Nuƒoƒo Faa Tso Susu Me

ANƆ eme be nèdzra ɖo nyuie ɖe wò nuƒoa ŋu. Nufiame nyuiwo anɔ eme. Ðoɖo si nu wòazɔ ɖo la me kɔ kɔte. Àte ŋu aƒo nuƒoa nyuie. Gake ne wò nyaselawo ƒe susu me ma—nya si gblɔm nèle ƒe akpa aɖewo koe wole to ɖomee le esi woƒe susu le tsatsam le nu bubuwo dzi yim ta—la, ke viɖe kae le wò nuƒoa ŋu? Ne wòle sesẽm na wo be woatsɔ woƒe susu blibo akplɔ nuƒoa ɖoe la, ke ɖe wòate ŋu adzɔ be nàɖo woƒe dzi gbɔ ŋutɔŋutɔa?

Nuka gbɔe kuxi sia ate ŋu atso? Ate ŋu atso nu vovovo gbɔ. Zi geɖe la, etsoa alesi womeƒo nu faa tso susu me o gbɔ. Ne míagblɔe bubui la, nuƒolaa le eƒe nuŋlɔɖiwo dzi kpɔm kabakaba akpa, alo ele agbalẽ me nyagbɔgblɔ zãm akpa le nuƒoa me. Alesi wodzra nuƒoa ɖoe gbɔ koŋ ye kuxi siawo tsona.

Ne èŋlɔ wo nuƒoa me nyawo katã ɖi gbã hafi va le agbagba dzem be yeatrɔe wòazu nya vevi kpuiwo ko la, anɔ eme be asesẽ be wò nuƒoa nanye esi tso susu me faa. Nukatae? Elabena ètia nya siwo tututu nèdi be yeazã do ŋgɔ. Ne èva le nya vevi kpuiawo ko zãm le nuƒoa me gɔ̃ hã la, ànɔ agbagba dzem be yeaɖo ŋku nya siwo tututu yeŋlɔ ɖi gbã la dzi. Ne woŋlɔ nyawo ɖi la, nyagbeawo zɔna ɖe agbalẽ me nyaŋɔŋlɔmɔ nu ke menye ɖe alesi woƒoa nui gbesiagbe nu o eye nyagbeawo te ŋu didina wu alesi wònɔna le alesi míeƒoa nui ŋutɔŋutɔ me. Nu ma adze le wò nuƒoa ƒoƒo me.

Le esi nàŋlɔ nuƒoa me nyawo katã kloe ɖi teƒe la, te esia wɔwɔ boŋ kpɔ: (1) Tia tanya kple nya vevi siwo nàzã atsɔ adzro nyatia mee. Le nuƒo kpuiwo gome la, nya vevi ɖeka alo ave asɔ gbɔ. Nuƒo si didi wu me nya veviawo ate ŋu ade ene alo atɔ̃. (2) Le nya veviawo dometɔ ɖesiaɖe te la, ŋlɔ mawunyakpukpui vevi siwo nèdi be yeazã atsɔ aɖe emee; ŋlɔ kpɔɖeŋu kple kpeɖodzinya veviwo hã ɖi. (3) Bu alesi nàdze nuƒoa gɔmee ŋu. Àte ŋu aŋlɔ nyagbe ɖeka alo eve aɖewo ɖi gɔ̃ hã. Bu alesi nàƒo nyaa tae hã ŋu.

Dzadzraɖo ɖe nuƒoa ƒoƒo ŋu le vevie ŋutɔ. Gake mègasrɔ̃ nuƒoa nyaɖenyanui kple susu be nya siwo tututu nàzã natsi susu me na wò o. Be nàte ŋu aƒo nu faa tso susu me la, menye nya siwo nàzã dzie wòle be nàda susu ɖo le esɔsrɔ̃ me o ke susu siwo me nàɖe la gɔmesese dzi boŋ ye. Gbugbɔ to susuawo me vaseɖe esime woɖo ɖe wo nɔewo nu nyuie le wò susu me. Ne ètrɔ asi le wò nuƒoa ŋu alesi dze eye nyawo le ɖoɖo nu nyuie bene wo gɔme nanya se la, esia wɔwɔ masesẽ o, eye ne èle nuƒoa ƒom la, susuawo ado faa bɔbɔe.

Bu Viɖeawo Ŋu. Viɖe vevi ɖeka si le nuƒoƒo faa tso susu me ŋu enye be ànɔ nu ƒom le mɔ si nu egɔmesese anɔ bɔbɔe ŋutɔ nu eye esiae ʋãa amewo wu. Agbe anɔ wò nuƒoa me wu eye wòanya se na wò nyaselawo nyuie wu.

Nuƒoƒo alea ana mɔnukpɔkpɔ wò be wò ŋku nanɔ nyaselawo dzi bliboe wu, eye esia awɔe woase wò nyawo nyuie wòawɔ dɔ ɖe wo dzi. Esi mèle ŋu ɖom ɖe wò nuŋlɔɖia ŋu na nya sia nya gbɔgblɔ o ta la, adze ƒã na wò nyaselawo be nènya nya si gblɔm nèle nyuie eye nèka ɖe nyaa dzi tututu. Eyata nuƒoƒo alea ɖea vividodoɖeameŋu fiana, enɔa dzeɖoɖo ƒe nɔnɔme me, eye wòtsoa wò dzi me hegena ɖe amewo ƒe dzi me.

Nuƒoƒo faa tso susu me wɔnɛ be wote ŋu wɔa tɔtrɔwo le nuƒoa ƒoƒo me bɔbɔe. Womeŋlɔ nya sia nya ɖi kpaɖii ale gbegbe be tɔtrɔ aɖeke meganya wɔna o. Tsɔe be le ŋkeke si dzi nàƒo wò nuƒoa la, wogblɔ nya vevi aɖe le nyadzɔdzɔwo me si wɔ ɖeka kple wò nyatia tẽ. Ðe masɔ be nàdee eme oa? Alo ɖewohĩ esi nèle nuƒoa ƒom la, ède dzesii be sukuvi geɖe le wò nyaselawo dome. Aleke gbegbe wòasɔe be nàgbugbɔ asi atrɔ le wò kpɔɖeŋuwo kple wo ŋudɔwɔwɔ ŋu be wòakpe ɖe wo ŋu woakpɔ alesi nyatia ka woƒe agbee nye si!

Nuƒoƒo faa tso susu me ƒe viɖe bubu enye alesi wòʋãa wò ŋutɔ wò susu ƒe dɔwɔwɔe. Ne wò nyaselawo ɖe dzidzɔ alo ŋudzedzekpɔkpɔ fia la, edea dzo wò hã mewò be nète ŋu gakɔa nyawo me geɖe wu alo gbɔa dzi ɖi gbugbɔ tea gbe ɖe nya vevi aɖewo dzi. Ne ède dzesii be nyaselawo megale ɖeke tsɔm le eme tututu o la, àte ŋu awɔ afɔɖeɖe aɖewo atsɔ akpɔ kuxia gbɔe le esi teƒe be nàyi nyaa dzi tẽ anɔ nu ƒom ɖe yame esime ameawo ƒe susu le teƒe bubu.

Ƒo Asa Na Kuxiawo. Ele be nàde dzesii be kuxiwo te ŋu nɔa nuƒoƒo faa tso susu me hã ŋu. Ðekae nye, ate ŋu ana woagbɔ game dzi. Ne ède nyawo eme fũ le nuƒoa ƒoɣi la, ate ŋu aɖu game na wò. Àte ŋu akpɔ esia gbɔ ne èŋlɔ ɣeyiɣi si nàzã ɖe wò nuƒoa ƒe akpa ɖesiaɖe ŋu la ɖe nuƒogbalẽa dzi. Eyome kpɔ egbɔ be nèwɔ ɖe edzi pɛpɛpɛ.

Kuxi bubu, vevietɔ le nuƒola bibiwo gome, enye kakaɖeameɖokui dzi fũ akpa. Esi ame aɖewo bi ɖe nuƒoƒo me ta la, wo dometɔ aɖewo abui be mesesẽ be woafɔ nya aɖewo tso afii kple afimɛ ko atsɔ aƒo nuƒo wòasu na gamea o. Gake ele be ɖokuibɔbɔ kple enyanya be hehenana si me Yehowa ŋutɔ nye Nufiala Gãtɔ le mee míele gome kpɔm le la naʋã mí be míabu dɔdasi ɖesiaɖe ŋu gbedodoɖatɔe ahadzra ɖo nyuie ɖe eŋu.—Yes. 30:20; Rom. 12:6-8.

Ðewohĩ nusi ŋu ame geɖe siwo menye nuƒola bibiwo o tsia dzi ɖo vevie le nuƒoƒo faa tso susu me ŋu enye be yewoava ŋlɔ nya si yewodi be yewoagblɔ la be. Mègana esia ŋu bubu naxe mɔ na wò le ŋgɔyiyi vevi sia wɔwɔ be nàva zu nuƒola nyui me o. Dzra ɖo nyuie, eye nàkpɔ Yehowa sinu na eƒe gbɔgbɔa ƒe kpekpeɖeŋu.—Yoh. 14:26.

Nuƒola bubuwo ɖea mɔ be dzitsitsi fũ akpa ɖe nya si tututu woazã ŋu xea mɔ na wo. Nyateƒee, anɔ eme be womate ŋu azã nya tiatia siwo nya se nyuie kple gbeŋutise si sɔ pɛpɛpɛ le nuƒoƒo faa tso susu me abe alesi woazã woe le nuƒo si me woŋlɔ nya sia nya ɖi le me ene ya o, ke hã dzeɖoɖo ƒe nɔnɔme si me wòanɔ wòanya se nyuie la tsyɔa mɔxenu mawo dzi. Nya siwo gɔmesese le bɔbɔe kple nyagbe siwo le tẽ la ʋãa amewo geɖe wu. Ne èdzra ɖo nyuie la, nyagbɔgblɔ siwo sɔ la ava le wo ɖokui si, menye esi nèlé wo ɖe susu me ta o, ke boŋ esi nèsrɔ̃e se susu veviawo gɔme nyuie tae. Eye ne èƒoa nu wòsɔna nyuie le wò gbesiagbe dzeɖoɖowo me la, nyawo ava susu me na wò le wo ɖokui si ne èɖo nuƒolanɔƒea.

Nuŋlɔɖi si Ƒomevi Nàzã. Ne ɣeyiɣiawo va le yiyim eye nèle mɔnu sia zãm geɖe wu la, àte ŋu anɔ wò nuƒogbalẽa dzi nyawo dzi ɖem kpɔtɔ wòava nye nya ʋɛ aɖewo ko na wò nuƒoa me nya vevi ɖesiaɖe. Nya siawo kple mawunyakpukpui siwo nèɖo be yeazã la katã ate ŋu anɔ agbalẽ ɖeɖee sue aɖe alo pepa ɖeka ko dzi nàte ŋu akpɔ edzinyawo bɔbɔe. Le gbeadzisubɔsubɔdɔa me la, zi geɖe la, àlé nya vevi kpui aɖewo ɖe susu me. Ne èwɔ numekuku le nyati aɖe ŋu na tɔtrɔyi wɔwɔ la, anɔ eme be nuŋlɔɖi kpui ʋɛ aɖewo koe anɔ pepa dzi nàde wò Biblia me. Alo àte ŋu azã nya veviwo tso (“Bible Topics for Discussion”) (Biblia me Dzeɖoɖo Nyatiwo) alo Reasoning From the Scriptures (si ƒe ɖewo le Alesi Nàdze Biblia me Dzeɖoɖowo Gɔme Ahayi Wo Dzii) me na numedzodzroa wɔwɔ.

Gake ne wode dɔ geɖe asi na wò le kpekpea me siwo kplɔ wo nɔewo ɖo le kwasiɖa ʋɛ aɖewo ko me eye ɖewohĩ dutoƒonuƒowo hã kpe ɖe eŋu la, àkpɔe be ahiã be yeaŋlɔ nya geɖe wu ɖi. Nukatae? Be woaɖo ŋku nyatiawo dzi na wò hafi nàva wɔ dɔdasiawo dometɔ ɖesiaɖe. Ke hã ne èva le ŋu ɖom ɖe wò nuŋlɔɖia ŋu akpa na nya sia nya gbɔgblɔ—hele edzi kpɔm ɣesiaɣi kloe le nyagbe ɖesiaɖe gbɔgblɔ me—la, màkpɔ viɖe si tsoa nuƒoƒo faa tso susu me la o. Ne nuŋlɔɖi siwo zãm nèle sɔ gbɔ la, de dzesi nya ʋɛ aɖewo alo mawunyakpukpui vevi siwo dzi nuƒoa nɔ te ɖo be woanya akpɔ na wò bɔbɔe.

Togbɔ be nuƒola bibi ƒe nuƒoa ƒe akpa gãtɔ anye nuƒoƒo faa tso susu me hã la, viɖe anɔ eme ne wode nuƒoƒo mɔnu bubuwo hã eme. Le ŋgɔdonya kple nyataƒonya siwo me nyaselawo ƒe mo kpɔkpɔ kpakple nya sẽŋu siwo wogblɔ nyuie hiã geɖe wu le la, nya ʋɛ siwo wolé ɖe susu me nyuie awɔ dɔ nyuie. Le afisi nyateƒenya aɖewo tututu, nyayɔyɔ aɖewo pɛpɛpɛ, alo mawunyakpukpui aɖe me nyawo hiã koŋ le la, exexlẽ tẽ asɔ eye wòawɔ dɔ geɖe wu.

Ne Wobia tso Mía Si be Míaɖe Nu Me. Ɣeaɖewoɣi woabia tso mía si be míaɖe míaƒe dzixɔsewo me eye mɔnukpɔkpɔ manɔ anyi be míadzra ɖo do ŋgɔ o. Esia ate ŋu adzɔ ne míedo go ame aɖe le gbeadzi si tsi tre ɖe nya aɖe ŋu. Ate ŋu adzɔ ne míele ƒometɔwo, dɔwɔhatiwo, alo sukuhatiwo dome hã. Dziɖuɖumegãwo hã ate ŋu abia numeɖeɖe tso míaƒe dzixɔsewo alo agbenɔnɔ ŋu. Ŋɔŋlɔawo de dzi ƒo na mí be: “Misu te ɖaasi, bene miana ŋuɖoɖo amesiame, si abia nya aɖe mi le mɔkpɔkpɔ, si le mia me la ŋuti; gake miwɔe kple dɔmefafa kpakple [bubu deto].”—Pet. I, 3:15.

De dzesi alesi Petro kple Yohanes ɖo nya ŋui na Yudatɔwo ƒe Sanhedrin lae, abe alesi woŋlɔe ɖe Dɔwɔwɔwo 4:19, 20 ene. Wogblɔ woƒe tenɔnɔ eme kɔ ƒã le nyagbe eve ko me. Wowɔe le mɔ si sɔ na woƒe nyaselawo nu—wofia asii be nya si dze ŋgɔ apostoloawo la dze ŋgɔ ʋɔnudrɔ̃ƒea hã. Emegbe woda alakpa tsɔ tso Stefano nui eye wokplɔe yi ʋɔnudrɔ̃ƒe ma ke. Xlẽ ŋuɖoɖo si wòna si ŋu medzra ɖo le do ŋgɔ o le Dɔwɔwɔwo 7:2-53. Ðoɖo ka nue eƒe nyawo yi ɖo? Egblɔ nyawo ɖe ɖoɖo si nu wodzɔ ɖo le ŋutinya me nu. Le afisi wòsɔ le la, eva nɔ gbe tem ɖe aglãdzegbɔgbɔ si Israel-dukɔa ɖe fia la dzi. Le etaƒoƒo me la, eɖee fia be Sanhedrin la hã ɖe gbɔgbɔ ma ke fia esi wona wowu Mawu ƒe Vi la.

Ne wobia tso asiwò le vome be nàɖe wò dzixɔsewo me la, nukae akpe ɖe ŋuwò be wò ŋuɖoɖowo naɖe kpe? Srɔ̃ Nexemya, amesi do gbe ɖa le susu me hafi ɖo nya ŋu na Fia Artaxsasta. (Nex. 2:4) Eyome ɖe abla nàɖo nyawo ɖe ɖoɖo nu le susu me. Afɔ vevi siwo nàɖe bɔbɔe ate ŋu ayi ale: (1) Tia nya vevi ɖeka alo eve siwo nàzã le numeɖeɖea me (àte ŋu atia nya veviawo le Reasoning From the Scriptures me). (2) Di mawunyakpukpui siwo nàtsɔ aɖo kpe nya vevi mawo dzii. (3) Wɔ ɖoɖo ɖe alesi nàdze numeɖeɖea gɔmee ŋu le aɖaŋudzedze me ale be nyabiala nalɔ̃ be yeaɖo to asee. Emegbe dze nuƒoƒo gɔme.

Àɖo ŋku nusi nàwɔ dzi le hiahiã kpata mawo mea? Yesu gblɔ na eyomedzelawo be: “Migaɖe fu na mia ɖokui be, aleke alo nuka gblɔ ge miala o; elabena le nenem gaƒoƒo ma me la woana nusi ke gblɔ ge miala la mi. Elabena menye miawoe nye amesiwo le nu ƒom o; ke boŋ mia Fofo ƒe [gbɔgbɔ] lae nye amesi le nu ƒom le mia me.” (Mat. 10:19, 20) Mefia be àxɔ “nunya ƒe nya” nukutɔe abe alesi wonae ƒe alafa gbãtɔ me Kristotɔwoe ene ya o. (Kor. I, 12:8) Gake ne èƒoa ɖokuiwò ɖe hehenana si tsoa Yehowa gbɔ na esubɔla siwo le Kristo-hamea me la me ɣesiaɣi la, gbɔgbɔ kɔkɔea ana nàɖo ŋku nya siwo sɔ dzi ɣeyiɣi si wòhiã.—Yes. 50:4.

Ðikeke mele eme o be nuƒoƒo faa tso susu me ate ŋu awɔ dɔ nyuie ŋutɔ. Ne èwɔnɛ edziedzi le wò dɔdasiwo wɔwɔ me le hamea me la, ekema ne eva hiã be nàɖo nya ŋu esime mèdzra ɖo do ŋgɔ o la manye nu sesẽ na wò o, elabena nya vevi ʋɛ aɖewo ko si nàzã la ŋudɔwɔwɔ ma wò. Mègahe ɖe megbe le mɔnu sia zazã me o. Esɔsrɔ̃ be nàƒo nu faa tso susu me akpe ɖe ŋuwò nàwɔ wò gbeadzisubɔsubɔdɔa memie wu. Eye ne mɔnukpɔkpɔa su asiwò be nàƒo nuƒo le hamea me la, anɔ bɔbɔe na wò wu be nàhe nyaselawo ƒe susu ahaɖo woƒe dzi gbɔ.