Ta Blaevelia
Yehowa ƒe Alɔ Meto Ðe Eme O
1. Aleke nuwo nɔ le Yuda, eye nya kae ame geɖe biana?
YUDA dukɔa gblɔ be nubabla le yewo kple Yehowa dome. Ke hã kuxiwo nɔ dukɔa ƒe afisiafi. Womedrɔ̃a ʋɔnu dzɔdzɔe o, nuvlowɔwɔ kple ameteteɖeanyi bɔ, eye woƒe mɔkpɔkpɔ be nuwo ava ka ɖe eme la meva eme o. Nane gblẽ le wo ŋu vevie. Ame geɖe biana be ɖe Yehowa ava wɔ nane tso eŋu gbaɖegbe hã. Aleae nuwo nɔ le Yesaya ƒe ŋkekeawo me. Gake menye blemaŋutinya dzro koe nusi Yesaya ŋlɔ ɖi le ɣeyiɣi sia ŋu nye o. Nyagblɔɖi me nuxlɔ̃amewo le eƒe nyawo me na amesiame si gblɔna be yesubɔa Mawu gake wòŋea aɖaba ƒua Eƒe sewo dzi. Eye nyagblɔɖi si tso gbɔgbɔ me si woŋlɔ ɖe Yesaya ta 59 la nye dzideƒonamenya dodzidzɔname na amesiwo katã dzea agbagba be yewoasubɔ Yehowa togbɔ be wole ɣeyiɣi sesẽ siwo me afɔku le me hã.
Wote Ða le Mawu Vavã la Gbɔ
2, 3. Nukata Yehowa meganɔ Yuda ta kpɔm o?
2 Bu eŋu kpɔ ko—dukɔ si Yehowa bla nu kpli la va zu xɔsegbelawo! Wogbugbɔ le wo Wɔla la yome, eye woto esia me ɖe wo ɖokui ɖa tso eƒe alɔ si kpɔa ame ta la te. Esia na wonɔ fu kpem vevie. Ðe wòanye be woagblɔ be Yehowae na yewole nɔnɔme sesẽ sia me toma? Yesaya gblɔ na wo be: “Kpɔ ɖa, Yehowa ƒe alɔ meto ɖe eme, be maxɔ na ame o, eye eƒe to metsi be mase nu o; ke boŋ miaƒe vodadawoe klã mia kple miaƒe Mawu dome, eye miaƒe nuvɔ̃woe na be, wòɣla ŋku me ɖe mi, be magaɖo to mi o.”—Yesaya 59:1, 2.
3 Wogblɔ nya mawo tẽ gake wonye nyateƒe. Yehowa kpɔtɔ nye xɔname Mawu. Esi wònye ‘Gbedodoɖasela’ ta la, esea esubɔla wɔnuteƒewo ƒe gbedodoɖawo. (Psalmo 65:3) Gake meyraa nuvɔ̃wɔlawo o. Ameawo ŋutɔe na wo kple Yehowa dome klã. Woa ŋutɔwo ƒe vɔ̃ɖivɔ̃ɖi tae wòɣla ŋkume ɖe wo ɖo.
4. Nya kawoe wotsɔ ɖe Yuda ŋu?
4 Le nyateƒe me, nu gblẽ le Yuda ŋutɔ. Wogblɔ nya si wotsɔ ɖe wo ŋu la dometɔ aɖewo le Yesaya ƒe nyagblɔɖia me be: “Ʋu ƒo asi na mi, eye vodada le miaƒe asibidewo ŋu, miaƒe nuyiwo daa alakpa, eye miaƒe aɖewo gblɔa nya tovo.” (Yesaya 59:3) Ameawo kaa aʋatso hegblɔa nya madzɔmadzɔwo. Esi wogblɔ be “ʋu ƒo asi na mi” la, efia be wo dometɔ aɖewo wu ame gɔ̃ hã. Aleke gbegbe wogbe bubudede Mawu, amesi menye amewuwu ɖeɖekoe eƒe Se tsri o ke etsi tre ɖe ‘fuléle nɔviwò le wò dzime’ hã ŋu la ŋutii enye si! (Mose III, 19:17) Yudatɔwo ƒe nuvɔ̃wɔwɔ atraɖii kple emetsonu si womate ŋu aƒo asa na o nye ŋkuɖodzi na mía dometɔ ɖesiaɖe be ele be míaɖu susu kple seselelãme gbegblẽwo dzi. Ne menye nenema o la, ana míava wɔ nu vɔ̃ɖi siwo aklã mía kple Mawu dome.—Romatɔwo 12:9; Galatiatɔwo 5:15; Yakobo 1:14, 15.
5. Aleke gbegbe Yuda gblẽe?
5 Nuvɔ̃ gblẽ nu le dukɔ bliboa ŋu. Nyagblɔɖia gblɔ be: “Ame aɖeke meli, si biaa dzɔdzɔenyenye ta sena o, eye ame ɖeke medrɔ̃a ʋɔnu ɖe eteƒe o, woɖoa ŋu ɖe nu dzodzroa ŋu, eye wodaa alakpa, wofɔa hiãkame ƒe fu hetsɔa dzɔgbevɔ̃e dzina.” (Yesaya 59:4) Ame aɖeke megblɔa nya dzɔdzɔe o. Esesẽ be woakpɔ amesi dzi woate ŋu aka ɖo alo nuteƒewɔla le ʋɔnudrɔ̃ƒewo gɔ̃ hã. Yuda gbugbɔ le Yehowa yome eye woɖo ŋu ɖe nubabla kple dukɔwo ŋu, ɖe legba siwo me agbe mele o gɔ̃ hã ŋu. Nusiawo katã nye ‘nu dzodzro,’ viɖe aɖeke mele wo ŋu o. (Yesaya 40:17, 23; 41:29) Esia na wodzroa nya geɖe me, gake tofloko ko wo katã nye. Wodea aɖaŋu, gake fukpekpe kple dzɔgbevɔ̃e wòhena vɛ.
6. Aleke Kristodukɔa ƒe ŋutinya sɔ kple Yuda tɔe?
6 Numadzɔmadzɔwɔwɔ kple ŋutasesẽ si nɔ Yuda la sɔ pɛpɛpɛ kple nusi le edzi yim le Kristodukɔa me. (Kpɔ “Yerusalem si Gbe Xɔse—Esɔ Kple Kristodukɔa,” le axa 294.) Dukɔ siwo be Kristotɔwoe yewonye domee wowɔ xexemeʋa dziŋɔ eve le. Va ɖo egbegbe la, Kristodukɔa ƒe mawusubɔsubɔ mete ŋu tɔ te gbeɖekadolawo tsɔtsrɔ̃ kple to vovovowo ƒe wo nɔewo wuwu siwo yia edzi le eya ŋutɔ ƒe amewo dome la o. (Timoteo II, 3:5) Togbɔ be Yesu fia eyomedzelawo be woaɖo ŋu ɖe Mawu Fiaɖuƒea ŋu hã la, asrafowo ƒe aʋawɔnuwo kple dunyahehe me nubablawo ŋue dukɔ siwo le Kristodukɔa me yia edzi ɖoa dzi ɖo be woawoe ana yewoanɔ dedie. (Mateo 6:10) Le nyateƒe me, dukɔ siwo le Kristodukɔa me domee xexeame ƒe aʋawɔnuwɔla gãtɔwo le! Ẽ, esi Kristodukɔa ɖoa dzi ɖe amegbetɔ ƒe agbagbadzedze kple eƒe habɔbɔwo ŋu be woawoe ana yewoanɔ dedie le etsɔme ta la, “nu dzodzroa ŋu” enye ma woawo hã le ŋu ɖom ɖo.
Emetsonu Gbegblẽwo Kpɔkpɔ
7. Nukata wònye nu gbegblẽwo sɔŋ koe do tso Yuda ƒe ɖoɖowo me?
7 Trɔ̃subɔsubɔ kple anukwaremaɖimaɖi mate ŋu awɔ amewo ame nyuiwoe o. Esi Yudatɔ nuteƒemawɔlawo wɔ nusiawo ta la, wova nɔ xaxa siwo woa ŋutɔwo ƒa la ŋem. Míexlẽ be: “Woƒoa dakpui ƒe azi, eye wolɔ̃a yiyiɖɔ; amesi ɖua woƒe azi la, aku, eye ne wogbãe kple afɔ la, ƒli ado atso me.” (Yesaya 59:5) Tso esime Yuda dze eƒe ɖoɖowo wɔwɔ gɔme vaseɖe esime wova eme la, nu nyui aɖeke medo tso eme o. Nu gbegblẽ sɔŋ koe do tso woƒe tamesusu vɔ̃awo me, abe alesi da vɔ̃ɖi ƒe azi ƒoa da vɔ̃ɖii ene. Eye ena dukɔa kpe fu.
8. Nukae ɖee fia be tame gbegblẽe Yuda bu?
8 Ðewohĩ Yudatɔ aɖewo awɔ ŋutasẽnuwo be woatsɔ akpɔ wo ɖokui tae, gake woado kpo nu. Womate ŋu atsɔ akpasesẽnuwɔwɔ aɖɔ li ŋuɖoɖo ɖe Yehowa ŋu kple nudzɔdzɔewɔwɔ wòakpɔ wo ta o abe alesi yiyiɖɔ mate ŋu aɖɔ li avɔ ŋutɔŋutɔ be wòakpɔ ame ta le vuvɔ me o ene. Yesaya gblɔ be: “Woƒe kawo mazu avɔ akpɔ o, eye womatsyɔ woƒe dɔwɔwɔwo o; woƒe dɔwɔwɔwo nye dɔ vɔ̃ɖiwo, eye ŋutasesẽ le woƒe asiwo me. Woƒe afɔwo le du dzi ɖe vɔ̃ɖiwɔwɔ ŋu, eye wole abla ɖem, be woakɔ ʋu maɖifɔ ɖi. Woƒe susuwo nye susu vɔ̃ɖiwo, gbegblẽ kple tsɔtsrɔ̃ le wo toƒewo.” (Yesaya 59:6, 7) Nane gblẽ le Yuda ƒe tamebubu ŋu. Eɖe mawumavɔ̃mavɔ̃ ƒe nɔnɔme fia esi wòwɔ ŋutasẽnu be yeatsɔ akpɔ yeƒe kuxiwo gbɔe. Metsɔ ɖeke le eme be amesiwo ŋu wògblẽ nu le la dometɔ geɖe meɖi fɔ o eye be wo dometɔ aɖewo nye mawusubɔla vavãwo o.
9. Nukata ŋutifafa vavãtɔ mate ŋu asu Kristodukɔa kplɔlawo si o?
9 Nya siawo siwo tso gbɔgbɔ me la na míeɖo ŋku Kristodukɔa ƒe ŋutinya si me ʋukɔkɔɖi yɔ fũ la dzi. Yehowa abia akɔntae godoo ɖe alesi wògblẽ Kristotɔnyenye ƒe ŋkɔ nublanuitɔe ta! Abe Yudatɔ siwo nɔ anyi le Yesaya ŋɔli ene la, Kristodukɔa nɔ agbe tovowo le esi eƒe kplɔlawo xɔe se be eya koe nye mɔ nyuitɔ ta. Togbɔ be woƒoa nu tso ŋutifafa ŋu hã la, wowɔa nu madzɔmadzɔ. Alakpanuwɔwɔ ka gbegbee nye si! Esi Kristodukɔa kplɔlawo yi edzi le nu wɔm alea ta ŋutifafa vavãtɔ mate ŋu asu wo si akpɔ o. Ele abe alesi nyagblɔɖia gblɔe yi edzii ene be: “Womenyaa ŋutifafa mɔ la o, eye nu dzɔdzɔe aɖeke menɔa wo toƒe o, woglɔ̃a woƒe mɔ, eye amesi toa edzi la, menyaa ŋutifafa aɖeke o.”—Yesaya 59:8.
Wole Asi Tsam Gbɔgbɔmeviviti Me
10. Aleke Yesaya ʋu nuvɔ̃ me ɖe Yuda nui?
10 Yehowa mate ŋu ayra ɖe Yuda ƒe mɔ vɔ̃ siwo gblẽa nu la dzi o. (Psalmo 11:5) Eyata Yesaya ƒo nu ɖe dukɔ bliboa nu heʋu Yuda ƒe fɔɖiɖi me be: “Ðoɖo la le adzɔge na mí, eye dzɔdzɔenyenye gbe mía gbɔ vava; míele mɔ kpɔm na kekeli, kpɔ ɖa, viviti li, míele mɔ kpɔm na xexeme ƒe kɔkɔ, ke míele zɔzɔm le blukɔ me. Míele asi tsam le gli ŋu abe ŋkuagbãtɔwo ene, eye míele asi tsam abe ŋkunɔwo ene. Míekli nu le ŋdɔkutsu dzatsɛ abe le zã me ene, eye míele ame damiwo dome abe ame kukuwo ene! Mí katã míele gbe tem abe sisiblisiwo ene, eye míele xɔxlɔ̃m abe ahɔnewo ene.” (Yesaya 59:9-11a) Yudatɔwo mena Mawu ƒe Nya la zu akaɖi na woƒe afɔ kple kekeli na woƒe toƒe o. (Psalmo 119:105) Esia na wole viviti me. Wotsaa asi anyi le ŋdɔkutsu dzatsɛ abe zã me ene. Ðeko wòwɔ abe ɖe woku ene. Woƒe gbɔdzɔe didi na wote gbe abe sisiblisi dɔwuitɔ alo xɔabi ene. Wo dometɔ aɖewo xlɔ̃ nublanuitɔe, abe ahɔne tsiakogowo ene.
11. Nukata Yuda ƒe mɔkpɔkpɔ na nya dzɔdzɔe kple xɔname zu dzodzro?
11 Yesaya nya nyuie be esi Yuda dze aglã ɖe Mawu ŋu tae woxaxa ɖo. Egblɔ be: “Míele mɔ kpɔm na ʋɔnudɔdrɔ̃, ke meva o, míele mɔ kpɔm na xɔname, ke etsi adzɔge na mí. Elabena míaƒe dzidadawo sɔ gbɔ le ŋkuwò me, eye míaƒe nuvɔ̃wo le ɖase ɖim le mía ŋu. Elabena míedze si míaƒe dzidadawo, eye míaƒe vodadawo la míenya wo. Míeda vo, eye míegbe Yehowa, míede megbe tso mía Mawu la gbɔ, eye míeƒo ŋutasesẽ kple godzedze ƒe nu, míefɔ alakpanya ƒe fu, eye míedzii tso dzi me.” (Yesaya 59:11b-13) Esi Yudatɔwo metrɔ dzime o ta la, woƒe nuvɔ̃wo gale wo ŋu kokoko. Nya dzɔdzɔe megale anyigba la dzi o elabena ameawo gblẽ Yehowa ɖi. Wowɔ alakpanu le mɔ sia mɔ nu, eye wote wo nɔviwo ɖe anyi gɔ̃ hã. Aleke gbegbe woɖi Kristodukɔa me tɔwo egbea enye si! Menye nu dzɔdzɔe wɔwɔ dzi koe wo dometɔ geɖe ŋea aɖaba ƒunɛ o ke wotia Yehowa ƒe Ðasefo nuteƒewɔla siwo dina be yewoawɔ Mawu ƒe lɔlɔ̃nu hã yome vevie.
Yehowa He Ʋɔnudɔdrɔ̃ Vɛ
12. Nɔnɔme kae nɔ amesiwo wòle be woadrɔ̃ nya dzɔdzɔe le Yuda la si?
12 Edze abe nya dzɔdzɔe, dzɔdzɔenyenye, alo nyateƒe mele Yuda o ene. “Ðoɖo la gbugbɔ ɖe megbe, eye dzɔdzɔenyenye tsi adzɔge. Elabena nyateƒe le nu klim le [ablɔme, “NW”], eye nuteƒewɔwɔ mate ŋu age ɖe eme o.” (Yesaya 59:14) Ablɔme nɔ Yuda-dugãwo ƒe agbowo megbe, afisi ame tsitsiwo kpena dzroa senyawo me le. (Rut 4:1, 2, 11) Ele be ŋutsu siawo nadrɔ̃ ʋɔnu le dzɔdzɔenyenye me eye woadi nya dzɔdzɔe, ahagbe zãnu xɔxɔ. (Mose V, 16:18-20) Gake woa ŋutɔwo ƒe ɖokuitɔdidi nukpɔsusuwo dzie wonɔa te ɖo drɔ̃a ʋɔnu. Nusi gavɔ̃ɖi wue nye be wobua amesiame si dzea agbagba anukwaretɔe be yeawɔ nu nyui la be enye amesi ŋu yewoate ŋu agblẽ nu le bɔbɔe. Míexlẽ be: “Nyateƒe bu ɖe ame, eye amesi ƒo asa na vɔ̃ɖiwɔwɔ la, wohae.”—Yesaya 59:15a.
13. Esi Yuda ʋɔnudrɔ̃lawo metsɔ ɖeke le woƒe dɔ me o ta la, nukae Yehowa awɔ?
13 Amesiwo meƒoa nu tsia tre ɖe agbevlonɔnɔ ŋu o ŋlɔ be bena Mawu menye ŋkuagbãtɔ, ɖekemanyala, alo ŋusẽmanɔsitɔ o. Yesaya ŋlɔ bena: “Yehowa kpɔ be, nu dzɔdzɔe wɔwɔ aɖeke meli o, eye medze eŋu o. Eye wòkpɔ be, ame aɖeke meli o, eye wòwɔ mo yaa nɛ be, avuléla aɖeke meli o. Tete wòtsɔ eƒe alɔ xɔ na eɖokui, eye eƒe dzɔdzɔenyenye kpe ɖe eŋu.” (Yesaya 59:15b, 16) Esi ʋɔnudrɔ̃la siwo woɖo metsɔ ɖeke le woƒe dɔ me o ta la, Yehowa ade asi nyaa me. Ne ede asi eme la, awɔ nu le dzɔdzɔenyenye kple ŋusẽ me.
14. (a) Nɔnɔme kae le ame geɖe si egbea? (b) Aleke Yehowa le akpa blamee ɖe nuwɔwɔ ŋu?
14 Nɔnɔme sia tɔgbe aɖe li egbea. Míele xexe si me ame geɖe ƒe “dzitsinya ku atri” le la me. (Efesotɔwo 4:19) Ame ʋɛ aɖewo koe xɔe se be Yehowa ade asi nyawo me aɖe vɔ̃ɖinyenye ɖa le anyigba dzi. Gake Yesaya ƒe nyagblɔɖia fia be Yehowa le ŋku lém ɖe amegbetɔ ƒe nuwɔna ɖesiaɖe ŋu. Edrɔ̃a ʋɔnu amewo, eye ewɔa nu ɖe ʋɔnudɔdrɔ̃ mawo nu le eya ŋutɔ ƒe ɣeyiɣi dzi. Ðe eƒe ʋɔnudɔdrɔ̃wo dzɔa? Yesaya ɖee fia be wodzɔ. Eŋlɔ le Yuda-dukɔa ŋu be: “[Yehowa do] dzɔdzɔenyenye abe gawu ene, eye wòɖɔ xɔname ƒe gakuku ɖe ta; eta hlɔ̃biabia abe avɔ ene, eye wòda ŋuʋaʋã ɖe abɔ abe taɖedzi ene.” (Yesaya 59:17) Nyagblɔɖi sia ɖɔ Yehowa abe aʋakalẽtɔ si le akpa blam na aʋagbedzi yiyi ene. Eɖoe kplikpaa be yeawɔ nu axɔ na ame. Eka ɖe eya ŋutɔ ƒe dzɔdzɔenyenye deblibo si ŋu ɖikeke mele o la dzi. Eye atsɔ dzonɔameme awɔ nu vɔvɔ̃manɔmee le eƒe ʋɔnudɔdrɔ̃ me. Ðikeke aɖeke mele eme o be nudzɔdzɔewɔwɔ aɖu dzi godoo.
15. (a) Aleke Kristotɔ vavãwo awɔ nui ne Yehowa he ʋɔnudɔdrɔ̃ vɛ? (b) Nya kae míate ŋu agblɔ le Yehowa ƒe ʋɔnudɔdrɔ̃wo ŋu?
15 Le dukɔ aɖewo me egbea la, nyateƒea ƒe futɔwo kakaa aʋatso kple gbɔɖiame nyawo kple susu be yewoado kplamatse Yehowa subɔlawo ƒe dɔa. Nyateƒe Kristotɔwo mehena ɖe megbe le nyateƒea taʋiʋli me o, gake womebiaa hlɔ̃ na wo ɖokui gbeɖe o. (Romatɔwo 12:19) Ne Yehowa va le akɔnta biam Kristodukɔ si gbe xɔse la gɔ̃ hã la, Yehowa subɔla siwo le anyigba dzi makpɔ gome le etsɔtsrɔ̃ me o. Wonya be hlɔ̃biabia nye Yehowa tɔ eye be awɔ nusi sɔ ne ɣeyiɣia ɖo. Nyagblɔɖia ka ɖe edzi na mí be: “Aɖo eteƒe ɖe nuwɔwɔwo nu: eƒe ketɔwo tɔ enye dziku, teƒeɖoɖo enye eƒe futɔwo tɔ, eye wòaɖo ƒukpowo ƒe nuwɔwɔwo teƒe na wo.” (Yesaya 59:18) Abe alesi wònɔ le Yesaya ƒe ŋkekea me ene la, menye ɖeko Mawu ƒe ʋɔnudɔdrɔ̃wo adzɔ o ke woade wo deƒe hã. Woaɖo “ƒukpowo” gɔ̃ hã dzi le didiƒewo. Ame aɖeke manɔ adzɔge alo atso abo akpa be Yehowa ƒe ʋɔnudɔdrɔ̃wo mate ŋu aɖo egbɔ o.
16. Amekawoe atsi agbe ne Yehowa he ʋɔnudɔdrɔ̃ vɛ, eye nukae woasrɔ̃ tso woƒe agbetsitsia me?
16 Yehowa drɔ̃a ʋɔnu dzɔdzɔe na amesiwo dzea agbagba be yewoawɔ nu nyui. Yesaya gblɔ ɖi be amesiawo atsi agbe tso anyigba ƒe akpa si yi akpa kemɛ—le anyigba bliboa katã dzi. Eye alesi Yehowa akpɔ wo tae ana woagade bubu deto eŋu ahasii ɖa geɖe wu. (Maleaxi 1:11) Míexlẽ be: “Ɣetoɖoƒetɔwo avɔ̃ Yehowa ƒe ŋkɔ, eye ɣedzeƒetɔwo avɔ̃ eƒe ŋutikɔkɔe, elabena ele vava ge abe tɔsisi, si xaxa, eye Yehowa ƒe ahom lɔ ɖe nu la ene.” (Yesaya 59:19) Yehowa ƒe gbɔgbɔ aɖe nusianu si nye mɔxenu na eƒe lɔlɔ̃nu me vava ɖa, abe ahom sesẽ si lɔ tsiɖɔɖɔ gblẽnu ɖe nu eye wòkplɔ nusianu si le eƒe mɔ me yinae la ene. Eƒe gbɔgbɔ tri akɔ wu amegbetɔ ƒe ŋusẽ ɖesiaɖe. Ne ezãe tsɔ he ʋɔnudɔdrɔ̃ va amewo kple dukɔwo dzii la, akpɔ dzidzedze blibo godoo.
Mɔkpɔkpɔ Kple Yayra Li na Dzimetrɔlawo
17. Amekae nye Zion ƒe Xɔnametɔ, eye ɣekaɣie wògbugbɔ Zion ƒle?
17 Le Mose ƒe Sea te la, xɔnametɔ alo ameɖeleawɔbamela ate ŋu agbugbɔ Israel-vi si dzra eɖokui zu kluvi la aƒle tso kluvinyenye me. Wogblɔe do ŋgɔ le Yesaya ƒe nyagblɔɖigbalẽa me be Yehowa nye Xɔnametɔ na amesiwo trɔ dzime. (Yesaya 48:17) Wogagblɔe ake le afisia hã be enye Xɔnametɔ na dzimetrɔlawo. Yesaya ŋlɔ Yehowa ƒe ŋugbedodoa ɖi be: “Anye ɖela ava na Zion, eye na amesiwo trɔ tso woƒe dzidadawo me le Yakob; Yehowa ye gblɔe.” (Yesaya 59:20) Ŋugbedodo sia si ŋu kakaɖedzi le la va eme le ƒe 537 D.M.Ŋ. me. Gake egava eme ake. Apostolo Paulo yɔ nya siawo tso Septuagint Biblia gɔmeɖeɖea me ku ɖe Kristotɔwo ŋu. Eŋlɔ bena: “Nenema ke woaxɔ Israel blibo la ɖe agbe, abe alesi woŋlɔ ɖi ene bena: ‘Ðela la atso Zion, eye wòava aɖe mawumavɔ̃mavɔ̃ ɖa tso Yakob gbɔ; eye esiae nye nubabla, si le mía kpli wo dome, ne maɖe woƒe nuvɔ̃wo ɖa.’” (Romatɔwo 11:26, 27) Le nyateƒe me la, Yesaya ƒe nyagblɔɖia gava me le mɔ si keke ta wu nu—eye eɖo míaƒe ɣeyiɣia me kple emegbe. Le mɔ ka nu?
18. Ɣekaɣie Yehowa ɖo “Mawu ƒe Israel” la anyi, eye to mɔ ka dzi?
18 Le ƒe alafa gbãtɔ me la, Israel-dukɔa ƒe ame susɔe ʋɛ aɖewo xɔ Yesu be eyae nye Mesia la. (Romatɔwo 9:27; 11:5) Le ƒe 33 M.Ŋ. ƒe Pentekoste-ŋkekea dzi la, Yehowa kɔ eƒe gbɔgbɔ kɔkɔe ɖe xɔsetɔ mawo siwo ade 120 la dzi eye wòna wova nɔ eƒe nubabla yeye si Yesu Kristo nye domenɔla na la me. (Yeremya 31:31-33; Hebritɔwo 9:15) Gbemagbee woɖo “Mawu ƒe Israel” anyi, wònye dukɔ yeye si me tɔwo wotsɔ Mawu ƒe gbɔgbɔ dzii, ke menye to Abraham ƒe dzidzimevi nyenye le ŋutilã me dzi o. (Galatiatɔwo 6:16) Trɔ̃subɔdukɔ me tɔ aʋamatsomatsotɔwo hã va le dukɔ yeye sia me tso Kornelio dzi. (Dɔwɔwɔwo 10:24-48; Nyaɖeɖefia 5:9, 10) Yehowa Mawu to esia me xɔ wo wozu eƒe gbɔgbɔmevi siwo nye Yesu ƒe hatidziɖulawo.—Romatɔwo 8:16, 17.
19. Nubabla kae Yehowa wɔ kple Mawu ƒe Israel la?
19 Azɔ Yehowa bla nu kple Mawu ƒe Israel. Míexlẽ be: “Yehowa be: Nusi mebla kpli wò la, enye si: Nye gbɔgbɔ, si le dziwò, kple nye nya, si metsɔ de nuwò la, mate ɖa le nuwò me alo le viwòwo kple viwòwo ƒe viwo nu me o, tso fifia ɖaseɖe mavɔ me, Yehowa ye gblɔe!” (Yesaya 59:21) Nya siawo ɖava eme ɖe Yesaya ŋutɔ dzi loo alo meɖava eme o, wova eme ɖe Yesu, amesi woka ɖe edzi na be ‘akpɔ eƒe dzidzimeviwo’ la ya dzi. (Yesaya 53:10) Yesu gblɔ nya siwo wòse tso Yehowa gbɔ, eye Yehowa ƒe gbɔgbɔ nɔ edzi. (Yohanes 1:18; 7:16) Esɔ be nɔvia kple hatidziɖula siwo nye Mawu ƒe Israel la me tɔwo hã xɔa Yehowa ƒe gbɔgbɔ kɔkɔea eye woɖea gbeƒã gbedasi si wose tso wo Fofo si le dziƒo la gbɔ. Wo katã wonye “Yehowa ƒe nusrɔ̃viwo.” (Yesaya 54:13; Luka 12:12; Dɔwɔwɔwo 2:38) Eɖanye to Yesaya dzi alo to Yesu, amesi Yesaya tsi tre ɖi na le nyagblɔɖi me dzi o, Yehowa bla nu azɔ be yemaɖɔ li wo akpɔ o ke boŋ yeazã wo woanye yeƒe ɖasefowo yi ɖe mavɔ me. (Yesaya 43:10) Gake amekawoe nye wo ‘vi’ siwo hã nubabla sia aɖe vi na?
20. Aleke ŋugbe si Yehowa do na Abraham va eme le ƒe alafa gbãtɔ mee?
20 Yehowa do ŋugbe na Abraham le blema be: “To wò dzidzimeviwo me woayra anyigba dzi dukɔwo katã le.” (Mose I, 22:18) Le ɖekawɔwɔ me kple esia la, dzɔdzɔme Israel-viwo ƒe ame susɔe ʋɛ siwo xɔ Mesia la do yi dukɔ geɖe me ɖaɖe gbeƒã Kristo ŋuti nyanyuia. Tso Kornelio dzi la, Trɔ̃subɔdukɔwo me tɔ aʋamatsomatsotɔ geɖe to Yesu si nye Abraham ƒe Dzidzimevi la dzi ‘yra wo ɖokui.’ Wova zu Mawu ƒe Israel la me tɔwo kple Abraham ƒe dzidzimevia ƒe akpa evelia. Wonye Yehowa ƒe “dukɔ kɔkɔe” la me tɔwo, amesiwo wode dɔ asi na be ‘woaɖe gbeƒã amesi yɔ wo tso viviti me va ye ŋutɔ ƒe nukukekeli gbɔ la ƒe nutsuwɔwɔwo afia.’—Petro I, 2:9; Galatiatɔwo 3:7-9, 14, 26-29.
21. (a) ‘Dzidzimevi’ kawoe ɖo Mawu ƒe Israel la si le míaƒe ɣeyiɣia me? (b) Aleke nubabla, alo ɖoɖo, si Yehowa wɔ kple Mawu ƒe Israel la fa akɔ na ‘dzidzimeviwoe’?
21 Egbea edze abe woƒo Mawu ƒe Israel la me tɔwo katã nu ƒu vɔ ene. Ke hã woyi edzi le dukɔwo yram—le mɔ si lolo wu nu. Le mɔ ka nu? Eyae nye be ‘dzidzimeviwo’ va le Mawu ƒe Israel la si, amesiawoe nye Yesu ƒe nusrɔ̃la siwo ƒe mɔkpɔkpɔe nye agbe mavɔ nɔnɔ le paradisonyigba dzi. (Psalmo 37:11, 29) Yehowa fiaa nu ‘dzidzimevi’ siawo hã eye wòfiaa eƒe mɔ wo. (Yesaya 2:2-4) Togbɔ be wometsɔa gbɔgbɔ kɔkɔe naa nyɔnyrɔ wo alo bua wo nubabla yeyea me tɔwoe o hã la, Yehowa ƒe gbɔgbɔ kɔkɔea doa ŋusẽ wo woɖua mɔxenu siwo katã Satana dana ɖe mɔ me na wo le woƒe gbeƒãɖeɖedɔa me dzi. (Yesaya 40:28-31) Fifia woƒe xexlẽme ɖo miliɔn geɖe eye woyi edzi le dzidzim ɖe edzi, dzidzimeviwo le woawo hã si ɖom. Nubabla, alo ɖoɖo, si Yehowa wɔ kple amesiaminawo naa kakaɖedzi ‘dzidzimevi’ siawo be Yehowa ayi edzi azã yewo hã be yewoanye eƒe nyanuɖelawo yi ɖe mavɔ me.—Nyaɖeɖefia 21:3, 4, 7.
22. Aleke míate ŋu aka ɖe Yehowa dzii, eye dɔ kae wòle be esia nawɔ ɖe mía dzi?
22 Eyata neva eme be mí katã míalé míaƒe Yehowa dzixɔse me ɖe asi. Elɔ̃ faa be yeaxɔ na mí eye ate ŋu axɔ na mí hã! Eƒe alɔ mato ɖe eme akpɔ gbeɖe o; aɖe eƒe ame wɔnuteƒewo ɣesiaɣi. Eƒe nya nyuiwo mate ɖa le amesiwo katã ɖoa ŋu ɖe eŋu ƒe nu me o “tso fifia ɖaseɖe mavɔ me.”
[Aɖaka si le axa 294]
Yerusalem si Gbe Xɔse—Esɔ Kple Kristodukɔa
Yerusalem si nye Mawu ƒe dukɔ tiatia la ƒe fiadu la tsi tre ɖi na Mawu ƒe dziƒohabɔbɔ si me gbɔgbɔmenuwɔwɔwo le eye wògatsi tre ɖi na Kristotɔ amesiamina siwo wofɔ yi dziƒo wozu Kristo ƒe ŋugbetɔ ƒe ha la hã. (Galatiatɔwo 4:25, 26; Nyaɖeɖefia 21:2) Gake zi geɖe la, Yerusalemtɔwo mewɔ nuteƒe na Yehowa o, eye woyɔ du la be enye gbolo kple nyɔnu ahasitɔ. (Xezekiel 16:3, 15, 30-42) Yerusalem zu Kristodukɔ si gbe xɔse la ƒe kpɔɖeŋu si sɔ le nɔnɔme ma me.
Yesu yɔ Yerusalem be enye du “si wu nyagblɔɖilawo, eye wòƒu kpe amesiwo wodɔ ɖo ɖe egbɔ!” (Luka 13:34; Mateo 16:21) Abe Yerusalem mawɔnuteƒea ene la, Kristodukɔa gblɔna be yesubɔa Mawu vavã la, gake etra kura tso eƒe mɔ dzɔdzɔeawo gbɔ. Míate ŋu aka ɖe edzi be Yehowa azã dzidzenu dzɔdzɔe siwo wòtsɔ drɔ̃ ʋɔnu Yerusalem si gbe xɔse la ke adrɔ̃ ʋɔnu Kristodukɔae.
[Nɔnɔmetata si le axa 296]
Ele be ʋɔnudrɔ̃la nadrɔ̃ ʋɔnu le dzɔdzɔenyenye me, wòadi nya dzɔdzɔe, eye wòagbe zãnuxɔxɔ
[Nɔnɔmetata si le axa 298]
Yehowa ƒe ʋɔnudɔdrɔ̃wo aɖe nusiwo katã doa kplamatse eƒe lɔlɔ̃nu me vava ɖa, abe tɔɖɔɖɔ ene
[Nɔnɔmetata si le axa 302]
Yehowa bla nu kple eƒe amewo be ɖasefo siwo wonye na ye ƒe mɔnukpɔkpɔa mage le wo si akpɔ o