amesiwo wode dɔ asi na be woadrɔ̃ nya le Kristo-hamea me?
9 Yesaya gagblɔ nya bubuwo ɖi le Mesia la ƒe nɔnɔmewo ŋu: “Madrɔ̃ ʋɔnu ɖe nusi eƒe ŋku le kpɔkpɔm la nu o, eye matso afia ɖe nusi eƒe to le sesem la nu o.” (Yesaya 11:3b) Ðe madzɔ dzi na wò be ʋɔnudrɔ̃la sia tɔgbe nadrɔ̃ nya na wò le ʋɔnudrɔ̃ƒe oa? Aʋatsonyawo, ayemenuwɔwɔ le ʋɔnudrɔ̃ƒe, nyasegblɔwo, alo gotagomenuwo abe gakpɔkpɔ ene meflua Mesia si nye ameƒomea katã ƒe Ʋɔnudrɔ̃la la o. Ete ŋu nyaa amebeble hekpɔa gotagome dzedzeme manyomanyowo, eye wòdea dzesi “dzime ƒe ame ɣaɣla,” “nusi amea nye le ememe.” (Petro I, 3:4, NW ƒe etenuŋɔŋlɔ) Yesu ƒe kpɔɖeŋu nyui la nye nusi amesiwo katã si wobiana tsoe le Kristo-hamea me be woadrɔ̃ nya la ate ŋu asrɔ̃.—Korintotɔwo I, 6:1-4.
10, 11. (a) Aleke Yesu ɖɔa eyomedzelawo ɖoe? (b) Afia kae Yesu atso na ame vɔ̃ɖiwo?
10 Ŋusẽ kae Mesia la ƒe nɔnɔme nyuia akpɔ ɖe eƒe afiatsotsowo dzi? Yesaya ɖe eme be: “Adrɔ̃ ʋɔnu na ame dahewo le dzɔdzɔenyenye me, eye wòatso afia na anyigba dzi hiãtɔwo ɖe eteƒe; atsɔ eƒe nu me tikplɔ aƒo ŋutasẽla la, eye wòatsɔ eƒe nu me gbɔgbɔ awu ame vɔ̃ɖi lae. Dzɔdzɔenyenye anye alidziblanu le eƒe ali, eye nyateƒe anye alidziblanu le eƒe aklito.”—Yesaya 11:4, 5.
11 Ne Yesu yomedzelawo hiã na ɖɔɖɔɖo la, eɖɔa wo ɖo le mɔ si ɖea vi na wo wu nu—enye kpɔɖeŋu nyui aɖe na Kristotɔ hamemegãwo. Gake amesiwo tsɔ nuvɔ̃ɖiwɔwɔ ɖo dɔe ate ŋu akpɔ mɔ be afia si woatso na yewo nu asẽ. Ne wòɖo edzi be Mawu nabia akɔnta nuɖoanyi sia la, Mesia la atsɔ eƒe gbe sesẽ la ‘aƒo dukɔwo,’ eye wòatso afia si anye tsɔtsrɔ̃ na ame vɔ̃ɖiwo katã. (Psalmo 2:9; tsɔe sɔ kple Nyaɖeɖefia 19:15.) Mlɔeba la, ame vɔ̃ɖi aɖeke makpɔtɔ agblẽ ameƒomea ƒe ŋutifafa me o. (Psalmo 37:10, 11) Ŋusẽ le Yesu, amesi dzɔdzɔenyenye kple nuteƒewɔwɔ nye alidziblanu le aklito kple ali na la si be wòawɔ esia.—Psalmo 45:4-8.
Alesi Nɔnɔmewo Atrɔe le Anyigba Dzi
12. Nukawo ŋue Yudatɔ ate ŋu atsi dzi ɖo ne ebu alesi wòatrɔ tso Babilon ayi Ŋugbedodonyigbaa dzi ŋu?
12 Kpɔ Israel-vi si see teti be Kores de se be Yudatɔwo natrɔ yi Yerusalem eye woagbugbɔ gbedoxɔa atu la ɖa le susu me. Ðe wòadzo le Babilon si dedienɔnɔ le ahazɔ mɔ didi ma ayi wo dea? Le ƒe 70 siwo Israel-viwo menɔ anyigbaa dzi o me la, gbe to ɖe agble siwo wogblẽ ɖi la me fũ. Fifia amegãxiwo, lãklewo, dzatawo, kple sisiblisiwo tsana le agble mawo me faa. Ƒliwo hã tsɔ afima wɔ wo nɔƒee. Aƒemelãwo ŋu koŋue Yudatɔ siwo atrɔ agbɔ la anɔ agbe ɖo—alẽhawo kple nyihawo mee woakpɔ notsi, lãfu, kple lã le, eye nyitsuwoe aŋlɔ agble na wo. Ðe lã lénuwo alé lã siawoa? Ðe dawo aɖu ɖevi suewoa? Ke afɔku si li be woatso adzo wo le mɔ dzi hã ɖe?
13. (a) Nɔnɔme dodzidzɔname ka ŋue Yesaya ƒo nu tsoe? (b) Aleke míewɔ nya be ŋutifafa si ŋu Yesaya ƒo nu tsoe la yi ŋgɔ wu dedienɔnɔ tso lã wɔadãwo si me?
13 Fifia Yesaya ƒo nu tso nɔnɔme dodzidzɔname siwo Mawu ahe va anyigba la dzi ŋu. Egblɔ be: “Amegãxi anɔ alẽvi gbɔ, lãkle atsyɔ akɔ ɖe gbɔ̃vi gbɔ, nyivi, dzata kple nyi dami woanɔ wo nɔewo gbɔ, eye ŋutsuvi sue aɖe akplɔ wo. Nyinɔ kple sisiblisinɔ woaɖu gbe, eye wo viwo atsyɔ akɔ ɖe afi ɖeka. Dzata aɖu gbe abe nyi ene. Ðevi nono afe le ƒli ƒe do nu, eye ɖevi, si ɖi no la, aƒo asi ɖe dakpui ƒe do me. Womawɔ vɔ̃ aɖeke o, eye womahe gbegblẽ ava nye tonyigba kɔkɔe blibo la dzi o; elabena sidzedze Yehowa xɔ anyigba la dzi, abe alesi tsi yɔ atsiaƒu me ene.” (Yesaya 11:6-9) Ðe nya siawo medo dzidzɔ na wò dzi oa? De dzesii be sidzedze Yehowa mee ŋutifafa si ŋu woƒo nu tsoe le afisia la tso. Eyata nya sia yi ŋgɔ wu dedienɔnɔ tso lã wɔadãwo si me ko. Sidzedze Yehowa matrɔ lãwo o, gake akpɔ ŋusẽ ɖe amewo dzi. Ne Israel-viwo le mɔ dzi yina wo de loo alo le woƒe anyigba si wogadzra ɖo dzi o, womavɔ̃ na lã wɔadãwo alo amesiwo wɔa nu abe lãwo ene o.—Ezra 8:21, 22; Yesaya 35:8-10; 65:25.
14. Nukae nye Yesaya 11:6-9 me vava gãtɔ?
14 Gake nyagblɔɖi sia gava eme le mɔ si lolo wu nu. Le ƒe 1914 me la, woɖo Yesu si nye Mesia la zi dzi le dziƒo Zion To la dzi. Le ƒe 1919 me la, woɖe “Mawu ƒe Israel” la me tɔ susɔeawo tso aboyo me le Babilon eye wokpɔ gome le tadedeagu dzadzɛ gbugbɔɖoanyi me. (Galatiatɔwo 6:16) Esia na mɔ ʋu ɖi be Yesaya ƒe nyagblɔɖi si ku ɖe Paradiso ŋu la nava eme le egbeŋkekea me. Yehowa ŋuti sidzedze si nye ‘sidzedze vavãtɔ’ la na amewo ƒe nɔnɔme trɔ. (Kolosetɔwo 3:9, 10) Amesiwo nye adãnuwɔlawo tsã la va zu ŋutifafamewo. (Romatɔwo 12:2; Efesotɔwo 4:17-24) Nusiawo kpɔ ŋusẽ ɖe ame miliɔn geɖe dzi fifia elabena Yesaya ƒe nyagblɔɖia va ku ɖe Kristotɔ siwo si anyigbadzinɔnɔ ƒe mɔkpɔkpɔ le siwo ƒe xexlẽme le dzidzim ɖe edzi kabakaba la hã ŋu. (Psalmo 37:29; Yesaya 60:22) Amesiawo srɔ̃e be ele be yewoalala akpɔ mɔ na ɣeyiɣi si me woagbugbɔ anyigba bliboa adzra ɖo wòazu paradiso si me dedienɔnɔ kple ŋutifafa le, abe alesi Mawu ɖoe le gɔmedzedzea me ene.—Mateo 6:9, 10; Petro II, 3:13.
15. Ðe míate ŋu akpɔ mɔ wòasɔ be Yesaya ƒe nyawo ava eme le nyaa nu ŋutɔŋutɔ le xexe yeyea mea? Ðe eme.
15 Ðe Yesaya ƒe nyagblɔɖia agava eme, ɖewohĩ le nyaawo nu ŋutɔŋutɔ, le Paradiso ma si woagbugbɔ aɖo anyi la mea? Edze abe esɔ be míabui nenema ene. Kakaɖedzinya si le nyagblɔɖia me na Israel-vi siwo trɔ gbɔ la kee wòna amesiwo katã anɔ agbe le Mesia ƒe dziɖuɖua te; wo kple wo viwo mavɔ̃ be nuvevi aɖe awɔ yewo o—eɖanye tso amegbetɔ alo lãwo gbɔ o. Le Mesia ƒe Fiaɖuƒedziɖuɖua te la, anyigbadzinɔlawo katã anɔ ŋutifafa si anɔ anyi la me abe alesi wònɔ le Adam kple Xawa gome le Eden ene. Ŋɔŋlɔawo megblɔ nya sia nya na mí le alesi agbenɔnɔ nɔ le Eden—alo alesi wòava nɔ le Paradiso me ŋu ya o. Gake míate ŋu aka ɖe edzi be le Fia Yesu Kristo ƒe dziɖuɖu si me nunya kple lɔlɔ̃ le te la, nusianu anɔ abe alesi tututu wòle be wòanɔ ene.
Woɖo Tadedeagu Dzadzɛ Anyi To Mesia Dzi
16. Nukae zu aflaga na Mawu ƒe amewo le ƒe 537 D.M.Ŋ. me?
16 Wodze tadedeagu dzadzɛ dzi zi gbãtɔ le Eden esime Satana te ŋu na Adam kple Xawa gbe toɖoɖo Yehowa. Vaseɖe egbea la, Satana mena ta le eƒe taɖodzinu si nye be yeatrɔ ame alesinu yeate ŋui ɖa tso Mawu gbɔ me o. Gake Yehowa maɖe mɔ gbeɖe be tadedeagu dzadzɛ nabu le anyigba dzi o. Nya la ku ɖe eƒe ŋkɔ ŋu, eye etsɔ ɖe le amesiwo subɔnɛ me. Eyata eto Yesaya dzi do ŋugbe ɖedzesi aɖe be: “[Ava] me le ɣemaɣi be, dukɔwo adi Isai ƒe ke, si nye aflaga li na anyigba dzi dukɔwo la yome, eye eƒe gbɔɖemeƒe anye atsyɔ̃.” (Yesaya 11:10) Le ƒe 537 D.M.Ŋ. me la, Yerusalem si nye du si Dawid tsɔ wɔ dukɔa ƒe fiadui la nɔ abe aflaga ene, henɔ Yudatɔ siwo ka hlẽ la ƒe ame susɔeawo yɔm be woatrɔ ava be woagbugbɔ gbedoxɔa atu.
17. Aleke Yesu ‘tsi tre be yeaɖu dukɔwo dzi’ le ƒe alafa gbãtɔ me kple le míaƒe ŋkekea mee?
17 Gake nyagblɔɖia fia asi nu geɖe wu ema. Abe alesi míekpɔe xoxo ene la, efia asi Mesia, dukɔwo katã Kplɔla vavãtɔ ɖeka la ƒe dziɖuɖu. Apostolo Paulo yɔ Yesaya 11:10 tsɔ ɖee fia be le eƒe ŋkekea me la, dukɔwo me tɔwo ate ŋu ava nɔ Kristo-hamea me. Eyɔ nya tso kpukpui sia me le Septuagint gɔmeɖeɖea me heŋlɔ bena: “Yesaya gagblɔ bena: ‘Isai ƒe kè kple amesi atsi tre, bene yeaɖu fia ɖe xexemedukɔwo dzi la, ava; eyama xexemedukɔwo lakpɔ mɔ na.’” (Romatɔwo 15:12) Tsɔ kpe ɖe eŋu la, nyagblɔɖia gayi ŋgɔ wu ema gɔ̃ hã—eva ɖo míaƒe ɣeyiɣia me esime dukɔwo me tɔwo ɖea woƒe lɔlɔ̃ na Yehowa fiana to alɔdodo Mesia la nɔvi amesiaminawo me.—Yesaya 61:5-9; Mateo 25:31-40.
18. Aleke Yesu zu dzesinɔƒee le míaƒe ŋkekea me?
18 Le emevava le egbeŋkekea me la, “ɣemaɣi” si Yesaya yɔ la dze egɔme esime woɖo Mesia la fiazikpui dzi wòzu Mawu ƒe Dziƒofiaɖuƒea ƒe Fia le ƒe 1914 me. (Luka 21:10; Timoteo II, 3:1-5; Nyaɖeɖefia 12:10) Tso ɣemaɣi la, Yesu Kristo zu aflaga, alo dzesinɔƒe, si le dzedzem nyuie na gbɔgbɔ me Israel kple dukɔwo katã me tɔ siwo dia dziɖuɖu dzɔdzɔe. Le Mesia ƒe mɔfiafia te la, wotsɔ Fiaɖuƒe ŋuti nyanyuia yi na dukɔwo katã, abe alesi Yesu gblɔe ɖi ene. (Mateo 24:14; Marko 13:10) Nyanyui sia kpɔa ŋusẽ ɖe amewo dzi. ‘Ameha gã, si ame aɖeke [mate] ŋu axlẽ o la, tso dukɔ sia dukɔ’ me bɔbɔ wo ɖokui na Mesia la esi wowɔ ɖeka kple amesiamina susɔeawo le tadedeagu dzadzɛ me. (Nyaɖeɖefia 7:9) Esi ame yeye geɖe yi edzi va le ha dem kple ame susɔeawo le Yehowa ƒe ‘gbɔgbɔmegbedoxɔa’ me la, wona ŋutikɔkɔe geɖe wu va Mesia la ƒe “gbɔɖemeƒe,” si nye Mawu ƒe gbɔgbɔmegbedoxɔ gã la ŋu.—Yesaya 56:7; Xagai 2:7.
Dukɔ Wɔɖeka aɖe Le Yehowa Subɔm
19. Nudzɔdzɔ eve kawo mee Yehowa gbugbɔ ɖo eƒe amewo ƒe ame susɔe siwo kaka ɖe anyigba dzi la te le?
19 Azɔ Yesaya ɖo ŋku edzi na Israel-viwo be Yehowa ɖe dukɔa kpɔ esime futɔ sesẽ aɖe nɔ wo tem ɖe anyi. Israel ƒe ŋutinya ƒe akpa ma—si nye alesi Yehowa ɖe dukɔa tso aboyo me le Egipte la—dzɔa dzi na Yudatɔ nuteƒewɔlawo katã. Yesaya ŋlɔ bena: “[Ava] me le ɣemaɣi be, Aƒetɔ la ado eƒe asi ɖa zi evelia, ne wòaxɔ eƒe dukɔ mamlɛa, si kpɔtɔ ɖi la, aƒle tso Asur, Egipte, Patros, Kus, Elam, Sinear, Xamat kple atsiaƒu me ƒukpowo dzi. Akɔ aflaga dzi na dukɔwo, eye wòaƒo Israel ƒe amesiwo wonyã de gbe kple Yuda-nyɔnu, siwo wokaka hlẽ la nu ƒu atso anyigba ƒe go eneawo dzi.” (Yesaya 11:11, 12) Yehowa akplɔ Israel kple Yuda ƒe ame susɔe nuteƒewɔlawo tso dukɔ siwo me wokaka ɖo me eye wòakplɔ wo va wo de dedie, abe ɖe wòlé woƒe alɔnu ene. Esia dzɔ le mɔ sue aɖe nu le ƒe 537 D.M.Ŋ. me. Gake ŋutikɔkɔe ka gbegbee nye si le emevava gãtɔ ŋu! Le ƒe 1914 me la, Yehowa do Yesu Kristo si woɖo fiazikpui dzi la ɖe dzi wòzu abe ‘aflaga ene na dukɔwo.’ Tso ƒe 1919 me la, “Mawu ƒe Israel” la ƒe ame susɔeawo te ziƒoƒo ɖe dzesi sia ŋu, eye wodi vevie be yewoakpɔ gome le tadedeagu dzadzɛ me le Mawu ƒe Fiaɖuƒea te. Gbɔgbɔmedukɔ tɔxɛ sia tso “to sia to kple gbegbɔgblɔ sia gbegbɔgblɔ kple du sia du kple dukɔ sia dukɔ me.”—Nyaɖeɖefia 5:9.
20. Ðekawɔwɔ kae anɔ Mawu ƒe amewo dome ne wotrɔ gbɔ tso Babilon?
20 Fifia Yesaya ƒo nu tso dukɔ si wogbugbɔ ɖo te la ƒe ɖekawɔwɔ ŋu. Eyɔ dziehefiaɖuƒea ƒe Efrayim kple anyiehefiaɖuƒea ƒe Yuda hegblɔ be: “Efrayim ƒe ŋuʋaʋã nu atso, eye woatsrɔ̃ Yuda ƒe ketɔwo. Efrayim maʋã ŋu Yuda o, eye Yuda maxaxa Efrayim ɖo o. Woadzo ɖe abɔta na Filistitɔwo le ƒu gome, eye woaƒo ƒu aɖaha ɣedzeƒeviwo, woake asi ɖe Edom kple Moab ŋu, eye Amon-viwo aɖo to wo.” (Yesaya 11:13, 14) Ne Yudatɔwo trɔ gbɔ tso Babilon la, womagama anye dukɔ eve azɔ o. Israel-toawo katã me tɔwo awɔ ɖeka atrɔ va woƒe anyigba la dzi. (Ezra 6:17) Dziku kple fuléle maganɔ wo me ɖe wo nɔewo ŋu o. Woanye dukɔ wɔɖeka anɔ te ɖe woƒe futɔ siwo le dukɔ siwo ƒo xlã wo me la nu dzidzedzetɔe.
21. Aleke Mawu ƒe amewo ƒe ɖekawɔwɔ ɖe dzesi ŋutɔŋutɔ egbeae?
21 “Mawu ƒe Israel” la ƒe ɖekawɔwɔ ya gaɖe dzesi wu. Ðekawɔwɔ le gbɔgbɔ me Israel si me kpɔɖeŋuto 12 la katã le la dome anɔ ƒe 2,000 kloe enye sia, eye etso lɔlɔ̃ si le wo si na Mawu kple woƒe gbɔgbɔ me nɔviŋutsu kple nɔvinyɔnuwo gbɔ. (Kolosetɔwo 3:14; Nyaɖeɖefia 7:4-8) Egbea ŋutifafa le Yehowa ƒe amewo—gbɔgbɔ me Israel-viwo kple amesiwo si anyigbadzinɔnɔ ƒe mɔkpɔkpɔ le siaa—dome eye wowɔ ɖeka le xexeame katã le Mesia la ƒe dziɖuɖu te, si nye nɔnɔme siwo tɔgbe mele Kristodukɔa ƒe sɔlemehawo me o. Yehowa Ðasefowo wɔ ɖeka tsi tre ɖe agbagba si dzem Satana le be yeagblẽ woƒe tadedeagu me la ŋu. Wowɔ ɖeka le dɔ si Yesu de wo si be woaɖe gbeƒã Mesia Fiaɖuƒea ŋuti nyanyuia ahafia nu tso eŋu le dukɔwo katã me la wɔm.—Mateo 28:19, 20.
Woaɖu Mɔxenuwo Dzi
22. Aleke Yehowa “ana Egipte-ƒu la ƒe adɔ̃ namiẽ” eye ‘wòanyè eƒe asi ɖe Tɔsisi la dzii’?
22 Nu geɖe li, nu ŋutɔŋutɔwo kple kpɔɖeŋunuwo, si nye mɔxenuwo na Israel-viwo ƒe tɔtrɔgbɔ tso aboyo me. Aleke woawɔ aɖu mɔxenu mawo dzii? Yesaya gblɔ be: “Yehowa ana Egipte-ƒu la ƒe adɔ̃ namie, eye anyẽ eƒe asi ɖe tɔsisi la dzi le eƒe ya sesẽ me, eye wòamãe ɖe tɔʋu adre me, ale be woanɔ atokota me atsoe.” (Yesaya 11:15) Yehowae aɖe nusiwo katã nye mɔxenu na eƒe amewo ƒe tɔtrɔgbɔ la ɖa. Mɔxenu si dzi ŋɔ abe Ƒudzĩa ƒe adɔ̃ (si ƒe ɖee nye Suez Ƒukɔmea) ene alo mɔxenu si dzi womate ŋu aɖu o, abe Frat Tɔsisia ene amie le kpɔɖeŋumɔ nu, ale be mahiã be woaɖe afɔkpa hafi atsoe o!
23. Mɔ ka nue ‘mɔ tata atso Asiria’ le?
23 Le Mose ƒe ŋkekea me la, Yehowa na mɔ Israel wodzo le Egipte yi Ŋugbedodonyigbaa dzi. Ele nu ma tɔgbe wɔ ge fifia: “[Anye] mɔ tata na eƒe dukɔ ƒe ame mamlɛa, siwo akpɔtɔ tso Asur, abe alesi wònɔ na Israel, esime wòʋu tso Egipte-nyigba dzi la ene.” (Yesaya 11:16) Yehowa akplɔ aboyome siwo trɔ gbɔna la abe ɖe wole mɔ tata dzi zɔm tso afisi wonɔ aboyo me le yina wo denyigba dzi ene. Tsitretsiɖeŋulawo ate kpɔ be yewoatɔ te wo, gake woƒe Mawu, Yehowa, anɔ kpli wo. Nenema ke Kristotɔ amesiaminawo kple woƒe zɔhɛwo dzea ŋgɔ amedzidzedze vɔ̃ɖi egbea, gake woyia ŋgɔ dzinɔameƒotɔe! Wodo go tso egbegbe Asiria, si nye Satana ƒe xexeame, eye wokpena ɖe ame bubuwo ŋu be woawo hã nawɔ nenema. Wonya be tadedeagu dzadzɛ akpɔ dzidzedze ahakpɔ ŋgɔyiyi. Menye amegbetɔe awɔe o, ke boŋ Mawue.
Dzidzɔ Mavɔ na Mesia la Teviwo!
24, 25. Kafukafu kple akpedadanya kawoe Yehowa ƒe amewo ado ɣli agblɔ?
24 Azɔ Yesaya zã nya dodzidzɔnamewo tsɔ gblɔ alesi Yehowa ƒe amewo atso aseye le alesi Eƒe nya va emee ta be: “Ɣemaɣi la àgblɔ bena: Mekafu wò, Yehowa, elabena èdo dɔmedzoe ɖe ŋunye, ke wò dɔmedzoe nu fa, eye nève nunye.” (Yesaya 12:1) To si Yehowa he na eƒe dukɔ dzeaglã la nu sẽ. Gake eɖo eƒe taɖodzinu si nye be wòaɖɔ dukɔa ƒe ƒomedodo kple eyama ɖo eye woagbugbɔ tadedeagu dzadzɛ aɖo anyi la gbɔ. Yehowa gana kakaɖedzi esubɔla wɔnuteƒewo be yeaxɔ na wo mlɔeba. Mewɔ nuku o be woɖe woƒe ŋudzedzekpɔkpɔ fia!
25 Israel-vi siwo wogbugbɔ ɖo anyi la ɖo kpe woƒe kaka ɖe Yehowa dzi bliboe, eye wodo ɣli gblɔ be: “Kpɔ ɖa, Mawu enye nye xɔname, dzi le ƒonye, nyemavɔ̃ o; elabena nye ŋusẽ kple nye hadzidzi enye [Yah, “NW”], ẽ, Yehowa, eye eya zu nye xɔname! Eye miadu tsi le xɔname ƒe vudowo me kple dzidzɔ.” (Yesaya 12:2, 3) Hebrigbe me nya si gɔme woɖe be “hadzidzi” le kpukpui 2 lia la dze le Septuagint gɔmeɖeɖea me be “kafukafu.” Tadeagulawo dzi kafukafuha ɖe xɔname si tso “Yah Yehowa” gbɔ la ta. Wozãa “Yah” si nye Yehowa yɔyɔ kpuie le Biblia me tsɔ fiaa alesi gbegbe kafukafu kple akpedada yɔ ame mee. Nyagbɔgblɔ “Yah Yehowa”—Mawu ƒe ŋkɔ la yɔyɔ zi eve—na eyama kafukafu nu gasẽ ɖe edzi wu.
26. Amekawoe ƒoa nu tso Mawu ƒe dɔwɔnawo ŋu na dukɔwo egbea?
26 Yehowa subɔla vavãwo mate ŋu amia nu ɖe woƒe dzidzɔkpɔkpɔ dzi o. Yesaya gblɔ ɖi be: “[Miagblɔ] le ɣemaɣi be: Mikafu Yehowa, miyɔ eƒe ŋkɔ, miɖe eƒe nuwɔwɔwo fia le dukɔwo dome, miɖe gbeƒãe be, eƒe ŋkɔ de dzi. Midzi ha na Yehowa, elabena ewɔ nu klitsuwo; woanya esia le anyigba blibo la dzi.” (Yesaya 12:4, 5) Tso keke ƒe 1919 me ke la, Kristotɔ amesiaminawo—amesiwo ŋu woƒe zɔhɛ siwo nye ‘alẽ bubuawo’ va kpe ɖo emegbe—‘ɖe gbeƒã amesi yɔ wo tso viviti me va ye ŋutɔ ƒe nukukekeli gbɔ la ƒe nutsuwɔwɔwo fia.’ Wonye “dzidzime tiatia, . . . dukɔ kɔkɔe” si woɖo ɖi na tameɖoɖo sia. (Yohanes 10:16; Petro I, 2:9) Amesiaminawo ɖea gbeƒãe be wodo Yehowa ƒe ŋkɔ kɔkɔe la ɖe dzi eye wokpɔa gome le egbɔgblɔ na anyigba dzi tɔwo katã me. Wonɔa ŋgɔ na Yehowa subɔlawo katã le dzidzɔkpɔkpɔ ɖe eƒe xɔname ƒe mɔnuɖoɖowo ŋu me. Ðeko wòle abe alesi Yesaya gblɔe ene be: “Zion-nɔla, kpɔ dzidzɔ, eye natso aseye, elabena Israel ƒe kɔkɔetɔ la tri akɔ le dowò me”! (Yesaya 12:6) Yehowa Mawu ŋutɔe nye Israel ƒe Kɔkɔetɔ la.
Tsɔ Kakaɖedzi Kpɔ Mɔ na Etsɔme!
27. Nuka dzie Kristotɔwo ka ɖo esi wole woƒe mɔkpɔkpɔ me vava lalam?
27 Egbea ame miliɔn geɖe ƒo zi ɖe ‘dukɔwo ƒe aflaga’—Yesu Kristo si woɖo fiazikpui dzi le Mawu ƒe Fiaɖuƒea me—ŋu. Wotsoa aseye be yewonye Fiaɖuƒe ma teviwo eye dzi dzɔa wo be yewonya Yehowa Mawu kple Via. (Yohanes 17:3) Wokpɔa dzidzɔ geɖe le Kristotɔwo ƒe habɔbɔ wɔɖeka si me wole la me eye wodzea agbagba vevie be yewoalé ŋutifafa si dea dzesi Yehowa subɔla vavãwo la me ɖe asi. (Yesaya 54:13) Esi woka ɖe edzi be Yah Yehowa nye Mawu si wɔa eƒe ŋugbedodowo dzi ta la, woka ɖe woƒe mɔkpɔkpɔa dzi eye nuƒoƒo tso eŋu na ame bubuwo doa dzidzɔ geɖe na wo. Neva eme be Yehowa subɔla ɖesiaɖe nayi edzi atsɔ eƒe ŋutete katã asubɔ Mawu ahakpe ɖe ame bubuwo ŋu be woawo hã nasubɔe. Mina mí katã míaxɔ Yesaya ƒe nyaawo ade dzime eye míakpɔ dzidzɔ le xɔname si to Yehowa ƒe Mesia la dzi me!
[Etenuŋɔŋlɔwo]
a Woɖe nya “Mesia” tso Hebrigbe me nya ma·shiʹach, si gɔmee nye “Amesiamina” me. Woyɔnɛ le Helagbe me be Khri·stosʹ, alo “Kristo.”—Mateo 2:4, NW ƒe etenuŋɔŋlɔ.
b Hebrigbe me nya si wozãna na “dzedze” ye nye neʹtser, eye woyɔa “Nazaretetɔ” be Nots·riʹ.
[Nɔnɔmetata siwo le axa 158]
Mesia la nye “atilɔ” si tso Isai me to Fia Dawid dzi
[Nɔnɔmetata si xɔ axa 162]
[Nɔnɔmetata si le axa 170]
Yesaya 12:4, 5 si dze le Ƒukukua me Agbalẽxatsaxatsawo dzi (Míede dzesi teƒe siwo Mawu ƒe ŋkɔ dze le)