Ta Blaetɔ̃lia
“Mifa Akɔ na Nye Dukɔ”
1. Nukae nye mɔ siwo dzi Yehowa tona faa akɔ na mí la dometɔ ɖeka?
YEHOWA nye “akɔfafa ƒe Mawu.” Mɔ siwo dzi wòtona faa akɔ na mí dometɔ ɖekae nye ŋugbedodo siwo wòna woŋlɔ ɖe eƒe Nya la me. (Romatɔwo 15:4, 5) Le kpɔɖeŋu me, ne wò ame vevi aɖe ku la, nukae agafa akɔ na wò wu mɔkpɔkpɔ si nye be woafɔ ame vevi ma ɖe tsitre le Mawu ƒe xexe yeyea me? (Yohanes 5:28, 29) Ke ŋugbe si Yehowa do be yeahe vɔ̃ɖinyenye ava nuwuwui kpuie ahatrɔ anyigba sia wòazu paradiso ya ɖe? Ðe mefaa akɔ na mí be mɔkpɔkpɔ le mía si be míatsi agbe ayi ɖe Paradiso ma si gbɔna me eye míaku akpɔ oa?—Psalmo 37:9-11, 29; Nyaɖeɖefia 21:3-5.
2. Nukata míate ŋu aka ɖe Mawu ƒe ŋugbedodowo dzi?
2 Ðe míate ŋu aka ɖe Mawu ƒe ŋugbedodowo dzi ŋutɔŋutɔa? Ẽ, míate ŋui! Míate ŋu aka ɖe Amesi do ŋugbe mawo dzi bliboe. Ŋutete le esi be wòawɔ ɖe eƒe nya dzi eye elɔ̃ be yeawɔe hã. (Yesaya 55:10, 11) Woɖe esia fia ɖikekemanɔŋutɔe le nya si Yehowa gblɔ to Yesaya dzi be yeagbugbɔ tadedeagu vavãtɔ aɖo anyi le Yerusalem la me. Mina míadzro nyagblɔɖi ma si dze le Yesaya ta 40 lia me la me, elabena esia wɔwɔ ate ŋu ado ŋusẽ míaƒe Yehowa, Ŋugbedododziwɔla la, dzixɔxɔse.
Ŋugbedodo Fakɔname Aɖe
3, 4. (a) Akɔfanya kae Yesaya ŋlɔ ɖi si ava hiã Mawu ƒe dukɔ la emegbe? (b) Nukata woakplɔ Yuda kple Yerusalem tɔwo ayi aboyo me le Babilon, eye ɣeyiɣi didi kae woƒe kluvimenɔnɔa axɔ?
3 Le ƒe alafa enyilia D.M.Ŋ. me la, nyagblɔɖila Yesaya ŋlɔ akɔfanya siwo Yehowa ƒe amewo ahiã le etsɔme la ɖi. Esi Yesaya gblɔ Yerusalem ƒe tsɔtsrɔ̃ si nɔ ŋgɔ kple Yudatɔwo kpɔkplɔ yi Babilon ŋu nya na Fia Xizkiya vɔ megbe teti la, edze Yehowa ƒe nya siwo me wòdo ŋugbe le be yeagbugbɔ wo aɖo anyi la gbɔgblɔ gɔme be: “Mifa akɔ, mifa akɔ na nye dukɔ, mía Mawu la gblɔe! Mide dzi ƒo na Yerusalem be, eƒe aʋawɔdɔ la wu enu, eye woxe eƒe vodada ŋu fe, elabena exɔ teƒeɖoɖo eve nu tso Yehowa gbɔ ɖe eƒe nuvɔ̃wo katã ta.”—Yesaya 40:1, 2.
4 Nya “mifa akɔ” si wotsɔ dze Yesaya ƒe ta 40 lia gɔme la ɖɔ kekeli kple mɔkpɔkpɔ ƒe gbedasi si le Yesaya ƒe agbalẽa ƒe akpa susɔea me la nyuie. Woakplɔ Yuda kple Yerusalem ayi aboyo me le Babilon le ƒe 607 D.M.Ŋ. me ɖe woƒe xɔsegbegbe ta. Gake Yudatɔ aboyomenɔla mawo masubɔ Babilontɔwo tegbee o. Ao, ne ‘woxe fe’ ɖe woƒe vodada ta ko la, woƒe kluvimenɔnɔa awu enu. Ɣeyiɣi didi kae esia axɔ? Nyagblɔɖila Yeremya gblɔ be anye ƒe 70. (Yeremya 25:11, 12) Yehowa akplɔ ame susɔe siwo nye dzimetrɔlawo tso Babilon atrɔ va Yerusalem. Le Yuda ƒe aƒedozuzu ƒe ƒe 70 lia me la, akɔfafa kae nye si wòanye na aboyomeawo be woakpɔe adze sii be ɖeɖekpɔkpɔ si ƒe ŋugbe wodo na yewo la ƒe ɣeyiɣi ɖo vɔ!—Daniel 9:1, 2.
5, 6. (a) Nukata mɔ didi si tso Babilon yi Yerusalem zɔzɔ mawɔe be Mawu ƒe ŋugbedodo nado kpo emevava o? (b) Dɔ kae Yudatɔwo gbugbɔɖoanyi ɖe wo denyigba dzi awɔ ɖe dukɔ bubuwo dzi?
5 Mɔzɔzɔ tso Babilon yi Yerusalem nye kilometa 800 vaseɖe 1,600, eye mɔ si woatoe afia eƒe didime. Ðe mɔ legbe la ana Mawu ƒe ŋugbedodo nado kpo emevavaa? Kura o! Yesaya ŋlɔ bena: “Miƒu to anyi, gbeƒãɖela aɖe ƒe gbe enye si: Mita mɔ ɖe gbe dzi na Yehowa, eye miwɔ mɔwo dzɔdzɔe ɖe gbegbe na mía Mawu la! Balimewo katã akɔ kpo, eye to kple togbɛwo katã anyẽ ɖe eme, kpoƒeewo azu zɔzrɔ̃e, eye kɔwo asɔ kple anyigba, ne Yehowa ƒe ŋutikɔkɔe naɖe eɖokui afia, eye ŋutilãwo katã nakpɔe; elabena Yehowa ƒe nue gblɔe.”—Yesaya 40:3-5.
6 Hafi Ɣedzeƒe dziɖulawo nadze mɔzɔzɔ aɖe gɔme la, wodɔa amewo ɖa zi geɖe be woaɖadzra mɔ dzi ɖo aɖe kpe gãwo ɖa eye woaxe ʋewo ahagbã kpowo gɔ̃ hã. Le Yudatɔ siwo trɔ gbɔna gome la, anɔ abe ɖe Mawu ŋutɔ le wo ŋgɔ le mɔxenu ɖesiaɖe ɖem ɖa ene. Ne míebu eŋu kpɔ la, amesiawo nye dukɔ si ŋu Yehowa ƒe ŋkɔ le, eye ne ewɔ ɖe ŋugbe si wòdo be yeagaɖo wo te le wo denyigba dzi dzi la, ana eƒe ŋutikɔkɔe nadze dukɔwo katã nakpɔ. Dukɔ mawo lɔ̃ alo womeɖalɔ̃ o, woazi wo dzi woakpɔe be Yehowa nye eƒe ŋugbedodowo Dziwɔla.
7, 8. (a) Aleke nya siwo le Yesaya 40:3 va eme le ƒe alafa gbãtɔ M.Ŋ. mee? (b) Aleke Yesaya ƒe nyagblɔɖia va eme le mɔ si lolo wu nu le ƒe 1919 mee?
7 Menye dukɔa gbugbɔɖoanyi le ƒe alafa adelia D.M.Ŋ. me koe nye nyagblɔɖi sia me vava o. Eva eme le ƒe alafa gbãtɔ M.Ŋ. me hã. Yohanes Amenyrɔɖetsimelae nye ame aɖe si ƒe ‘gbe nɔ ɖiɖim le gbedzi,’ si nye Yesaya 40:3 me vava. (Luka 3:1-6) Gbɔgbɔ ʋã Yohanes wòzã Yesaya ƒe nyaawo na eɖokui. (Yohanes 1:19-23) Tso ƒe 29 M.Ŋ. me la, Yohanes te mɔ dzi dzadzraɖo na Yesu Kristo.a Alesi Yohanes ɖe gbeƒã do ŋgɔ la ʋã amewo be woadi Mesia si ŋugbe wodo la ale be woawo hã naɖo toe ahadze eyome. (Luka 1:13-17, 76) Yehowa ato Yesu dzi akplɔ dzimetrɔlawo ayi ablɔɖe si Mawu ƒe Fiaɖuƒea koe ate ŋu ana me—si nye ablɔɖekpɔkpɔ tso nuvɔ̃ kple ku ƒe kluvinyenye me. (Yohanes 1:29; 8:32) Yesaya ƒe nyawo gava eme le mɔ si lolo wu nu esi woɖe gbɔgbɔ me Israel ƒe ame susɔeawo tso Babilon Gã la me le ƒe 1919 me kple esi wogbugbɔ tadedeagu vavãtɔ ɖo anyi.
8 Ke amesiwo dze akpɔ viɖe tso ŋugbedodoa me vava gbãtɔ me—siwo nye Yudatɔ aboyomenɔla siwo nɔ Babilon—la ya ɖe? Ðe woate ŋu aka ɖe Yehowa ƒe ŋugbedodo be yeana woatrɔ ava wo denyigba lɔlɔ̃a dzi la dzi ŋutɔŋutɔa? Ẽ, woate ŋu aka ɖe edzi! Azɔ Yesaya zã gbesiagbegbenɔnɔ me nya kple kpɔɖeŋu siwo me kɔ tsɔ gblɔ susu vevi siwo ta woate ŋu aka ɖe edzi bliboe be Yehowa awɔ ɖe eƒe nya dzi.
Mawu si ƒe Nya Nɔa Anyi Tegbee
9, 10. Aleke Yesaya de vovototo amegbetɔ ƒe agbe ƒe nu kpui nyenye kple Mawu ƒe “nya” ƒe anyinɔnɔ ɖaa domee?
9 Gbã, Amesi do gbugbɔɖoanyi ƒe ŋugbe la ƒe nya nɔa anyi tegbee. Yesaya ŋlɔ bena: “Miƒu to anyi, ame aɖe le gbɔgblɔm be: Ðe gbeƒã! Tete megblɔ be: Nya ka tsɔ ge mala aɖe gbeƒã lae? Ŋutilãwo katã le abe gbe ene, eye woƒe atsyɔ̃ le abe seƒoƒo le gbe me ene. Gbe ƒuna, eye seƒoƒo yrɔna, elabena Yehowa ƒe gbɔgbɔ gbɔ ɖee. Nyateƒe, gbe enye dukɔ la! Gbe ƒuna, eye seƒoƒo yrɔna, ke mía Mawu ƒe nya anɔ anyi tegbee.”—Yesaya 40:6-8.
10 Israel-viwo nya nyuie be gbe menɔa anyi tegbee o. Le pepi me la, ŋdɔ ƒe ʋuʋu sesĩe nana wòƒuna zua hẽ. Le go aɖewo me la, amegbetɔ ƒe agbe le abe gbe ene—ele kpuie ŋutɔ. (Psalmo 103:15, 16; Yakobo 1:10, 11) Yesaya de vovototo alesi amegbetɔ ƒe agbe le kpuie kple alesi Mawu ƒe “nya,” alo tameɖoɖo si wògblɔ, nɔa anyi ɖaae dome. Ẽ, “mía Mawu ƒe nya” nɔa anyi tegbee. Ne Mawu ƒo nu la, naneke mate ŋu atrɔ eƒe nyawo loo alo ana woado kpo emevava o.—Yosua 23:14.
11. Nukata míate ŋu aka ɖe Yehowa dzi be ana ŋugbedodo siwo le eƒe Nya si woŋlɔ ɖi me la nava eme?
11 Egbea woŋlɔ Yehowa ƒe tameɖoɖo si wògblɔ la na mí ɖe Biblia me. Le ƒe alafawo me la, wotsi tre ɖe Biblia ŋu vevie, eye gbegɔmeɖela siwo ƒo dzi le kple ame bubuwo de woƒe agbe afɔku me tsɔ kpɔ etae. Ke hã menye woƒe agbagbadzedzewo koe na be wògali vaseɖe egbea o. Ele be eƒe anyinɔnɔ ŋuti kafukafu ɖesiaɖe nayi na Yehowa, ‘Mawu gbagbe si li ɖaa’ si nye eƒe Nya la Takpɔla la. (Petro I, 1:23-25) Bu nya sia ŋu kpɔ: Esi Yehowa kpɔ eƒe Nya si woŋlɔ ɖi ta wòli la, ɖe míate ŋu aka ɖe edzi be ana ŋugbedodo siwo le eme hã nava eme oa?
Mawu Sẽŋu si Léa Be na Eƒe Alẽwo Lɔlɔ̃tɔe
12, 13. (a) Nukata woate ŋu aka ɖe gbugbɔɖoanyi ŋugbedodoa dzi? (b) Nyanyui kae li na Yudatɔ aboyomewo, eye nukata kakaɖedzi ate ŋu anɔ wo si?
12 Yesaya gblɔ susu evelia si ta woate ŋu aka ɖe gbugbɔɖoanyi ŋuti ŋugbedodoa dzi. Amesi do ŋugbea nye Mawu sẽŋu si léa be na eƒe amewo lɔlɔ̃tɔe. Yesaya yi edzi be: “Zion, wò du nyui xɔla, lia to kɔkɔ la; wò Yerusalem, du nyui xɔla, kɔ wò gbe dzi sesĩe; kɔe dzi megavɔ̃ o, eye gblɔ na Yuda-duwo bena: Kpɔ ɖa, mia Mawu enye si! Kpɔ ɖa, Aƒetɔ Yehowa gbɔna kple ŋusẽ, eye eƒe alɔ aɖu fia ɖe enu. Kpɔ ɖa, eƒe fetu kpe ɖe eŋu, eye eƒe teƒeɖoɖo le eŋgɔ. Anyi eƒe alẽhawo abe alẽkplɔvi ene, alé alẽviawo ɖe abɔ dome, eye wòakɔ wo ɖe akɔnu, eye wòakplɔ vinɔwo ɖɔɖɔɖɔ.”—Yesaya 40:9-11.
13 Le Biblia ƒe ɣeyiɣiwo me la, ebɔ be nyɔnuwo natso aseye ne woɖu aʋa dzi, wodoa ɣli gblɔa aʋa siwo dzi woɖu alo gbɔdzɔe si woava kpɔ alo tsɔnɛ dzia hae. (Samuel I, 18:6, 7; Psalmo 68:12) Yesaya ɖee fia le nyagblɔɖi me be nyanyui li na Yudatɔ aboyomewo, enye nyanyui si woate ŋu ado ɣli agblɔ le towo tame gɔ̃ hã vɔvɔ̃manɔmee—eyae nye be Yehowa akplɔ eƒe dukɔ atrɔ yi Yerusalem si nye woƒe du lɔlɔ̃ la me! Woate ŋu aka ɖe edzi elabena Yehowa ava “kple ŋusẽ.” Eyata naneke mate ŋu axe mɔ na eƒe ŋugbedodo dzi wɔwɔ o.
14. (a) Aleke Yesaya wɔ alesi Yehowa akplɔ eƒe dukɔa lɔlɔ̃tɔe ƒe kpɔɖeŋui? (b) Kpɔɖeŋu kae ɖe alesi alẽkplɔlawo léa be na woƒe alẽwo lɔlɔ̃tɔe fia? (Kpɔ aɖaka si le axa 405.)
14 Gake Mawu sẽŋu sia ƒe nɔnɔme bubue nye tufafa. Yesaya ƒo nu tso alesi Yehowa akplɔ eƒe dukɔ atrɔ yi wo denyigba dzi ŋu dzidzɔtɔe. Yehowa le abe alẽkplɔla lɔ̃ame si ƒoa eƒe alẽviwo nu ƒu eye wòkɔa wo ɖe “akɔnu” la ene. Edze abe nya “akɔnu” si wozã le afisia la fia awu ƒe akɔta ene. Afisiae alẽkplɔlawo tsɔa alẽvi siwo wodzi yeyee siwo mate ŋu azɔ ɖe alẽha la ti o ɖo ɣeaɖewoɣi. (Samuel II, 12:3) Ðikeke mele eme o be alẽkpɔkplɔdɔ me nɔnɔme lédziname sia na Yehowa ƒe dukɔ aboyomenɔlawo gakpɔ kakaɖedzi le eƒe ɖetsɔleme na wo lɔlɔ̃tɔe ŋu. Godoo la, woate ŋu aka ɖe Mawu sẽŋu si lɔ̃a ame alea la dzi be awɔ ɖe ŋugbe siwo katã wòdo na wo dzi!
15. (a) Ɣekaɣie Yehowa va “kple ŋusẽ,” eye amekae nye ‘alɔ si le fia ɖum ɖe enu’? (b) Nyanyui kae wòle be míaɖe gbeƒãe vɔvɔ̃manɔmee?
15 Gɔmesese geɖe le Yesaya ƒe nya siwo nye nyagblɔɖi la me na míaƒe ŋkekea. Le ƒe 1914 me la, Yehowa va “kple ŋusẽ” eye wòɖo eƒe Fiaɖuƒea gɔme anyi ɖe dziƒo. ‘Alɔ si le fia ɖum ɖe enu’ lae nye Via, Yesu Kristo, amesi Yehowa tsɔ ɖo eƒe dziƒofiazikpuia dzi. Le ƒe 1919 me la, Yehowa ɖe esubɔla amesiamina siwo le anyigba dzi tso Babilon Gã la ƒe aboyo me eye wòdze Mawu gbagbe vavã la ƒe tadedeagu dzadzɛ gbugbɔɖoanyi bliboe gɔme. Esia nye nyanyui si wòle be míaɖe gbeƒãe vɔvɔ̃manɔmee, abe to dzie míele gbeƒã ɖem tsoe kple gbe sesẽ ene ale be nyaa nade didiƒe ke. Ekema mina míakɔ míaƒe gbe dzi eye míatsɔ dzinɔameƒo ana ame bubuwo nanya be Yehowa Mawu gbugbɔ eƒe tadedeagu dzadzɛ ɖo anyi ɖe anyigba sia dzi!
16. Mɔ ka nue Yehowa kplɔa eƒe amewo le egbea, eye kpɔɖeŋu kae esia nye?
16 Asixɔxɔ nyui bubu gale Yesaya 40:10, 11 me nyawo ŋu na mí egbea. Efaa akɔ na mí be míade dzesi alesi Yehowa kplɔa eƒe amewo lɔlɔ̃tɔe. Abe alesi alẽkplɔla nyaa alẽ ɖesiaɖe—kple alẽvi sue siwo mate ŋu azɔ kple mamlɛawo o—ƒe nuhiahiãwo ene la, nenema tututue Yehowa nya afisi esubɔla nuteƒewɔla ɖesiaɖe ƒe ŋutete se ɖo. Tsɔ kpe ɖe eŋu la, Yehowa si nye Alẽkplɔla lɔ̃ame la ɖo kpɔɖeŋu ɖi na Kristotɔ alẽkplɔlawo. Ele be hamemegãwo nawɔ nu ɖe alẽha la ŋu le lɔlɔ̃ me eye woasrɔ̃ lɔlɔ̃ ƒe ɖetsɔleme si Yehowa ŋutɔ ɖena fiana la. Ele be woana alesi Yehowa bua alẽha “si wòƒle kple ye ŋutɔ [Via] ƒe ʋu” la dometɔ ɖesiaɖee la nanɔ susu me na wo ɣesiaɣi.—Dɔwɔwɔwo 20:28.
Enye Ŋusẽkatãtɔ si ƒe Nunya Ƒo Ðesiaɖe Ta
17, 18. (a) Nukata Yudatɔ aboyomenɔlawo ate ŋu aka ɖe gbugbɔɖoanyi ŋuti ŋugbedodowo dzi? (b) Nya siwo dea vɔvɔ̃ kple bubu deto ame me kawoe Yesaya bia?
17 Yudatɔ aboyomenɔlawo ate ŋu aka ɖe gbugbɔɖoanyi ŋuti ŋugbedodo la dzi elabena Mawu nye ŋusẽkatãtɔ kple amesi ƒe nunya ƒo ɖesiaɖe ta. Yesaya gblɔ be: “Ameka tsɔ asiʋlo dzidze tsii, eye wòdzidze asi ɖe dziƒo ŋu? Ameka tsɔ nudonui do anyigba dzi kee, etsɔ nudanu da to, eye wòda togbɛwo le nudagbɛ me? Ameka nya ta le Yehowa ƒe gbɔgbɔ nu, eye ameka nye eƒe adaŋudela, si fia nui? Ameka wòde adaŋu kplii, be wòafia nunyae, eye wòafia nui le nu dzɔdzɔe ƒe mɔ ŋu, wòafia sidzedzee, eye wòaɖe gɔmesese ƒe mɔ afiae?”—Yesaya 40:12-14.
18 Nya siawo nye biabia siwo dea vɔvɔ̃ kple bubu deto ame me si ŋu wòle be Yudatɔ aboyomenɔlawo nabu. Ðe amegbetɔ dzrowo ate ŋu axe mɔ na atsiaƒu gã la ƒe ƒutsotsoewoa? Womate ŋui o! Ke hã atsiaƒu si xɔ anyigba dzi la le abe tsi toŋ ene le Yehowa ƒe asiʋlo me.b Ðe amegbetɔ beliwo ate ŋu adzidze dziƒo gã gbahoo si ɣletivi gbogbowo le la alo ada anyigba ƒe towo kple togbɛwo le nudanu mea? Ao. Ke hã Yehowa dzidzea dziƒowo bɔbɔe abe alesi amegbetɔ ate ŋu atsɔ asi—si fia dometsotso si le degblefetsua nu vaseɖe asibide suetɔa nu ne woke asi me—adzidze nui ene. Míate ŋu agblɔe be Mawu dzidzea towo kple togbɛwo le nudanu me. Ðe amegbetɔ siwo nye nunyala gãwo gɔ̃ hã ate ŋu aɖo aɖaŋu na Mawu le nusi wòawɔ le nɔnɔme siwo li fifia me ŋu alo agblɔ nusi wòawɔ le etsɔme nɛa? Kura o!
19, 20. Kpɔɖeŋu siwo me kɔ kawoe Yesaya zã tsɔ te gbe ɖe Yehowa ƒe gãnyenye dzii?
19 Ke xexemedukɔ sesẽ siwo le anyigba dzi ya ɖe—ɖe woate ŋu axe mɔ na Mawu le ŋugbe si wòdo dzi wɔwɔ mea? Yesaya ƒo nu tso dukɔwo ŋu tsɔ ɖo eŋui be: “Kpɔ ɖa, dukɔwo le abe tsi toŋtoŋ le ze ŋu ene, wobu wo abe ʋuʋudedi le nudanu ŋu ene; kpɔ ɖa, edo ƒukpowo abe kekui ko ene! Libanon ƒe atiwo mesɔ gbɔ hena dzododo o, eye edzi lãwo mesɔ gbɔ hena numevɔsa o. Dukɔwo katã mele ɖeke me le eŋku me o, ebu wo abe nu maɖinui kple tofloko ene.”—Yesaya 40:15-17.
20 Dukɔwo katã le abe tsi toŋ ene le Yehowa ŋkume. Wole abe ʋuʋudedi le nudanu ŋu ene, eye womeɖi naneke o.c Tsɔe be ame aɖe ɖi vɔsamlekpui gã aɖe eye wòtsɔ ati siwo katã le Libanon-towo dzi wɔ nakee. Eye tsɔe be amea tsɔ lã siwo katã tsana le to mawo dzi wɔ vɔsalãe. Vɔsa sia gɔ̃ hã meɖi naneke le Yehowa gbɔ o. Yesaya zã nya si nu gasẽ wu abe ɖe kpɔɖeŋu si wòwɔ la mesɔ gbɔ o ene—dukɔwo katã “le sue ŋutɔ” le Yehowa ŋkume.—Yesaya 40:17, New Revised Standard Version.
21, 22. (a) Aleke Yesaya te gbe ɖe edzii be womate ŋu atsɔ naneke asɔ kple Yehowa o? (b) Nyataƒoƒo ka gbɔe Yesaya ƒe numeɖeɖe siwo me kɔ la kplɔ mí yii? (d) Nya siwo sɔ le dzɔdzɔmeŋutinunya nu kae Yesaya ŋlɔ ɖi? (Kpɔ aɖaka si le axa 412.)
21 Yesaya yi edzi ɖe bometsinu si amesiwo tsɔa sika, klosalo, alo ati wɔa legbawoe wɔna la fia gatsɔ te gbe ɖe edzi be womate ŋu atsɔ naneke asɔ kple Yehowa o. Bometsitsi ka gbegbee nye si wòanye be woatsɔ legba siawo dometɔ aɖe atsi tre ɖi na “amesi le xexeame godoo ta me” eye wòkpɔ ŋusẽ ɖe emenɔlawo dzi la!—Yesaya 40:18-24.
22 Numeɖeɖe siawo siwo me kɔ alea la katã fia asi nyataƒonya aɖe—eyae nye be naneke mate ŋu axe mɔ na Yehowa si nye ŋusẽkatãtɔ, nunyala si ƒo ɖesiaɖe ta, eye ame aɖeke mesɔ kplii o la le eƒe ŋugbedodo dzi wɔwɔ me o. Aleke gbegbe Yesaya ƒe nyawo anya fa akɔ na Yudatɔ aboyome siwo nɔ Babilon eye wòdzro wo vevie be woatrɔ ayi wo denyigba dzi la ahado ŋusẽ woe enye si! Egbea míawo hã míate ŋu aka ɖe edzi be Yehowa ƒe ŋugbedodowo le míaƒe etsɔme ŋu ava eme.
“Amekae Wɔ Nusiawo Katã?”
23. Nukata dzi ate ŋu anɔ Yudatɔ aboyomeawo ƒo, eye nuka dzie Yehowa te gbe ɖo azɔ le eya ŋutɔ ɖokui ŋu?
23 Susu bubu aɖe gali si ta wòle be dzi nanɔ Yudatɔ aboyomenɔlawo ƒo. Amesi do ɖeɖekpɔkpɔ ŋugbe la nye nuwo katã Wɔla kple ŋusẽwo katã Tsoƒe. Yehowa he susu yi eƒe ŋutete si dze le xexemewɔwɔ me dzi tsɔ te gbe ɖe eƒe ŋusẽ triakɔa dzi be: “Ameka ŋu miebe, yewoatsɔm aɖoe, ne masɔ kplii? Mifɔ mo dzi, ne miakpɔ nu! Ameka wɔ nusiawo, eye wòkplɔa eŋu nuwo doa goe dedie? Eyɔa wo katã ŋkɔ, eye wo dometɔ aɖeke mesusɔna o le eƒe ŋusẽ geɖe kple alɔkame sesẽ la nu.”—Yesaya 40:25, 26.
24. Esi Yehowa nɔ nu ƒom tso eɖokui ŋu la, aleke wòɖee fiae be ame aɖeke mesɔ kpli ye o?
24 Israel ƒe Kɔkɔetɔ la nɔ nu ƒom tso eya ŋutɔ ɖokui ŋu. Yehowa he susu yi dziƒoɣletiviwo dzi tsɔ ɖee fia be ame aɖeke mede ye nu o. Yehowa kpɔ ŋusẽ ɖe ɣletiviwo dzi abe alesi aʋakplɔla te ŋu ɖea gbe na eƒe asrafowo ene. Ne ɖe wòayɔ wo aƒo ƒu la, ‘anye ne wo dometɔ aɖeke masusɔ o.’ Togbɔ be ɣletiviwo sɔ gbɔ fũ hã la, eyɔa wo dometɔ ɖesiaɖe ƒe ŋkɔ, eɖanye woƒe ŋkɔ ŋutɔŋutɔwoe loo alo dzesideŋkɔwoe o. Wonɔa wo nɔƒe hewɔa nu ɖe ɖoɖo nyui nu abe asrafo sedziwɔlawo ene, elabena “ŋusẽ geɖe” le wo Kplɔla la si eye eƒe “alɔkame sesẽ.” Eyata susu le eme be kakaɖedzi nanɔ Yudatɔ aboyomeawo si. Ŋusẽ le Wɔla si kplɔa ɣletiviwo la si be wòakpe ɖe esubɔlawo ŋu.
25. Aleke míate ŋu awɔ ɖe Mawu ƒe amekpekpe si woŋlɔ ɖe Yesaya 40:26 la dzii, eye dɔ kae wòle be wòawɔ ɖe mía dzi?
25 Mía dometɔ kae ate ŋu agbe Mawu ƒe amekpekpe si woŋlɔ ɖe Yesaya 40:26, si gblɔ be, “Mifɔ mo dzi, ne miakpɔ nu” la dzi wɔwɔ? Nusiwo ŋu ɣletiviŋununyalawo ke ɖo le egbeŋkekea me ɖee fia be dziƒoɣletiviwo nye nu wɔnukuwo wu alesi wobui le Yesaya ƒe ŋkekea me gɔ̃ hã. Ɣletiviŋununyala siwo tsɔa woƒe yamenutomekpɔmɔ̃ sesẽwo kpɔa dziƒo la bu akɔnta be ɣletivihatsotso siwo ade biliɔn 125 ye le yamenutome ƒe akpa si woate ŋu akpɔ la me. Akɔntabubu aɖewo ɖee fia be ɣletivi biliɔn 100 kple edzivɔe le esiawo dometɔ ɖeka ko—si nye Milky Way ɣletivihatsotso, si me míaƒe anyigba kple ɣea le la—me! Ele be esia nyanya nana bubu deto nanɔ míaƒe dzime na mía Wɔla la eye míaka ɖe eƒe ŋugbedodonya la dzi bliboe.
26, 27. Aleke woƒo nu tso aboyome siwo nɔ Babilon ƒe seselelãme ŋui, eye nukawoe wòle be woanya?
26 Esi Yehowa nya be ƒe siwo Yudatɔ aboyomeawo atsɔ anɔ aboyo me ana dzi naɖe le wo ƒo ta la, eʋã Yesaya wòŋlɔ kakaɖedzinya siawo ɖi do ŋgɔ be: “Yakob, nukaŋuti nèle nu ƒom, Israel, nèle gbɔgblɔm be: Nye mɔ ɣla ɖe Yehowa, eye nye nya dzɔdzɔe to nye Mawu ŋu yi? Mènyae, eye mèsee kpɔ be, Mawu mavɔ enye Yehowa, amesi wɔ anyigba ƒe mlɔeanuwo oa? Nu metia kɔ nɛ o, ɖeɖi metea eŋu o, eye eƒe nunya ƒe ta metsɔ o.”—Yesaya 40:27, 28.d
27 Yesaya ŋlɔ nya siwo Yehowa gblɔ le aboyome siwo nɔ Babilon si gbɔ didi kilometa alafa geɖe tso wo denyigba gbɔ la ƒe seselelãme ŋu ɖi. Wo dometɔ aɖewo bu be woƒe Mawu la mele woƒe “mɔ”—si nye nɔnɔme sesẽ si me tom wonɔ—la kpɔm alo nyae o. Wosusu be Yehowa metsɔ ɖeke le nu madzɔmadzɔ si wowɔ ɖe wo ŋu la me o. Woɖo ŋku nusiwo wòle be woanya tso nusi teƒe woa ŋutɔwo kpɔ loo alo tso nya siwo woŋlɔ ɖi wova se me la dzi na wo. Yehowa ate ŋu aɖe eƒe dukɔ eye elɔ̃ faa be yeaɖe wo hã. Eyae nye Mawu mavɔ kple anyigba bliboa katã Wɔla. Eyata ŋusẽ si wòɖe fia le xexemewɔwɔ me la gale esi, eye Babilon si nye fiaɖuƒe sẽŋu la gɔ̃ hã mate ŋu anɔ te ɖe enu o. Nu metia kɔ na Mawu sia wògblẽa eƒe dukɔ ɖi o. Mele be woakpɔ mɔ be yewoate ŋu ase Yehowa ƒe nuwɔnawo gɔme bliboe o, elabena eƒe nugɔmesese—alo numenyanya ayi to, eƒe gɔmesese, kple tamesusu—kɔ boo wu wo tɔ.
28, 29. (a) Aleke Yehowa ɖo ŋku edzi na eƒe dukɔ be yeakpe ɖe ame beliwo ŋui? (b) Kpɔɖeŋu kae wozã tsɔ fia alesi Yehowa doa ŋusẽ esubɔlawoe?
28 Yehowa yi edzi de dzi ƒo na aboyomenɔla siwo ƒo dzi ɖe le la to Yesaya dzi be: “Eyae naa lãmesesẽ amesiwo ŋu ɖeɖi te, eye wònaa ŋusẽ geɖe ame beliwo. Nu tia kɔ na ɖekakpuiwo, eye ɖeɖi tea wo ŋu, eye ŋutsuwo dzea anyi; ke ŋusẽ yeye ɖoa amesiwo kpɔa mɔ na Yehowa ya ŋu, woɖɔa li fu abe hɔ̃ ene, woƒua du metia wo o, wozɔa azɔli ɖeɖi metea wo ŋu o.”—Yesaya 40:29-31.
29 Ðewohĩ mɔzɔzɔ sesẽ si wòle be aboyomeawo nava zɔ atrɔ yi wo de lae nɔ susu me na Yehowa esi wònɔ nu ƒom tso alesi wòahiã be woana ŋusẽ amesiwo ŋu ɖeɖi te ŋu. Yehowa ɖo ŋku edzi na eƒe dukɔa be yelɔ̃a kpekpeɖeŋu nana ame beli siwo dia kpekpeɖeŋu tso ye gbɔ. Nu ate ŋu ati kɔ na amegbetɔ sesẽtɔwo—“ɖekakpuiwo” kple “ŋutsuwo”—le hloloetsotso kple ɖeɖiteameŋu ta. Ke hã Yehowa do ŋugbe be yeana ŋusẽ—ŋusẽ yeye si woatsɔ aƒu du ahazɔ azɔli—amesiwo ɖoa ŋu ɖe ye ŋu. Wozã hɔ̃ si nye xe sẽŋu aɖe si te ŋu saa agba le yame ʋĩ henɔa afima gaƒoƒo geɖe la ƒe dzodzo si dzena abe ɖe mesesẽ kura o ene la tsɔ wɔ alesi Yehowa doa ŋusẽ esubɔlawoe la ƒe kpɔɖeŋu.e Esi mɔkpɔkpɔ li be Mawu ana kpekpeɖeŋu alea ta la, mele be dzi naɖe le Yudatɔ aboyomenɔlaawo ƒo kura o.
30. Aleke Kristotɔ vavã siwo li egbea ate ŋu akpɔ akɔfafa tso Yesaya ta 40 lia ƒe kpukpui mamlɛawo mee?
30 Akɔfanyawo le Yesaya ta 40 lia ƒe kpukpui mamlɛ siawo me na Kristotɔ vavã siwo le nuɖoanyi vɔ̃ɖi sia ƒe ŋkeke mamlɛwo me. Esi xaxa kple kuxi siwo ɖea dzi le ame ƒo bɔ ta la, edoa ŋusẽ ame be míanya be nɔnɔme sesẽ siwo me míetona kple nu madzɔmadzɔ si wowɔna ɖe mía ŋu mele ɣaɣla ɖe mía Mawu la o. Míate ŋu aka ɖe edzi be nuwo katã Wɔla, Amesi ƒe ‘nunya ŋu goléƒe mele o,’ la aɖɔ nu madzɔmadzɔwo katã ɖo le ye ŋutɔ ƒe ɣeyiɣi dzi kple le eƒe mɔ nu. (Psalmo 147:5, 6) Hafi ɣemaɣi naɖo la, mele be míado dzi le mía ŋutɔ ƒe ŋusẽ me o. Yehowa, amesi ƒe ŋusẽ mevɔna o la ate ŋu ado ŋusẽ esubɔlawo—ado “ŋusẽ ƒe agbɔsɔsɔ, si gbã go” gɔ̃ hã wo—le dodokpɔɣiwo me.—Korintotɔwo II, 4:7.
31. Gbɔgbɔmekekeli ƒe ŋugbedodo kae nɔ Yesaya ƒe nyagblɔɖia me na Yudatɔ aboyome siwo nɔ Babilon, eye nuka dzie míate ŋu aka ɖo bliboe?
31 Bu Yudatɔ aboyomenɔla mawo siwo nɔ Babilon le ƒe alafa adelia D.M.Ŋ. me ŋu kpɔ. Yerusalem si nye woƒe du lɔlɔ̃ si gbɔ didi kilometa alafa geɖe la zu aƒedo eye wogbã eƒe gbedoxɔa. Gbɔgbɔmekekeli kple mɔkpɔkpɔ ƒe ŋugbedodo fakɔname aɖe nɔ Yesaya ƒe nyagblɔɖia me na wo—eyae nye be Yehowa agaɖo wo te le wo denyigbaa dzi! Le ƒe 537 D.M.Ŋ. me la, Yehowa kplɔ eƒe dukɔa yi wo de, eye wòɖee fia be yenye ŋugbedodowo Dziwɔla. Míawo hã míate ŋu aka ɖe Yehowa dzi bliboe. Eƒe Fiaɖuƒeŋugbedodo siwo wogblɔ wònya se ŋutɔ le Yesaya ƒe nyagblɔɖia me la ava eme ŋutɔŋutɔ. Nyanyui wònye vavã—enye gbɔgbɔmekekeli ƒe gbedasi na ameƒomea katã!
[Etenuŋɔŋlɔwo]
a Yesaya gblɔ alesi woadzra mɔ dzi ɖo na Yehowa ɖi. (Yesaya 40:3) Gake nusi Yohanes Amenyrɔɖetsimela la wɔ le mɔ dzi dzadzraɖo na Yesu Kristo me ŋue Nyanyuigbalẽawo zã nyagblɔɖi ma na. Kristotɔwo ƒe Hela Ŋɔŋlɔawo ŋlɔla siwo gbɔgbɔ ʋã la ɖe nu me alea elabena Yesu nɔ Fofoa teƒe eye Fofoa ƒe ŋkɔ mee wòva le.—Yohanes 5:43; 8:29.
b Wobu akɔnta be “atsiaƒuwo ƒe kpekpeme ade metrik tɔn quintillion 1.35 (1.35 x 1018) alo Anyigba bliboa ƒe kpekpeme si woma ɖe akpa 4400 me la ƒe ɖeka.”—Encarta 97 Encyclopedia.
c The Expositor’s Bible Commentary gblɔ be: “Le Ɣedzeƒenutome asitsaƒewo la, womeléa ŋku ɖe tsi toŋ si le tsidzidzenu ŋu alo ʋuʋudedi sue si le nudanu ŋu ne wole lã alo atikutsetse dam o.”
d Nyagbɔgblɔ “mavɔ” si wozã le Yesaya 40:28 la fia “tegbee,” elabena Yehowa nye “fia mavɔmavɔtɔ.”—Timoteo I, 1:17.
e Ne hɔ̃ le agba sam le yame la, mezãa eƒe ŋusẽ boo o. Ewɔa yaƒoƒo, alo ya xɔdzo si yia dzi la, ŋudɔ aɖaŋutɔe le esia wɔwɔ me.
[Aɖaka/Nɔnɔmetata si le axa 404, 405]
Yehowa Nye Alẽkplɔla Lɔ̃ame
Yesaya tsɔ Yehowa sɔ kple alẽkplɔla lɔ̃ame si tsɔa eƒe alẽviwo ɖe akɔnu tsɔ wɔ Yehowa ƒe ɖetsɔleme na eƒe dukɔa ƒe kpɔɖeŋui. (Yesaya 40:10, 11) Edze ƒã be blema alẽkplɔlawo ƒe agbemenuwɔna ŋutɔŋutɔ dzie Yesaya tu kpɔɖeŋu wɔdɔɖeamedzi sia ɖo. Ame aɖe si nɔ alẽkplɔla siwo le Hermon To si le Titina Ɣedzeƒe ƒe abunu kpɔm le egbeŋkekea me ka nya ta be: “Alẽkplɔla ɖesiaɖe nɔ ŋku lém ɖe eƒe alẽha ŋu nyuie be yeakpɔ alesi wole ɖa. Ne ekpɔ alẽvi si wodzi yeyee la, etsɔnɛ dea eƒe . . . awu ʋlaya gã la me, elabena ŋusẽ mele eŋu wòakplɔ dadaa ɖo o. Ne eƒe akɔnu yɔ la, ekɔa alẽviawo ɖe abɔta heléa woƒe afɔ, alo dea wo akplo loo alo kusi si le tedzi dzi me, vaseɖe esime vi fẽawo ate ŋu azɔ akplɔ wo dada ɖo.” Ðe mefaa akɔ na mí be míanya be Mawu si tsɔa ɖe le eƒe amewo me lɔlɔ̃tɔe alea subɔmee míele oa?
[Aɖaka/Nɔnɔmetata si le axa 412]
Nɔnɔme Ka Mee Anyigba la Le?
Le blema la, ame geɖe xɔe se be anyigba le gbadzaa. Gake le keke ƒe alafa adelia D.M.Ŋ. me ke la, Helatɔ xexemenunyala Pythagoras tsɔ susu bui be anyigba la anye nu nogo. Togbɔ be ele alea hã, ƒe alafa eve hafi Pythagoras nava do eƒe susua ɖa gɔ̃ hã la, nyagblɔɖila Yesaya tsɔ kakaɖedzi gblɔe eme kɔ ƒã wòɖe dzesi be: “Amesi le anyigba si le nogo la tame.” (Yesaya 40:22, NW) Woagate ŋu aɖe Hebrigbe me nya chugh si gɔme woɖe le afisia be “nogo” la gɔme be “nusi le godoo.” Enyo be míade dzesii be nu nogo koe míakpɔ be exa nyuie eɖanye afika ke míetsi tre ɖo o.f Eyata nyagblɔɖila Yesaya ŋlɔ nya si sɔ ɖe dzɔdzɔmeŋutinunya nu eye blemaglitotowo metɔtɔe o la ɖi wòde ŋgɔ wu eƒe ɣeyiɣia me tɔwo ƒe susu.
[Etenuŋɔŋlɔ]
f Ne míagblɔe tututu la, nu nogo si ƒe dzigbe kple anyigbe de sɔsɔ gee anyigba nye. Etame kple eƒe anyime le gbadzaa vie.
[Nɔnɔmetata si le axa 403]
Yohanes Amenyrɔɖetsimelae nye gbeƒãɖela si ƒe ‘gbe nɔ ɖiɖim le gbedzi’